<<    <     Gulə Tɔnɔ     14     >    >> 
Wǝǝnu tɩlʋ na culǝ tɩn
14
«Abam yɩ á Tu Baŋa-Wɛ nɔɔna mʋ. Kʋntʋ tɩn á na lagɩ a keeri twa, yɩ gwɩ-na á yɩra yam, nan yɩ ceeri-na á yum tɩ trǝ seeni. 2 Abam sɩɩnɩ á yɩ á Tu Baŋa-Wɛ nyɩm mʋ. Lʋgʋ baŋa nɔɔna maama wʋnɩ mʋ DƖ kuri abam sɩ á taá yɩ DƖ tɩtɩ nɔɔna DƖ yi na su tɩn.a
Wǝǝnu tɩlʋ na maŋɩ dɩ dim tɩnb
3 Yɩ zaŋɩ-na á di wo-yɔɔrʋ tɩlʋ Baŋa-Wɛ na culi tɩ dim tɩn. 4 Á waɩ á di vara bantʋ dwi:
Naa, naa piə, naa bʋŋʋ, 5 naa wəŋə, naa fərə, naa sigə, naa tɔgɔ, naa namboro, naa tababʋra.
6 Á ta waɩ á di varɩm wʋlʋ maama napɔɔna na lɔgɩ bɩle yɩ ba yǝni ba dʋnɩ gaa ba guli ba joori ba dʋnɩ tɩn. 7 Kʋ nan daɩ sɩ á di yogondi, naa zooni, naa pa-nyaanɩ, sɩ vara bam kʋntʋ dʋnɩ gaa ba guli yɩ ba napɔɔna laan wʋ lɔgɩ bɩle. Kʋntʋ ŋwaanɩ bantʋ wʋ maŋɩ sɩ á di-ba. 8 Tǝrǝ dɩ nan wʋ maŋɩ sɩ á di-ba. Ya napɔɔna lɔgɩ bɩle yɩ ba laan ba dʋnɩ gaa ba gulə ba joori ba dʋna. Kʋntʋ ŋwaanɩ kʋ culǝ sɩ á di ba nwana. Ba na tɩga, brɩ á yɩ dwe-ba.
9 Kʋ nan na yɩ wǝǝnu tɩlʋ na zʋʋrɩ na wʋnɩ tɩn, á waɩ á di kale sɩlʋ na jɩgɩ nabili-pɩlwarʋ yɩ sɩ ta jɩgɩ pʋrʋ pa sɩ kwǝli sɩ yɩra tɩn. 10 Kʋ daarɩ kʋ na yɩ woŋo maama na wʋ na wʋnɩ yɩ kʋ ba jɩgɩ nabili-pɩlwarʋ dɩdaanɩ pʋrʋ na kwǝli-kʋ tɩn, kʋ culǝ sɩ á di-kʋ. Kʋ wʋ maŋɩ dɩ dim.
11 Á waɩ á di zunə balʋ maama na maŋɩ dɩ dim tɩn. 12 Kʋ daarɩ á ba maŋɩ sɩ á di zunə bantʋ dwi:
Maarʋ, dɩ duurə dwi maama, 13 dɩ ciləciiru, dɩ kalwəənu dwi maama, 14 dɩ bacangaarʋ dwi maama, 15-17 dɩ kukwəəru dwi maama, dɩ lɩnlanɩ, dɩ nɩnɩʋ zunə, dɩ kawuli dwi maama, dɩ nakɩlakwarʋ, dɩ bugə-ceeni, 18 dɩ bugə ni zunə, dɩ tintəli, dɩ pɛbiə, dɩ jɩnjwaanʋ.
19 Wo-kʋrrʋ tɩlʋ na jɩgɩ vwana yɩ tɩ kaagɩ tɩ ve tɩga nɩ tɩn dɩ culǝ. Á ba maŋɩ sɩ á di-tɩ. 20 Á za waɩ á di wo-kʋrrʋ tɩlʋ na maŋɩ dɩ dim tɩn.c
21 Yɩ zaŋɩ-na á di varɩm wʋlʋ na tɩga o tɩtɩ nɩ tɩn. Á waɩ á kwe á pa vərə balʋ na zʋʋrɩ abam tɩʋ kʋm nɩ tɩn sɩ ba di, naa á kwe á yəgi á pa zʋra. Abam Tu Baŋa-Wɛ dɩm kuri abam sɩ á taá yɩ DƖ tɩtɩ nɔɔna mʋ.
Nɔɔn-nɔɔnʋ yɩ kwe bʋbala dɩ ka nu nayɩla o saŋɩ mim wʋnɩ.
Wɛ-təri pɛɛra
22 Bɩnɩ maama wʋnɩ taá ye-na sɩ á lɩ á karɩ sɩm wʋdiiru pʋpwara dɩdʋa fugə maama wʋnɩ á pa Wɛ.d 23 Laan ja-na Wɛ-təri wʋdiiru tɩm kʋntʋ á ja vu jǝgǝ kalʋ Baŋa-Wɛ na wʋ́ kuri sɩ nɔɔna taa zuli DƖ yɩrɩ da tɩn. Kʋ na yɩ á mɩna yam, dɩ á dɩvɛn bam, dɩ á nugə kam, dɩ á vara bam na dɛ yigə ba lʋ biə balʋ tɩn, sɩ á vu á di Wɛ-təri dɩm á Tu Baŋa-Wɛ yigə nɩ, sɩ á taá kwarɩ-DƖ maŋa maama. 24 Baŋa-Wɛ nan na yɔɔrɩ DƖ kɩ zaanɩ abam yuu nɩ pa á na wʋdiiru zanzan, yɩ DƖ wara je sɩm na yɩ yigə yigə ka pa abam sɩ á ja á wʋdiiru tɩm á yi da, sɩ á kɩ tɩntʋ: 25 Kwe-na á Wɛ-təri wʋdiiru tɩm á yəgi á joŋi səbu, sɩ á daarɩ á ja səbu kʋm á vu Baŋa-Wɛ zulə jǝgǝ kam. 26 Á na yi da, sɩ á laan ma á yəgi kʋlʋ maama á na lagɩ tɩn sɩ á di. Kʋ na yɩ naanɩ, naa peeni, naa sana, abam dɩ á sɔŋɔ tiinə bam wʋ́ di-tɩ á Tu Baŋa-Wɛ dɩm yigə nɩ dɩ wʋpolo.
27 Za taá ye-na sɩ á yɩ swe-na Levi dwi tiinə balʋ na zʋʋrɩ abam tee nɩ tɩn ni nɩ, bantʋ na ba jɩgɩ ba tɩtɩ tɩga sɩ ba taa te tɩn ŋwaanɩ. 28 Bɩna yatɔ bɩnɩ dɩm maama na yǝni dɩ yi, sɩ á kwe-na Wɛ-təri wʋdiiru tɩm maama á la-tɩ jǝgǝ dɩdʋa á tɩʋ maama wʋnɩ. 29 Wʋdiiru tɩm kʋntʋ wʋ́ taa yɩ Levi dwi tiinə bam nyɩm mʋ, bantʋ na ba jɩgɩ ba tɩtɩ tɩga tɩn ŋwaanɩ. Abam ta maŋɩ sɩ á kwe-tɩ á pa vərə, dɩ bɩtara, dɩ kadənə balʋ na zʋʋrɩ abam wʋnɩ tɩn mʋ. Ba maama wʋ́ wanɩ ba ba ba joŋi wʋdiu ba di ba su. Kɩ-na kʋntʋ sɩ kʋ pa á Tu Baŋa-Wɛ zaanɩ taa wʋ á baŋa nɩ dɩ kʋlʋ maama á na lagɩ á tʋŋɩ tɩn.»