Jɩna cɛɛm taanɩ
15
«Bɩna yarpɛ bɩnɩ dɩm maama na yǝni dɩ yi, sɩ á kwe-na balʋ na jɩgɩ á jɩna tɩn á yagɩ á cɛ-ba. 2 Á na wʋ́ kɩ te tɩn mʋ tɩntʋ: Wʋlʋ maama na kwe səbu o jɩnɩ o pa o doŋ Yisɩrayɛlɩ tu tɩn maŋɩ sɩ o yagɩ jɩnɩ dɩm o ma cɛ-o mʋ. Kʋ tu daa yɩ bʋŋɩ sɩ o joŋi o səbu kʋm o cʋrʋ kʋm tee nɩ, Baŋa-Wɛ na brɩ nɩ kʋ yɩ jɩna saarɩm bɩnɩ tɩn ŋwaanɩ. 3 Kʋ na yɩ vəru, n waɩ n joŋi n jɩnɩ dɩm o tee nɩ. Kʋ daarɩ kʋ na yɩ n tɩtɩ nɔɔna bam jɩna yam mʋ, sɩ n yagɩ n cɛ-ba.4 Abam Tu Baŋa-Wɛ dɩm wʋ́ kɩ abam yu-yoŋo pa á na ywəəni tɩga kalʋ DƖ na lagɩ DƖ pa abam sɩ á taá te tɩn wʋnɩ. Kʋntʋ ŋwaanɩ, yinigə bá ja abam dɩdʋa tɩtɩ dɩ, 5 nɩ á na sɛ DƖ ni yɩ á tʋŋɩ á tɔgɩ zaasɩm dɩlʋ maama amʋ na brɩ abam zɩm tɩntʋ tɩn. 6 Cɩga tɩn, Baŋa-Wɛ wʋ́ kɩ abam yu-yoŋo nɩ DƖ na goni ni sɩ DƖ kɩ te tɩn. Kʋntʋ tɩn, á wʋ taá jɩna á paɩ dwi-gɛ tiinə zanzan yɩ á ba maŋɩ sɩ á di jɩna ba tee nɩ. Á wʋ́ taá jɩgɩ dam dwi-gɛ tiinə baŋa nɩ. Tɩʋ kʋdoŋ nan bá di dam abam baŋa nɩ.
7 Á na zʋ tɩga kalʋ á Tu Baŋa-Wɛ dɩm na lagɩ DƖ pa abam tɩn, yɩ yinigə na jaanɩ á doŋ Yisɩrayɛlɩ tu wʋlʋ na zʋʋrɩ á tɩʋ wʋnɩ tɩn, yɩ vɩ-na sɩ á zən‑o, á na jɩgɩ wo-cɛɔ tɩn ŋwaanɩ. 8 Á nan maŋɩ sɩ á kɩ wʋ-yoŋo mʋ dɩd-o sɩ á jɩnɩ te maama o na wʋ́ taa laga sɩ o ma ji nɔɔnʋ tɩn.a 9 Ta n ye sɩ n yɩ pa wʋbʋbʋŋ-lɔŋɔ ba n kana nɩ yɩ n ta nɩnɛɛnɩ: ‹Bɩna yarpɛ bɩnɩ dɩm na yɩ jɩna saarɩm bɩnɩ tɩn bwələ.› Nmʋ na bʋŋɩ kʋntʋ doŋ yɩ n vɩn sɩ n jɩnɩ n pa n doŋ Yisɩrayɛlɩ tu wʋlʋ yinigə na jaan‑o tɩn, kʋ yɩ pu-sɩŋa kǝm mʋ n kɩa. Nɔɔnʋ wʋm wʋ́ wanɩ o keeri o loori Baŋa-Wɛ nmʋ ŋwaanɩ, yɩ Wɛ wʋ́ pa n tʋ dɩ n bʋra. 10 N maŋɩ sɩ n pa yinigə tu zaanɩ mʋ sɩ n yɩ kɩ wo-cɛɔ dɩd-o. N Tu Baŋa-Wɛ dɩm laan wʋ́ kɩ nmʋ yu-yoŋo pa kʋlʋ maama n na jɩgɩ n tʋŋɩ tɩn kɩ lanyɩranɩ kʋ pa‑m. 11 Maŋa maama yinigə na jaanɩ balʋ tɩn wʋ́ taa wʋ abam wʋnɩ. Kʋntʋ tɩn amʋ pɛ abam ni sɩ á kɩ wʋ-yoŋo á pa Yisɩrayɛlɩ tiinə balʋ cam na jɩgɩ-ba tɩn.
Bɩna yarpɛ yarpɛ bɩnɩ dɩm taanɩ
12 Ebru tu na kwe o tɩtɩ o yəgi o pa nmʋ sɩ o taa yɩ n gambaa, o na yɩ baarʋ naa kaanɩ, kʋ tu wʋ́ tʋŋɩ o pa‑m bɩna yardʋ mʋ. Bɩna yarpɛ bɩnɩ dɩm na yiǝ, sɩ n yag-o sɩ o taa te o tɩtɩ. 13 N nan na yag-o, yɩ pa o viiri dɩ jɩ-kʋrɩ. 14 Poli n wʋʋ sɩ n lɩ kʋlʋ maama n na jɩgɩ tɩn wʋnɩ n pa‑o, kʋ na maŋɩ kʋ yɩ n vara bam wʋnɩ, dɩ n wʋdiiru tɩm wʋnɩ, dɩ n sana bam wʋnɩ. Nmʋ Tu Baŋa-Wɛ na kɩ zaanɩ n yuu nɩ DƖ pa‑m wǝǝnu tɩlʋ tɩn, sɩ nmʋ dɩ kɩ n gambaa kam lanyɩranɩ kʋntʋ doŋ. 15 Guli-na nɩ abam dɩ dɛɛn yɩ gambɛ mʋ Ezipi nɩ, yɩ á Tu Baŋa-Wɛ dɩm laan ba DƖ joŋi abam DƖ yagɩ. Kʋntʋ ŋwaanɩ a zɩm tagɩ Wɛ ni dɩm kʋntʋ a brɩ abam.
16 N gambaa kam nan wʋ́ wanɩ o ta dɩ nmʋ nɩ o ba lagɩ sɩ o viiri, o na soe nmʋ dɩ n sɔŋɔ tiinə bam yɩ n kɩ-o lanyɩranɩ tɩn ŋwaanɩ. 17 O na tagɩ kʋntʋ doŋ, kʋ maŋɩ sɩ n ja-o mʋ n vu n pa o salɩ manco-pɩɩna boro kʋm, sɩ n daarɩ n kwe lwe n puri o zwɛ dɩdʋa. Kʋntʋ brɩ nɩ oó taa yɩ nmʋ gambaa sɩ kʋ taa nii o tʋʋnɩ. N gambaa kam na yɩ kaanɩ, sɩ n kɩ-o dɩ kʋntʋ doŋ.
18 Nmʋ na yagɩ n gambaa sɩ o viiri, sɩ n yɩ pa kʋ taa yɩ wo-cɛɔ kʋ pa‑m. Bɛŋwaanɩ o tʋŋɩ o pa‑m bɩna yardʋ mʋ yɩ o tɩtʋŋa yam daga ya dwe wʋlʋ na tʋŋɩ o pa‑m ŋwɩɩrʋ ŋwaanɩ tɩn tɩtʋŋa kuni bɩle. N Tu Baŋa-Wɛ dɩm laan wʋ́ kɩ nmʋ yu-yoŋo pa kʋlʋ maama n na jɩgɩ n tʋŋɩ tɩn kɩ lanyɩranɩ kʋ pa‑m.
Sɔŋɔ vara bu-kwɩn sɩm
19 Lɩ-na wo-balɩ sɩlʋ á vara bam na dɛ yigə ba lʋ tɩn sɩ á kwe á pa á Tu Baŋa-Wɛ dɩm. Yɩ ma-na naanɩ dɩm kʋntʋ á tʋŋɩ tɩtʋŋɩ, nan yɩ fanɩ á peeni sɩm kʋntʋ kʋrʋ. 20 Bɩnɩ maama wʋnɩ abam dɩ á sɔŋɔ tiinə bam maŋɩ sɩ á vu jǝgǝ kalʋ Baŋa-Wɛ na wʋ́ kuri tɩn yɩ á di wǝǝnu tɩm kʋntʋ DƖ yigə nɩ. 21 Varɩm wʋlʋ nan na jɩgɩ gɛɛrɩ o yɩra nɩ, nɩ o na yɩ varɩ-gwana, naa varɩ-lilwe, naa o jɩgɩ tusim dwi dɩlʋ, kʋ wʋ maŋɩ sɩ á kwe wʋntʋ dwi á ma á kɩ kaanɩm á pa Baŋa-Wɛ. 22 Á nan maŋɩ sɩ á kwe vara bam kʋntʋ doŋ á di á sam nɩ mʋ. Kʋ nyɩ dɩ á na lagɩ á di wəŋə naa fərə yɩ nɔɔna maama jɩgɩ cwǝŋǝ sɩ ba di, ba na maŋɩ ba kwɛ ba tɩtɩ Wɛ ŋwaanɩ naa ba wʋ kwɛ ba tɩtɩ mʋ dɩ. 23 Kʋ nan culǝ sɩ á di vara bam jana. Pa-na sɩ jana bam lo tɩga nɩ, nɩ á na wʋ́ lo na á yagɩ te tɩn.»