Pakɩ candiə kam
16
«Bɩnɩ maama Abibi cana kam nɩ, á maŋɩ sɩ á di Pakɩ candiə kam á ma á zuli á Tu Baŋa-Wɛ dɩm, bɛŋwaanɩ kantʋ cana kam dɛ dɩdʋa nɩ mʋ DƖ jaanɩ abam tɩtɩɩ nɩ DƖ ja nuŋi Ezipi tɩʋ nɩ. 2 Á na lagɩ á di Pakɩ candiə kam, ve-na jǝgǝ kalʋ á Tu Baŋa-Wɛ dɩm na wʋ́ kuri sɩ nɔɔna taa zuli DƖ yɩrɩ da tɩn á ja varɩm wʋlʋ á na lɩ á naanɩ dɩm wʋnɩ naa á peeni sɩm naa bʋnɩ dɩm wʋnɩ tɩn á gʋ á ma kɩ kaanɩm á pa‑DƖ. 3 Á na jǝni á di varɩm wʋm nwana yam, sɩ á yɩ di dɩpɛ dɩlʋ na jɩgɩ dabɩlɩ tɩn. Da yarpɛ wʋnɩ á maŋɩ sɩ á di dɩpɛ dɩlʋ dabɩlɩ na wʋ wǝli kʋ wʋnɩ tɩn nɩnɛɛnɩ á dɛɛn na kɩ te yɩ á lagɩ lɩla sɩ á nuŋi Ezipi nɩ á ya na yaarɩ da tɩn. Á na yǝni á di yaara dɩpɛ dɩm kʋntʋ doŋ, á wʋ́ guli dɛ dɩlʋ á na zaŋɩ á nuŋi Ezipi nɩ tɩn gulə. 4 Da yarpɛ yam maama wʋnɩ, nɔɔn-nɔɔnʋ ba maŋɩ sɩ dabɩlɩ ta wʋ o sɔŋɔ nɩ. Varɩm wʋlʋ á na wʋ́ gʋ candiə kam pulim dɛ dɩm dɩdaan-ni nɩ tɩn, á maŋɩ sɩ á di o nwana yam maama mʋ sɩ tɩga laan pʋʋrɩ. 5 Abam na wʋ tɩʋ kʋlʋ maama nɩ á Tu Baŋa-Wɛ na lagɩ DƖ pa abam tɩn, sɩ á yɩ gʋ Pakɩ vara bam je dɩ je, 6 kʋ na daɩ jǝgǝ kalʋ DƖ na wʋ́ kuri sɩ nɔɔna taa zuli DƖ yɩrɩ da tɩn yɩranɩ. Wa-zʋʋrɩ maŋa nɩ mʋ á wʋ́ gʋ vara bam sɩ kʋ maŋɩ dɩ maŋa kalʋ á na yagɩ Ezipi tɩn. 7 Saŋɩ-na nwana yam á di Wɛ jǝgǝ kam nɩ, sɩ tɩga na pʋʋrɩ, á laan zaŋɩ á joori á vwə nɩ. 8 Da yardʋ yalʋ na saŋɩ tɩn wʋnɩ, á wʋ́ di dɩpɛ dɩlʋ na ba jɩgɩ dabɩlɩ dɩ wʋnɩ tɩn mʋ, sɩ da yarpɛ dɛ dɩm na yiǝ, á la daanɩ sɩ á kɔgɔ kʋm maama zuli á Tu Baŋa-Wɛ dɩm. Á ba maŋɩ sɩ á tʋŋɩ dɛ dɩm kʋntʋ nɩ.Faa wo-vallʋ candiə kam
9 Á na puli sɩ á zagɩ á wʋdiiru tɩm, jeeli-na da yarpɛ yarpɛ kuni bɩrpɛ, 10 sɩ á laan di Faa wo-vallʋ candiə kama á ma á zuli á Tu Baŋa-Wɛ dɩm. Kwe-na á wʋ-yoŋo pɛɛra sɩ kʋ maŋɩ dɩ Baŋa-Wɛ na kɩ yu-yoŋo á baŋa nɩ te tɩn á ja vu á zuli‑DƖ. 11 Á maŋɩ sɩ á vu jǝgǝ kalʋ á Tu Baŋa-Wɛ dɩm na wʋ́ kuri sɩ nɔɔna taa zuli DƖ yɩrɩ da tɩn á di candiə kam dɩ wʋpolo DƖ yigə nɩ. Kʋʋ́ taa yɩ abam, dɩ á biə, dɩ á gambɛ, kʋ wǝli dɩ Levi tiinə, dɩ vərə, dɩ bɩtara, dɩ kadənə balʋ maama na zʋʋrɩ á tɩtarɩ nɩ tɩn mʋ. 12 Guli-na nɩ á dɛɛn yɩ gambɛ mʋ Ezipi nɩ, sɩ á kɩ á yuu nɩ sɩ á sɛ Wɛ niə yantʋ maama.
Vwə cwiim candiə kamb
13 Á na frɩ á wʋdiiru tɩm maama á ti, yɩ á ta kwǝri á kan á vinyə tiu biə bam maama á ti, á laan maŋɩ sɩ á kɩ da yarpɛ á di Vwə cwiim candiə kam mʋ. 14 Tɔgɩ-na dɩ á biə, dɩ á gambɛ, kʋ wǝli dɩ Levi tiinə, dɩ vərə, dɩ bɩtara, dɩ kadənə balʋ maama na zʋʋrɩ á tɩɩnɩ dɩm nɩ tɩn, á di candiə kam dɩ wʋpolo. 15 Á wʋ́ vu jǝgǝ kalʋ á Tu Baŋa-Wɛ dɩm na wʋ́ kuri tɩn á kɩ da yarpɛ á di candiə kam á ma á zuli‑DƖ. Á wʋ́ taá jɩgɩ wʋpolo lanyɩranɩ, Baŋa-Wɛ na kɩ yu-yoŋo á baŋa nɩ dɩ á wʋdiiru dɩ kʋlʋ maama á na tʋŋɩ tɩn ŋwaanɩ.
16 Bɩnɩ maama wʋnɩ kuni bɩtɔ mʋ á baara bam maŋɩ sɩ ba vu jǝgǝ kalʋ á Tu Baŋa-Wɛ dɩm na wʋ́ kuri tɩn ba jeeri DƖ yigə nɩ ba zuli‑DƖ. Kʋʋ́ taa yɩ Dɩpɛ dɩlʋ na ba jɩgɩ dabɩlɩ dɩ wʋnɩ tɩn candiə kam,c dɩ Faa wo-vallʋ candiə kam, dɩ Vwə cwiim candiə kam mʋ. Nɔɔnʋ maama nan maŋɩ sɩ o taa ze pɛɛrɩ mʋ o ja vu o ma zuli Baŋa-Wɛ. 17 Nɔɔnʋ maama wʋ́ kwe pɛɛrɩ sɩ kʋ maŋɩ dɩ Baŋa-Wɛ na kɩ yu-yoŋo o baŋa nɩ DƖ zən‑o te tɩn mʋ o ja jeeri.
Ba tiŋi sarɩya-dirə
18 Tɩʋ kʋlʋ maama á Tu Baŋa-Wɛ na lagɩ DƖ pa abam tɩn wʋnɩ, kuri-na nakwa dɩ yigǝ tiinǝ sɩ ba wanɩ ba tɔgɩ cɩga ba di nɔɔna taanɩ. 19 Nmʋ nan na di nɔɔnʋ taanɩ, n daɩ sɩ n zɩgɩ vwan wʋnɩ, naa n pu nɔɔn-nɔɔnʋ kwaga n bʋra bʋrɩm nɩ. Kʋ daɩ sɩ n joŋi dim, bɛŋwaanɩ pɛɛra waɩ ya dwe nɔn-ŋʋna tɩtɩ yiǝ yɩ ya kwɩɩlɩ cɩga taanɩ ya pa dɩ ji vwan.d 20 Yɔɔrɩ-na á tɔgɩ cɩga sarɩya lanyɩranɩ sɩ kʋ pa á wanɩ á zʋ tɩga kalʋ á Tu Baŋa-Wɛ dɩm na lagɩ DƖ pa abam tɩn wʋnɩ á daanɩ.