17
Yɩ kwe-na varɩm wʋlʋ na jɩgɩ gɛɛrɩ naa tusim o yɩra nɩ tɩn á ma á kaanɩ á pa á Tu Baŋa-Wɛ dɩm, sɩ DƖ culi kʋntʋ.
2 Abam na tu á ba á zʋʋrɩ je sɩlʋ Baŋa-Wɛ na lagɩ DƖ pa abam tɩn nɩ, dɛdoŋ á wʋ́ na nɩ baarʋ naa kaanɩ zaŋɩ o kɩ lwarɩm á Tu Baŋa-Wɛ dɩm yigə nɩ yɩ o lɔ Wɛ ni-gonim dɩm kwaga nɩ. 3 Wʋntʋ na cɔgɩ Wɛ niə yam te tɩn yɩ nɩnɛɛnɩ o na kuni donnǝ o zuli jwǝnǝ naa o zuli wɩa kam, naa cana kam, naa calɩcwɩ sɩm. 4 Sawɩa kantʋ doŋ na tʋ á zwa nɩ, á maŋɩ sɩ á tɔgɩ ka nɛ sɩ á lwarɩ cɩga kam. Nɔɔnʋ wʋm nan na sɩɩnɩ o tʋŋɩ wo-lɔŋɔ kʋm kʋntʋ Yisɩrayɛlɩ tɩʋ kʋm nɩ, 5 sɩ á ja kʋntʋ tu á nuŋi á vu tɩʋ kʋm dáa nɩ á dʋl-o dɩ kandwa á gʋ. 6 Kʋ nan maŋɩ sɩ nɔɔna bale naa batɔ mʋ pa maana yɩ ya lɔ o kwaga nɩ sɩ ba laan gʋ-o. O ba maŋɩ sɩ o tɩ nɔɔnʋ dɩdʋa yɩranɩ maana baŋa nɩ. 7 Maana-para bam mʋ maŋɩ sɩ ba da yigə ba dʋlɩ kandwa sɩ nɔɔna bam maama pu ba kwaga ba dʋlɩ kʋ tu. Kantʋ cwǝŋǝ kam mʋ á wʋ́ tɔgɩ á ma á saarɩ lwarɩm dɩm kʋntʋ abam tɩtarɩ nɩ.
Taana yalʋ na dana ya dwe tɩn taanɩ
8 Nɔɔna na jɩgɩ taana yɩ ya camma ya dwe á yigǝ tiinǝ bam sɩ ba bʋrɩ bʋra, sɩ á kwe taana yam kʋntʋ doŋ á ja á vu jǝgǝ kalʋ á Tu Baŋa-Wɛ dɩm na wʋ́ kuri sɩ nɔɔna zuli‑DƖ da tɩn.a Nɩ kʋ na yɩ nɔn-gʋra taanɩ, naa zʋnnɩ kǝm taanɩ, naa jɩjɩgɩrʋ maŋɩm taanɩ, yɩ á warɩ sɩ á pɔɔrɩ cɩga kam, 9 kʋ maŋɩ sɩ á vu á guli taanɩ dɩm á brɩ Levi dwi tiinə balʋ na yɩ Wɛ kaanɩm tiinə tɩn, dɩ wʋlʋ na nii taana yam baŋa nɩ da yam kʋntʋ nɩ tɩn, sɩ bantʋ wʋ́ bʋrɩ cɩga bʋra ba pa abam. 10 Ba na guri taanɩ dɩm Baŋa-Wɛ zulə jǝgǝ kam nɩ yɩ ba ta sɩ á kɩ kʋlʋ maama, sɩ á fɔgɩ á kɩ-kʋ. 11 Sɛ-na ba bʋra bʋrɩm dɩm á daarɩ á tɔgɩ ba na wʋ́ brɩ abam ni dɩlʋ sɩ á kɩ tɩn maama, sɩ á yɩ tusi dɩ fɩnfɩɩn dɩ. 12 Wʋlʋ maama nan na zǝŋi o tɩtɩ yɩ o vɩn wʋlʋ na di taanɩ dɩm tɩn ni, naa o vɩn Wɛ kaanɩm tu wʋlʋ na tʋŋɩ o pa Baŋa-Wɛ tɩn ni, kʋ tu maŋɩ sɩ o tɩ mʋ. Kantʋ cwǝŋǝ kam mʋ á wʋ́ tɔgɩ á ma á saarɩ lwarɩm dɩm kʋntʋ Yisɩrayɛlɩ tɩʋ kʋm nɩ. 13 Kʋ kwaga nɩ Yisɩrayɛlɩ tiinə bam maama na ni kʋlʋ na kɩ tɩn, fʋʋnɩ wʋ́ ja-ba, pa ba daa yɩ zǝŋi ba tɩtɩ ba vɩn bʋra bʋrɩm.
Yisɩrayɛlɩ tiinə bam Pɛ
14 Abam na tu á zʋ tɩga kalʋ á Tu Baŋa-Wɛ dɩm na lagɩ DƖ pa abam tɩn, á laan wʋ́ bʋŋɩ sɩ á tiŋi pɛ o taa te abam, nɩnɛɛnɩ tɩɩnɩ dɩlʋ na gilimi abam tɩn na jɩgɩ pwa te tɩn.b 15 Nan tiŋi-na wʋlʋ yɩranɩ á Tu Baŋa-Wɛ wʋm na wʋ́ kuri tɩn sɩ o ji á pɛ. O maŋɩ sɩ o taa yɩ abam tɩtɩ dwi tu mʋ. Yɩ zaŋɩ á tiŋi-na vəru sɩ o ji á pɛ. 16 Pɛ wʋm ba maŋɩ sɩ o siseŋ-nɔɔna tiini sɩ puli sɩ gaalɩ. O nan ba maŋɩ sɩ o tʋŋɩ nɔɔna sɩ ba vu Ezipi ba yəgi siseŋ-nɔɔna ba pa‑o, bɛŋwaanɩ Baŋa-Wɛ pɛ abam ni nɩ: á daa yɩ joori á vu dáanɩ. 17 Pɛ wʋm ba maŋɩ sɩ o taa jɩgɩ kaana zanzan, bantʋ na waɩ ba paɩ o lɔ Wɛ kwaga nɩ tɩn ŋwaanɩ. O nan ba maŋɩ sɩ o tiini o beeri duuni o pa o tɩtɩ.c
18 O na puli sɩ o di paarɩ, kʋ maŋɩ sɩ o vu Wɛ kaanɩm tiinə bam te mʋ o beeri Wɛ niə yam sɩ ba lwǝni ya donnǝ ba tiŋi tɔnɔ wʋnɩ ba pa‑o.d 19 O ta na ŋwɩ: tɔnɔ kʋm wʋ́ taa wʋ o tee nɩ sɩ o taa waɩ o karɩmɩ Wɛ niə yam kʋntʋ dɛ maama. Kʋntʋ wʋ́ pa o taa kwarɩ Baŋa-Wɛ yɩ o daarɩ o tʋŋɩ o tɔgɩ Wɛ niə yam dɩ DƖ cullu tɩm maama. 20 Kʋ ta wʋ́ cɩ pɛ wʋm sɩ o yɩ zǝŋi o tɩtɩ nɩ o garɩ o cʋrrʋ tɩm, sɩ o yɩ ywəri Wɛ niə cwǝŋǝ kam wʋnɩ o vu jazɩm naa jagwiə seeni. Kʋ na kɩ kʋntʋ, o paarɩ dɩm wʋ́ daanɩ, yɩ o dwi dɩm dɩ wʋ́ taa jɩgɩ paarɩ Yisɩrayɛlɩ tɩʋ kʋm wʋnɩ ba di.»