Levi dwi tiinə
18
«Wɛ kaanɩm tiinə bam dɩ Levi dwi tiinə bam maama ba maŋɩ sɩ ba joŋi ba nyɩm tɩga kam pɔɔrɩm baŋa nɩ, nɩ ba donnǝ Yisɩrayɛlɩ tiinə bam na wʋ́ na te tɩn. Ba nan wʋ́ na cwǝŋǝ sɩ ba joŋi ba tǝri pɛɛra yalʋ nɔɔna na kaanɩ ba pa Baŋa-Wɛ tɩn wʋnɩ, nɩnɛɛnɩ kʋ na maŋɩ sɩ ba joŋi tɩn. 2 Ba ba maŋɩ sɩ ba taa te ba tɩtɩ tɩga, nɩ ba cʋrrʋ tɩm na nɛ te tɩn. Baŋa-Wɛ tɩtɩ mʋ yɩ ba nyɩma, nɩnɛɛnɩ DƖ na goni ni dɩ ba te tɩn.b3 Nɔɔnʋ na tu o kaanɩ naa naa piə o pa Wɛ, kaanɩm tiinə bam jɩgɩ cwǝŋǝ sɩ ba lɩ vɔŋɔ, dɩ pɩyaa, dɩ pugə ba pa ba tɩtɩ. 4 Kʋ ta na yɩ Wɛ pɛɛra yalʋ na yɩ mɩna, dɩ dɩvɛn, dɩ nugə, dɩ peeni kʋrʋ, yɩ tɩ loori yigə tɩ kɩ tɩn, wǝǝnu tɩntʋ dɩ wʋ́ taa yɩ Wɛ kaanɩm tiinə nyɩm mʋ. 5 Bɛŋwaanɩ, abam Tu Baŋa-Wɛ dɩm pɔɔrɩ Levi dwi dɩm Yisɩrayɛlɩ dwiə yam maama wʋnɩ sɩ bantʋ dɩ ba biə taa tʋŋɩ ba pa‑DƖ DƖ jero-vwe dɩm nɩ, sɩ kʋ taa ve wuu.
6 Levi tu na bʋŋɩ sɩ o nuŋi á tɩʋ kʋlʋ maama o na zʋʋrɩ tɩn nɩ sɩ o vu jǝgǝ kalʋ Baŋa-Wɛ na wʋ́ kuri tɩn, o jɩgɩ cwǝŋǝ sɩ o kɩ kʋntʋ, 7 sɩ o vu o tʋŋɩ o pa o Tu Baŋa-Wɛ dɩm nɩ o donnǝ Levi tiinə bam dɩ na tʋŋɩ ba pa‑DƖ te tɩn. 8 Wʋntʋ dɩ jɩgɩ cwǝŋǝ sɩ o taa joŋi o wʋdiu sɩ kʋ taa maɩ dɩ babam bam na joŋi te tɩn mʋ, dɩ o na maŋɩ o joŋi kʋlʋ o ko jɩjɩgɩrʋ tɩm baŋa nɩ dɩ.
Wo-zɔɔna kikiə
9 Á na tu á zʋ á Tu Baŋa-Wɛ dɩm na lagɩ DƖ pa abam tɩga kalʋ tɩn wʋnɩ, sɩ á yɩ lwǝni tɩtʋŋ-zɔɔna yalʋ dwi-gɛ tiinə balʋ na zʋʋrɩ da yɩ ba tʋŋɩ tɩn. 10-11 Kʋ culǝ sɩ abam wʋlʋ zwɛ o bu mim wʋnɩ o ma kɩ kaanɩm. Kʋ ta culǝ sɩ yi-nara, dɩ vʋra, dɩ cɩra, dɩ liri mwaanʋ tiinə taa wʋ abam tɩtarɩ nɩ ba tʋŋɩ ba tɩtʋŋa. Baŋa-Wɛ culi balʋ na dʋlɩ səbu-pwənə ba ma beeri ba nii ba yigə tɩn dɩ, dɩdaanɩ ciciri vʋra maama.c 12 DƖ culi balʋ maama na tʋŋɩ kəm-balwaarʋ yam kʋntʋ doŋ tɩn. Kʋ maa yɩ kʋntʋ ŋwaanɩ mʋ DƖ lagɩ DƖ da á yigə DƖ zəli dwi-gɛ tiinə bam sɩ abam wanɩ á zʋ da. 13 Abam nan maŋɩ sɩ á yɔɔrɩ á tɔgɩ á Tu Baŋa-Wɛ dɩm cwe sɩm, sɩ á yɩ tusi dɩ fɩnfɩɩn dɩ.
Baŋa-Wɛ nijoŋnu
14 Dwi-gɛ tiinə balʋ á na wʋ́ zəli tɩn yǝni ba cəgi vʋra dɩ yi-nara vɩɩra yam mʋ. Abam Tu Baŋa-Wɛ dɩm nan wʋ pɛ abam pwələ sɩ á kɩ kʋntʋ. 15 DƖ za wʋ́ tʋŋɩ DƖ nijoŋnu á tee nɩ, nɩ amʋ na yɩ te tɩn. Wʋntʋ wʋ́ nuŋi abam tɩtɩ dwi dɩm wʋnɩ mʋ. Nan cəgi-na o taanɩ dɩm.d
16 Abam dɛɛn na gilimi daanɩ Sinayi piu kʋm təŋə nɩ dɛ dɩlʋ tɩn, á loori á wɩ: á daa ba lagɩ sɩ á ni Baŋa-Wɛ kwǝrǝ kam vɩkkɩ, á nan ba lagɩ sɩ á na Wɛ min-vʋgʋ kʋm, á na fʋna nɩ á wʋ́ tɩ tɩn ŋwaanɩ. 17 Baŋa-Wɛ ma ta dɩ amʋ DƖ wɩ:
‹Nɔɔna bam na loori kʋlʋ tɩn maama jɩgɩ cɩga. 18 Amʋ wʋ́ pa amʋ nijoŋnu nuŋi ba dwi wʋnɩ, nɩ nmʋ dɩ na yɩ te tɩn, yɩ a tʋŋ-o ba tee nɩ. Amʋ wʋ́ brɩ-o a taanɩ dɩm, sɩ o lwǝni o brɩ nɔɔna bam. 19 O na wʋ́ taa ŋɔɔnɩ amʋ yɩrɩ ŋwaanɩ tɩn, wʋlʋ maama na vɩn sɩ o sɛ o ni, amʋ tɩtɩ wʋ́ sɩɩnɩ yiǝ mʋ a bwe kʋ tu. 20 Nijoŋnu kalʋ maama nan na mɛ amʋ yɩrɩ o ŋɔɔnɩ taanɩ yɩ kʋ daɩ amʋ mʋ pɛ‑o taanɩ dɩm, kʋntʋ tu maŋɩ sɩ o tɩ mʋ. Kʋ ta yɩ bɩdwɩ mʋ dɩ nijoŋnu kalʋ na wʋ́ ma wa yadonnə yɩrɩ o pwərisi tɩn, wʋntʋ dɩ maŋɩ sɩ o tɩ mʋ.›
21 Á nan waɩ á bwe nɩnɛɛnɩ, á wʋ́ kɩ tɛ mʋ á lwarɩ nɩ nijoŋnu kantʋ na ŋɔɔnɩ kʋlʋ tɩn sɩɩnɩ kʋ yɩ Baŋa-Wɛ taanɩ naa kʋ daɩ. 22 Nɩ nijoŋnu na mɛ Baŋa-Wɛ yɩrɩ o ŋɔɔnɩ taanɩ yɩ kʋlʋ o na tagɩ tɩn wʋ kɩ, kʋ brɩ nɩ kʋ daɩ Baŋa-Wɛ kwǝrǝ mʋ o ŋɔɔnɩ. Nijoŋu wʋm kʋntʋ zǝŋi o tɩtɩ mʋ o ŋɔɔna. Á ba maŋɩ sɩ á taá kwar-o.»