Ka-duri-ka-zʋ-ka-səgi tɩɩnɩ
19
«Abam Tu Baŋa-Wɛ dɩm laan wʋ́ cɔgɩ dwiə yalʋ á na lagɩ á kwe ya tɩga á taá te tɩn. Á wʋ́ vu á zəli-ba yɩ á daarɩ á taá zʋʋrɩ ba tɩɩnɩ dɩ ba sam wʋnɩ. 2 Á na tu á zʋʋrɩ tɩga kam nɩ, sɩ á kuri tɩɩnɩ dɩtɔ sɩ nɔɔnʋ maama wanɩ o kɩ lɩla o duri o vu o yi dɩ dɩdʋa wʋnɩ. 3 Pɔɔrɩ-na tɩga kam laŋa kam kuni bɩtɔ sɩ á daarɩ á fɔgɩ cwe sɩ nɔɔnʋ na gʋ o doŋ, sɩ o wanɩ o duri o lu o zʋ tɩɩnɩ dɩm kʋntʋ dɩdʋa wʋnɩ o səgi da.4 Mʋ kʋ na wʋ́ kɩ te kʋ pa nɔɔnʋ wʋlʋ na gʋ o doŋ yɩ o wʋ paalɩ o kɩ tɩn. Kʋ na daɩ nɩ ba ya maŋɩ ba dʋnɩ daanɩ, nɔɔnʋ wʋm kʋntʋ wʋ́ wanɩ o duri o zʋ tɩʋ kʋm o joŋi o tɩtɩ o yagɩ. 5 Kʋ maŋɩ dɩ nɔɔna bale na dɛ daanɩ ba zʋ kagʋa sɩ ba goni dɛ. Ba dɩdʋa na wʋra o zagɩ tiu pa o dooru yuu lɩ kʋ magɩ wʋdoŋ wʋm kʋ gʋ, oó wanɩ o duri o vu o zʋ tɩɩnɩ dɩm kʋntʋ dɩdʋa o səgi sɩ o joŋi o tɩtɩ. 6 Kʋ na daɩ kʋntʋ, yɩ cwǝŋǝ kam na tiini ka dwara, wʋlʋ na tɩgɩ tɩn yɩra nɔɔnʋ wʋ́ wanɩ o zəli nɔn-gʋrʋ wʋm o yi yɩ o tɔgɩ o ban-zɔŋɔ kʋm baŋa o ja-o o gʋ. Kʋ tu nan wʋ maŋɩ sɩ o tɩ, o na wʋ paalɩ o gʋ o doŋ wʋm tɩn ŋwaanɩ. 7 Kʋntʋ ŋwaanɩ a pɛ abam ni nɩ á kuri tɩɩnɩ dɩtɔ ka-duri-ka-zʋ-ka-səgi ŋwaanɩ.
8 Abam Tu Baŋa-Wɛ dɩm na pɛ á laŋa kam tiini ka yalɩ, nɩ DƖ na goni ni dɩ á nabaara bam sɩ DƖ kɩ te tɩn, yɩ á ba á te tɩga kam maama, 9 kʋ maŋɩ sɩ á ta kuri tɩɩnɩ dɩtɔ mʋ á wǝli da. Á nan wʋ́ taá tɔgɩ Wɛ niə yalʋ maama amʋ na pɛ abam zɩm tɩntʋ tɩn, sɩ á taá soe á Tu Baŋa-Wɛ dɩm yɩ á tɔgɩ DƖ cwe sɩm, sɩ DƖ laan wǝli tɩga kam maama DƖ pa abam sɩ á taá te. 10 Á maŋɩ sɩ á kuri tɩɩnɩ dɩtɔ á wǝli da, sɩ nɔɔna balʋ na wʋ maŋɩ sɩ ba tɩ tɩn yɩ tɩ. Abam na wʋ kɩ kʋntʋ, yɩ nɔɔnʋ na tɩga kʋntʋ doŋ tɩga kalʋ Baŋa-Wɛ na lagɩ DƖ pa abam tɩn wʋnɩ, o jana wʋ́ ta wʋ á yuu nɩ.
11 Nɔɔnʋ nan na maŋɩ o culi o doŋ yɩ o beeri pwələ sɩ o gʋ-o, kʋ yɩ o paalɩ mʋ. Kʋntʋ tu laan na duri o vu o zʋ tɩɩnɩ dɩntʋ dɩdʋa wʋnɩ sɩ o səgi, 12 o tɩtɩ tɩʋ kʋm nakwa mʋ maŋɩ sɩ ba tʋŋɩ ba ja-o ba joori ba tɩʋ kʋm, sɩ ba daarɩ ba kɩ-o wʋlʋ o na gʋ tɩn yɩra nɔɔnʋ jɩŋa nɩ. O maŋɩ sɩ o tɩ mʋ. 13 Yɩ duri-na nɔn-gʋrʋ ŋwaŋa. Saarɩ-na kǝm-lɔŋɔ kʋntʋ doŋ Yisɩrayɛlɩ laŋa kam nɩ sɩ á ŋwɩa wanɩ ka kɩ lanyɩranɩ ka pa abam.
Faŋa faŋa sisənə yam
14 Abam na tu á zʋ tɩga kalʋ á Tu Baŋa-Wɛ dɩm na lagɩ DƖ pa abam sɩ á taá te tɩn wʋnɩ, nɔɔn-nɔɔnʋ yɩ zaŋɩ o di o zʋ o doŋ sisəm dɩlʋ na maŋɩ dɩ lɔ dɩ tigə faŋa faŋa tɩn.
Maana zəli taanɩ
15 Taanɩ na wʋra yɩ nɔɔnʋ dɩdʋa yɩranɩ mʋ na pɛ maana kǝm-lɔŋɔ ŋwaanɩ, kʋ bá wanɩ kʋ pa nɔɔnʋ tʋ dɩ o bʋra. Kʋ maŋɩ sɩ maana-para taa yɩ bale naa batɔ mʋ sɩ ba brɩ nɩ kʋ tu gɛ bʋra.a 16 Nɔɔnʋ na kwaanɩ sɩ o pa kʋ zʋ o doŋ yɩra yɩ o bwɛ‑o Wɛ niə cɔgɩm baŋa nɩ, 17 ba maama bale mʋ maŋɩ sɩ ba vu ba zɩgɩ Baŋa-Wɛ yigə nɩ ba tʋlɩ taanɩ dɩm ba brɩ Wɛ kaanɩm tiinə bam dɩ balʋ na nii taana yam baŋa nɩ da yam kʋntʋ nɩ tɩn. 18 Bantʋ mʋ wʋ́ nii ba taanɩ dɩm wʋnɩ zii ba kwaanɩ ba lwarɩ kʋ yɩ cɩga naa vwan. Ba na nɛ nɩ nɔɔnʋ wʋm bwɛ o doŋ Yisɩrayɛlɩ tu vwan wʋnɩ, 19 ba maŋɩ sɩ ba waarɩ kʋ tu dɩ waarɩm dɩlʋ o ya na bʋŋɩ sɩ o pa o doŋ na tɩn mʋ. Kantʋ cwǝŋǝ kam mʋ á wʋ́ tɔgɩ á ma á saarɩ lwarɩm dɩm kʋntʋ abam tɩtarɩ nɩ. 20 Kʋ kwaga nɩ Yisɩrayɛlɩ tiinə bam maama na ni kʋlʋ na kɩ tɩn, fʋʋnɩ wʋ́ ja-ba, pa nɔɔn-nɔɔnʋ daa bá kɩ kǝm-lɔŋɔ kʋntʋ doŋ. 21 Yɩ duri-na vwa-nyɩm ŋwaŋa. Nɔɔnʋ na ti o doŋ mʋmwɛ, baá ti o dɩ mʋmwɛ mʋ. O na pi o doŋ yi, baá pi o dɩ yi mʋ. O na guri o doŋ yəli, baá guri o dɩ yəli mʋ. O na goni o doŋ jɩŋa, baá go o dɩ jɩŋa mʋ. O na bwəri o doŋ naga, baá bwəri o dɩ naga mʋ.»