Levi dwi tiinə bam tɩɩnɩ dɩm
35
Yisɩrayɛlɩ tiinə bam dɛɛn ta wʋ Moabɩ laŋa kam tɩ-kamparɩ nɩ mʋ. Je sɩm kʋntʋ wʋ Zʋrdɛn bugə kam ni nɩ mʋ yɩ Zeriko dɩ wʋ bubɛ dɩdoŋ dɩm seeni. Ba na wʋra tɩn, Baŋa-Wɛ ma ta dɩ Moyisi DƖ wɩ: 2 «Ta dɩ Yisɩrayɛlɩ tiinə bam nɩ ba na joŋi ba tɩga kam, sɩ ba lɩ tɩɩnɩ ka wʋnɩ ba pa Levi tiinə bam sɩ ba taa zʋʋrɩ dɩ wʋnɩ. Ta pa-ba pwəli sɩlʋ na gilimi tɩɩnɩ dɩm kʋntʋ maama tɩn sɩ ba taa kɔnɩ ba vara. 3 Kʋntʋ mʋ wʋ́ pa ba dɩ taa jɩgɩ tɩɩnɩ ba zʋʋrɩ da, yɩ ba jɩgɩ pwəli sɩ ba taa kɔnɩ ba vara dwi maama.a4 Ba na lɔgɩ ba tɩɩnɩ dɩm ba pɩ, sɩ ba zɩgɩ tɩʋ maama kabri sɩm təŋə nɩ ba jeeli kantɩ mʋrʋ (1,000) dɛ sɩna sɩm maama nɩ sɩ kʋ taa yɩ ba vara pwələ. 5 Daa ta jeeli-na kantɩ mʋr-tɩle (2,000) tɩʋ kʋm daa maama seeni, sɩ pwəli sɩm sisənə taa tigi kʋntʋ yɩ tɩʋ kʋm zɩgɩ sɩ tɩtarɩ nɩ. Levi tiinə bam tɩʋ maama wʋ́ taa jɩgɩ vara pwəli sɩlʋ na gilimi-kʋ tɩn sɩ ba taa kɔnɩ ba vara.
Ka-duri-ka-zʋ-ka-səgi tɩɩnɩ dɩm
6 Nan lɩ-na tɩɩnɩ dɩrdʋ Levi tiinə tɩɩnɩ dɩm wʋnɩ sɩ dɩ taa wʋra ka-duri-ka-zʋ-ka-səgi ŋwaanɩ. Nɔɔnʋ na gʋ o doŋ yɩ o wʋ paalɩ o kɩ, sɩ kʋntʋ tu duri o zʋ tɩɩnɩ dɩm kʋntʋ dɩdʋa wʋnɩ o səgi. Abam ta maŋɩ sɩ á kwe tɩɩnɩ fiinna-dɩle á pa Levi dwi tiinə bam á wǝli da, 7 sɩ ba tɩɩnɩ dɩm maama laan taa yɩ fiinna-nana, dɩdaanɩ dɩ vara pwəli sɩlʋ na kaagɩ-dɩ tɩn. 8 Á wʋ́ kuri tɩɩnɩ dɩm kʋntʋ á lɩ Yisɩrayɛlɩ dwi maama tɩga kam wʋnɩ sɩ Levi dwi tiinə taa zʋʋrɩ dɩ wʋnɩ. Kʋntʋ ŋwaanɩ á maŋɩ sɩ á lɩ tɩɩnɩ sɩ kʋ maŋɩ dɩ dwi maama tɩga kam na maɩ te tɩn, nɩ ba na yɩ kɔ-kamunu naa kɔ-balaŋa mʋ dɩ.»
9 Baŋa-Wɛ ta ma ta dɩ Moyisi DƖ wɩ:
10 «Nan ta dɩ Yisɩrayɛlɩ tiinə bam nɩ: Abam na bɛ Zʋrdɛn bugə kam yɩ á zʋ Kaanan tɩga kam wʋnɩ, 11 sɩ á kuri tɩɩnɩ dɩdonnǝ á zɩgɩ ka-duri-ka-zʋ-ka-səgib ŋwaanɩ.c Nɔɔnʋ na gʋ o doŋ yɩ o wʋ paalɩ o kɩ, sɩ kʋntʋ tu duri o zʋ tɩɩnɩ dɩm kʋntʋ dɩdʋa wʋnɩ o səgi. 12 Kʋntʋ mʋ wʋ́ pa o wanɩ o duri o vu o lu wʋlʋ na beeri o gʋm tɩn jɩŋa nɩ. Ba bá na cwǝŋǝ sɩ ba gʋ kʋ tu yɩ tɩʋ kʋm nakwa bam wʋ ni o ni-taanɩ sɩ ba lwarɩ kʋlʋ na kɩ tɩn. 13 Lɩ-na tɩɩnɩ dɩrdʋ ka-duri-ka-zʋ-ka-səgi ŋwaanɩ. 14 Tɩɩnɩ dɩtɔ wʋ́ taa wʋ Zʋrdɛn bugə kam wa-puli seeni. Dɩtɔ dɩ wʋ́ taa wʋ Kaanan tɩga kam wʋnɩ. 15 Tɩɩnɩ dɩrdʋ dɩm kʋntʋ wʋ́ taa wʋra Yisɩrayɛlɩ tiinə, dɩ vərə, dɩ balʋ maama na zʋʋrɩ dɩ ba tɩn ŋwaanɩ mʋ, sɩ wʋlʋ maama na gʋ o doŋ yɩ o wʋ paalɩ o kɩ, sɩ kʋntʋ tu duri o zʋ dɩ dɩdʋa wʋnɩ o joŋi o tɩtɩ.
16 Nɔɔnʋ nan na kwe luu o magɩ o doŋ pa kʋ tu tɩ, kʋ yɩ nɔɔnʋ wʋm paalɩ o kɩ mʋ. O yɩ nɔn-gʋrʋ mʋ yɩ ba maŋɩ sɩ ba gʋ o dɩ mʋ. 17-18 Nɔɔnʋ ta na ze kandwɛ-kamunu, naa da-lɔŋɔ o jɩŋa nɩ, yɩ o na kwe-kʋ o magɩ o doŋ pa kʋ tu tɩ, kʋ brɩ nɩ o paalɩ o kɩ mʋ. O yɩ nɔn-gʋrʋ mʋ yɩ ba maŋɩ sɩ ba gʋ o dɩ mʋ. 19 Ba na gʋ wʋlʋ tɩn yɩra nɔɔnʋ mʋ maŋɩ sɩ o beeri nɔn-gʋrʋ wʋm. O maa na nɛ‑o, sɩ o yɔɔrɩ o gʋ-o.
20 Kʋ ta wǝli da, nɔɔnʋ na culi o doŋ, yɩ o yigi kʋ tu o dɩ tɩga nɩ, naa o na paalɩ o dʋl-o dɩ woŋo, 21 naa o na mag-o dɩ o ja-gulə, pa o doŋ wʋm tɩ, o yɩ nɔn-gʋrʋ mʋ yɩ o maŋɩ sɩ ba gʋ o dɩ mʋ. Ba na gʋ wʋlʋ tɩn yɩra nɔɔnʋ maŋɩ sɩ o beeri nɔn-gʋrʋ wʋm je mʋ sɩ o gʋ-o.
22 Kʋ nan na daɩ nɩ o ya culi o doŋ mʋ, yɩ o na yig-o o dɩ tɩga nɩ, naa o dʋl-o dɩ woŋo, kʋ brɩ nɩ o wʋ paalɩ o kɩ. 23 O ta na ze kandwɛ-kamunu yɩ o dʋlɩ yɔɔ pa kʋ vu kʋ magɩ o doŋ, kʋ brɩ nɩ o wʋ paalɩ o kɩ kʋntʋ, o na ba culi o doŋ wʋm tɩn ŋwaanɩ. O doŋ wʋm na tɩga o kǝm dɩm kʋntʋ baŋa nɩ, 24 sɩ tɩʋ kʋm nakwa di nɔɔnʋ wʋm dɩ wʋlʋ o na gʋ tɩn yɩra nɔɔnʋ taanɩ dɩm sɩ ba tɔgɩ kwiə yam kʋntʋ ba bʋrɩ cɩga kam. 25 Nakwa bam nan na di taanɩ dɩm yɩ ba pa wʋlʋ bʋra, sɩ ba joŋ-o tʋʋ wʋm yɩra nɔɔnʋ jɩŋa nɩ. Ba laan maa wʋ́ pa o joori ka-duri-ka-zʋ-ka-səgi tɩʋ kʋlʋ wʋnɩ o ya na duri o vu o səgi da tɩn. Oó taa zʋʋrɩ tɩʋ kʋm kʋntʋ wʋnɩ mʋ sɩ kʋ taa nii kaanɩm yigə tu wʋm na tɩga.
26 Nɔɔnʋ wʋm nan na nuŋi ka-duri-ka-zʋ-ka-səgi tɩʋ kʋm wʋnɩ, 27 yɩ tʋʋ wʋm yɩra nɔɔnʋ na nɛ‑o o ja o gʋ, o tʋʋnɩ dɩm bá taa wʋ kʋ tu yuu nɩ. Kʋ tu jɩgɩ cwǝŋǝ sɩ o gʋ-o. 28 Wʋlʋ na wʋ paalɩ o gʋ o doŋ wʋm tɩn maŋɩ sɩ o yǝni o taa wʋ ka-duri-ka-zʋ-ka-səgi tɩʋ kʋm wʋnɩ mʋ, sɩ kaanɩm yigə tu wʋm na tɩga, sɩ o laan joori o viiri o tɩtɩ tɩʋ.
29 Á na zʋʋrɩ mɛ maama, abam dɩ á kwaga kam maama maŋɩ sɩ á taá tɔgɩ niə yantʋ mʋ sɩ kʋ taa ve maŋa maama.
30 Nɔɔnʋ na zaŋɩ o gʋ o doŋ, á ba jɩgɩ cwǝŋǝ sɩ á gʋ kʋ tu, kʋ na daɩ nɩ nɔɔna mʋ pɛ maana nɩ o sɩɩnɩ o yɩ nɔn-gʋrʋ. Nɔn-dʋa yɩranɩ ni-taanɩ nan bá wanɩ dɩ pa nɔɔnʋ tɩ.
31 Nɔn-gʋrʋ maŋɩ sɩ ba gʋ-o mʋ. Kʋntʋ tu bá wanɩ o ŋwɩ səbu sɩ o ma joŋi o ŋwɩa.
32 Kʋ ta wǝli da, wʋlʋ na zʋ ka-duri-ka-zʋ-ka-səgi tɩʋ kʋdoŋ wʋnɩ o na wʋ paalɩ o gʋ nɔɔnʋ tɩn ŋwaanɩ, kʋntʋ tu bá wanɩ o ŋwɩ səbu sɩ o ma o joori o tɩtɩ sɔŋɔ lɩla, yɩ kaanɩm yigə tu wʋm ta wʋ tɩgɩ.
33 Nɔn-gʋra cɔgɩ tɩga kam mʋ. Nan yɩ pa-na sɩ tɩga kalʋ á na zʋʋrɩ ka wʋnɩ tɩn taa cɔga kǝm dɩm kʋntʋ ŋwaanɩ. Nɔɔnʋ na yɔɔrɩ o gʋ o doŋ, yɩ á wʋ gʋ nɔn-gʋrʋ wʋm, tʋʋ wʋm jana bam cɔgɩ tɩga kam mʋ. 34 Amʋ Baŋa-Wɛ mʋ zʋʋrɩ Yisɩrayɛlɩ tiinə bam tɩtarɩ nɩ. Kʋntʋ ŋwaanɩ, yɩ pa-na sɩ tɩga kalʋ amʋ dɩ abam na je ka wʋnɩ tɩn cɔgɩ.»