Zelofadɩ bukwa bam taanɩ
36
Galadɩ sɔ-yuu kʋm yigǝ tiinǝ dɛɛn ma zaŋɩ dɛ dɩdʋa ba fʋfɔ ba yi Moyisi dɩdaanɩ Yisɩrayɛlɩ sɔ-yuni tɩdaara yigǝ tiinǝ bam te. Galadɩ ko maa yɩ Makira. Wʋntʋ ko dɩ maa yɩ Zʋzɛfʋ bu Manasɩ. 2 Ba ma ta dɩ Moyisi ba wɩ: «Dɩ́ ko, Baŋa-Wɛ dɛɛn pɛ nmʋ mʋ ni sɩ n ta jɔrɔ n ma n pɔɔrɩ tɩga kam n pa Yisɩrayɛlɩ dwiə yam maama. O ta ma pa ni sɩ n kwe tɩga kalʋ ya na wʋ́ taa yɩ dɩbam cʋrʋ Zelofadɩ nyɩm tɩn n pa o bukwa bam.a 3 Bantʋ nan na zʋ banna na nuŋi Yisɩrayɛlɩ sɔ-yuu kʋdoŋ wʋnɩ tɩn, ba tɩga kam laan wʋ́ ji sɔ-yuu kʋm kʋntʋ nyɩm mʋ sɩ ba wǝli-ka ba tɩtɩ tɩga kam wʋnɩ. Kʋ maa wʋ́ pa dɩbam tɩga kam muri. 4 Kʋ nan na yi ywəəni dim bɩnɩ dɩm pa Yisɩrayɛlɩ tiinə kwe ba wǝǝnu ba joori ba paɩ tɩ tiinə,b Zelofadɩ bukɔ wʋlʋ maama na zʋ barʋ sɔ-yuu-gaa wʋnɩ, kʋ tu tɩga laan wʋ́ lɛɛrɩ ka ji sɔ-yuu kʋm kʋntʋ nyɩm, pa dɩ́ nabaara bam sɔ-yuu kʋm ga-ka.»5 Moyisi dɛɛn na lwarɩ Baŋa-Wɛ ni na yɩ te dɩ taanɩ dɩm tɩn, o ma pa Yisɩrayɛlɩ tiinə bam ni nɩ: «Zʋzɛfʋ dwi dɩm nɔɔna na tagɩ kʋlʋ tɩn yɩ cɩga mʋ. 6 Baŋa-Wɛ na pɛ ni dɩlʋ Zelofadɩ bukwa bam ŋwaanɩ tɩn mʋ tɩntʋ:
Ba jɩgɩ cwǝŋǝ sɩ ba kuri banna balʋ ba na wʋ́ zʋ tɩn. Kʋ nan maŋɩ sɩ ba banna nuŋi ba ko sɔ-yuu kʋm wʋnɩ mʋ. 7 Tɩga kalʋ Yisɩrayɛlɩ sɔ-yuu maama na wʋ́ joŋi tɩn maŋɩ sɩ ka maŋɩ ba tɩtɩ sɔ-yuu kʋm dɩ ba kwaga kam tee nɩ mʋ. Ka bá lɛɛrɩ ka ji sɔ-yuu kʋdoŋ nyɩm. 8 Bukɔ wʋlʋ maama na joŋi tɩga Yisɩrayɛlɩ sɔ-yuu kʋlʋ maama ŋwaanɩ o te, sɩ kʋ tu beeri barʋ o zʋ o ko sɔ-yuu kʋm wʋnɩ. Kʋntʋ wʋ́ pa Yisɩrayɛlɩ tu maama taa te tɩga kalʋ o na joŋi o nabaara sɔ-yuu kʋm ŋwaanɩ tɩn. 9 Sɔ-yuu maama tɩga bá lɛɛrɩ ka ji sɔ-yuu kʋdoŋ nyɩm. Yisɩrayɛlɩ sɔ-yuni tɩm maama tɩga kam jɩgɩ sɩ ka maŋɩ sɔ-yuu kʋm kʋntʋ tee nɩ, sɩ ba taa te-ka.»
10 Zelofadɩ bukwa bam dɛɛn ma sɩɩnɩ ba sɛ Baŋa-Wɛ ni dɩm DƖ na pɛ Moyisi tɩn. 11 Maala, dɩ Tirisa, dɩ Hogɩla, dɩ Milka, dɩdaanɩ Nowe mʋ kʋntʋ. Ba ma zʋ ba ko cʋrrʋ tɩdonnǝ. 12 Ba banna dɛɛn nuŋi Zʋzɛfʋ bu Manasɩ sɔ-yuni tɩm wʋnɩ mʋ. Kʋntʋ ŋwaanɩ ba tɩga kam maŋɩ ba ko sɔ-yuu kʋm tee nɩ yɩ ba te-ka.
13 Baŋa-Wɛ na tɔgɩ Moyisi baŋa nɩ DƖ pa Yisɩrayɛlɩ tiinə bam niə dɩ cullu tɩlʋ tɩn mʋ kʋntʋ. Ka maŋa nɩ, dɩ ba ta wʋ Moabɩ laŋa kam tɩ-kamparɩ nɩ mʋ. Je sɩm kʋntʋ wʋ Zʋrdɛn bugə kam ni nɩ yɩ Zeriko wʋ bubɛ dɩdoŋ dɩm seeni.