Kaanan tɩga kam sisənə
34
Baŋa-Wɛ dɛɛn ma ta dɩ Moyisi DƖ wɩ:2 «Ta dɩ Yisɩrayɛlɩ tiinə bam nɩ: Kaanan tɩga kam yɩ tɩga kalʋ ba na wʋ́ pɔɔrɩ ba pa abam sɩ á taá te tɩn mʋ. Á na tu á zʋ tɩga kam kʋntʋ, sɩ á taá ye nɩ ka sisəm mʋ tɩntʋ:
3 Jagwiə seeni sisəm dɩm wʋ́ tɔgɩ Zin kagʋa kam, Edɔm laŋa kam sisəm na wʋ mɛ tɩn. Wa-puli daa kam seeni, sisəm dɩm wʋ́ puli Yɛ nɩnɩʋ kʋma nɩ mʋ. 4 Ka ta ma vu ka lɛɛnɩ Nɔŋɔ pweeru cwǝŋǝ kam jagwiə seeni ka kɛ ka yi Zin sɩ ka daarɩ ka tɔgɩ Kadese-Baranɩa kuri seeni ka vu ka yi Hazarɩ-Adarɩ dɩ Azɩmon. 5 Ka laan wʋ́ pipiri ka taa tɔgɩ Ezipi bu-tʋla kam sɩ ka vu ka kweeli Mediterane nɩnɩʋ kʋm ni nɩ.
6 Kʋ na yɩ á tɩga kam wa-zʋʋrɩ seeni sisəm dɩm, dɩ yɩ Mediterane nɩnɩʋ kʋm mʋ.
7 Á jazɩm baŋa seeni sisəm dɩm wʋ́ zɩgɩ Mediterane nɩnɩʋ kʋm ni nɩ mʋ dɩ tʋlɩ dɩ yi Hɔrɩ piu kʋm. 8 Ka wʋ́ zɩgɩ dáanɩ ka vu ka yi Lebo-Hamatɩ, dɩ Zedadɩ, 9 dɩ Ziforon, sɩ ka laan kweeli Hazara-enan nɩ.
10 Kʋ nan na yɩ á wa-puli seeni sisəm dɩm, ka wʋ́ zɩgɩ Hazara-Enan nɩ mʋ ka tʋlɩ ka yi Sefam. 11 Ka ta wʋ́ tu kuri ka vu Ribila na wʋ Ayin wa-puli seeni tɩn. Ka na zɩgɩ dáanɩ ka wʋ́ vu ka yi zwǝǝnu tɩlʋ na wʋ Galile nɩnɩʋ kʋm bubɛ dɩlʋ na jeeri wa-puli seeni tɩn mʋ, 12 sɩ ka laan tu ka tɔgɩ Zʋrdɛn bugə kam ka vu ka kweeli Yɛ nɩnɩʋ kʋm nɩ.
Abam tɩga kam sisənə yana yam mʋ kʋntʋ.»b
13 Moyisi dɛɛn ma ta dɩ Yisɩrayɛlɩ tiinə bam o wɩ: «Tɩga kantʋ mʋ abam maŋɩ sɩ á ta jɔrɔ sɩ á pɔɔrɩ-ka á taá te. Baŋa-Wɛ pɛ ni sɩ á kwe-ka á pɔɔrɩ á pa á dwiə nʋgʋ dɩ cicoro kʋm mʋ. 14 Bɛŋwaanɩ, Ruban dwi dɩm, dɩ Gadɩ dwi dɩm, dɩdaanɩ Manasɩ dwi cicoro kʋm maŋɩ ba na ba tɩga kam. 15 Tɩga kalʋ ba na lagɩ ba joŋi ba taa te tɩn wʋ Zʋrdɛn bugə kam wa-puli seeni, mɛ na jeeri Zeriko bubɛ dɩdoŋ dɩm seeni tɩn mʋ.»
16 Baŋa-Wɛ daa ma ta dɩ Moyisi DƖ wɩ: 17 «Nɔɔna balʋ na wʋ́ pɔɔrɩ tɩga kam ba pa abam tɩn yɩra mʋ tɩntʋ: Wɛ kaanɩm tu Eleyazaarɩ, dɩ Nun bu Zozwe. 18 Nan lɩ nɔɔnʋ dɩdʋa dɩdʋa Yisɩrayɛlɩ dwi maama wʋnɩ n wǝli da. Nɔɔna bam kʋntʋ mʋ wʋ́ wǝli-ba sɩ ba pɔɔrɩ tɩga kam.» 19-28 Baara bam yɩra mʋ tɩntʋ:
| Dwi dɩm | Yigə tu wʋm |
| Zuda | Yefune bu Kalɛbɩ |
| Simeyon | Amiwudi bu Sanwɛlɩ |
| Bɛnzamɛn | Kisilon bu Elidadɩ |
| Dan | Yogili bu Buki |
| Manasɩ | Efodi bu Haniyɛlɩ |
| Efrayim | Sifitan bu Kemuel |
| Zabulɔn | Paranakɩ bu Elizafan |
| Yisakaarɩ | Azan bu Paliti |
| Asɛɛrɩ | Selomi bu Ayiwudi |
| Nɛfitali | Amiwudi bu Pedahɛlɩ |
29 Nɔɔna bam kʋntʋ dɛɛn yɩ balʋ Baŋa-Wɛ na pɛ-ba ni sɩ ba tɔgɩ ba pɔɔrɩ Kaanan tɩga kam ba pa Yisɩrayɛlɩ tiinə bam sɩ ba taa te tɩn mʋ.