Yisɩrayɛlɩ tiinə bam cwə-vəli
33
Yisɩrayɛlɩ tiinə bam na nuŋi Ezipi tɩʋ kʋm nɩ ba kɛ tɩn, Moyisi dɩ Arɔn dɛɛn mʋ tʋ ba yigə nɩ pa ba veǝ. 2 Baŋa-Wɛ ma pa Moyisi ni sɩ o taa pʋpʋnɩ mɛ dɩ mɛ maama ba na yǝni ba yi sɩ ba cwi ba vwə yam tɩn. Yisɩrayɛlɩ tiinə bam na tɔgɩ je sɩlʋ yɩ Moyisi pʋpʋnɩ sɩ yɩra o tiŋi tɩn mʋ tɩntʋ:
3 Bɩnɩ dɩlʋ wʋnɩ ba na nuŋi Ezipi nɩ tɩn, kʋ yɩ bɩnɩ dɩm kʋntʋ pulim cana kam da fugə-yanu dɛ nɩ mʋ ba zɩgɩ Ramsɛsɩ nɩ ba nuŋi sɩ ba kɛ. Kʋ yɩ dɛ dɩlʋ na saŋɩ Pakɩ dɛ dɩm tɩn mʋ kʋntʋ. Ba dɛɛn nuŋi dɩ baarɩ ba maa kɛa yɩ Ezipi tiinə bam yɔɔrɩ ba zɩgɩ ba nii mʋ.a 4 Bantʋ maa wʋra ba kɩ ba twa, Baŋa-Wɛ na magɩ ba bəkər-kwɩn sɩm maama o gʋ tɩn ŋwaanɩ. Baŋa-Wɛ dɛ kǝm dɩm kʋntʋ baŋa nɩ mʋ DƖ cɔgɩ Ezipi tiinə jwǝnǝ yam dam.
5 Yisɩrayɛlɩ tiinə bam dɛɛn nuŋi Ramsɛsɩ tɩʋ nɩ, ba vu ba yi Sukɔtɩ mʋ ba cwi ba vwə ba jǝni. 6 Ba ma zɩgɩ dáanɩ ba vu Etam. Kʋ maa wʋ kagʋa kam ni nɩ.b 7 Ba daa ma pipiri ba vu Pi-Hayirɔtɩ. Je sɩm kʋntʋ wʋ Baal-Zefɔnɩ wa-puli seeni mʋ. Ba ma cwi ba vwə Migidɔla seeni. 8 Ba na yagɩ Pi-Hayirɔtɩ tɩn, ba ma tɔgɩ Nanɩ-sʋŋʋ kʋm wʋnɩ ba bɛ ba zʋ kagʋa kam wʋnɩ. Ba ma kwe da yatɔ ba beeri Etam kagʋa kam wʋnɩ ba vu ba yi Mara. Ba ma cwi ba vwə dáanɩ. 9 Ba na yagɩ Mara tɩn, ba ma vu Elim. Buli-yiə fugə-yale, dɩdaanɩ kʋrrʋ fusɩrpɛ mʋ wʋ je sɩm kʋntʋ nɩ. Ba ma cwi ba vwə ba jǝni da.c 10 Ba daa na yagɩ Elim tɩn, ba ma joori Nanɩ-sʋŋʋ kʋm ni nɩ ba jǝni da. 11 Ba na yagɩ Nanɩ-sʋŋʋ kʋm seeni tɩn, ba ma vu ba cwi ba vwə Sin kagʋa kam wʋnɩ. 12 Ba ma zaŋɩ Sin kagʋa kam nɩ ba vu ba cwi ba vwə Dofeka nɩ. 13 Ba ma zaŋɩ Dofeka nɩ ba vu ba cwi ba vwə Alusi nɩ. 14 Ba ma zaŋɩ Alusi nɩ ba vu ba cwi ba vwə Refidim nɩ. Je sɩm kʋntʋ nɩ na dɛɛn tǝrǝ sɩ nɔɔna bam taa nyɔa. 15 Ba na yagɩ Refidim tɩn, ba laan ma zʋ Sinayi kagʋa kam nɩ.d
16-36 Yisɩrayɛlɩ tiinə bam dɛɛn na yagɩ Sinayi kagʋa kam tɩn, ba ma beeri taan. Ba na ve ba zɩgɩ je sɩlʋ nɩ yɩ ba cwi ba vwə yam tɩn mʋ tɩntʋ:
Kibrɔtɩ-Atava,e dɩ Hazerɔtɩ, dɩ Ritama, dɩ Rimɔn-Pɛrɩzɩ, dɩ Libina, dɩ Risa, dɩ Kehelata, dɩ Sefɛrɩ piu kʋm, dɩ Harada, dɩ Makelɔtɩ, dɩ Tahatɩ, dɩ Tera, dɩ Mitika, dɩ Hasemona, dɩ Moserɔtɩ, dɩ Ben-Yakan, dɩ Hɔr-Gidigadɩ, dɩ Yotibata, dɩ Aberona, dɩ Ezion-Gebɛrɩ, dɩ Kadɛsɩ na wʋ Zin kagʋa kam nɩ tɩn.f
37 Ba dɛɛn na yagɩ Kadɛsɩ tɩn, ba ma vu Hɔrɩ piu kʋm na wʋ Edɔm laŋa kam sisəm ni nɩ tɩn. Ba ma cwi ba vwə ba jǝni da. 38 Ba na wʋra tɩn, mʋ Baŋa-Wɛ pɛ Arɔn ni sɩ o din piu kʋm yuu. Arɔn ma din yɩ o daarɩ o tɩ. Yisɩrayɛlɩ tiinə bam na nuŋi Ezipi tɩʋ nɩ tɩn bɩna fiinna bɩnɩ dɩm, canɩ sɩnu cana kam pulim dɛ nɩ mʋ o tɩga. 39 O maa jɩgɩ bɩna bi dɩ fiinle-yatɔ (123).g
 
40 Arada tɩʋ pɛ na zʋʋrɩ Kaanan kagʋa kam na wʋ jagwiə seeni tɩn ma ni nɩ Yisɩrayɛlɩ tiinə bam bɩɩnɩ o je sɩm seeni.h 41-47 Yisɩrayɛlɩ tiinə bam dɛɛn na yagɩ Hɔrɩ piu kʋm ba daarɩ ba beeri ba zɩgɩ je sɩlʋ nɩ yɩ ba cwi ba vwə tɩn mʋ tɩntʋ:
Zalɩmona, dɩ Punon, dɩ Obotɩ, dɩ Ye-Abarim na wʋ Moabɩ laŋa kam sisəm ni nɩ tɩn, dɩ Dibon-Gadɩ, dɩ Alɩmon-Dibilatayim, dɩ Abarim pweeru je sɩlʋ na bwələ dɩ Nebo piu kʋm tɩn.
48 Ba dɛɛn na yagɩ Abarim pweeru tɩm tɩn, ba ma vu Moabɩ laŋa kam tɩ-kamparɩ ba jǝni. Je sɩm kʋntʋ wʋ Zʋrdɛn bugə kam ni nɩ mʋ yɩ Zeriko dɩ wʋ bubɛ dɩdoŋ dɩm seeni. 49 Yisɩrayɛlɩ tiinə bam ma cwi ba vwə Zʋrdɛn bugə kam ni nɩ, kʋ zɩgɩ Bɛt-yesimɔtɩ nɩ sɩ kʋ taa ve Abɩl-Sitim.
50 Ba na wʋ Moabɩ laŋa kam tɩ-kamparɩ nɩ kʋntʋ tɩn, mʋ Baŋa-Wɛ tagɩ dɩ Moyisi DƖ wɩ:
51 «Nan ta dɩ Yisɩrayɛlɩ tiinə bam nɩ: Abam na bɛ Zʋrdɛn bugə kam sɩ á zʋ Kaanan tɩga kam wʋnɩ, 52 sɩ á kwaanɩ á fɩn balʋ na zʋʋrɩ tɩga kam nɩ tɩn á zəli-ba. Yɔɔrɩ á cɔgɩ-na ba jwǝnǝ yalʋ ba na kwe kandwa dɩ luuru ba ma kɩ tɩn, dɩdaanɩ ba wara-je bimbinə yam. 53 Á laan daarɩ á joŋi tɩʋ kʋm á ta te, sɩ á ta zʋʋrɩ kʋ wʋnɩ. Bɛŋwaanɩ, amʋ pɛ abam tɩʋ kʋm, sɩ kʋ ta yɩ abam nyɩm mʋ.i 54 Nan pɔɔrɩ-na tɩga kam sɩ á dwiə yam maama joŋi ba nyɩm, sɔ-yuu dɩ sɔ-yuu. Abam wʋ́ ta jɔrɔ mʋ, sɩ á ma á pɔɔrɩ-ka á pa-ba. Sɔ-yuu maama wʋ́ joŋi tɩga sɩ kʋ maŋɩ dɩ ba ni na maɩ te tɩn mʋ, nɩ ba na maŋɩ ba yɩ kɔ-kamunu naa kɔ-balaŋa dɩ.j
55 Abam nan na vɩn sɩ á zəli balʋ na zʋʋrɩ tɩga kam nɩ tɩn, ba balʋ na daarɩ tɩn wʋ́ pa á yɩra cɛ, nɩnɛɛnɩ da-cɔrɔ mʋ cugi á yiǝ, naa sabarɩ mʋ zɔ á yɩra yam. Á na tu á jǝni tɩga kam nɩ, ba lagɩ ba taa daanɩ abam mʋ taan. 56 Amʋ Baŋa-Wɛ laan maa wʋ́ cɔgɩ abam dɩ, nɩnɛɛnɩ a na bʋŋɩ sɩ a kɩ-ba te tɩn.»