Dwiə yalʋ na jǝni Zʋrdɛn bugə kam wa-puli seeni tɩn
32
Kʋ na yɩ Ruban dɩ Gadɩ dwiə yam, ba vara kɔgɔ dɛɛn daga zanzan. Ba ma na nɩ Yazɛrɩ tɩga kam dɩ Galadɩ tɩga kam lana sɩ vara bam taa di ba sui. 2 Ba ma vu Moyisi, dɩ Wɛ kaanɩm tu Eleyazaarɩ, dɩdaanɩ Yisɩrayɛlɩ kɔgɔ kʋm yigǝ tiinǝ badonnǝ bam te, yɩ ba wɩ: 3-4 «Baŋa-Wɛ sɩɩnɩ DƖ wǝli dɩbam pa dɩ́ di Atarɔtɩ, dɩ Dibɔn, dɩ Yazɛrɩ, dɩ Nimira, dɩ Hesebon, dɩ Elealɛ, dɩ Sebam, dɩ Nebo, dɩ Biyɔn. Dɩ́ nan maanɩ nɩ tɩga kalʋ na gilimi tɩɩnɩ dɩntʋ tɩn tiini ka lana dɩ vara kɔnɔ. Cɩga tɩn, dɩ́ vara kɔgɔ kʋm daga zanzan. 5 Dɩ́ ko, nmʋ yi na su dɩ́ kikiə yam, sɛ sɩ dɩ́ yɩ bɛ Zʋrdɛn bugə kam. Kwe yo seeni tɩga kam n pa dɩbam sɩ dɩ́ taa te.»6 Moyisi ma ləri Ruban dwi tiinə dɩ Gadɩ dwi tiinə bam o wɩ:
«Abam nan bʋŋɩ sɩ á maŋɩ yo seeni, sɩ á cʋrrʋ Yisɩrayɛlɩ tiinə bam taa ve ba kɩ najara mʋ na? 7 Abam na kɩ kʋntʋ, á cʋrrʋ tɩm vwana wʋ́ parɩ mʋ pa ba ga cwǝŋǝ sɩ ba bɛ Zʋrdɛn bugə kam ba vu ba zʋ tɩga kalʋ Baŋa-Wɛ na kwe DƖ pa-ba tɩn wʋnɩ. 8 Amʋ dɛɛn na zɩgɩ Kadese-Baranɩa nɩ, yɩ a tʋŋɩ á kwə bam sɩ ba vu ba nii tɩga kam tɩn, ba dɛɛn kɩ abam kikiə yam doŋ mʋ.a 9 Ba dɛɛn ve ba yi Ɛskɔlɩ bugə kam ba nii ba na tɩga kam na yɩ te tɩn. Ba laan ma joori dɩ́ te, yɩ ba pa Yisɩrayɛlɩ tiinə bam vwana parɩ yɩ ba wɩ: dɩ́ yɩ zʋ tɩga kalʋ Baŋa-Wɛ na kwe DƖ pa dɩbam tɩn wʋnɩ. 10 Dɩntʋ dɛ dɩm nɩ mʋ Baŋa-Wɛ banɩ zaŋɩ, yɩ DƖ du durə DƖ wɩ:
11 ‹Nɔɔna balʋ maama na maŋɩ ba yi bɩna fiinle ba daŋɩ yɩ ba nuŋi Ezipi tɩʋ wʋnɩ tɩn bá na cwǝŋǝ sɩ ba zʋ tɩga kalʋ wʋnɩ amʋ na goni ni dɩ ba nabaara Abraham, dɩ Yizakɩ, dɩ Zakɔbɩ sɩ a pa-ba tɩn wʋnɩ. Bɛŋwaanɩ, ba wʋ yɔɔrɩ ba kɩ ba wʋ-dɩdʋa dɩ amʋ. 12 Yefune bu Kalɛbɩ, dɩ Nun bu Zozwe yɩranɩ mʋ wʋ́ zʋ da, bantʋ na kɩ ba wʋ-dɩdʋa dɩ amʋ Baŋa-Wɛ tɩn ŋwaanɩ.›
13 Baŋa-Wɛ banɩ dɛɛn na zaŋɩ dɩ Yisɩrayɛlɩ tiinə bam kʋntʋ tɩn, mʋ DƖ pɛ ba kaagɩ kagʋa kam wʋnɩ ba beeri taan, bɩna fiinna. DƖ kɩ-ba kʋntʋ sɩ kʋ vu kʋ yi balʋ na kɩ lwarɩm ba pa‑DƖ tɩn maama laan mʋ tɩgɩ ba ti.
14 Nii-na! Abam nan daa zɩgɩ sɩ á tɔgɩ á kwə tɩtʋŋ-naga kam mʋ, sɩ Baŋa-Wɛ banɩ daa tiini dɩ zaŋɩ Yisɩrayɛlɩ tiinə bam baŋa nɩ dɩ wǝli da. Á yɩ nɔn-balwaarʋ mʋ! 15 Abam zɩm na ywəri Baŋa-Wɛ kwaga nɩ, á wʋ́ pa DƖ dɩ vɩn nɔɔna bam maama mʋ DƖ yagɩ kagʋa kantʋ wʋnɩ. Abam wʋ́ pa ba na ba cɔgɩm.»
16 Ruban dwi tiinə, dɩ Gadɩ dwi tiinə bam ma ləri Moyisi ba wɩ:
«Dɩ́ ya bʋŋɩ sɩ dɩ́ lɔ je sɩlʋ dɩ́ na wʋ́ pɩ dɩ́ peeni sɩm, dɩ dɩ́ bʋnɩ dɩm sɩ wʋnɩ tɩn, sɩ dɩ́ daarɩ dɩ́ lɔ tɩɩnɩ dɩlʋ dɩ́ kaana dɩ dɩ́ biə na wʋ́ taa zʋʋrɩ da tɩn mʋ. 17 Kʋntʋ na kɩa, dɩ́ wʋ́ kwe dɩ́ jara zɩla dɩ́ tʋ dɩ́ donnǝ Yisɩrayɛlɩ tiinə bam yigə nɩ sɩ dɩ́ vu dɩ́ pa ba zʋ ba tɩga kam wʋnɩ.b Dɩ́ biə bam nan wʋ́ taa zʋʋrɩ tɩɩnɩ dɩlʋ na fɔgɩ dɩ pɩ tɩn wʋnɩ mʋ, sɩ tɩga kam tɩmbiə yɩ wanɩ ba kɩ-ba kʋlʋkʋlʋ. 18 Dɩ́ nan bá joori yo seeni, kʋ na daɩ nɩ Yisɩrayɛlɩ dwi tiinə maama nɛ ba jǝŋǝ je sɩ ba jǝni. 19 Dɩbam tɩtɩ bá tɔgɩ dɩ́ joŋi tɩga kalʋ na tigi Zʋrdɛn bugə kam bubɛ dɩdoŋ dɩm seeni tɩn, dɩ́ na nɛ dɩ́ tɩga kam yo seeni tɩn ŋwaanɩ.»
20 Moyisi ma lǝri-ba o wɩ:
«Abam na sɩɩnɩ yiǝ mʋ sɩ á kɩ kʋntʋ, ti-na yigə sɩ á nuŋi á vu á kɩ najara yam Baŋa-Wɛ ŋwaanɩ. 21 Nan pa-na sɩ á baara bam maama kwe ba jara zɩla yam ba tɔgɩ ba bɛ Zʋrdɛn bugə kam ba vu ba jeeri dɩ́ dʋna bam dɩ najara, sɩ kʋ vu kʋ yi sɩ Baŋa-Wɛ zəli-ba dɩ́ yigə nɩ 22 pa dɩ́ wanɩ ba maama dɩ́ di dɩ́ daarɩ dɩ́ joŋi ba tɩga kam. Kʋntʋ maama na kɩa, sɩ abam dɩ joori yo seeni á jǝni tɩga kalʋ wʋnɩ Baŋa-Wɛ na kwe DƖ pa abam sɩ á taá te tɩn. Baŋa-Wɛ dɩ Yisɩrayɛlɩ tiinə bam daa bá taa jɩgɩ abam jɩnɩ.c
23 Abam nan na wʋ kɩ sɩ kʋ tɔgɩ dɩ á ni dɩm, kʋ yɩ á cɔgɩ Baŋa-Wɛ cwǝŋǝ nɩ mʋ kʋntʋ. Taá ye-na nɩ: á lwarɩm dɩm kʋntʋ wʋ́ ba dɩ lwarɩ jaja mʋ. 24 Tɔ. Lɔ-na tɩɩnɩ sɩ á kaana dɩ á biə taa zʋʋrɩ dɩ wʋnɩ. Ta fɔgɩ-na je sɩ á pɩ á peeni sɩm, dɩ á bʋnɩ dɩm sɩ wʋnɩ. Nan ta kɩ-na á na goni ni sɩ á kɩ te tɩn.»
25 Gadɩ dwi tiinə dɩ Ruban dwi tiinə bam ma ləri Moyisi ba wɩ:
«Dɩ́ ko. Dɩ́ wʋ́ kɩ te nmʋ na pɛ dɩbam ni sɩ dɩ́ kɩ tɩn. 26 Dɩ́ kaana, dɩ dɩ́ biə, dɩ dɩ́ vara mʋ wʋ́ maŋɩ Galadɩ tɩɩnɩ dɩm laŋa nɩ. 27 Kʋ daarɩ, dɩ́ baara bam maama wʋ́ ti yigə sɩ dɩ́ vu dɩ́ kɩ najara yam Baŋa-Wɛ ŋwaanɩ. Dɩ́ maa wʋ́ bɛ Zʋrdɛn bugə kam dɩ́ vu dɩ́ dɩ jara nɩnɛɛnɩ nmʋ na tagɩ te tɩn.»
28 Moyisi dɩ laan ma pa Wɛ kaanɩm tu Eleyazaarɩ, dɩ Nun bu Zozwe, dɩdaanɩ Yisɩrayɛlɩ sɔ-yuni yigǝ tiinǝ bam ni yɩ o wɩ: 29 «Ruban dwi tiinə dɩ Gadɩ dwi tiinə baara bam maama maŋɩ sɩ ba kwe ba jara zɩla ba tɔgɩ dɩ abam ba bɛ Zʋrdɛn bugə kam, sɩ ba vu ba kɩ najara Baŋa-Wɛ ŋwaanɩ ba wǝli abam sɩ á dɩ joŋi á tɩga. Kʋntʋ na kɩ pa á na á jǝŋǝ je, sɩ á laan kwe Galadɩ laŋa kam á pa-ba sɩ ba taa te. 30 Ba nan na wʋ sɛ sɩ ba bɛ ba vu ba kɩ najara yam, sɩ á pa ba dɩ tɔgɩ ba joŋi ba tɩga Kaanan laŋa kam nɩ, mɛ á maama na wʋ́ joŋi á nyɩm tɩn.»
31 Gadɩ dwi tiinə bam, dɩ Ruban dwi tiinə bam ma ləri ba wɩ: «Dɩ́ ko, dɩ́ wʋ́ kɩ sɩ kʋ tɔgɩ dɩ Baŋa-Wɛ ni dɩm. 32 Dɩ́ wʋ́ kwe dɩ́ jara zɩla dɩ́ tɔgɩ dɩ́ bɛ Zʋrdɛn bugə kam dɩ́ zʋ Kaanan laŋa kam wʋnɩ sɩ dɩ́ kɩ najara Baŋa-Wɛ ŋwaanɩ. Kʋ kwaga nɩ dɩ́ laan wʋ́ joori dɩ́ jǝni yo seeni sɩ dɩ́ taa te tɩga kantʋ na wʋ Zʋrdɛn bugə kam wa-puli seeni tɩn.»
33 Moyisi dɛɛn ma kwe tɩga o pa Gadɩ dwi tiinə bam, dɩ Ruban dwi tiinə bam, dɩ Zʋzɛfʋ bu Manasɩ dwi cicoro kʋm sɩ ba taa te. O na pɛ-ba tɩga kalʋ tɩn maa yɩ: Amɔɔrɩ tiinə Pɛ Sɩhɔn paarɩ dim laŋa kam, dɩdaanɩ Basan tɩʋ Pɛ Ɔgɩ paarɩ dim laŋa kam mʋ, kʋ na yɩ ba tɩga kam maama, dɩ ba tɩɩnɩ dɩm dɩ dɩ nawuurə yam.
34 Gadɩ tiinə bam dɛɛn ma fɔgɩ ba lɔ Dibɔn, dɩ Atarɔtɩ, dɩ Aroyɛrɩ, 35 dɩ Aterɔtɩ-Sofan, dɩ Yazɛrɩ, dɩ Yogebeha, 36 dɩ Bɛtɩ-Nimira, dɩdaanɩ Bɛtɩ-Haran. Ba ma lɔ tɩɩnɩ dɩm kʋntʋ ba pɩ, yɩ ba daarɩ ba fɔgɩ je sɩ ba pɩ ba peeni sɩ wʋnɩ.
37 Ruban tiinə bam dɩ ma joori ba lɔ Hesebon, dɩ Elealɛ, dɩ Kiryatayim, 38 dɩ Nebo, dɩ Baal-Meyɔn, kʋ wǝli dɩ Sibima. Ba dɛɛn pɛ tɩɩnɩ dɩm kʋntʋ dɩ yɩra mʋ. Dɩ yɩra badonnǝ dɩ dɛɛn ləri mʋ.
39 Manasɩ bu Makira sɔ-yuu tiinə bam dɛɛn ve Galadɩ tɩʋ kʋm ba kɩ najara ba di-kʋ, yɩ ba zəli Amɔɔrɩ tiinə bam ya na zʋʋrɩ da tɩn. 40 Kʋntʋ ŋwaanɩ Moyisi ma kwe Galadɩ laŋa kam o pa Makira sɔ-yuu tiinə bam sɩ ba taa zʋʋrɩ da. 41 Yayiri na nuŋi Manasɩ dwi dɩm wʋnɩ tɩn, dɩ ma vu o kɩ najara o di Galadɩ nawuurə yam. O ma pa ba lɛɛrɩ ba bəi-ya nɩ ‹Yayiri tɩ-balwa bam›. 42 Noba dɩ ma vu o kɩ najara o di Kenatɩ tɩʋ dɩ kʋ nawuurə yam. O dɛɛn ma pa ba lɛɛrɩ ba bǝi tɩʋ kʋm yɩrɩ nɩ ‹Noba›.