Ba wanɩ Pɛ Ɔgɩ ba di
3
«Kʋntʋ maama na kɩ kʋ ti tɩn, dɩ́ laan ma magɩ dɩ́ yuu Basan seeni. Pɛ Ɔgɩ dɛɛn mʋ yɩ je sɩm kʋntʋ pɛ. O ma nuŋi dɩdaanɩ o jar-kərə bam maama sɩ ba zaŋɩ najara dɩdaanɩ dɩbam Ederi nɩ. 2 Baŋa-Wɛ ma ta dɩ amʋ DƖ wɩ: ‹Nan yɩ ta n kwar-o, sɩ amʋ mʋ lagɩ a kwe Pɛ Ɔgɩ dɩ o jar-kərə bam a kɩ abam jɩŋa nɩ, sɩ á joŋi ba tɩga kam á taá te. Abam nan maŋɩ sɩ á cɔgɩ pɛ wʋm kʋntʋ dɩdaanɩ o nɔɔna bam mʋ nɩnɛɛnɩ á na kɩ Amɔɔrɩ tiinə Pɛ Sɩhɔn na di paarɩ Hesebon nɩ te tɩn.›3 Dɩbam Tu Baŋa-Wɛ dɩm ma sɩɩnɩ DƖ wǝli dɩbam. DƖ dɛɛn kwe Pɛ Ɔgɩ dɩ o nɔɔna bam maama mʋ DƖ kɩ dɩbam jɩa nɩ pa dɩ́ magɩ ba maama dɩ́ gʋ. Ba wʋlʋwʋlʋ wʋ daarɩ. 4 Dɩ́ ma wanɩ tɩɩnɩ dɩm maama Arɩgɔbɩ laŋa kam nɩ Pɛ Ɔgɩ dɛɛn na di o paarɩ Basan nɩ mɛ tɩn. Dɩ yɩ tɩɩnɩ fusɩrdʋ mʋ. Tɩʋ dɛɛn wʋ daarɩ yɩ dɩ́ wʋ di-kʋ. 5 Tɩɩnɩ dɩntʋ maama dɛɛn lɔgɩ mʋ dɩ pɩ dɩ dam. Dɩ kabri sɩm maa tiini sɩ dwara. Luuru mʋ ba dɛɛn ta mɛ ba cɩ tɩɩnɩ dɩm manchoŋo niə yam. Tɩ-balwa dɩ dɛɛn wʋra, yɩ dɩntʋ wʋ fɔgɩ dɩ cɩ kʋntʋ doŋ. 6 Dɩ́ ma yɔɔrɩ dɩ́ cɔgɩ Pɛ Ɔgɩ tɩɩnɩ dɩm maama dɩ́ kɩ-dɩ Wɛ dam kuri nɩ, nɩnɛɛnɩ dɩ́ na maŋɩ dɩ́ cɔgɩ Pɛ Sɩhɔn laŋa kam te tɩn. Dɩ́ ma cɔgɩ dɩ nɔn-biə bam maama: baara, dɩ kaana, dɩdaanɩ biə. 7 Sɩ kʋ na yɩ ba vara bam dɩdaanɩ ba jɩjɩgɩrʋ tɩm, dɩ́ ma vrɩ-tɩ pa tɩ ji dɩ́ nyɩm.
8 Sɩhɔn dɩdaanɩ Ɔgɩ dɛɛn yɩ Amɔn tiinə bam pwa mʋ. Bantʋ paarɩ laŋa kam wʋ Zʋrdɛn bugə kam bubɛ dɩlʋ na yɔɔrɩ wa-puli seeni tɩn mʋ. Ba laŋa kam dɛɛn tʋlɩ ka zɩgɩ Aranon bugə kam nɩ mʋ sɩ ka yi Hɛrmɔn piu kʋm na wʋ baŋa seeni tɩn. Dɩbam dɛɛn ma joŋi je sɩm kʋntʋ maama dɩ́ te. 9 (Sidɔn tiinə bam jɩgɩ Hɛrmɔn piu kʋm ba bǝi wɩ Siriyɔn mʋ. Kʋ daarɩ yɩ Amɔɔrɩ tiinə bam bəi-kʋ wɩ Seniri.) 10 Dɩ́ dɛɛn magɩ najara mʋ dɩ́ vrɩ tɩɩnɩ dɩlʋ maama na wʋ pweeru tɩm laŋa nɩ tɩn. Dɩ́ ta ma wanɩ Galadɩ laŋa kam dɩ Basan maama sɩ kʋ yi Salɛka dɩdaanɩ Ederi. Tɩɩnɩ dɩle dɩm kʋntʋ dɩ dɛɛn tɔgɩ dɩ wʋ Basan laŋa kam nɩ mʋ, mɛ Ɔgɩ na di o paarɩ dɩm tɩn. 11 Pɛ Ɔgɩ dɛɛn mʋ kweeli Refayim tiinə bam jɩŋa nɩ. Ba dɛɛn na mɛ kʋlʋ ba kɩ-o kʋ wʋnɩ tɩn yɩ luuru mʋ ba mɛ ba kɩ-kʋ. Kʋ saŋ-dɩdɔrɔ maŋɩm maa yɩ kantɩa maŋɩm kuni nʋgʋ. Yɩ kʋ daarɩ kʋ saŋ-kukugə seeni maŋɩm maa yɩ kantɩa maŋɩm kuni bɩna. Kʋ daa ta wʋ Amɔn tiinə tɩʋ Raba nɩ mʋ.»a
Zʋrdɛn bugə kam wa-puli seeni tɩga kam
12 «Dɩ́ na joŋi tɩga kam dɩ́ te kʋntʋ tɩn, mʋ amʋ dɛɛn kwe laŋa kadoŋ a pɔɔrɩ a pa Ruban dwi dɩm dɩdaanɩ Gadɩ dwi dɩm. Bantʋ laŋa kam dɛɛn zɩgɩ Aroyɛrɩ tɩʋ kʋm na wʋ Aranon bugə kam ni nɩ tɩn sɩ kʋ taa ve jazɩm baŋa seeni, kʋ wǝli dɩ Galadɩ pweeru laŋa kam cicoro dɩ tɩɩnɩ dɩlʋ na wʋ je sɩm kʋntʋ nɩ tɩn mʋ. 13 Galadɩ tɩga kam cicoro kʋlʋ na daarɩ tɩn mʋ amʋ dɛɛn kwe a pa Manasɩ dwi cicoro kʋm. A ta ma kwe Basan maama a wǝli da a pa-ba. Pɛ Ɔgɩ laŋa kam mʋ kʋntʋ. (Arɩgɔbɩ laŋa kam na wʋ Basan nɩ tɩn mʋ ba dɛɛn jɩgɩ ba bǝi nɩ Refayim tiinə tɩga kam.) 14 Nɔɔnʋ wʋdoŋ dɛɛn maa wʋ Manasɩ dwi dɩm wʋnɩ, o yɩrɩ mʋ Yayiri. Wʋntʋ ma magɩ o vrɩ Arɩgɔbɩ laŋa kam maama o vu o yi Gesuri dɩdaanɩ Maaka sisəm dɩm. O ma pa ba lɛɛrɩ ba bǝi Basan tɩɩnɩ dɩm kʋntʋ wɩ ‹Yayiri tɩɩnɩ›. Kʋ ta yɩ kʋntʋ mʋ dɩ zɩm maama. 15 Sɩ kʋ na yɩ Galadɩ tɩga kam cicoro kʋlʋ na wʋ baŋa seeni tɩn, amʋ dɛɛn kwe-ka a pa Makira na yɩ Manasɩ dwi tu tɩn mʋ. 16 A ma daarɩ a kwe laŋa kalʋ na zɩgɩ Galadɩ nɩ sɩ ka yi Aranon bugə kam tɩtarɩ nɩ tɩn a pa Ruban dwi dɩm dɩdaanɩ Gadɩ dwi dɩm. Ba laŋa kam baŋa seeni sisəm dɩm maa yɩ Yabɔkɩ bugə kam. Amɔn tiinə laŋa kam sisəm mʋ kʋntʋ. 17 Wa-zʋʋrɩ seeni mʋ ba tɩga kam sisəm dɩm dɛɛn tɔgɩ Zʋrdɛn bugə kam, kʋ na zɩgɩ Galile nɩnɩʋ kʋm seeni sɩ kʋ taa ve jagwiə seeni kʋ vu kʋ yi Araba nɩnɩʋ kʋm. (Yɛ nɩnɩʋ kʋm mʋ kʋntʋ.)b Pisiga piu kʋm təŋə maa wʋ tɩga kam wa-puli seeni.
18 Amʋ dɛɛn ma pa abam ni dɩntʋ a wɩ: ‹Dɩbam Tu Baŋa-Wɛ dɩm mʋ kwe tɩga kantʋ DƖ pa abam sɩ á taá te. Abam balʋ nan na yɩ jar-kərə tɩn maŋɩ sɩ á kwe á jara zɩla yɩ á daarɩ á tɔgɩ Yisɩrayɛlɩ dwi tiinə badonnǝ bam yigə á bɛ Zʋrdɛn bugə kam, ba na yɩ á cʋrrʋ tɩn ŋwaanɩ. 19 Sɩ Kʋ daarɩ á kaana, dɩ á biə, dɩdaanɩ á vara bam maama mʋ, á wʋ́ pa bantʋ maŋɩ á tɩɩnɩ dɩlʋ amʋ na maŋɩ a kwe a pa abam tɩn wʋnɩ. Bɛŋwaanɩ a ye nɩ abam vara bam tiini ba daga zanzan. 20 Abam maŋɩ sɩ á wǝli á cʋrrʋ tɩm mʋ sɩ ba jaŋɩ ba di tɩga kalʋ na wʋ Zʋrdɛn bugə kam wa-zʋʋrɩ seeni tɩn. Baŋa-Wɛ nan na tu DƖ pa ba sin dɩ najara yam yɩ ba daarɩ ba jǝni ba tɩga kam nɩ, nɩnɛɛnɩ abam na nɛ te tɩn, abam dɩ laan wʋ́ joori mɛ amʋ na kwe a pa abam tɩn mʋ á taá wʋra.›
21 Maŋa kam kʋntʋ nɩ amʋ dɛɛn kwe ni dɩntʋ a pa Zozwe nɩ: ‹Nmʋ tɩtɩ yi nɛ n Tu Baŋa-Wɛ na tʋŋɩ te dɩdaanɩ pwa bale bantʋ, Sɩhɔn dɩ Ɔgɩ tɩn. Tɩʋ kʋlʋ maama abam nan na wʋ́ vu tɩn, Baŋa-Wɛ ta lagɩ DƖ tʋŋɩ kʋntʋ mʋ ba yɩra nɩ. 22 Kʋntʋ ŋwaanɩ, yɩ taá kwarɩ-na fʋʋnɩ dɩ ba. Abam Tu Baŋa-Wɛ mʋ lagɩ DƖ jaŋɩ DƖ pa abam.› »
Wɛ wʋ sɛ sɩ Moyisi bɛ o vu o zʋ Kaanan tɩga kam
23 «Kantʋ maŋa kam nɩ, a dɛɛn ma tiini a loori Wɛ a wɩ: 24 ‹Yuutu Baŋa-Wɛ, amʋ yɩ n tɩntʋŋnʋ mʋ. Nmʋ laan nan sɩŋɩ sɩ n brɩ-nɩ nmʋ jɩŋa na jɩgɩ dam sɩ n ma n kɩ wo-kɩnkagɩla yalʋ tɩn. Bɛŋwaanɩ, Wɛ dɩdoŋ tǝrǝ wɛyuu nɩ naa tɩga baŋa nɩ sɩ dɩ wanɩ dɩ kɩ nmʋ wo-kamunə yam doŋ. 25 A loori-m, pa amʋ cwǝŋǝ sɩ a dɩ tɔgɩ a bɛ Zʋrdɛn bugə kam a zʋ tɩ-ŋʋŋa kalʋ na wʋ bubɛ dɩdoŋ dɩm nɩ tɩn, sɩ a wanɩ a na zwəənu tɩm laŋa kam na tiini ka lana tɩn, dɩdaanɩ Liban je sɩm.›
26 Baŋa-Wɛ nan wʋ sɛ sɩ DƖ cəgi a wɛ-loro kʋm. Abam kɔgɔ kʋm ŋwaanɩ mʋ DƖ banɩ dɛɛn tiini dɩ zaŋɩ dɩ amʋ, yɩ DƖ ta DƖ brɩ-nɩ DƖ wɩ: ‹Pa kʋ kweeli! Daa n yɩ ŋɔɔnɩ taanɩ dɩm kʋntʋ dɩ amʋ! 27 Za n diini Pigisa piu kʋm yuu nɩ. Dáanɩ mʋ nń wanɩ n nii n kaagɩ tɩga kam je maama. Nii n yigə nɩ, dɩ n kwaga nɩ, kʋ wǝli dɩ n jazɩm dɩ n jagwiə maama. Fɔgɩ n nii n na, bɛŋwaanɩ n bá tɔgɩ n bɛ Zʋrdɛn bugə kam.c 28 Ve n ta dɩ Zozwe sɩ o bɩcarɩ kɩ dam. Kɩ baarɩ n kɩ o kuri nɩ, sɩ wʋntʋ mʋ lagɩ o da amʋ nɔɔna bam yigə sɩ ba bɛ ba zʋ tɩga kam nmʋ na wʋ́ na tɩn. O ta wʋ́ pa ba joŋi-ka ba taa te.›
29 Baŋa-Wɛ na tagɩ kʋntʋ DƖ ti tɩn, dɩ́ dɛɛn ma maŋɩ bolo kʋm kʋntʋ seeni, kʋ na twɛ dɩdaanɩ Bɛt-Pewɔrɩ tɩn.»