Ba kaagɩ kagʋa kam nɩ ba beerǝ
2
«Dɩ́ dɛɛn ma kɩ te Baŋa-Wɛ na tagɩ dɩ amʋ tɩn. Dɩ́ ma zaŋɩ dɩ́ pipiri dɩ kwe cwǝŋǝ kalʋ na maa ve Nanɩ-sʋŋʋ kʋm seeni tɩn, sɩ dɩ́ vu dɩ́ zʋ kagʋa kam wʋnɩ. Dɩ́ ma tiini dɩ́ beeri taan dɩ́ jijirə yɩ dɩ́ kɩkarɩ dɩ́ kaagɩ Edɔm pweeru tɩm laŋa kam nɩ.2 Baŋa-Wɛ dɛɛn ma ta dɩ amʋ DƖ wɩ:
3 ‹Abam tiini á kɩkarɩ pweeru tɩntʋ laŋa kam nɩ á dáanɩ zanzan. Kʋ laan maŋɩ mʋ sɩ á pipiri á taá ve jazɩm baŋa seeni. 4 Nan pa nɔɔna bam amʋ niə yantʋ: Abam laan lagɩ á tɔgɩ Esawu dwi tiinə bam tɩga kam nɩ mʋ á kɛ. Bantʋ yɩ á cʋrrʋ yɩ ba zʋʋrɩ Edɔm laŋa kam nɩ. Baá taa kwarɩ fʋʋnɩ dɩ abam. Nan zuri-na á yɩra dɩ ba. 5 Yɩ zaŋɩ á gwɩn ba najara. Bɛŋwaanɩ, amʋ ba lagɩ a kwe ba tɩga kam a pa abam, dɩ ka na-baarɩ yi dɩdʋa dɩ. Amʋ maŋɩ a kwe Edɔm pweeru laŋa kam mʋ a pa Esawu dwi dɩm sɩ ba taa te. 6 Á na maa tɔgɩ ba tɩga kam wʋnɩ á kɛa, á wʋ́ wanɩ á ma səbu-sɩŋa á yəgi wʋdiiru dɩdaanɩ na ba tee nɩ.›
7 Abam Tu Baŋa-Wɛ dɩm maŋɩ DƖ kɩ zaanɩ abam yuu nɩ pa kʋlʋ maama á na jɩgɩ á tʋŋɩ tɩn kɩ lanyɩranɩ. Á dɛɛn na beeri kagʋa kantʋ je sɩm maama wʋnɩ tɩn, DƖ jɩgɩ abam mʋ DƖ niə. Bɩna fiinna yantʋ maama wʋnɩ DƖ wʋ abam tee nɩ, yɩ á naɩ woŋo kʋlʋ maama á na gɛ tɩn.
8 Kʋntʋ ŋwaanɩ mʋ, dɩ́ tɔgɩ Edɔm laŋa kam wʋnɩ mɛ dɩ́ cʋrrʋ Esawu dwi tiinə bam na zʋʋrɩ tɩn dɩ́ kɛ. Dɩ́ ma lɔŋɩ cwǝŋǝ kalʋ na tɔgɩ Araba tɩ-kamparɩ ka kɛ tɩn. Cwǝŋǝ kam kʋntʋ zɩgɩ jagwiə seeni mʋ Elatɩ dɩ Ezion-Gebɛrɩ nɩ. Dɩ́ laan ma pipiri dɩ́ kwe kagʋa cwǝŋǝ kalʋ na maa ve Moabɩ tɩn.
9 Baŋa-Wɛ daa ma ta dɩ amʋ DƖ wɩ: ‹Yɩ daanɩ-na Moabɩ tiinə bam, sɩ ba yɩ Lɔtɩ dwi dɩm mʋ. Yɩ kwaarɩ-na najara dɩ ba, sɩ amʋ mʋ maŋɩ a kwe Ara je sɩm a pa-ba. A ba lagɩ a pa abam ba tɩga kam.›
10 Emimi tiinə dɛɛn ya mʋ zʋʋrɩ laŋa kam kʋntʋ nɩ. Bantʋ dɛɛn jɩgɩ dam yɩ ba kɔgɔ kʋm gaalɩ. Ba maa yɩ nɔn-sawaara sɩ kʋ maŋɩ dɩ Anakɩ tiinə bam na yɩ te tɩn. 11 Nɔɔna dɛɛn yǝni ba pa Emimi dwi dɩm dɩ Anakɩ dwi dɩm yɩ Refayim tiinə mʋ. Moabɩ tiinə bam dɩ maa bǝi-ba wɩ Emimi tiinə. 12 Kʋ nan na yɩ Edɔm laŋa kam, Hori tiinə mʋ ya zʋʋrɩ je sɩm kʋntʋ nɩ. Esawu dwi tiinə bam laan ma zaŋɩ ba baŋa nɩ yɩ ba daarɩ ba zəli-ba. Ba na cɔgɩ ba tɩʋ kʋm kʋntʋ tɩn, ba ma joŋi ba tɩga kam ba te, sɩ kʋ maŋɩ dɩ Yisɩrayɛlɩ tiinə bam dɩ na lagɩ ba kɩ te ba zəli ba dʋna ba daarɩ ba joŋi tɩga kalʋ Baŋa-Wɛ na kwe DƖ pa-ba tɩn.
13 Baŋa-Wɛ laan ma pa dɩbam ni sɩ dɩ́ zaŋɩ dɩ́ bɛ Zerɛdɩ bugə kam. Dɩbam dɛɛn ma sɩɩnɩ dɩ́ kɩ kʋntʋ. 14 Bɩna fiintɔ-nana tɩtarɩ nɩ mʋ dɩ́ kwe dɩ́ ma dɩ́ zɩgɩ Kadese-Baranɩa nɩ dɩ́ vu dɩ́ yi Zerɛdɩ bugə kam dɩ́ bɛ. Kʋ dɛɛn kɩ kʋntʋ yɩ balʋ maama ya na maŋɩ ba yi jara-kǝm pulim nɩ tɩn laan tu ba tɩ, nɩnɛɛnɩ Baŋa-Wɛ dɛɛn na dugi durə nɩ ba lagɩ ba tɩ kagʋa kam nɩ te tɩn mʋ. 15 Kʋ dɛɛn yɩ Baŋa-Wɛ tɩtɩ jɩŋa mʋ DƖ mɛ DƖ cɔgɩ-ba, sɩ kʋ pa ba maama tɩ dɩdʋa dɩdʋa ba vu ba ti.
16 Jar-kərə bam kʋntʋ dwi dɩm na tɩga maama yɩ ba wʋlʋwʋlʋ daa tǝrǝ Yisɩrayɛlɩ tiinə kɔgɔ kʋm wʋnɩ tɩn, 17 mʋ Baŋa-Wɛ tagɩ DƖ brɩ amʋ DƖ wɩ: 18 ‹Zɩm dɛ dɩm nɩ mʋ abam wʋ́ tɔgɩ Moabɩ tiinə tɩʋ Ara seeni á kɛ. 19 Á laan maa wʋ́ zʋ Amɔn tiinə laŋa kam. Taá ye-na sɩ á yɩ daanɩ-ba. Yɩ kwaarɩ-na najara dɩ ba, sɩ amʋ ba lagɩ a pa abam Amɔn tiinə tɩga kam. Amʋ maŋɩ a kwe tɩga kam kʋntʋ mʋ a pa Lɔtɩ dwi tiinə bam sɩ ba taa te-ka.›
20 Je sɩm kʋntʋ maama dɩ dɛɛn yɩ Refayim tiinə tɩga mʋ. Bantʋ badonnǝ maa zʋʋrɩ ka wʋnɩ. Amɔn tiinə bam dɛɛn jɩgɩ-ba ba bǝi nɩ Zamzumi tiinə mʋ. 21 Bantʋ dɛɛn jɩgɩ dam yɩ ba kɔgɔ kʋm gaalɩ. Ba maa yɩ nɔn-sawaara sɩ kʋ maŋɩ dɩ Anakɩ tiinə bam na yɩ te tɩn. Dɩ kʋntʋ maama, Baŋa-Wɛ mʋ cɔgɩ-ba pa Amɔn tiinə bam wanɩ ba zəli-ba yɩ ba daarɩ ba joŋi ba tɩga kam ba te. 22 Baŋa-Wɛ dɛɛn ya maŋɩ DƖ kɩ kʋntʋ doŋ mʋ DƖ wǝli Esawu dwi tiinə bam na zʋʋrɩ Edɔm nɩ tɩn. DƖ dɛɛn ya cɔgɩ Hori tiinə bam mʋ pa Edɔm tiinə bam wanɩ ba zəli-ba yɩ ba daarɩ ba joŋi ba tɩga kam. Ba ta zʋʋrɩ da dɩ zɩm maama. 23 Kʋ daa ta na yɩ Awa tiinə bam, bantʋ dɛɛn zʋʋrɩ tɩ-balwa balʋ na wʋ Mediterane nɩnɩʋ kʋm ni nɩ tɩn, sɩ kʋ taa ve Gaza tɩʋ kʋm seeni. Filisi tiinə bam na nuŋi Kaftɔrɩ nɩ tɩn ma gʋ-ba, yɩ ba daarɩ ba joŋi Awa tiinə tɩga kam ba zʋʋrɩ da.
24 Baŋa-Wɛ ta ma ta dɩbam DƖ wɩ: ‹Zaŋɩ-na á kwalɩmɩ á zɩla yam sɩ á vu á bɛ Aranon bugə kam. Nii-na yo! Amʋ mʋ lagɩ a kwe Hesebon tɩʋ Pɛ Sɩhɔn a kɩ abam jɩŋa nɩ sɩ á wan‑o á di. A maa wʋ́ kwe o tɩga kam dɩ a pa abam. Ve-na á zaŋɩ najara dɩd-o, sɩ á daarɩ á joŋi o je sɩm á taá te. 25 Kʋ zɩgɩ zɩm dɛ dɩm nɩ sɩ kʋ taa veǝ, amʋ lagɩ a pa lʋgʋ baŋa tɩɩnɩ dɩm maama taa kwarɩ abam fʋʋnɩ mʋ. Ba na maŋɩ ba ni abam ŋwa, kʋ maŋɩ sɩ ba yɩra mʋ taa saɩ vagɩ vagɩ yɩ ba bɩcara di abam ŋwaanɩ.› »
Ba di Pɛ Sɩhɔn najara baŋa nɩ
26 «Dɩbam dɛɛn ta na wʋ Kedemɔtɩ kagʋa kam nɩ tɩn, mʋ amʋ tʋŋɩ kwǝrǝ a pa Hesebon tɩʋ Pɛ Sɩhɔn. A dɛɛn tagɩ dɩd-o mʋ sɩ o pa dɩ́ kɩ ni-mɔrɔ daanɩ sɩ najara yɩ taa wʋra dɩ́ tɩtarɩ nɩ. 27 A ma ta a wɩ: ‹Dɩbam na maa tɔgɩ nmʋ tɩʋ kʋm nɩ dɩ́ kɛa, dɩ́ wʋ́ kwe cwǝŋǝ mʋ yɔɔrɔ-tɔtɔ dɩ́ taa veǝ. Dɩ́ ba lagɩ dɩ́ ywəri jazɩm naa jagwiə seeni. 28 Wʋdiu kʋlʋ maama dɩ́ na wʋ́ di, dɩdaanɩ na balʋ dɩ́ na wʋ́ nyɔ tɩn, dɩ wʋ́ yəgi abam tee nɩ. Nan pa dɩbam pwələ sɩ dɩ́ tɔgɩ á je sɩm nɩ dɩ́ kɛ. 29 Dɩbam nan maŋɩ sɩ dɩ́ vu dɩ́ yi Zʋrdɛn bugə kam mʋ sɩ dɩ́ bɛ-ka dɩ́ kɛ. Nan taá ye-na nɩ: Esawu dwi tiinə balʋ na zʋʋrɩ Edɔm nɩ tɩn dɩdaanɩ Moabɩ tiinə bam na zʋʋrɩ Ara nɩ tɩn maŋɩ ba pa dɩbam pwələ pa dɩ́ tɔgɩ ba laŋa kam nɩ dɩ́ kɛ.›
30 Pɛ Sɩhɔn dɛɛn ma vɩn amʋ kwǝrǝ kam kʋntʋ. O wʋ sɛ sɩ o pa dɩbam pwələ sɩ dɩ́ tɔgɩ o tɩga kam baŋa nɩ dɩ́ kɛ. Bɛŋwaanɩ, dɩbam Tu Baŋa-Wɛ dɛɛn mʋ pɛ Sɩhɔn wʋʋ kʋm kɩ dam, sɩ DƖ na pwələ DƖ kɩ-o á dam kuri nɩ, nɩnɛɛnɩ kʋ laan na yɩ te lele tɩntʋ tɩn.
31 Baŋa-Wɛ laan ma ta dɩ amʋ DƖ wɩ: ‹Nii-na! Amʋ lagɩ a kwe Pɛ Sɩhɔn dɩ o tɩʋ kʋm mʋ a kɩ abam jɩŋa nɩ. Nan ve-na yigə sɩ á magɩ najara dɩ ba á joŋi ba tɩga kam á taá te.›
32 Yahazɩ nɩ mʋ Pɛ Sɩhɔn dɩ o nɔɔna bam dɛɛn nuŋi sɩ ba zaŋɩ najara dɩdaanɩ dɩbam. 33 Dɩbam Tu Baŋa-Wɛ ma kwe‑o DƖ kɩ dɩbam jɩŋa nɩ. Dɩ́ ma mag-o dɩ́ gʋ, yɩ dɩ́ daarɩ dɩ́ gʋ o biə dɩdaanɩ o nɔɔna bam maama dɩ́ wǝli da. 34 Dɩ́ ma yɔɔrɩ dɩ́ cɔgɩ Pɛ Sɩhɔn tɩɩnɩ dɩm maama dɩ́ kɩ-dɩ Wɛ dam kuri nɩ. Dɩ́ ta ma cɔgɩ dɩ nɔn-biə bam maama: baara, dɩ kaana dɩdaanɩ biə. Nɔɔn-nɔɔnʋ dɛɛn wʋ daarɩ. 35 Sɩ kʋ na yɩ ba vara bam dɩdaanɩ ba jɩjɩgɩrʋ tɩm, dɩ́ vrɩ-tɩ pa tɩ ji dɩ́ nyɩm mʋ. 36 Dɩbam Tu Baŋa-Wɛ dɩm mʋ wǝli dɩbam yɩ dɩ́ di tɩɩnɩ dɩm maama. Kʋ na zɩgɩ Aroyɛrɩ tɩʋ na wʋ Aranon bolo kʋm ni nɩ tɩn, dɩdaanɩ tɩʋ kʋlʋ na wʋ bolo kʋm tɩtarɩ nɩ tɩn, sɩ kʋ taa ve Galadɩ laŋa kam tɩn mʋ dɩ́ wanɩ maama. Tɩʋ dɛɛn tərə, dɩbam na wʋ joŋi. 37 Kʋntʋ maama baŋa nɩ, dɩ́ ta sɛ mʋ sɩ dɩ́ kɩ tɩte dɩ́ Tu Baŋa-Wɛ dɩm na brɩ dɩbam tɩn. Dɩ́ dɛɛn wʋ zʋ Amɔn tiinə bam je sɩm. Kʋ na yɩ tɩga kalʋ na wʋ Yabɔkɩ bugə kam ni seeni tɩn, dɩ tɩɩnɩ dɩlʋ na wʋ zwəənu tɩm laŋa kam nɩ tɩn, dɩ́ wʋ zaŋɩ najara je sɩm kʋntʋ nɩ.»