Yisɩrayɛlɩ tiinə bam wanɩ Kaanan tiinə bam
21
Arada tɩʋ pɛ dɛɛn mʋ wʋra. O maa yɩ Kaanan dwi tu yɩ o zʋʋrɩ jagwiə seeni kagʋa kam nɩ. O ma ni nɩ Yisɩrayɛlɩ tiinə bam wʋ Atarim cwǝŋǝ kam nɩ mʋ ba ve ba bɩɩnɩ o je sɩm. O ma nuŋi o jeeri-ba dɩ najara yɩ o ja ba badaara o pɩ. 2 Yisɩrayɛlɩ tiinə bam ma du durə dɩ Baŋa-Wɛ ba wɩ: «Nmʋ na wǝli pa dɩ́ wanɩ nɔɔna bantʋ dɩ́ di, dɩbam dɩ goni ni sɩ dɩ́ yɔɔrɩ dɩ́ cɔgɩ ba tɩɩnɩ dɩm maama dɩ́ pa nmʋ.» 3 Baŋa-Wɛ ma cəgi ba wɛ-loro kʋm yɩ DƖ sɛ DƖ wǝli-ba pa ba di Kaanan tiinə bam. Ba ma yɔɔrɩ ba cɔgɩ ba tɩɩnɩ dɩm dɩ dɩ nɔn-biə bam. Kʋntʋ ŋwaanɩ mʋ ba bəŋi je sɩm yɩrɩ nɩ Horama.aCanna bɩsankwɩa kam
4 Yisɩrayɛlɩ tiinə bam dɛɛn na zaŋɩ Hɔrɩ piu kʋm nɩ tɩn, kʋ maŋɩ sɩ ba kaagɩ ba yagɩ Edɔm laŋa kam dáa nɩ mʋ. Ba ma kwe Nanɩ-sʋŋʋ cwǝŋǝ kam ba kɛ. Ba nan na wʋ cwǝŋǝ nɩ ba ve tɩn, mʋ nɔɔna bam daa wʋ wanɩ ba ja ba tɩtɩ. 5 Ba maa puli Wɛ daanɩ Moyisi coom, ba tɛ ba wɩ: «Moyisi, bɛɛ mʋ yɩ nmʋ yɔɔrɩ n ja dɩbam n nuŋi Ezipi wʋnɩ, sɩ dɩ́ ba dɩ́ tɩ kagʋa kantʋ wʋnɩ? Wʋdi-ŋʋŋʋ tǝrǝ yo seeni. Na dɩ maa tǝrǝ sɩ dɩ́ nyɔ. Dɩ́ yɩra dɩ laan cɛ dɩ wʋdi-yɔɔ kʋntʋ.»b
6 Baŋa-Wɛ ma pa bɩsankwɩ sɩlʋ ni na cana tɩn tʋ Yisɩrayɛlɩ tiinə bam wʋnɩ, yɩ sɩ dʋnɩ ba zanzan sɩ gʋ. 7 Nɔɔna bam badonnǝ ma vu Moyisi te ba ta ba wɩ: «Dɩ́ na ŋɔɔnɩ dɩ́ cɔgɩ Baŋa-Wɛ dɩ nmʋ tɩn, kʋ yɩ lwarɩm mʋ dɩ́ kɩa. Nan loori Baŋa-Wɛ n pa dɩbam, sɩ DƖ pa bɩsankwɩ sɩntʋ viiri sɩ daarɩ dɩbam.» Moyisi dɩ ma loori Wɛ o pa nɔɔna bam.
8 Baŋa-Wɛ ma ta dɩ Moyisi DƖ wɩ: «Nan yɔɔrɩ n mɔ bɩsankwɩa, sɩ n daarɩ n kwe-ka n lə daa yɩra nɩ. Bɩsankwɩ sɩm na dʋnɩ wʋlʋ maama, kʋ tu wʋ́ kwǝni o nii-ka sɩ o ma joŋi o ŋwɩa.» 9 Moyisi ma kwe canna o ma o mɔ bɩsankwɩa o daarɩ o lə-ka daa yɩra nɩ o zɩgɩ-ka dəki. Wʋlʋ maama bɩsankwɩ sɩm na dʋnɩ yɩ o kwǝni o nii canna bɩsankwɩa kam tɩn mʋ joŋi o ŋwɩa o yagɩ.c
Ba kwe cwǝŋǝ ba maa ve Moabɩ
10 Yisɩrayɛlɩ tiinə bam daa ma zaŋɩ ba vu ba yi Obotɩ tɩʋ ba jǝni da. 11 Ba ma zɩgɩ Obotɩ nɩ, ba zaŋɩ ba vu ba yi Ye-Abarim ba jǝni da. Je sɩm kʋntʋ maa yɩ Moabɩ wa-puli seeni kagʋa kam nɩ mʋ. 12 Ba daa ma zaŋɩ dáanɩ ba vu ba jǝni Zerɛdɩ nabara kam ni nɩ. 13 Ba laan ma zaŋɩ ba vu ba bɛ Aranon bugə kam, yɩ ba vu ba jǝni kagʋa kalʋ na wʋ Amɔɔrɩ tiinə laŋa kam sisəm ni nɩ tɩn. Aranon bugə kam dɛɛn mʋ yɩ sisəm na tigi Moabɩ tiinə bam dɩ Amɔɔrɩ tiinə bam tɩtarɩ nɩ tɩn. 14 Kʋntʋ ŋwaanɩ nan mʋ te Baŋa-Wɛ Jara-kǝm Tɔnɔ kʋm tagɩ je sɩm kʋntʋ taanɩ nɩ:
«Wahɛbɩ tɩʋ na wʋ Sufa laŋa nɩ, dɩ kʋ nabarɩ sɩm, dɩ Aranon bugə kam, 15 dɩ nabarɩ sɩm siswəəru tɩm kʋntʋ na tigi Moabɩ sisəm ni nɩ, yɩ tɩ kɛ tɩ yi Ara tɩʋ tɩn.»
16 Ba ma zɩgɩ je sɩm kʋntʋ nɩ ba vu ba yi Beeri tɩʋ. Vʋlɩ maa wʋ tɩʋ kʋm kʋntʋ nɩ, yɩ dáanɩ mʋ Baŋa-Wɛ dɛɛn tagɩ dɩ Moyisi DƖ wɩ: «La nɔɔna bam n kɩ daanɩ sɩ a lagɩ a pa-ba na mʋ sɩ ba nyɔ.» 17 Kantʋ maŋa nɩ mʋ Yisɩrayɛlɩ tiinə bam leeni ləŋə kantʋ ba wɩ:
«Vʋlɩ dɩm na buri na
dɩ pa dɩbam tɩn,
dɩbam dɩ wʋ́ kɩ wʋpolo
yɩ dɩ́ leeni le!
18 Pwa mʋ kʋgɩ vʋlɩ dɩm!
Nadunə dɩ ma fɔgɩ-dɩ!
Ba kwe ba paarɩ nace sɩm mʋ
ba kʋ-dɩ!»
Yisɩrayɛlɩ tiinə bam dɛɛn ma zaŋɩ kagʋa kam nɩ ba vu ba jǝni Matana nɩ. 19 Ba maa zaŋɩ Matana nɩ ba vu Nahaliyɛlɩ. Ba daa zɩgɩ da ba vu ba yi Bamoti. 20 Ba ma zɩgɩ Bamoti nɩ ba vu ba yi bolo kʋdoŋ na wʋ Moabɩ laŋa kam nɩ tɩn. Ba ma jǝni mɛ na twɛ dɩ Pisiga piu kʋm tɩn. Piu kʋm yuu maa yɔɔrɩ kʋ jeeri kagʋa kam seeni.
Ba na di Pɛ Sɩhɔn dɩ Pɛ Ɔgɩ te tɩn
21 Yisɩrayɛlɩ tiinə bam dɛɛn ma tʋŋɩ kwǝrǝ ba pa Amɔɔrɩ tiinə Pɛ Sɩhɔn, yɩ ba wɩ:
22 «Dɩ́ loori nmʋ mʋ sɩ n pa dɩbam cwǝŋǝ sɩ dɩ́ tɔgɩ n tɩga kam baŋa dɩ́ kɛ. Dɩ́ bá ywəri cwǝŋǝ kam nɩ dɩ́ tɔgɩ á karɩ dɩ á kadwi seeni. Dɩ́ maŋɩ dɩ́ bá mɔ na á vʋla yam nɩ dɩ́ nyɔ. Dɩ́ nan wʋ́ yɔɔrɩ dɩ́ tʋlɩ cwə-fara kam yɩranɩ mʋ taan sɩ dɩ́ vu dɩ́ bɛ abam laŋa kam.»
23 Pɛ Sɩhɔn ma vɩn sɩ Yisɩrayɛlɩ tiinə bam tɔgɩ o laŋa kam nɩ ba kɛ. O ma bəŋi o jar-kərə bam maama o kɩ daanɩ, yɩ ba nuŋi ba vu kagʋa kam wʋnɩ sɩ ba jeeri Yisɩrayɛlɩ tiinə bam. Ba na yi Yahaza seeni tɩn, mʋ ba dɛɛn zaŋɩ najara dɩ ba. 24 Yisɩrayɛlɩ tiinə bam dɛɛn ma di-ba. Ba ma vrɩ ba tɩga kam ba te, kʋ zɩgɩ Aranon bugə kam ni nɩ, sɩ kʋ yi Yabɔkɩ bugə kam. Ba nan wʋ bɛ Yabɔkɩ bugə kam ba kɛ, kʋ na yɩ Amɔn tiinə bam sisəm dɩm yɩ dɩ fɔgɩ dɩ cɩ dɩ dam tɩn ŋwaanɩ. 25 Yisɩrayɛlɩ tiinə bam dɛɛn vrɩ Amɔɔrɩ tiinə tɩɩnɩ dɩm maama, dɩ ba tʋ-fɔrɔ Hesebon dɩ kʋ nawuurə yam mʋ. Ba maa lɛɛrɩ ba zʋʋrɩ dɩ wʋnɩ. 26 Hesebon yɩ tɩʋ kʋlʋ Amɔɔrɩ tiinə Pɛ Sɩhɔn na je o di o paarɩ kʋ wʋnɩ tɩn mʋ. O dɛɛn nan ya kɩ najara dɩ Moabɩ tiinə bam pɛ mʋ, pa o vrɩ ba tɩga kam maama sɩ kʋ vu kʋ yi Aranon bugə kam seeni.
27 Kʋntʋ ŋwaanɩ nan mʋ te lən-leenə bam yǝni ba zuli Hesebon tɩʋ kʋm ba wɩ:
«Ba-na á zʋ Hesebon tɩʋ kʋm wʋnɩ,
sɩ á joori á fɔgɩ á lɔ-kʋ.
Pa-na sɩ Pɛ Sɩhɔn tʋ-fɔrɔ kʋm
zɩgɩ dɩ dam!
28 Min-fɔrɔ dɛɛn nuŋi Pɛ Sɩhɔn tɩʋ Hesebon wʋnɩ
kʋ jagɩ kʋ di Moabɩ tɩʋ Ara,
dɩ nadunə balʋ na zʋʋrɩ
Aranon pweeru tɩm wʋnɩ tɩn.
29 Moabɩ tiinə bam, lɛɛrʋ yi abam!
Abam balʋ na zuli á jwəm Kemɔsɩ tɩn,
cɔgɩm tʋ abam baŋa nɩ!
Á jwəm dɩm vɩn abam mʋ
pa Amɔɔrɩ tiinə Pɛ Sɩhɔn coori abam.
Á baara ma duri ba jagɩ je maama saɩ!
O ma zi á bukwa o ja o viiri.
30 Dɩbam laan nan yɔɔrɩ
dɩ́ wanɩ-ba dɩ́ di mʋ,
kʋ zɩgɩ Hesebon nɩ
sɩ kʋ yi Dibɔn seeni.
Dɩ́ cɔgɩ-ba mʋ sɩ kʋ vu kʋ yi Nofa,
sɩ kʋ ta yi Medɩba seeni.»
31 Yisɩrayɛlɩ tiinə bam dɛɛn na jǝni Amɔɔrɩ tiinə tɩga kam nɩ tɩn, 32 mʋ Moyisi tʋŋɩ nɔɔna sɩ ba vu ba ŋɔ ba nii Yazɛrɩ tɩʋ kʋm. Ba na nii-kʋ tɩn, Yisɩrayɛlɩ tiinə bam ma vu ba di tɩʋ kʋm kʋntʋ dɩ kʋ nawuurə yam. Ba ma zəli Amɔɔrɩ tiinə bam na zʋʋrɩ je sɩm kʋntʋ nɩ tɩn.
33 Kʋ kwaga nɩ mʋ Yisɩrayɛlɩ tiinə bam pipiri ba kwe Basan cwǝŋǝ kam ba veǝ. Basan tɩʋ Pɛ Ɔgɩ ma nuŋi dɩ o jar-kərə bam maama o vu o jeeri-ba Ederi nɩ sɩ ba zaŋɩ najara.
34 Baŋa-Wɛ dɛɛn ma ta dɩ Moyisi DƖ wɩ: «Yɩ tan fʋna dɩ Pɛ Ɔgɩ. Amʋ lagɩ a kwe pɛ wʋm dɩ o nɔɔna bam maama a kɩ nmʋ jɩŋa nɩ, sɩ á joŋi ba tɩga kam á taá te mʋ. Abam nan maŋɩ sɩ á cɔgɩ pɛ wʋm kʋntʋ dɩdaanɩ o nɔɔna bam mʋ nɩnɛɛnɩ á na kɩ Amɔɔrɩ tiinə Pɛ Sɩhɔn na di paarɩ Hesebon nɩ te tɩn.»
35 Yisɩrayɛlɩ tiinə bam ma yɔɔrɩ ba ti Pɛ Ɔgɩ, dɩ o biə, dɩ o jar-kərə bam maama pa nɔɔn-nɔɔnʋ daa wʋ daarɩ. Ba maa lɛɛrɩ ba zʋʋrɩ o tɩga kam nɩ.