Pɛ Balakɩ bəŋi Balam sɩ o ba o zən‑o
22
Yisɩrayɛlɩ tiinə bam dɛɛn ma gɔ ba vwə yam ba vu ba yi Moabɩ laŋa kam tɩ-kamparɩ ba jǝni da. Je sɩm kʋntʋ wʋ Zʋrdɛn bugə kam ni nɩ mʋ yɩ Zeriko dɩ wʋ bubɛ dɩdoŋ dɩm seeni.2 Zipʋre bu Balakɩ dɛɛn mʋ yɩ Moabɩ tɩʋ pɛ. O ma lwarɩ kʋlʋ maama Yisɩrayɛlɩ tiinə bam na kɩ dɩ Amɔɔrɩ tiinə bam tɩn. 3 Fʋʋnɩ ma tiini dɩ zʋ o dɩ o nɔɔna bam, Yisɩrayɛlɩ tiinə bam kɔgɔ kʋm na daga tɩn ŋwaanɩ. Moabɩ tiinə bam nagwələ ma tɩ Yisɩrayɛlɩ tiinə bam ŋwaanɩ. 4 Ba ma ta dɩ Madian tiinə nakwa bam ba wɩ: «Yisɩrayɛlɩ tiinə kɔgɔ kʋm lagɩ kʋ ba kʋ cɔgɩ dɩbam dɩ dɩ́ wǝǝnu tɩm maama, nɩ na-bɩa na yɔɔrɩ ka gaanɩ gaa pwələ nɩ te tɩn mʋ.»
5 Moabɩ Pɛ Balakɩ dɛɛn tʋŋɩ kwǝrǝ o pa Bewɔrɩ bu Balam sɩ o ba o te. Balam dɛɛn zʋʋrɩ Amawa tɩʋ kʋdoŋ nɩ, kʋ yɩrɩ mʋ Petɔrɩ. Kʋ dɛɛn wʋ Efratɩ bugə kam ni nɩ mʋ. Pɛ Balakɩ maa wɩ:
«Nɔn-dwi dɩdoŋ mʋ zɩgɩ Ezipi nɩ ba ba yo seeni. Ba yɔɔrɩ ba jagɩ je maama mʋ, yɩ ba laan ba ba jǝni amʋ tɩga kam ni nɩ. 6 Nɔɔna bam kʋntʋ dana ba dwe dɩbam. Nan ba n sɔɔlɩ lwarɩm n yagɩ ba yɩra nɩ, sɩ kʋ pa dɩ́ wanɩ-ba dɩ́ zəli sɩ ba viiri ba daarɩ dɩbam. Amʋ ye nɩ nmʋ na yǝni n loori Wɛ sɩ DƖ kɩ wʋlʋ lanyɩranɩ, kʋntʋ tu wʋ́ sɩɩnɩ o na yu-yoŋo Wɛ tee nɩ. Kʋ daarɩ nmʋ na sɔɔlɩ lwarɩm n daŋɩ wʋlʋ yuu nɩ, kʋ tu wʋ́ sɩɩnɩ o na lɛɛrʋ mʋ.»
7 Moabɩ dɩ Madian tiinə nakwa bam ma zaŋɩ sɩ ba vu Balam te. Ba ma kwe kwǝrǝ sɩ ba ŋwɩ‑o o yi-nɛɛrɩ tɩtʋŋɩ dɩm ŋwaanɩ. Ba na yi da tɩn mʋ ba pɛ‑o Balakɩ ni dɩm.
8 Balam ma lǝri-ba o wɩ: «Maŋɩ-na yo seeni á pəni, sɩ tɩga na pʋʋrɩ, sɩ a laan ləri á taanɩ dɩm, nɩ Baŋa-Wɛ na vɩɩrɩ DƖ wʋbʋŋa DƖ brɩ-nɩ te tɩn.» Moabɩ dɩdɛɛra bam ma maŋɩ o sɔŋɔ nɩ ba pəni.
9 Tɩtɩɩ nɩ, Baŋa-Wɛ ma ba Balam te yɩ DƖ wɩ: «Nɔɔna bantʋ yɩ bran mʋ yɩ ba ba nmʋ sɔŋɔ?» 10 Balam ma ləri o wɩ: «Moabɩ tɩʋ Pɛ Balakɩ mʋ tʋŋɩ-ba sɩ ba ba ba ta dɩ amʋ nɩ: 11 nɔn-dwi dɩdoŋ mʋ nuŋi Ezipi nɩ ba ba ba jagɩ tɩga kam baŋa maama. O laan maa lagɩ sɩ a vu o te, sɩ a sɔɔlɩ lwarɩm a daŋɩ ba baŋa nɩ, sɩ o wanɩ-ba o zəli sɩ ba viiri ba daarɩ‑o.»
12 Wɛ ma ta dɩd-o DƖ wɩ: «Yɩ sɛ n tɔgɩ Balakɩ tɩntʋŋna bam kwaga sɩ á vu o te. Nan yɩ sɔɔlɩ lwarɩm n daŋɩ nɔn-kɔgɔ kʋm kʋntʋ baŋa nɩ, sɩ amʋ maŋɩ a kɩ ba yu-yoŋo mʋ.»
13 Tɩga na pʋʋrɩ tɩn, Balam ma yi Balakɩ tɩntʋŋna bam te yɩ o ta dɩ ba o wɩ: «Joori-na á tɩtɩ tɩʋ, sɩ Baŋa-Wɛ vɩn sɩ a da dɩ abam a vu.» 14 Moabɩ tiinə dɩdɛɛra bam ma zaŋɩ ba joori ba vu ba ta dɩ Balakɩ ba wɩ: «Balam wʋ sɛ sɩ o tɔgɩ dɩbam sɩ dɩ́ ba nmʋ te.»
15 Balakɩ daa ma tʋŋɩ o dɩdɛɛra badonnǝ sɩ ba vu Balam te. Bantʋ tiini ba yɩ nadunə, yɩ ba daga ba dwe dayigə nɔɔna bam. 16 Ba na yi Balam te tɩn, mʋ ba wɩ: «Zipʋre bu Balakɩ tʋŋɩ ni o wɩ: n yɩ pa kʋlʋkʋlʋ cɩ-m sɩ n ba wʋm te. 17 N nan na tuǝ, Balakɩ wʋ́ pa‑m kwǝrǝ yalʋ maama n na lagɩ tɩn. O ta wʋ́ kɩ kʋlʋ maama n na lagɩ sɩ o kɩ o pa‑m tɩn. Nan yɔɔrɩ n ba n sɔɔlɩ lwarɩm n daŋɩ nɔɔna bam yuu nɩ n pa‑o.»
18 Balam maa wʋ sɛ yɩ o lǝri-ba o wɩ: «Pɛ Balakɩ na maŋɩ o lɔ sɔ-fɔrɔ mʋ, yɩ o laan su kʋ ni dɩ səbu-sɩŋa dɩdaanɩ səbu-poŋo sɩ o kwe o pa-nɩ dɩ, amʋ ta bá wanɩ a vɩn ni dɩlʋ amʋ Tu Baŋa-Wɛ dɩm na kwe DƖ pa-nɩ tɩn. A ba jɩgɩ cwǝŋǝ sɩ a kɩ wo-kamunu naa wo-balaŋa dɩ, yɩ kʋ daɩ kʋlʋ Baŋa-Wɛ na pɛ amʋ ni sɩ a kɩ tɩn. 19 Nan maŋɩ-na yo seeni á pəni, nɩnɛɛnɩ á donnǝ bam daama na kɩ te tɩn. Amʋ ta wʋ́ nii Baŋa-Wɛ jɩgɩ bʋbʋŋɩ dɩdoŋ sɩ DƖ daa vɩɩrɩ DƖ brɩ-nɩ na?»
20 Tɩtɩɩ dɩm kʋntʋ nɩ, Baŋa-Wɛ ma ta dɩ Balam DƖ wɩ: «Nɔɔna bam na tu sɩ ba bǝŋi-m sɩ n vu Moabɩ tɩn, tɔgɩ dɩ ba n vu. Nmʋ nan wʋ́ kɩ kʋlʋ yɩranɩ amʋ na wʋ́ brɩ-m sɩ n kɩ tɩn mʋ.» 21 Tɩga na pʋʋrɩ tɩn, Balam ma zaŋɩ o vɔ o bɩnaga dɩ zɩla. O na diini-ka tɩn, o ma tɔgɩ dɩ Moabɩ dɩdɛɛra bam pa ba kɛ.
Balam dɩ o bɩnaga kam
22 Baŋa-Wɛ banɩ nan ya zaŋɩ dɩ Balam mʋ o na tɔgɩ dɩ ba o maa ve tɩn ŋwaanɩ. Balam dɛɛn diini o bɩnaga mʋ yɩ ba veǝ. O tɩntʋŋna bale dɩ maa tɔgɩ ba veǝ. Ba na maa ve tɩn, Baŋa-Wɛ malɛka ma zɩgɩ ka cɩ Balam cwǝŋǝ sɩ o yɩ kɛ. 23 Bɩnaga kam na nɛ nɩ Baŋa-Wɛ malɛka kam cɩgɩ ba cwǝŋǝ yɩ sʋ-lɔŋɔ wʋ ka jɩŋa nɩ tɩn, mʋ ka yagɩ cwǝŋǝ kam yɩ ka lɔ ka zʋ gaarʋ wʋnɩ. Balam maa magɩ-ka yɩ o ja-ka o joori o dɩ cwǝŋǝ kam nɩ.
24 Baŋa-Wɛ malɛka kam ma vu ka yi cwǝŋǝ kam mɛ na yɩ mɩmɩna yɩ ka tigi kabri sɩle laŋa nɩ tɩn. Kadwi sɩlʋ vinyə tweeru na wʋ sɩ wʋnɩ tɩn maa tigi cwǝŋǝ kam jazɩm dɩ jagwiə nɩ. Malɛka kam maa zɩgɩ da ka cɩ cwǝŋǝ kam. 25 Bɩnaga kam daa ma na Baŋa-Wɛ malɛka kam. Ka ma pɩɩnɩ ka tɩtɩ dɩ kəbrə kam pa kabri kam kwɩɩrɩ Balam naprɩ. O daa ma magɩ o bɩnaga kam.
26 Baŋa-Wɛ malɛka kam ta ma fʋfɔ ka yi ka zɩgɩ cwǝŋǝ kam mɛ na tiini ka pɩɩnɩ tɩn nɩ. Laŋa daa tǝrǝ sɩ bɩnaga kam tɔgɩ jazɩm naa jagwiə seeni ka kɛ. 27 Ka dɩ na nɛ kʋntʋ tɩn, mʋ ka tʋ tɩga nɩ ka tigə. Balam daa maa warɩ o banɩ o ja. O ma kwe o nacəgə o jɩgɩ bɩnaga kam o maga. 28 Baŋa-Wɛ laan maa pɛ bɩnaga kam cwǝŋǝ sɩ ka ŋɔɔnɩ. Ka ma bwe Balam ka wɩ: «Bɛɛ mʋ a kɩ a cɔgɩ pa n yɔɔrɩ n magɩ-nɩ kuni bɩtɔ tɩntʋ doŋ?» 29 Balam ma ləri-ka o wɩ: «Kʋ yɩ nmʋ na pɛ a nyɩ dɩ joro tɩn ŋwaanɩ mʋ. A ya na maŋɩ a jɩgɩ sʋ-lɔŋɔ yo seeni, a yaá gʋ-m lɩla.»
30 Bɩnaga kam laan maa wɩ: «Amʋ daɩ nmʋ tɩtɩ bɩnaga mʋ yɩ n jɩgɩ-nɩ n diini maŋa maama na? A nan yǝni a kɩ tɩntʋ doŋ nmʋ yɩra nɩ na?» Balam ma ləri wɩ: «Awo! N ta wʋ kɩ tɩntʋ doŋ.»
31 Kʋntʋ baŋa nɩ mʋ Baŋa-Wɛ pʋrɩ Balam yiǝ, pa o na Baŋa-Wɛ malɛka kam na cɩgɩ cwǝŋǝ kam ka zɩga yɩ sʋ-lɔŋɔ wʋ ka jɩŋa nɩ tɩn. Balam na nɛ tɩn, o ma tiiri o vin o yibiyə tɩga nɩ.
32 Malɛka kam ma bwe‑o ka wɩ: «Bɛŋwaanɩ mʋ nmʋ magɩ n bɩnaga kam kuni bɩtɔ kʋntʋ? Amʋ nuŋi sɩ a ba a dwəni dɩ nmʋ, Bɛŋwaanɩ, a nɛ nɩ cwǝŋǝ kalʋ n na kwe tɩn ba jɩgɩ kuri. 33 Kʋ na daɩ n bɩnaga kam ŋwaanɩ, tɩntʋ a ya gʋ-m. Ka nɛ-nɩ mʋ pa ka ywəri cwǝŋǝ kam nɩ kuni bɩtɔ. Kʋ ya na daɩ kʋntʋ, a yaá gʋ-m yɩ a daarɩ a yagɩ n bɩnaga kam pa ka viiri.»
34 Balam ma ləri malɛka kam o wɩ: «Amʋ kɩ a tusi. A ya yǝri nɩ nmʋ cɩgɩ cwǝŋǝ mʋ sɩ n dwəni dɩ amʋ. Dɩ kʋ dɩ, nmʋ yi na wʋ su a vəŋə kam, amʋ wʋ́ joori sɔŋɔ.»
35 Baŋa-Wɛ malɛka kam ma ta dɩd-o ka wɩ: «Ta tɔgɩ dɩ nɔɔna bam n kɛ. Nan lwarɩ sɩ n ta kʋlʋ yɩranɩ amʋ na wʋ́ brɩ-m sɩ n ta tɩn.» Balam laan ma da dɩ Balakɩ dɩdɛɛra bam o kɛ.
36 Balakɩ na ni nɩ Balam wʋ cwǝŋǝ nɩ o bɩɩnɩ o te tɩn, mʋ o nuŋi o vu sɩ o jeer-o Moabɩ tɩʋ kʋdoŋ nɩ. Kʋ dɛɛn wʋ Aranon bugə kam ni nɩ mʋ, sɩ kʋ maŋɩ dɩ o laŋa kam sisəm. 37 O na yi da tɩn, o ma bwe Balam o wɩ: «Bɛɛ mʋ kɩ yɩ n wʋ sɛ a kwǝrǝ kam a na tʋŋɩ tɩn? Bɛɛ mʋ yɩ n wʋ tu lɩla? Nmʋ bʋŋɩ sɩ a jɩŋa muri sɩ a ŋwɩ‑m mʋ na?» 38 Balam ma lǝr-o o wɩ: «Kʋ na yɩ te maama, a laan tuǝ. A nan ba jɩgɩ cwǝŋǝ sɩ a ta taanɩ sɩ dɩ dwǝni te yɩranɩ Wɛ na brɩ-nɩ sɩ a ta tɩn.»a
39 Ba ma tɔgɩ daanɩ ba vu Kiriyat-Husɔtɩ. 40 Ba na yi da tɩn, Balakɩ ma kwe naanɩ dɩ peeni o kɩ kaanɩm. O ma fɔ nwana yam wʋnɩ o kwe o pa Balam dɩ o tɩʋ dɩdɛɛra balʋ na tɔgɩ dɩd-o tɩn. 41 Tɩga na pʋʋrɩ tɩn, Balakɩ ma zaŋɩ o ja Balam o vu Bamotɩ-Baal. Balam na zɩgɩ dáanɩ tɩn, o waɩ o nii o naɩ Yisɩrayɛlɩ tiinə kɔ-fɔrɔ kʋm wʋnɩ nɔɔna bam badaara.