Balam pulim taanɩ dɩm
23
Balam ma ta dɩ Balakɩ o wɩ: «Pa ba kɩ kaanɩm bimbinə yarpɛ je sɩm kʋntʋ nɩ, sɩ n daarɩ n ja na-balɩ sɩrpɛ dɩdaanɩ pi-bɛ sɩrpɛ n ba n pa-nɩ.» 2 Balakɩ maa sɩɩnɩ o kɩ kʋlʋ maama Balaam na wɩ o kɩ tɩn, kʋ daarɩ yɩ ba maama wəli daanɩ, ba ja na-bɩa dɩdʋa dɩ pi-bɩa dɩdʋa, ba ma ba kɩ kaanɩm, kaanɩm bimbim maama baŋa nɩ.3 Balam laan ma ta dɩ Balakɩ o wɩ: «Ta n zɩgɩ n zwɛɛm pɛɛra yam təŋə nɩ kʋntʋ. Amʋ wʋ́ fʋfɔ a vu dáa sɩ a nii Baŋa-Wɛ wʋ́ jeeri-nɩ na? DƖ na vɩɩrɩ kʋlʋ maama dɩ amʋ, amʋ dɩ wʋ́ ba a ta a brɩ-m.» O laan ma vu o din piu yuu mɛ tweeru na tǝrǝ tɩn.
4 Wɛ ma ba o te. Balam ma ta o wɩ: «Amʋ kɩ bimbinə yarpɛ mʋ, yɩ a kaanɩ na-bala dɩ pi-bɩa bimbim maama baŋa nɩ.» 5 Baŋa-Wɛ ma kwe DƖ kwǝrǝ DƖ pa Balam yɩ DƖ ta dɩd-o nɩ: «Nan joori Balakɩ te, sɩ n ta amʋ kwǝrǝ kam n brɩ-o.»
6 Balam ma joori Balakɩ te, dɩdaanɩ o ta zɩgɩ o zwɛɛm pɛɛra yam təŋə nɩ mʋ. Moabɩ dɩdɛɛra bam dɩ maa wʋ o tee nɩ. 7 Balam ma sɩŋɩ sɩ o tʋlɩ taanɩ dɩm yɩ o wɩ:
«Moabɩ tɩʋ pɛ Balakɩ mʋ jaanɩ amʋ
o pa a nuŋi Arama pweeru tɩm na wʋ wa-puli seeni tɩn nɩ
a ba yo seeni.
O maa bʋŋɩ sɩ a sɔɔlɩ lwarɩm
a daŋɩ Yisɩrayɛlɩ tiinə bam yuu nɩ
sɩ kʋ cɔgɩ-ba.
8 Wɛ nan na wʋ sɔɔlɩ lwarɩm DƖ pa Yisɩrayɛlɩ tiinə bam tɩn ŋwaanɩ,
amʋ wʋ́ kɩ tɛ mʋ a sɔɔlɩ lwarɩm a daŋɩ ba yuu nɩ?
Amʋ wʋ́ na cwǝŋǝ yən nɩ mʋ sɩ a bwɛ-ba,
yɩ Baŋa-Wɛ wʋ bwɛ-ba?
9 Amʋ na zɩgɩ pweeru tɩm yuu nɩ tɩn,
a yɔɔrɩ a na-ba mʋ.
Yisɩrayɛlɩ dwi tiinə yɩ balʋ na pɔɔrɩ ba tɩtɩ
sɩ ba yɩ tɔgɩ ba taa wʋ dwi-gɛ tiinə bam wʋnɩ tɩn mʋ.
10 Yisɩrayɛlɩ tiinə bam kɔgɔ daga zanzan
nɩ kasʋlʋ na yɩ te tɩn mʋ.
Nɔɔn-nɔɔnʋ warɩ-ba sɩ o ga o ti.
Amʋ na lagɩ a tɩ,
Wɛ wʋ́ pa a tʋʋnɩ taa nyɩ dɩ nɔn-ŋʋna tʋʋnɩ na yɩ te tɩn mʋ,
pa a ŋwɩa kweeli dɩ bɩcar-zuru.»
11 Balam na tʋlɩ taanɩ dɩm o ti tɩn, mʋ Balakɩ tagɩ dɩd-o o wɩ: «Bɛɛ mʋ kʋntʋ n jɩgɩ n kɩ a yɩra nɩ? A bǝŋi-m sɩ n ba n sɔɔlɩ lwarɩm mʋ n yagɩ a dʋna baŋa nɩ. Nmʋ daa n ma n zɩgɩ n loori Wɛ sɩ DƖ kɩ-ba lanyɩranɩ n pa-ba.» 12 Balam ma lǝr-o o wɩ: «Baŋa-Wɛ nan na wɩ a ta kʋlʋ, kʋ daɩ sɩ a ta kʋntʋ yɩranɩ mʋ na?»
Balam taanɩ bɩle tu
13 Balakɩ daa ma ta dɩd-o wɩ: «Ba sɩ dɩ́ vu jǝgǝ kadoŋ. Nmʋ wʋ́ na Yisɩrayɛlɩ tiinə bam badonnǝ da, yɩ kʋ daɩ ba maama. Nmʋ laan ma n wʋ́ zɩgɩ dáanɩ n sɔɔlɩ lwarɩm n yagɩ ba baŋa nɩ.» 14 O ma ja Balam o vu o din Pisiga piu kʋm yuu o zɩgɩ Zofim tɩ-kamparɩ je sɩm nɩ. Balam daa ma lɔ kaanɩm bimbinə yarpɛ. O ta ma kwe na-bala dɩ pi-bɩa o daŋɩ kaanɩm bimbim maama baŋa nɩ. 15 Balam ma ta dɩ Balakɩ o wɩ: «Ta n zɩgɩ n zwɛɛm pɛɛra yam təŋə nɩ kʋntʋ. Amʋ wʋ́ fɔɔrɩ a vu dáa sɩ a jeeri dɩ Baŋa-Wɛ.»
16 Baŋa-Wɛ daa maa jeer-o, yɩ DƖ daarɩ DƖ kwe DƖ kwǝrǝ DƖ pa Balam yɩ DƖ wɩ: «Joori Balakɩ te sɩ n ta amʋ kwǝrǝ kam n brɩ-o.»
17 Balam ta na joori Balakɩ te tɩn, dɩdaanɩ o ta zɩgɩ o zwɛɛm pɛɛra yam təŋə nɩ mʋ. Moabɩ dɩdɛɛra bam ta maa wʋ o tee nɩ. Balakɩ ma bwe Balam o wɩ: «Baŋa-Wɛ dɩm tagɩ DƖ wɩ bɛɛ mʋ?»
18 Balam ma puli sɩ o tʋlɩ taanɩ dɩm yɩ o wɩ:
«Zipʋre bu Balakɩ, ba n cəgi a taanɩ dɩm!
Fɔgɩ n cəgi sɩ n ni kʋ kuri lanyɩranɩ.
19 Wɛ daɩ nabiinu,
sɩ DƖ taa kaagɩ DƖ fɔɩ vwan,
naa sɩ DƖ taa jɩgɩ niǝ yale yale.
DƖ na yǝni DƖ goni DƖ ni,
DƖ sɩɩnɩ DƖ kɩ DƖ tɔgɩ DƖ na tagɩ te tɩn mʋ.b
20 Wɛ pɛ-nɩ ni sɩ a sɔɔlɩ lanyɩranɩ mʋ
a daŋɩ nɔɔna bantʋ yuu nɩ.
Dɩntʋ nan na kɩ wʋlʋ yu-yoŋo,
kʋ daa warɩ kʋ kwanɩ.
21 Amʋ nii a na Yisɩrayɛlɩ tiinə bam
na yɩ te tɩn.
Cam dɩ wʋ-cɔgɔ bá yi-ba.
Ba Tu Baŋa-Wɛ dɩm mʋ wʋ ba tee nɩ.
Ba maa zǝŋi DƖ yɩrɩ nɩ:
DƖ yɩ ba Pɛ.
22 Baŋa-Wɛ mʋ jaanɩ-ba DƖ nuŋi Ezipi wʋnɩ.
DƖ na jaŋɩ te DƖ pa-ba tɩn
nyɩ dɩ na-bɩa kalʋ na warɩ ka ja tɩn mʋ.
23 Liri tǝrǝ sɩ na wʋ́ wanɩ Yisɩrayɛlɩ dwi tiinə bam sɩ cɔgɩ.
Yi-nɛɛrɩ dɩ ba tʋŋa ba yɩra nɩ pa kʋ bwe-ba.
Nɔɔna wʋ́ taa tɛ Zakɔbɩc biə bam taanɩ ba wɩ:
‹Nii-na Wɛ na kɩ kʋlʋ DƖ pa-ba tɩn.›
24 Nii-na! Ba kɔgɔ kʋm nyɩ dɩ nyoŋo!
Kʋ lagɩ kʋ zaŋɩ kʋ zi varɩm mʋ kʋ di.
Kʋ daa bá pəni kʋ sin,
yɩ kʋ wʋ dʋnɩ nwana yam maama kʋ su,
Kʋ daarɩ kʋ nyɔ vara bam jana kʋ ti.»
25 Balam na tʋlɩ taanɩ dɩm o ti tɩn, mʋ Balakɩ bag‑o yɩ o wɩ: «Yagɩ! Nmʋ na warɩ n sɔɔlɩ lwarɩm n kɩ ba yɩra nɩ, nan yɩ sɔɔlɩ lam n kɩ ba yuu nɩ!» 26 Balam ma lǝr-o o wɩ: «Amʋ maŋɩ a pa n maanɩ nɩ kʋlʋ Baŋa-Wɛ na tagɩ dɩ amʋ tɩn yɩranɩ mʋ a maŋɩ sɩ a ta.»
Balam taanɩ bɩtɔ tu
27 Balakɩ daa ma ta dɩ Balam o wɩ: «Pa dɩ́ daa ləri jǝgǝ, sɩ dɛdoŋ Wɛ wʋ́ pa‑m cwǝŋǝ dáanɩ sɩ n sɔɔlɩ lwarɩm n daŋɩ Yisɩrayɛlɩ tiinə bam baŋa nɩ n pa-nɩ.» 28 O ma ja Balam o vu o din Peora piu kʋm yuu nɩ. Jǝgǝ kam kʋntʋ tʋlɩ ka nii kagʋa kam mʋ.