24
Balam dɛɛn yɔɔrɩ o lwarɩ nɩ Baŋa-Wɛ lagɩ sɩ DƖ kɩ Yisɩrayɛlɩ tiinə bam yu-yoŋo mʋ. Kʋntʋ ŋwaanɩ, o daa wʋ nii o tankwa yam wʋnɩ sɩ o lwarɩ kʋlʋ na wʋra, nɩnɛɛnɩ o ya na maŋɩ o kɩ te tɩn. O ma pipiri o yibiyə o nii kagʋa kam seeni.2 O ma kwǝni o nii o na Yisɩrayɛlɩ tiinə bam na cwi ba vwə yam dwi dɩ dwi. Sɩ nɛ sɩm ni nɩ mʋ Wɛ Joro tu o baŋa nɩ.3 O ma puli sɩ o tʋlɩ taanɩ dɩm o wɩ:
«Amʋ, Bewɔrɩ bu Balam taanɩ mʋ tɩntʋ.
Amʋ, nɔɔnʋ wʋlʋ na nii o naɩ ja tɩn.
4 A maa yǝni a ni Wɛ kwǝrǝ,
pa a lwǝni DƖ taanɩ dɩm a brɩ nɔɔna.
A vi a yigə tɩga nɩ yɩ a ta naɩ mʋ,
pa Dam-fɔrɔ Tu Wɛ dɩm vɩɩrɩ wǝǝnu DƖ brɩ-nɩ.
5 Yisɩrayɛlɩ tiinə bam,
nii á vwə yam na cwi dɩ nɩnwaŋa te!
Je sɩlʋ á na zʋʋrɩ tɩn tiini sɩ lana.
6 Á vwə yam nyɩ dɩ nabarɩa
sɩlʋ na jagɩ je maama tɩn.
Ya ta nyɩ dɩ gaara
yalʋ na kɩ bugə ni nɩ tɩn mʋ.
Abam zʋʋrɩm je ta maa yɩ nɩnɛɛnɩ
tu-ŋunnʋ tɩlʋ Baŋa-Wɛ na jəri tɩn,
dɩ Sɛdrɩ tweeru na zɩgɩ bugə ni nɩ tɩn mʋ.
7 Dʋa wʋ́ taa nɩa zanzan ka pa-ba,
pa ba wo-dwə kɩ lanyɩranɩ.
Ba pɛ wʋ́ taa dana o dwe Pɛ Agagɩ,
sɩ o yɩrɩ zaŋɩ dɩ jagɩ je maama nɩ.
8 Baŋa-Wɛ mʋ jaanɩ-ba DƖ nuŋi Ezipi wʋnɩ.
DƖ na yǝni DƖ jaŋɩ te DƖ pa-ba tɩn
nyɩ dɩ na-bɩa kalʋ na warɩ ka ja tɩn mʋ.
Baá wanɩ dwiə yalʋ na dwǝni dɩ ba tɩn ba li,
sɩ ba daarɩ ba cɩcʋgɩ ba kwi,
yɩ ba zɔ-ba dɩ ba cɩna yam.
9 Yisɩrayɛlɩ tiinə kɔgɔ kʋm nyɩ dɩ nyoŋo
na tigi kʋ dɔ tɩn mʋ.
Nɔɔn-nɔɔnʋ bá sɛ sɩ o vu o zaŋɩ-kʋ.
Wʋlʋ na loori Wɛ sɩ DƖ kɩ ba yu-yoŋo,
Wɛ dɩ wʋ́ kɩ kʋntʋ tu yu-yoŋo.
Sɩ wʋlʋ na sɔɔlɩ lwarɩm o pa abam,
Wɛ dɩ wʋ́ sɔɔlɩ lwarɩm mʋ DƖ kɩ kʋntʋ tu dɩ yɩra nɩ.»
10 Balam na tʋlɩ o taanɩ dɩm o ti tɩn, mʋ Balakɩ banɩ zaŋɩ o baŋa nɩ. O ma pu o ja-gulə o magɩ daanɩ yɩ o wɩ: «Amʋ bǝŋi-m sɩ n ba n sɔɔlɩ lwarɩm mʋ n cɔgɩ a dʋna. Nmʋ nan sɔɔlɩ lam n pa-ba tɩntʋ n kɩ bɩtɔ mʋ. 11 Laan ta n viirǝ! Amʋ ya sɩɩnɩ a ta nɩ a lagɩ a ŋwɩ‑m zanzan mʋ n tɩtʋŋa ŋwaanɩ. Baŋa-Wɛ nan wʋ pɛ‑m cwǝŋǝ sɩ n kɩ kʋlʋ na wʋ́ pa n na n ŋwɩɩrʋ tɩm tɩn.»
12 Balam ma lǝr-o o wɩ: «Amʋ maŋɩ a ta dɩ nɔɔna balʋ nmʋ na tʋŋɩ a tee nɩ tɩn a wɩ: 13 ‹Pɛ Balakɩ na maŋɩ o lɔ sɔ-fɔrɔ mʋ, yɩ o laan su kʋ ni dɩ səbu-sɩŋa dɩdaanɩ səbu-poŋo sɩ o kwe o pa-nɩ dɩ, amʋ ta bá wanɩ a vɩn ni dɩlʋ Baŋa-Wɛ na kwe DƖ pa-nɩ tɩn. A ba jɩgɩ cwǝŋǝ sɩ a tɔgɩ a tɩtɩ wʋbʋŋa baŋa nɩ a kɩ wo-laa naa wo-balɔrɔ. Baŋa-Wɛ na yǝni DƖ pa-nɩ ni sɩ a ta kʋlʋ tɩn yɩranɩ mʋ a maŋɩ sɩ a ta.› 14 Tɔ. A nan sɩɩnɩ a lagɩ a joori a tɩtɩ nɔɔna bam tee nɩ mʋ. Nan cəgi, sɩ a ta a brɩ-m Yisɩrayɛlɩ tiinə bam jwa na wʋ́ kɩ te dɩ nmʋ nɔn-biə bam tɩn.»
Balam taanɩ bɩna tu
15 Balam ma puli sɩ o tʋlɩ taanɩ dɩm yɩ o wɩ:
«Amʋ, Bewɔrɩ bu Balam taanɩ mʋ tɩntʋ.
Amʋ, baarʋ wʋlʋ na nii o naɩ ja tɩn.
16 A maa yǝni a ni Wɛ kwǝrǝ,
pa a lwǝni DƖ taanɩ dɩm a brɩ nɔɔna.
A yǝni a joŋi yǝno mʋ Yuutu Wɛ dɩm tee nɩ.
A vi a yigə tɩga nɩ yɩ a ta naɩ mʋ,
pa Dam-fɔrɔ Tu Wɛ dɩm lɩ wǝǝnu DƖ brɩ-nɩ.
17 A na nɛ te vɩɩra wʋnɩ tɩn daɩ lele woŋo.
Kʋ ta ba bwələ sɩ kʋ kɩ.
A ma na nɩ dɩdɛɛrʋ wʋ́ nuŋi Zakɔbɩ dwi dɩm wʋnɩ,
nɩ calɩcʋa na puli te tɩn.
Pɛ wʋm kʋntʋ wʋ́ jǝni Yisɩrayɛlɩ tɩʋ kʋm wʋnɩ.
O maa wʋ́ magɩ Moabɩ tiinə yum tɩm o cɩcʋgɩ.
O ta wʋ́ cɔgɩ Sɛtɩ dwi tiinə bam maama.
18 Wʋntʋ ta wʋ́ wanɩ Edɔm tiinə bam o di,
yɩ o pa ba tɩga kam ji o nyɩm,
ba na yɩ o dʋna tɩn ŋwaanɩ.
Kʋ daarɩ, Yisɩrayɛlɩ tiinə bam wʋ́ di yigə dɩ dam.
19 Dɩdɛɛrʋ wʋ́ nuŋi Zakɔbɩ dwi dɩm wʋnɩ.
Wʋntʋ wʋ́ cɔgɩ balʋ maama ta na daarɩ tɩʋ kʋm wʋnɩ tɩn.»
20 Balam ma pipiri o nii Amalɛkɩ tiinə bam seeni. O ta ma tʋlɩ o taanɩ dɩm o wɩ:
«Amalɛkɩ dwi tiinə bam ya jɩgɩ dam
ba dwe lʋgʋ baŋa dwi tiinə bam maama.
Ba kweelim je nan wʋ́ taa yɩ cɔgɩm yɩranɩ mʋ.»
21 Balam ta ma nii Kɛnɩ tiinə bam seeni. O ma tʋlɩ o taanɩ dɩm o wɩ:
«Abam Kɛnɩ tiinə bam na zʋʋrɩ mɛ tɩn dana lanyɩranɩ.
Á pwəgə je maa wʋ pweeru gugwəəru wʋnɩ.
22 Nan lwarɩ-na nɩ Asuurib tiinə bam jɩŋa na zʋ abam,
á maŋa yi mʋ kʋntʋ sɩ ba cɔgɩ abam ba ti.»
23 Balam ta ma tʋlɩ o taanɩ dɩm o wɩ:
«Lɛɛrʋ wʋ á yum nɩ!
Baŋa-Wɛ na bʋŋɩ sɩ DƖ kɩ kʋntʋ,
wɔɔ mʋ wʋ́ wəri?
24 Nabwǝǝru mʋ lagɩ tɩ nuŋi Kitimic tɩʋ kʋm nɩ tɩ ba,
sɩ tɩ nɔɔna zaŋɩ Asuuri tiinə dɩ Hebɛrɩ tiinə baŋa nɩ
ba bɛɛsɩ-ba.
Kitimi tiinə bam dɩ nan wʋ́ ba ba na ba cɔgɩm.»
25 Balam na tʋlɩ o taanɩ dɩm maama o ti tɩn, o laan ma zaŋɩ o joori o tɩtɩ sɔŋɔ. Balakɩ dɩ ma zaŋɩ o viiri.