Moabɩ tiinə sʋgɩ Yisɩrayɛlɩ tiinə wʋbʋŋa
25
Yisɩrayɛlɩ tiinə bam dɛɛn ma vu ba zʋʋrɩ Sitim nɩ. Ba baara bam badaara ma vu ba lagɩ Moabɩ tiinə bukwa sɩ ba kɩ kabwəŋə dɩ ba. 2 Moabɩ tiinə bukwa bam kʋntʋ laan ma sʋgɩ Yisɩrayɛlɩ tiinə bam ba dɩ ba jwǝnǝ yam kaanɩm wʋnɩ. Kʋ ma pa Yisɩrayɛlɩ tiinə bam lɛɛrɩ ba zuli Moabɩ tiinə jwǝnǝ yam, yɩ ba daarɩ ba di ya wʋdiiru. 3 Kʋntʋ baŋa nɩ mʋ Yisɩrayɛlɩ tiinə bam dɛɛn tɔgɩ ba zuli Moabɩ tiinə jwəm Baal-Pewɔrɩ. Baŋa-Wɛ banɩ ma zaŋɩ dɩ ba, 4 yɩ DƖ ta dɩ Moyisi DƖ wɩ: «Nan zaŋɩ n ja nɔɔna bantʋ yigǝ tiinǝ bam n yɔɔrɩ n gʋ amʋ yɩrɩ zulə ŋwaanɩ. Kɩ kʋntʋ pooni yigə nɩ jaja sɩ nɔɔna maama taa zɩga ba niə. Kʋntʋ wʋ́ pa amʋ Baŋa-Wɛ banɩ tʋ dɩ Yisɩrayɛlɩ tiinə bam.» 5 Moyisi ma ta dɩ Yisɩrayɛlɩ tiinə dɩdɛɛra bam o wɩ: «Go-na baara balʋ maama na wʋ abam wʋnɩ yɩ ba tɔgɩ ba zuli Baal-Pewɔrɩ jwəm dɩm tɩn.»a6 Kʋ na kɩ fɩɩn tɩn, mʋ Yisɩrayɛlɩ tu wʋdoŋ jaanɩ Madian tiinə bukɔ o zʋ o cʋrrʋ tɩm vwe wʋnɩ. Kʋntʋ maama dɩ Moyisi dɩdaanɩ Yisɩrayɛlɩ nɔn-kɔgɔ kʋm maama wʋ Baŋa-Wɛ jero-vwe dɩm ni nɩ mʋ ba keerǝ. Ba maama ma na nɔɔnʋ wʋm na kɩ te tɩn. 7 Kaanɩm tu Fineasɩ dɩ ma na-ba. O dɛɛn yɩ Eleyazaarɩ bu mʋ, yɩ o ko-nakwɩ yɩ Arɔn. O ma nuŋi kɔ-fɔrɔ kʋm na wʋ mɛ tɩn nɩ, yɩ o daarɩ o kwe cicwe 8 o ja o vu o tɔgɩ nɔɔnʋ wʋm kwaga o zʋ o vwe dɩm wʋnɩ. Fineasɩ na yi da tɩn, mʋ o yɔɔrɩ o mʋʋrɩ cicwe dɩm ba maama yɩra nɩ o vu o ja bukɔ wʋm pugə. Baŋa-Wɛ ma da o kǝm dɩm ŋwaanɩ DƖ pa yawɩ-cɛɔ kʋlʋ na wʋra kʋ gʋɩ Yisɩrayɛlɩ tiinə bam laan ti. 9 Dɩ kʋ dɩ, balʋ na maŋɩ ba tɩ dɩ yawɩʋ kʋm tɩn yɩ nɔɔna mʋrrʋ fiinle-tɩna (24,000) mʋ.
10 Baŋa-Wɛ ma ta dɩ Moyisi DƖ wɩ: 11 «Kʋ na daɩ kaanɩm tu Fineasɩ ŋwaanɩ, amʋ yaá gʋ Yisɩrayɛlɩ tiinə bam maama a ti a ban-zɔŋɔ kʋm ŋwaanɩ. Wʋntʋ nan jɩgɩ cɩga lanyɩranɩ o pa-nɩ, yɩ o sɩɩnɩ o yiǝ amʋ ŋwaanɩ sɩ nɔɔna taa zuli amʋ yɩranɩ. 12 Kʋntʋ ŋwaanɩ nan ta dɩd-o nɩ: amʋ goni ni a pa‑o sɩ yazurə taa wʋ o tee nɩ. 13 Wʋntʋ dɩ o kwaga kam wʋ́ taa yɩ amʋ kaanɩm tiinə mʋ sɩ kʋ taa ve wuu. O na sɩɩnɩ o yiǝ amʋ zulə ŋwaanɩ pa o lɩ Yisɩrayɛlɩ tiinə tusim dɩm amʋ yigə nɩ tɩn ŋwaanɩ mʋ te a goni ni a pa‑o kʋntʋ doŋ.»
14 Yisɩrayɛlɩ tu wʋlʋ ba dɛɛn na jaan‑o dɩ bukɔ wʋm yɩ ba gʋ-ba tɩn yɩ Salu bu Zimiri mʋ. O dɛɛn yɩ Simeyon dwi dɩm sɔ-yuu kʋdoŋ yigə tu mʋ. 15 Madian tiinə bukɔ wʋm yɩrɩ maa yɩ Kozibi. O ko Zurǝ dɛɛn yɩ Madian tiinə sɔ-yuu-kamunu yigə tu mʋ.
16 Baŋa-Wɛ ma ta dɩ Moyisi DƖ wɩ: 17 «Zaŋɩ-na Madian tiinə bam baŋa nɩ sɩ á wanɩ-ba á di. 18 Ba dɛɛn jɩgɩ dɩdaanɩ abam mʋ dɩ ba na sʋgɩ abam sɩ á zuli ba jwəm Baal-Pewɔrɩ tɩn. Ba ta pɛ á kɩ á cɔgɩ ba bukɔ Kozibi ŋwaanɩ. Wʋntʋ maa yɩ Madian tiinə dɩdɛɛrʋ bukɔ yɩ o ba o tɩ yawɩʋ kʋlʋ na puri Baal-Pewɔrɩ zulim ŋwaanɩ tɩn baŋa nɩ.»