Na nuŋi piu wʋnɩ sɩ nɔɔna bam nyɔ
20
Yisɩrayɛlɩ tiinə kɔ-fɔrɔ kʋm dɛɛn ma beeri ba vu ba yi Zin kagʋa kam pulim cana kam nɩ. Ba ma vu ba cwi ba vwə Kadɛsɩ nɩ ba zʋʋrɩ da. Ba na wʋra tɩn, Miriyam dɛɛn ma tɩ yɩ ba kɩ-o da.2 Na dɛɛn tǝrǝ sɩ Yisɩrayɛlɩ tiinə bam nyɔ. Ba maama ma la daanɩ ba vu ba yi Moyisi dɩ Arɔn te sɩ ba dwǝni dɩ ba. 3 Ba ma bwɛ Moyisi yɩ ba wɩ: «Dɩbam dɩ dɛɛn ya na tɔgɩ dɩdaanɩ dɩ́ cʋrrʋ tɩm dɩ́ tɩ Baŋa-Wɛ jero-vwe dɩm yigə nɩ, kʋ ya garɩ tɩntʋ. 4 Nmʋ nan yɔɔrɩ n ja dɩbam na yɩ Baŋa-Wɛ kɔgɔ kʋm tɩn mʋ n ba n dʋlɩ n yagɩ kagʋa kantʋ nɩ, sɩ dɩbam dɩdaanɩ dɩ́ vara maama tɩ. 5 Bɛɛ mʋ yɩ n ja dɩbam n nuŋi Ezipi tɩʋ wʋnɩ sɩ dɩ́ ba dɩ́ zɩgɩ yini-sambala jəgə kʋntʋ nɩ? Wʋdiiru warɩ sɩ tɩ kɩ yo seeni, kapʋrrʋ nan tǝrǝ, vinyə tweeru dɩ tǝrǝ, kampwɩ tweeru dɩ maa tǝrǝ. Na dɩ nan tǝrǝ sɩ dɩ́ nyɔ!»
6 Moyisi dɩ Arɔn ma titwəni ba kɛ ba daarɩ nɔn-kɔgɔ kʋm ba vu ba zɩgɩ jero-vwe dɩm ni nɩ. Ba ma vin ba yibiyə tɩga nɩ, yɩ Baŋa-Wɛ da DƖ cu DƖ vɩɩrɩ DƖ tɩtɩ kʋ tɔgɩ dɩ DƖ paarɩ-zulǝ yam DƖ brɩ-ba. 7 Baŋa-Wɛ ma ta dɩ Moyisi DƖ wɩ: 8 «Zaŋɩ n kwe n nacəgə kam sɩ nmʋ dɩ n zɩmbaarʋ Arɔn vu á la kɔ-fɔrɔ kʋm maama á kɩ daanɩ. Laan zɩgɩ ba yigə nɩ n ŋɔɔnɩ dɩ piu kʋlʋ na zɩgɩ tɩntʋ tɩn. Na wʋ́ ta ba nuŋi kʋ yɩra nɩ. Cɩga tɩn, nmʋ wʋ́ pa na taa nuŋi piu kʋm wʋnɩ ba paɩ nɔn-kɔgɔ kʋm dɩ ba vara bam sɩ ba taa nyɔa.»
9 Moyisi ma sɩɩnɩ o vu o zʋ Baŋa-Wɛ jero-vwe dɩm wʋnɩ o kwe o nacəgə kam nɩ Baŋa-Wɛ na pɛ ni sɩ o kɩ te tɩn. 10 O dɩ Arɔn ma ja nɔn-kɔgɔ kʋm maama ba vu ba zɩgɩ piu kʋm yigə nɩ. Moyisi laan ma ta dɩ nɔɔna bam o wɩ: «Abam zwabani-nyɩna bantʋ, cəgi-na! Dɩbam mʋ maŋɩ sɩ dɩ́ pa na ta ba nuŋi piu kʋntʋ nɩ sɩ á nyɔ na?» 11 O laan ma zǝŋi o jɩŋa wɛɛnɩ yɩ o kwe o nacəgə kam o ma magɩ piu kʋm kuni bɩle. Na-fara ma da ba wuurǝ yɩ ba cuurə, pa nɔɔna bam dɩ ba vara nyɔ.a
12 Kʋ daarɩ Baŋa-Wɛ ma ta dɩ Moyisi dɩ Arɔn DƖ wɩ: «Abam nan wʋ kɩ á wʋ-dɩdʋa dɩ amʋ sɩ kʋ pa Yisɩrayɛlɩ tiinə bam lwarɩ nɩ: amʋ mʋ yɩ Wɛ dɩlʋ na yɩ wʋ-poŋo tu tɩn. Á wʋ-dɩdʋa kam na muri tɩn ŋwaanɩ, a daa bá pa abam cwǝŋǝ sɩ á ja amʋ nɔn-kɔgɔ kʋm á vu á zʋ tɩga kalʋ a na lagɩ a pa-ba tɩn wʋnɩ.»b
13 Ba dɛɛn jɩgɩ je sɩm kʋntʋ ba bǝi nɩ ‹Meriba›c mʋ. Dáanɩ mʋ Yisɩrayɛlɩ tiinə bam magɩ kantɔgɔ dɩdaanɩ Baŋa-Wɛ. DƖ dɩ ma brɩ-ba DƖ wʋ-poŋo kʋm na yɩ te tɩn.
Edɔm tɩʋ pɛ vɩn sɩ o pa Yisɩrayɛlɩ tiinə bam cwǝŋǝ sɩ ba kɛ
14 Moyisi dɛɛn ma zɩgɩ Kadɛsɩ nɩ o tʋŋɩ kwǝrǝ o pa Edɔm tɩʋ pɛ o wɩ:
«Dɩbam yɩ nmʋ tɩtɩ cʋrrʋ Yisɩrayɛlɩ dwi tiinə bam mʋ.d Nmʋ maŋɩ n ye yaara yalʋ maama na yi dɩbam tɩn ni nɩ. 15 Dɩ́ nabaara dɛɛn ve ba zʋ Ezipi tɩʋ wʋnɩ ba maŋɩ da bɩna zanzan. Kʋ kwaga nɩ mʋ Ezipi tiinə bam bɛɛsɩ dɩ́ kwə bam dɩ dɩbam dɩ. 16 Dɩ́ na keeri dɩ́ loori Baŋa-Wɛ tɩn, mʋ DƖ ni dɩ́ wɛ-loro kʋm. DƖ ma tɔgɩ DƖ malɛka baŋa nɩ DƖ ja dɩbam DƖ nuŋi tɩʋ kʋm kʋntʋ nɩ. Dɩ́ laan nan tu dɩ́ je Kadɛsɩ nɩ mʋ, kʋ na wʋ abam tɩʋ kʋm sisəm ni nɩ tɩn. 17 Dɩ́ maa loori nmʋ mʋ sɩ n pa dɩbam cwǝŋǝ sɩ dɩ́ tɔgɩ n tɩga kam baŋa dɩ́ kɛ. Dɩ́ bá tɔgɩ á karɩ dɩ á kadwi seeni. Dɩ́ maŋɩ dɩ́ bá mɔ na á vʋla yam nɩ dɩ́ nyɔ. Dɩ́ nan wʋ́ yɔɔrɩ dɩ́ tʋlɩ cwə-fara kam yɩranɩ mʋ taan sɩ dɩ́ vu dɩ́ bɛ abam laŋa kam. Dɩ́ brɩ dɩ́ bá ywəri cwǝŋǝ kam nɩ.»
18 Edɔm pɛ wʋm ma ləri o wɩ: «Awo! Dɩbam bá pa abam cwǝŋǝ sɩ á tɔgɩ dɩ́ laŋa kam á kɛ. Abam nan na fɩn sɩ á tɔgɩ da á kɛ, dɩ́ wʋ́ nuŋi dɩ́ jeeri abam dɩ najara.»
19 Yisɩrayɛlɩ tiinə bam ma joori ba ləri ba wɩ: «Dɩ́ nan wʋ́ maŋɩ cwə-fara kam ni nɩ mʋ dɩ́ taa veǝ. Dɩbam dɩ dɩ́ vara na nyɔgɩ á na, dɩ́ wʋ́ ŋwɩ dɩ́ pa abam. Dɩ́ na loori kʋlʋ yɩranɩ tɩn mʋ yɩ sɩ dɩ́ tɔgɩ á laŋa kam nɩ dɩ́ kɛ.»
20 Edɔm pɛ wʋm ma yɔɔrɩ o vɩn yɩ o wɩ: «Dɩ́ bá sɛ sɩ á tɔgɩ yo seeni á kɛ.»
O ma pa o jar-kərə kɔ-fɔrɔ kʋm nuŋi dɩ dam sɩ ba jeeri Yisɩrayɛlɩ tiinə bam dɩ najara. 21 Kʋntʋ tɩn, Edɔm tiinə bam wʋ pɛ Yisɩrayɛlɩ tiinə bam cwǝŋǝ sɩ ba tɔgɩ ba laŋa kam ba kɛ. Kʋ dɛɛn pɛ Yisɩrayɛlɩ tiinə bam pipiri mʋ ba joori kwaga sɩ ba kwe cwə-gaa.
Arɔn tʋʋnɩ
22 Yisɩrayɛlɩ kɔ-fɔrɔ kʋm maama dɛɛn ma zɩgɩ Kadɛsɩ nɩ ba vu ba yi Hɔrɩ piu kʋm 23 na wʋ Edɔm laŋa kam sisəm nɩ tɩn. Ba na wʋra tɩn mʋ Baŋa-Wɛ tagɩ dɩ Moyisi dɩ Arɔn DƖ wɩ: 24 «Arɔn lagɩ o maŋɩ yo seeni mʋ o tɩ. O bá zʋ tɩga kalʋ a na lagɩ a pa Yisɩrayɛlɩ tiinə bam tɩn wʋnɩ, abam bale na nuŋi amʋ ni dɩm kwaga nɩ Meriba je sɩm nɩ tɩn ŋwaanɩ. 25 Moyisi, nan ja Arɔn dɩ o bu Eleyazaarɩ sɩ á maama din Hɔrɩ piu kʋm yuu. 26 N laan lɩ Arɔn Wɛ kaanɩm gwar-laarʋ tɩm, sɩ n kwe-tɩ n zʋ o bu Eleyazaarɩ. Bɛŋwaanɩ, Arɔn lagɩ o tɩ piu kʋm yuu nɩ mʋ.»