Lwarɩm saarɩm cullu tɩm
19
Baŋa-Wɛ dɛɛn ma ta dɩ Moyisi dɩ Arɔn DƖ wɩ:2 «Amʋ Baŋa-Wɛ tiŋi a ni dɩntʋ mʋ sɩ á taá tɔgɩ-dɩ. Ta-na á brɩ Yisɩrayɛlɩ tiinə bam nɩ: Ba maŋɩ sɩ ba ja na-chwɛ-sʋŋʋ kʋlʋ na ba jɩgɩ gɛɛrɩ kʋ yɩra nɩ yɩ ba ta wʋ kwe-kʋ ba ma tʋŋɩ tɩn mʋ ba ba ba pa abam. 3 Á wʋ́ kwe-kʋ á pa kaanɩm tu Eleyazaarɩ. O dɩ maa wʋ́ ja-kʋ o nuŋi o vu dáa, pa ba gʋ-kʋ yɩ o zɩgɩ o niə. 4 Eleyazaarɩ ta wʋ́ dɩ o nʋa na-cwɛn dɩm jana wʋnɩ, yɩ o laan pipiri o jeeri jero-vwe dɩm yigə seeni o miisi jana bam kuni bɩrpɛ. 5 Kʋ daarɩ naa kʋm tɩtɩ, dɩ kʋ tɔnɔ kʋm, dɩ kʋ nwana yam, dɩ kʋ jana bam, dɩ kʋ wʋ-zɩla yam maama maŋɩ sɩ ba zwɛ mʋ kulə yɩ kaanɩm tu wʋm zɩgɩ o niə. 6 Na-cwɛn dɩm na jɩgɩ dɩ zwɛ kʋntʋ tɩn, kaanɩm tu wʋm laan wʋ́ kwe Sɛdrɩ daa dɩdʋa, dɩ Yisopi tiu vɔɔrʋ, dɩ gar-ŋʋn-sɩŋa, o dʋlɩ-tɩ o dɩ mim dɩm wʋnɩ. 7 Kʋntʋ kwaga nɩ sɩ kaanɩm tu wʋm swɛ o yɩra o daarɩ o zarɩ o gwaarʋ. O laan jɩgɩ cwǝŋǝ sɩ o joori o taa zʋʋrɩ Yisɩrayɛlɩ tiinə kɔgɔ kʋm wʋnɩ. O laan maa wʋ́ digimi cullu tɩm seeni sɩ kʋ yi dɩdaan-ni maŋa. 8 Nɔɔnʋ wʋlʋ dɩ na zwɛ na-cwɛn dɩm tɩn dɩ wʋ́ zarɩ o gwaarʋ mʋ yɩ o daarɩ o swɛ o yɩra. Wʋntʋ dɩ wʋ́ digimi cullu tɩm seeni mʋ sɩ kʋ yi dɩdaan-ni maŋa.
9 Wʋlʋ na maŋɩ dɩ cullu tɩm tɩn maa wʋ́ pɛ na-cwɛn dɩm tɩntwarɩm dɩm, yɩ o kɩ-dɩ pwələ kalʋ ba na kwɛ Wɛ ŋwaanɩ tɩn nɩ. Jǝgǝ kam kʋntʋ nan wʋ́ taa yɩ dáa dáa mʋ dɩ á na zʋʋrɩ mɛ tɩn. Ba ta wʋ́ yǝni ba viiri tɩntwarɩm dɩm na wʋnɩ sɩ Yisɩrayɛlɩ tiinə bam ma ba kwɛ ba tɩtɩ dɩ cullu tɩm lwarɩm saarɩm ŋwaanɩ. 10 Wʋlʋ na pɛ tɩntwarɩm dɩm tɩn dɩ wʋ́ zarɩ o gwaarʋ mʋ. O dɩ wʋ́ digimi cullu tɩm seeni sɩ kʋ yi dɩdaan-ni maŋa mʋ. Abam Yisɩrayɛlɩ tiinə bam dɩ vərə balʋ na zʋʋrɩ á wʋnɩ tɩn maŋɩ sɩ á tɔgɩ ni dɩntʋ mʋ sɩ kʋ taa ve wuu.
11 Wʋlʋ na dwe tʋʋ, kʋntʋ tu digimi cullu tɩm seeni mʋ sɩ kʋ taa ve da yarpɛ. 12 O maŋɩ sɩ o kwe cullu kwɛɛm na bam mʋ o ma o kwɛ o tɩtɩ dɩ cullu tɩm. Oó kɩ kʋntʋ da yatɔ dɛ dɩm nɩ, dɩdaanɩ da yarpɛ dɛ dɩm nɩ mʋ, sɩ o laan maŋɩ dɩ cullu tɩm. O na wʋ kwɛ o tɩtɩ da yam kʋntʋ nɩ, o yɔɔrɩ o ta wʋ maŋɩ dɩ cullu tɩm mʋ. 13 Nɔɔnʋ nan na dwe tʋʋ, yɩ o vɩn sɩ o kwɛ o tɩtɩ cullu tɩm ŋwaanɩ, kʋ tu cɔgɩ Baŋa-Wɛ jero-vwe dɩm mʋ. Ba lɩ-o sɩ o daa yɩ wǝli Yisɩrayɛlɩ tiinə bam wʋnɩ. O ta digimi cullu tɩm seeni mʋ, ba na wʋ kwe cullu kwɛɛm na bam ba miisi o yɩra nɩ tɩn ŋwaanɩ.
14 Nɔɔnʋ na wʋ vwe nɩ yɩ o tɩ, cullu tɩm brɩ nɩ wʋlʋ maama na wʋra yɩ kʋ tu tɩ, dɩ wʋlʋ na zʋ da o maŋɩ dɩ o tʋʋnɩ dɩm tɩn maama digimi mʋ cullu tɩm seeni sɩ kʋ taa ve da yarpɛ. 15 Kambiə naa kɔɔrʋ naa zʋŋa kalʋ na wʋ vwe dɩm wʋnɩ yɩ ka ni wʋ pugi, ka dɩ wʋ maŋɩ dɩ cullu tɩm.
16 Nɔɔnʋ wʋlʋ na wʋ pooni yigə nɩ pa o dwe tʋʋ, kʋ tu wʋ́ digimi cullu tɩm seeni sɩ kʋ taa ve da yarpɛ. Kʋ na yɩ wʋlʋ na tɩga jara-kǝm baŋa nɩ tɩn, naa wʋlʋ na tɩgɩ o tɩtɩ tʋʋnɩ tɩn mʋ kʋ tu dwe, kʋ ta yɩ bɩdwɩ mʋ. O ta na dwe tʋʋ kuə, naa o dwe yibeeli, kʋ tu digimi mʋ sɩ kʋ taa ve da yarpɛ maŋa nɩ.
17 Á na lagɩ á kwɛ wʋlʋ na digimi cullu tɩm seeni tɩn, á wʋ́ kwe na-cwɛn dɩlʋ ba na zwɛ lwarɩm saarɩm ŋwaanɩ tɩn tɩntwarɩm mʋ á kɩ kɔɔrʋ wʋnɩ á daarɩ á lo na-ŋʋna á wǝli da. 18 Nɔɔnʋ na maŋɩ dɩ cullu tɩm tɩn laan wʋ́ kwe Yisopi tiu vɔɔrʋ o dɩ na bam wʋnɩ o daarɩ o miisi vwe dɩm, dɩ dɩ wʋ-zɩla yam, dɩ nɔɔna balʋ na wʋ dɩ wʋnɩ yɩ nɔɔnʋ wʋm tɩ tɩn. Kʋ ta yɩ bɩdwɩ mʋ dɩ wʋlʋ na dwe tʋʋ, naa tʋʋ kuə, naa yibeeli. Ba maŋɩ sɩ ba miisi kʋ tu dɩ cullu kwɛɛm na bam mʋ. 19 Á wʋ́ miisi wʋlʋ na digimi tɩn da yatɔ dɛ dɩm nɩ, dɩdaanɩ da yarpɛ dɛ dɩm nɩ, sɩ o laan maŋɩ dɩ cullu tɩm. Nɔɔnʋ wʋm wʋ́ zarɩ o gwaarʋ mʋ o daarɩ o swɛ o yɩra. Dɩdaan-ni maŋa na yiǝ, oó maŋɩ dɩ cullu tɩm. 20 Nɔɔnʋ na digimi cullu tɩm seeni, yɩ o vɩn sɩ o kwɛ o tɩtɩ dɩ cullu tɩm, ba maŋɩ sɩ ba lɩ kʋ tu sɩ o daa yɩ wǝli Yisɩrayɛlɩ tiinə kɔgɔ kʋm wʋnɩ mʋ, o na cɔgɩ Baŋa-Wɛ jero-vwe dɩm tɩn ŋwaanɩ. O ta digimi mʋ cullu tɩm seeni, ba na wʋ kwe cullu kwɛɛm na bam ba miisi o yɩra nɩ tɩn ŋwaanɩ. 21 Niə yantʋ nan wʋ́ taa wʋra maŋa maama ya pa abam.
Wʋlʋ na kwe cullu kwɛɛm na bam o miisi nɔɔna tɩn dɩ maŋɩ sɩ o zarɩ o gwaarʋ mʋ. Wʋlʋ maama dɩ na dwe na bam kʋntʋ, kʋ tu wʋ́ digimi cullu tɩm seeni, sɩ kʋ taa nii dɩdaan-ni maŋa. 22 Wʋlʋ na digimi cullu tɩm seeni tɩn na dwe woŋo kʋlʋ maama, woŋo kʋm kʋntʋ dɩ digimi mʋ. Wʋlʋ dɩ nan na dwe woŋo kʋm, o dɩ wʋ́ digimi o tɩtɩ sɩ kʋ taa nii dɩdaan-ni maŋa mʋ.»