Wɛ kaanɩm tiinə dɩ Levi dwi tiinə tɩtʋŋa yam taanɩ
18
Baŋa-Wɛ dɛɛn ma ta dɩ Arɔn DƖ wɩ:«Nmʋ dɩ n biə, kʋ wǝli dɩ á cʋrrʋ Levi dwi tiinə bam mʋ maŋɩ sɩ á taá nii sɩ nɔɔn-nɔɔnʋ yɩ cɔgɩ jero-vwe cullu tɩm. Kʋ nan na yɩ Wɛ kaanɩm tiinə bam, nmʋ dɩ n biə bam mʋ maŋɩ sɩ á taá nii ba baŋa nɩ, sɩ ba yɩ kɩ ba cɔgɩ. 2 Nmʋ dɩ́ n biə na yǝni á tʋŋɩ jero-vwe dɩm tɩtʋŋa, sɩ á pa á cʋrrʋ Levi dwi tiinə bam taa tui ba wǝli abam wʋnɩ ba taa tʋŋa. 3 Taá nii ba baŋa nɩ sɩ ba taa tʋŋɩ jero-vwe dɩm maama tɩtʋŋa yam. Nan yɩ pa-na sɩ ba yi ba dwe jero-vwe dɩm wʋ-zɩla yam, naa kaanɩm bimbim dɩm. Á na pɛ-ba cwǝŋǝ pa ba kɩ kʋntʋ, abam dɩ bantʋ maama wʋ́ tɩ mʋ. 4 Bantʋ mʋ wʋ́ wǝli abam wʋnɩ sɩ á taá tʋŋɩ jero-vwe dɩm tɩtʋŋa yam maama. Kʋ na daɩ bantʋ yɩranɩ, nɔn-gaa ba jɩgɩ cwǝŋǝ sɩ o twɛ abam tɩtʋŋa je sɩm.a
5 Nmʋ dɩ n biə bam wʋ́ nii jero-vwe dɩm tɩtɩ, dɩ kaanɩm bimbim dɩm tɩtʋŋa baŋa nɩ, sɩ amʋ banɩ daa yɩ zaŋɩ dɩ Yisɩrayɛlɩ tiinə bam. 6 Amʋ tɩtɩ mʋ kuri Levi dwi dɩm Yisɩrayɛlɩ dwiə yam maama wʋnɩ sɩ ba taa yɩ a nyɩm. A laan ma kwe-ba a pa abam kaanɩm tiinə bam sɩ ba taa zǝni abam. 7 Nmʋ dɩ n biə bam yɩranɩ mʋ wʋ́ taa tʋŋɩ kaanɩm tiinə tɩtʋŋa yam. Abam mʋ jɩgɩ cwǝŋǝ sɩ á taá kɩ kaanɩm á pa-nɩ bimbim dɩm baŋa nɩ, yɩ á ta daarɩ á gaalɩ á zʋ Wɛ jero-vwe gar-jalɩ dɩm yigə nɩ. Kaanɩm tɩtʋŋɩ dɩm á na wʋ́ tʋŋɩ tɩn yɩ pɛɛrɩ mʋ amʋ na kwe a pa abam. Nɔn-gaa na kwaanɩ sɩ o twɛ á tɩtʋŋa je sɩm, kʋ tu maŋɩ sɩ o tɩ mʋ.»
Wɛ kaanɩm tiinə bam pɛɛra taanɩ
8 Baŋa-Wɛ ma ta dɩ Arɔn DƖ wɩ:
«Amʋ kwe pɛɛra yalʋ maama Yisɩrayɛlɩ tiinə bam na yǝni ba jaanɩ ba tui ba pa-nɩ tɩn mʋ a kɩ abam jɩŋa nɩ sɩ á taá nii ya kaanɩm baŋa nɩ. Amʋ nan pɔɔrɩ abam nyɩm mʋ ya wʋnɩ sɩ á taá jɩga taan wuu. 9 Kʋ na yɩ pɛɛra yalʋ na tiini ya yɩ lanyɩranɩ fasɩ yɩ nɔɔna jaanɩ ba tui ba pa-nɩ tɩn, á wʋ́ pɔɔrɩ á nyɩm pɛɛra yalʋ ba na wʋ zwɛ kaanɩm bimbim dɩm baŋa nɩ tɩn wʋnɩ mʋ. Kʋ na yɩ ba wʋdiu pɛɛra yam, dɩ ba lwarɩm saarɩm pɛɛra yam, dɩ ba lwarɩm jɩnɩ pɛɛra yam, nmʋ dɩ n biə wʋ́ joŋi á nyɩm ya maama wʋnɩ. 10 Á nan maŋɩ sɩ á maŋɩ jero-vwe dɩm wʋnɩ mʋ á di wǝǝnu tɩm kʋntʋ, tɩ na tiini tɩ yɩ lanyɩranɩ fasɩ tɩn ŋwaanɩ. Á baara bam maama mʋ jɩgɩ cwǝŋǝ sɩ ba di-tɩ. Nan pa-na sɩ tɩ taa yɩ lanyɩranɩ fasɩ abam tee nɩ.
11 Kʋ ta na yɩ pɛɛra yalʋ á na wʋ́ pɔɔrɩ Yisɩrayɛlɩ tiinə pɛɛra yalʋ á na zǝŋi wɛɛnɩ á yaarɩ-ya amʋ yigə nɩ tɩn wʋnɩ, amʋ kwe tɩntʋ sɩ tɩ taa yɩ nmʋ dɩ n biə bam nyɩm mʋ. Nmʋ bu-baara dɩ n bukwa jɩgɩ cwǝŋǝ sɩ ba di-tɩ taan wuu. N digə tiinə bam wʋlʋ maama na maŋɩ dɩ cullu tɩm, kʋ tu jɩgɩ cwǝŋǝ sɩ o joŋi tɩ wʋnɩ o di.
12 Kʋ ta na yɩ pɛɛra yalʋ nɔɔna na yǝni ba pɔɔrɩ ba nugə wʋnɩ, dɩ ba vinyə dɩvɛn wʋnɩ, dɩ ba wʋdiiru tɩlʋ maama na yǝni tɩ loori yigə tɩ kɩ tɩn wʋnɩ ba ja ba ba ba pa-nɩ tɩn, amʋ kwe tɩntʋ a pa abam mʋ. 13 Wʋdiiru tɩlʋ maama tɩga kam na yǝni tɩ kɩ yɩ nɔɔna ja-tɩ ba ba ba pa-nɩ tɩn wʋ́ taa yɩ abam nyɩm. N digə tiinə bam wʋlʋ maama na maŋɩ dɩ cullu tɩm, kʋ tu jɩgɩ cwǝŋǝ sɩ o joŋi tɩ wʋnɩ o di.b
14 Woŋo kʋlʋ maama Yisɩrayɛlɩ tiinə bam na yɔɔrɩ ba kwe ba kɩ amʋ jɩŋa nɩ tɩn dɩ wʋ́ taa yɩ abam nyɩm. 15 Yisɩrayɛlɩ tiinə bam bəkər-kwɩn sɩm, dɩ ba varɩ-kwɩn sɩm ba na yǝni ba ja ba ba sɩ ba pa-nɩ tɩn maama yɩ abam nyɩm mʋ. Á nan wʋ́ pa ba ŋwɩ səbu mʋ sɩ kʋ ləri ba bəkər-kwɩn sɩm yuu nɩ. Kʋ ta na yɩ varɩ-kwɩn sɩlʋ na wʋ maŋɩ dɩ cullu tɩm tɩn, baá ŋwɩ səbu sɩ ŋwaanɩ. 16 Ba na lagɩ ba ŋwɩ səbu ba bəkər-kwɩn sɩm ŋwaanɩ, abam wʋ́ joŋi sɛkɛlɩ səbu-dala yanu mʋ bu wʋlʋ na yi cana tɩn ŋwaanɩ. Səbu kʋm kʋntʋ duuni maŋɩ sɩ kʋ tɔgɩ dɩ jero-vwe dɩm maŋɩm cɩga cɩga na yɩ te tɩn mʋ. Sɛkɛlɩ dɩdʋa maa yɩ gɛra-dala kuni fiinle. 17 Kʋ nan na yɩ varɩ-kwɩan kalʋ na yɩ naa, naa piə, naa bʋŋʋ, kʋ daɩ sɩ á joŋi səbu kʋ ŋwaanɩ. Vara bam kʋntʋ doŋ yɔɔrɩ ba yɩ amʋ nyɩm mʋ. Á maŋɩ sɩ á kwe ba jana á miisi kaanɩm bimbim dɩm yɩra nɩ mʋ, yɩ á daarɩ á zwɛ ba lara kam á ma á kɩ zwɛɛm kaanɩm á pa-nɩ, sɩ ka lwəm dɩm taa ywəmmə dɩ pa-nɩ. 18 Vara bam kʋntʋ nwana nan yɩ abam nyɩm mʋ sɩ á di, nɩnɛɛnɩ á na jɩgɩ cwǝŋǝ sɩ á di vara nyɔɔna yalʋ á na zǝŋi wɛɛnɩ amʋ ŋwaanɩ tɩn, dɩ ba jazɩm cwə yam te tɩn. 19 Pɛɛra yalʋ maama Yisɩrayɛlɩ tiinə bam na pɔɔrɩ sɩ ba kwe ba pa-nɩ tɩn mʋ amʋ kwe-ya sɩ ya taa yɩ nmʋ dɩ n biə bam nyɩm, bəkəri dɩ bɩsankam maama. Yaá taa yɩ abam nyɩm taan wuu. Amʋ ni dɩm kʋntʋ wʋ́ yɔɔrɩ dɩ taa wʋra kʋ paɩ nmʋ dɩ n kwaga kam sɩ kʋ taa ve maŋa maama.»
20 Baŋa-Wɛ laan ma ta dɩ Arɔn DƖ wɩ:
«Ba na lagɩ ba pɔɔrɩ tɩga kam ba pa Yisɩrayɛlɩ tiinə bam, nmʋ bá tɔgɩ n joŋi n pʋpwara ka wʋnɩ. Nmʋ bá na tɩga sɩ kʋ taa yɩ nmʋ nyɩm, kʋ yɩ amʋ mʋ yɩ n təri.c
21 Kʋ ta na yɩ Levi dwi tiinə bam, amʋ wʋ́ pa ba joŋi ba ŋwɩɩrʋ tɩtʋŋa yalʋ ba na jɩgɩ ba tʋŋɩ jero-vwe dɩm wʋnɩ tɩn baŋa nɩ. Yisɩrayɛlɩ tiinə bam na yǝni ba lɩ pʋpwara dɩdʋa ba wǝǝnu tɩm pɔɔrɩm fugə maama wʋnɩ sɩ ba pa-nɩ, amʋ wʋ́ kwe amʋ pʋpwara kam kʋntʋ a pa Levi dwi tiinə bam.d 22-23 Bantʋ yɩranɩ mʋ maŋɩ sɩ ba taa nii jero-vwe dɩm baŋa nɩ, sɩ nɔɔn-nɔɔnʋ yɩ cɔgɩ dɩ cullu tɩm. Nɔn-gaa daa ba jɩgɩ cwǝŋǝ sɩ o fʋfɔ o yi jero-vwe dɩm. Wʋlʋ na kɩ kʋntʋ, kʋ tu tusim dɩm wʋ́ taa wʋ o yuu nɩ yɩ o maŋɩ sɩ o tɩ mʋ. Levi tiinə bam dɩ maŋɩ sɩ ba na waarɩm kʋ ŋwaanɩ. Ni dɩntʋ a na pɛ abam tɩn wʋ́ taa wʋra mʋ taan wuu kʋ paɩ abam dɩ á kwaga kam.
Levi tiinə bam nan bá tɔgɩ ba joŋi ba pʋpwara tɩga kam pɔɔrɩm baŋa nɩ, nɩ ba cʋrrʋ Yisɩrayɛlɩ tiinə bam na wʋ́ na te tɩn. 24 Kʋ na yɩ te tɩn, amʋ kwe Wɛ-təri pɛɛra yalʋ Yisɩrayɛlɩ tiinə na jaanɩ ba tui ba pa-nɩ tɩn a pa-ba sɩ ya taa yɩ ba pʋpwara. Kʋntʋ ŋwaanɩ mʋ a nan tagɩ Levi tiinə bam taanɩ a wɩ: ba bá tɔgɩ ba na ba pʋpwara Yisɩrayɛlɩ tiinə tɩga kam pɔɔrɩm baŋa nɩ.»
25 Baŋa-Wɛ laan ma ta dɩ Moyisi DƖ wɩ:
26 «Ta n brɩ Levi tiinə bam nɩ: Abam na joŋi Wɛ-təri pɛɛra yalʋ na yɩ abam nyɩm tɩn Yisɩrayɛlɩ tiinə bam tee nɩ, sɩ á dɩ lɩ pʋpwara dɩdʋa fugə maama wʋnɩ á pa Baŋa-Wɛ. Yaá taa yɩ abam tɩtɩ Wɛ-təri pɛɛra á na lɩ bantʋ Wɛ-təri pɛɛra yam wʋnɩ tɩn mʋ. 27 Baŋa-Wɛ wʋ́ jeeli á Wɛ-təri pɛɛra yam kʋntʋ, nɩnɛɛnɩ á ya na kwe á tɩtɩ mɩna naa dɩvɛn á pa‑o tɩn mʋ. 28 Á wʋ́ tɔgɩ cwǝŋǝ kam kʋntʋ á lɩ Yisɩrayɛlɩ tiinə bam Wɛ-təri pɛɛra yam maama wʋnɩ, sɩ á dɩ kɩ pɛɛra á pa‑o. Á ma á wʋ́ kwe abam tɩtɩ Wɛ-təri pɛɛra yam kʋntʋ á pa Wɛ kaanɩm tu Arɔn. 29 Á maŋɩ sɩ á lɩ wǝǝnu tɩlʋ na tiini tɩ lana tɩn á pɛɛra yam wʋnɩ mʋ sɩ tɩ taa yɩ Baŋa-Wɛ nyɩm. Pɔɔrɩ-na-tɩ á pa‑DƖ.
30 Ta ta dɩ Levi tiinə bam nɩ: Abam na pɔɔrɩ wǝǝnu tɩlʋ na tiini tɩ lana tɩn á pa Wɛ, DƖ wʋ́ jeeli á pɛɛra yam kʋntʋ, nɩnɛɛnɩ á ya na kwe á tɩtɩ mɩna naa dɩvɛn á pa‑DƖ tɩn mʋ. 31 Abam dɩ á digə tiinə jɩgɩ cwǝŋǝ sɩ á kwe kʋlʋ na daarɩ á pɛɛra yam wʋnɩ tɩn á di mɛ seeni á na lagɩ tɩn. Bɛŋwaanɩ, pɛɛra yam kʋntʋ yɩ á ŋwɩɩrʋ tɩlʋ á na nɛ jero-vwe dɩm tɩtʋŋa baŋa nɩ tɩn mʋ. 32 Á na yɔɔrɩ á lɩ wǝǝnu tɩlʋ na tiini tɩ lana tɩn sɩ tɩ taa yɩ á Wɛ-təri pɛɛra á pa‑DƖ, á bá na cɔgɩm cullu tɩm seeni. Pɛɛra yalʋ Yisɩrayɛlɩ tiinə bam na jaanɩ ba tui ba pa-nɩ tɩn yɩ lanyɩranɩ fasɩ mʋ. Kʋ daɩ sɩ á kwe-ya á di yɔɔ yɔɔ. Á na tɔgɩ cwe sɩm kʋntʋ, á bá tɩ cullu tɩm cɔgɩm ŋwaanɩ.»