Arɔn nacəgə na kwin vɔɔrʋ te tɩn
17
Baŋa-Wɛ ma ta dɩ Moyisi DƖ wɩ: 2 «Ta dɩ Yisɩrayɛlɩ tiinə bam sɩ n joŋi nace fugə-sɩle ba tee nɩ. Ba nabaara sɔ-yuni tɩm maama yigə tu wʋm wʋ́ kwe o nacəgə kam o pa‑m sɩ n pʋpʋnɩ kʋ tu yɩrɩ n kɩ ka yɩra nɩ. 3 Kʋ na yɩ Levi dwi dɩm nacəgə kam, sɩ n pʋpʋnɩ Arɔn yɩrɩ n kɩ ka yɩra nɩ. Kʋntʋ tɩn, ba sɔ-yuni tɩm maama yigə tu nacəgə kam wʋ́ taa wʋra. 4 Nan kwe nace sɩm kʋntʋ n ja n zʋ jero-vwe dɩm wʋnɩ n tiŋi Wɛ ni-gonim daka kam yigə nɩ, mɛ seeni a na yǝni a jeeri‑m tɩn. 5 Kʋ na yɩ nɔɔnʋ wʋlʋ amʋ na kuri sɩ o taa yɩ a kaanɩm yigə tu wʋm tɩn, kʋ tu nacəgə kam wʋ́ kwin dɩ vɔɔrʋ. A maa wʋ́ tɔgɩ kʋ baŋa nɩ sɩ Yisɩrayɛlɩ tiinə bam na yɔɔrɩ ba jɩgɩ-m ba pʋʋna te tɩn yagɩ.»6 Moyisi ma ta Wɛ ni dɩm o brɩ Yisɩrayɛlɩ tiinə bam. Ba yigǝ tiinǝ bam ma sɩɩnɩ ba pa‑o ba nace fugə-sɩle, sɔ-yuu maama dɩ kʋ nacəgə. Arɔn nacəgə kam dɩ ma wǝli da Levi dwi dɩm ŋwaanɩ. 7 Moyisi ma ja sɩ maama o zʋ jero-vwe dɩm wʋnɩ o tiŋi Wɛ ni-gonim daka kam yigə nɩ.
8 Tɩga na pʋʋrɩ tɩn mʋ Moyisi joori o zʋ jero-vwe dɩm wʋnɩ. O na zʋ tɩn, mʋ o nɛ nɩ Arɔn nacəgə kam, ka na zɩgɩ ka paɩ Levi dwi dɩm tɩn kwin vɔɔrʋ. Ka ta kɩ punnu dɩ, yɩ Amandiə tiu biə na bɩgɩ tɩn lǝgi ka yɩra nɩ. 9 Moyisi ma ja nace sɩm maama ya na tigi Baŋa-Wɛ daka kam yigə nɩ tɩn o nuŋi pooni, sɩ Yisɩrayɛlɩ tiinə bam maama na. Yigǝ tiinǝ bam maama ma lwarɩ ba nace yɩ ba kwe-sɩ.
10 Baŋa-Wɛ laan ma ta dɩ Moyisi DƖ wɩ: «Ja Arɔn nacəgə kam n joori n zʋ n tiŋi ni-gonim daka kam yigə nɩ. Ka yɩ maana mʋ ka pa zwabani-nyɩna bam nɩ: ba na wʋ yagɩ ba pʋmpʋna kam amʋ ŋwaanɩ, aá cɔgɩ-ba.» 11 Moyisi ma kɩ te Baŋa-Wɛ na pɛ‑o ni sɩ o kɩ tɩn.