Kʋra dɩ Datan dɩ Abiram vɩn Moyisi dɩ Arɔn ni
16
Yiseyarɩ bu Kʋra dɛɛn yɩ Levi dwi tu mʋ yɩ o nuŋi Keyatɩ sɔ-yuu kʋm wʋnɩ.a O ma kɩ ni dɩ Ruban dwi tiinə badonnǝ sɩ ba dwəni dɩ Moyisi. Nɔɔna bam kʋntʋ maa yɩ Eliabɩ biə bale Datan dɩ Abiram, dɩdaanɩ Peleti bu Ɔnɩ mʋ. 2 Ba dɛɛn dwəni dɩ Moyisi, yɩ Yisɩrayɛlɩ kɔgɔ kʋm yigǝ tiinǝ biə-yale dɩ fiinnu balʋ nɔɔna na nɩgɩ tɩn maa zɩgɩ ba kwaga nɩ. 3 Ba laan ma vu ba jeeri Moyisi dɩ Arɔn, yɩ ba ta dɩ ba ba ba wɩ: «Abam zǝŋi á tɩtɩ á gaalɩ kʋ na maŋɩ sɩ á kɩ te tɩn. Á bʋŋɩ nɩ á garɩ Yisɩrayɛlɩ tiinə bam maama mʋ na? Dɩ́ kɔgɔ kʋm wʋnɩ nɔɔnʋ maama yɩ Wɛ nyɩm mʋ. Baŋa-Wɛ maa wʋ nɔɔnʋ maama tee nɩ. Bɛ nan mʋ yɩ á zǝŋi á tɩtɩ Baŋa-Wɛ kɔgɔ kʋm maama yigə nɩ?»4 Moyisi na ni ba taanɩ dɩm tɩn, mʋ o vin o yibiyə tɩga nɩ. 5 O laan ma ta o brɩ Kʋra dɩ o kwaga kɔgɔ kʋm o wɩ: «Jwa tɩtɩɩtɩ Baŋa-Wɛ tɩtɩ wʋ́ brɩ dɩbam wʋlʋ DƖ na sɩɩnɩ DƖ pɔɔrɩ sɩ o taa yɩ DƖ nyɩm tɩn. DƖ ta wʋ́ pa kʋ tu cwǝŋǝ sɩ o fʋfɔ o twɛ DƖ te. Nɔɔnʋ wʋlʋ DƖ na sɩɩnɩ DƖ kuri tɩn mʋ wʋ́ zɩgɩ DƖ yigə nɩ. 6 Kʋra, nmʋ dɩ n kɔgɔ kʋm maama maŋɩ sɩ á kɩ tɩntʋ mʋ: kwe-na min-cala zwɩ 7 sɩ á jwa kɩ min-cala sɩ wʋnɩ. Á ta wʋ́ kwe wǝǝnu tɩlʋ lwǝm na ywǝmmǝ tɩn á kɩ á wǝli da sɩ á daarɩ á vu Baŋa-Wɛ yigə nɩ. Baŋa-Wɛ wʋ́ kuri wʋlʋ DƖ na pɔɔrɩ sɩ o taa yɩ DƖ nyɩm tɩn. Abam Levi dwi tiinə mʋ zǝŋi á tɩtɩ á gaalɩ!»
8 Moyisi ta ma ta dɩ Kʋra o wɩ: «Nan cəgi-na lanyɩranɩ, abam Levi dwi tiinə bam! 9 Baŋa-Wɛ pɔɔrɩ abam Yisɩrayɛlɩ dwi tiinə bam maama wʋnɩ sɩ á taá tʋŋɩ á pa‑DƖ DƖ jero-vwe dɩm nɩ, sɩ á daarɩ á taá zɩgɩ Yisɩrayɛlɩ tiinə kɔgɔ kʋm yigə nɩ á wǝli-ba Wɛ zulə seeni. DƖ na kwe tɩtʋŋɩ dɩm kʋntʋ DƖ pa abam tɩn daɩ kʋlʋkʋlʋ abam tee nɩ na? 10 DƖ pɛ cwǝŋǝ sɩ nmʋ, Kʋra, dɩ n donnǝ Levi tiinə badaara bam taa tui DƖ yigə nɩ. Nmʋ nan bʋŋɩ sɩ n ji Wɛ kaanɩm tu mʋ n wǝli da na? 11 Cɩga ŋwaanɩ tɩn, nmʋ dɩ n kwaga kɔgɔ kʋm na zǝŋi á tɩtɩ te tɩn, kʋ yɩ á ciŋi jara dɩ Baŋa-Wɛ mʋ. Á jɩgɩ Arɔn á pʋʋna sɩ bɛɛ mʋ?»
12 Moyisi ma tʋŋɩ o bəŋi Eliabɩ biə, Datan dɩ Abiram. Ba ma tʋŋɩ kwǝrǝ o tee nɩ ba wɩ: «Dɩ́ bá ba nmʋ te! 13 Nmʋ jaanɩ dɩbam n nuŋi Ezipi tɩ-ywəŋə kalʋ na lana dɩ varɩm dɩ kɔnɔ tɩn wʋnɩ n ba yo seeni sɩ dɩ́ tɩ kagʋa kantʋ wʋnɩ. Kʋ nan daɩ kʋlʋkʋlʋ nmʋ tee nɩ yɩ n ta bʋŋɩ sɩ n di dam dɩ́ baŋa nɩ! 14 Nmʋ ta wʋ pɛ dɩ́ zʋ tɩga kalʋ na ywəmmə dɩ varɩm dɩ kɔnɔ tɩn. N wʋ pɛ dɩ́ taa te tɩga sɩ dɩ́ du wǝǝnu ka wʋnɩ, naa dɩ́ jəri Vinyə tweeru dɩ́ gwəri dɩ biə. Daa n yɩ bʋŋɩ sɩ n ganɩ nɔɔna bantʋ. Dɩ́ brɩ dɩ́ ba bɩɩna n te!»
15 Moyisi banɩ ma tiini dɩ zaŋɩ yɩ o ta dɩ Baŋa-Wɛ o wɩ: «Yɩ pa n yigə taa wʋ nɔɔna bantʋ pɛɛra yam wʋnɩ. A wʋ cɔgɩ ba yigə, a nan wʋ joŋi ba bɩnaga dɩdʋa tɩtɩ dɩ.»
16 Moyisi laan ma ta dɩ Kʋra o wɩ: «Jwaanɩ sɩ nmʋ dɩ n kwaga kɔgɔ kʋm ba á zɩgɩ Baŋa-Wɛ yigə nɩ. Abam maama dɩ Arɔn wʋ́ ba á jeeri da. 17 Abam nɔɔnʋ maama wʋ́ ja o min-cala zʋŋa kam dɩ ka wʋ wǝǝnu tɩlʋ lwǝm na ywǝmmǝ tɩn mʋ o ja o jeeri sɩ o zwɛ o pa Baŋa-Wɛ. Arɔn dɩ wʋ́ kɩ kʋntʋ. Á min-cala zwɩ sɩm maama wʋ́ taa yɩ biə-yale dɩ fiinnu mʋ.»
18 Tɩga na pʋʋrɩ tɩn, nɔɔna bam maama ma sɩɩnɩ ba kwe ba zwɩ dɩ sɩ wʋ min-cala, yɩ ba laan daŋɩ wǝǝnu tɩlʋ lwǝm na ywǝmmǝ tɩn sɩ wʋnɩ. Ba ma vu ba jeeri Moyisi dɩ Arɔn yɩ ba maama zɩgɩ jero-vwe dɩm ni nɩ. 19 Kʋra dɛɛn ya pɛ Yisɩrayɛlɩ tiinə kɔgɔ kʋm maama ba ba jeeri jero-vwe dɩm ni nɩ ba zɩgɩ Moyisi dɩ Arɔn yigə nɩ. Ba maama na tu ba zɩgɩ da kʋntʋ tɩn, Baŋa-Wɛ ma vɩɩrɩ DƖ tɩtɩ dɩ DƖ paarɩ-zulǝ yam DƖ brɩ ba maama, 20 yɩ DƖ ta dɩ Moyisi dɩ Arɔn DƖ wɩ: 21 «Abam bale kɛ-na dáa á daarɩ Yisɩrayɛlɩ tiinə kɔ-fɔrɔ kʋm, sɩ a yɔɔrɩ a lagɩ a ti-ba mʋ lele kʋntʋ.» 22 Moyisi dɩ Arɔn ma vin ba yibiyə tɩga nɩ ba loori Wɛ ba wɩ: «Dɩ́ Tu Wɛ, nmʋ ŋwaanɩ mʋ nabiinǝ maama ŋwɩ. Nɔɔnʋ dɩdʋa nan na kɩ o tusi, nmʋ wʋ́ da kʋ ŋwaanɩ n kɩ banɩ dɩ nɔn-kɔgɔ kʋm maama mʋ na?»
23 Baŋa-Wɛ ma ta dɩ Moyisi DƖ wɩ: 24 «Nan ta dɩ kɔ-fɔrɔ kʋm maama sɩ ba ja ba tɩtɩ ba vu dáa ba daarɩ Kʋra, dɩ Datan, dɩ Abiram vwə yam.» 25 Moyisi ma zaŋɩ o vu Datan dɩ Abiram te yɩ Yisɩrayɛlɩ nakwa bam dɩ tɔgɩ o kwaga. 26 Moyisi maa jɩgɩ nɔn-kɔgɔ kʋm o kaanɩ yɩ o wɩ: «Fʋfɔ-na á daarɩ nɔn-balwaarʋ tɩntʋ vwe yam. Nan yɩ zaŋɩ-na á dwe ba kʋlʋkʋlʋ, sɩ á dɩ tɔgɩ dɩ ba á tɩ ba lwarɩm dɩm ŋwaanɩ.» 27 Nɔɔna bam maama ma sɩɩnɩ ba vu dáa ba daarɩ Kʋra, dɩ Datan, dɩ Abiram vwə yam. Datan dɩ Abiram dɛɛn nuŋi mʋ ba zɩgɩ ba vwə yam ni nɩ, yɩ ba kaana dɩ ba biə dɩ zɩgɩ ba tee nɩ.
28 Moyisi laan ma ta o wɩ: «Kǝm dɩntʋ baŋa nɩ mʋ abam wʋ́ ma á sɛ nɩ Baŋa-Wɛ mʋ tʋŋɩ-nɩ, sɩ kʋ daɩ a tɩtɩ wʋbʋŋa ŋwaanɩ mʋ a kɩ tɩtʋŋa yalʋ a na jɩgɩ a kɩ tɩn. 29 Nɔɔna bantʋ na tɩgɩ ba tɩtɩ tʋʋnɩ, kʋ brɩ nɩ Baŋa-Wɛ wʋ tʋŋɩ-nɩ, sɩ a tɩtɩ mʋ kɩ a wʋbʋŋa. 30 Baŋa-Wɛ nan na kɩ wo-kɩnkagɩlɩ dɩlʋ ta na wʋ maŋɩ dɩ kɩ tɩn, pa tɩga kam bɔkɩ bɩle ka joŋi-ba ka li, yɩ bantʋ dɩ ba wǝǝnu maama na zʋ tɩga kuri nɩ yɩ ba ŋwɩ: kʋʋ́ pa á lwarɩ nɩ ba na gooni Baŋa-Wɛ tɩn ŋwaanɩ mʋ DƖ kɩ kʋntʋ.»
31 Moyisi na yɔɔrɩ o ta kʋntʋ o ti tɩn, mʋ tɩga kam mɛ seeni nɔɔna bam na zɩgɩ tɩn bɔkɩ bɩle. 32 Ka ma joŋi ba dɩ ba di sɩm tiinə ka li. Tɩga kam dɛɛn ta ligi Kʋra dɩ o kwaga tɔgɩna bam maama mʋ, dɩ ba jɩjɩgɩrʋ maama. 33 Ba dɩ ba wǝǝnu maama na sirimi ba zʋ goŋo kʋm wʋnɩ kʋntʋ tɩn, mʋ tɩga kam joori ka kwǝni ka tɩtɩ. Nɔɔna bam kʋntʋ laan je, yɩ ba daa tǝrǝ Yisɩrayɛlɩ tiinə kɔgɔ kʋm wʋnɩ. 34 Yisɩrayɛlɩ tiinə bam dɛɛn ni nɔɔna bam na kaasɩ bɔgɩ-bɔgɩ te tɩn. Ba dɩ ma duri sɩ ba lu yɩ ba kaasɩ ba wɩ: «Duri-na sɩ tɩga kam wʋ́ zɩgɩ ka ba, ka li dɩbam dɩ ka wəli da!»
35 Kʋ ta na yɩ nɔɔna biə-yale dɩ fiinnu balʋ na mɛ ba mim zwɩ sɩm ba zwɛ wǝǝnu tɩlʋ lwǝm na ywǝmmǝ tɩn ba pa Baŋa-Wɛ tɩn, min-vʋgʋ mʋ da kʋ nuŋi Baŋa-Wɛ tee nɩ kʋ cu ba baŋa nɩ kʋ gʋ-ba.
36 Baŋa-Wɛ ma ta dɩ Moyisi DƖ wɩ: 37 «Ta dɩ Arɔn bu Eleyazaarɩ sɩ o beeri tɩntwarɩm dɩm wʋnɩ o twɛ min-cala zwɩ sɩm. O na kɩ kʋntʋ, sɩ o laan lɩ min-cala yalʋ na wʋ sɩ wʋnɩ tɩn o dʋlɩ o yagɩ yigə yigə. Bɛŋwaanɩ, zwɩ sɩm laan yɩ lanyɩranɩ fasɩ mʋ, 38 ba na kwe-sɩ ba ma kɩ pɛɛra ba pa Baŋa-Wɛ tɩn ŋwaanɩ. Nɔɔna balʋ na kɩ kʋntʋ tɩn laan tɩgɩ mʋ ba lwarɩm ŋwaanɩ. Kʋntʋ ŋwaanɩ, á maŋɩ sɩ á kwe zwɩ sɩm á magɩ á kɩ daanɩ sɩ sɩ caanɩ sɩ ji canna-pɩlaga, sɩ á daarɩ á kwe á ma á kwǝli kaanɩm bimbim dɩm. Kʋntʋ na kɩa, min-cala zwɩ sɩm wʋ́ ji maana mʋ sɩ pa Yisɩrayɛlɩ tiinə bam.»
39 Kaanɩm tu Eleyazaarɩ ma sɩɩnɩ o twɛ zwɩ sɩlʋ nɔɔna bam na jaanɩ ba vu Wɛ yigə nɩ yɩ Wɛ gʋ-ba tɩn. O ma pa ba magɩ-sɩ ba kɩ canna-pɩlaga na caanɩ tɩn, yɩ ba kwe-ka ba kwǝli kaanɩm bimbim dɩm. 40 Kʋ maa yɩ maana kʋ pa Yisɩrayɛlɩ tiinə bam sɩ ba taa ye wɩ nɔɔn-nɔɔnʋ daɩ sɩ o zwɛ wǝǝnu tɩlʋ lwǝm na ywǝmmǝ tɩn o pa Baŋa-Wɛ yɩ o wʋ nuŋi Arɔn dwi dɩm wʋnɩ. Nɔn-gaa na kwaanɩ sɩ o kɩ kʋntʋ, kʋ tu wʋ́ na cɔgɩm nɩnɛɛnɩ Kʋra dɩ o kwaga tɔgɩna bam na nɛ te tɩn mʋ. Eleyazaarɩ dɛɛn kɩ nɩnɛɛnɩ Baŋa-Wɛ na tɔgɩ Moyisi baŋa DƖ pa‑o ni sɩ o kɩ te tɩn mʋ.
41 Tɩga na pʋʋrɩ tɩn mʋ Yisɩrayɛlɩ tiinə kɔ-fɔrɔ kʋm maama ve Moyisi dɩ Arɔn te yɩ ba pʋʋnɩ ba wɩ: «Abam bale mʋ gʋ Wɛ nɔɔna bam badaara.»
42 Nɔɔna bam na yɔɔrɩ ba jeeri ba gilimi-ba tɩn, mʋ Moyisi dɩ Arɔn pipiri sɩ ba nii jero-vwe dɩm seeni, dɩdaanɩ kunkoŋo kʋm tu kʋ kwǝli jero-vwe dɩm yɩ Baŋa-Wɛ da DƖ vɩɩrɩ DƖ tɩtɩ dɩ DƖ paarɩ-zulǝ yam DƖ brɩ ba maama. 43 Moyisi dɩ Arɔn ma vu ba zɩgɩ jero-vwe dɩm yigə nɩ. 44 Baŋa-Wɛ ma ta dɩ Moyisi DƖ wɩ: 45 «Fʋfɔ á zɩgɩ-na dáa nɩ dɩ nɔn-kɔgɔ kʋm sɩ a laan yɔɔrɩ a ti ba maama bɩdwɩ baŋa nɩ.» Ba dɩ ma vin ba yibiyə tɩga nɩ.
46 Moyisi ma ta dɩ Arɔn o wɩ: «Zaŋɩ n kwe n min-cala zʋŋa kam n daarɩ n lɩ min-cala kaanɩm bimbim dɩm mim wʋnɩ n kɩ zʋŋa kam wʋnɩ. Ta kwe wǝǝnu tɩlʋ lwǝm na ywǝmmǝ tɩn n wǝli da n vu n zʋ nɔn-kɔgɔ kʋm wʋnɩ sɩ n ma n saarɩ ba lwarɩm Wɛ yigə nɩ. Kɩ lɩla! Baŋa-Wɛ banɩ zaŋɩ nɔɔna bam baŋa nɩ mʋ pa yawɩ-cɛɔ maŋɩ kʋ tʋ ba wʋnɩ kʋ jɩgɩ-ba kʋ gʋɩ.» 47 Arɔn ma sɩɩnɩ o kɩ kʋlʋ Moyisi na tagɩ tɩn. O kwe o mim zʋŋa kam mʋ o ja o duri o zʋ nɔn-kɔgɔ kʋm wʋnɩ, yɩ yawɩ-cɛɔ kʋm ta jɩgɩ nɔɔna bam kʋ gʋɩ. O ma zwɛ wǝǝnu tɩlʋ lwǝm na ywǝmmǝ tɩn o pa Baŋa-Wɛ sɩ o lɩ ba lwarɩm Wɛ yigə nɩ. 48 O ma zɩgɩ twa bam dɩ nɔɔna balʋ ta na ŋwɩ tɩn tɩtarɩ nɩ. Arɔn kǝm dɩm kʋntʋ ma cɩ yawɩʋ kʋm dam, yɩ nɔɔna bam daa ba tʋa. 49 Dɩ kʋ dɩ, Yisɩrayɛlɩ tiinə balʋ na tɩgɩ yawɩʋ kʋm ŋwaanɩ tɩn dɛɛn yɩ nɔɔna mʋrrʋ fugə-tɩna dɩ biə yarpɛ (14,700). Twa bam kʋntʋ dɛɛn mʋ wǝli dɩ balʋ na maŋɩ ba tɩ Kʋra kǝm-balɔrɔ kʋm ŋwaanɩ tɩn.
50 Yawɩʋ kʋm na tu kʋ yagɩ tɩn, mʋ Arɔn joori jero-vwe dɩm ni nɩ o vu o zɩgɩ Moyisi tee nɩ.