Kaanɩm cwǝŋǝ na wʋ́ taa yɩ te tɩn
15
Baŋa-Wɛ dɛɛn ma ta dɩ Moyisi DƖ wɩ:2 «Ta n brɩ Yisɩrayɛlɩ tiinə bam nɩ: Abam na tu á zʋ tɩga kalʋ a na lagɩ a pa abam sɩ á taá zʋʋrɩ da tɩn wʋnɩ, 3 yɩ á na lagɩ á kɩ kaanɩm sɩ á ma á poli Baŋa-Wɛ wʋʋ, á wʋ́ lɩ varɩm á naanɩ dɩm, naa á peeni sɩm, naa á bʋnɩ dɩm wʋnɩ sɩ á kwe á zwɛ, sɩ kʋ nyʋa kam taa ywəmmə ka paɩ Baŋa-Wɛ. Kʋ na yɩ zwɛɛm pɛɛrɩ kaanɩm, naa ni-gonim pɛɛrɩ kaanɩm, naa á tɩtɩ wʋ-yoŋo pɛɛrɩ kaanɩm, naa kaanɩm dɩlʋ á na kɩ candiə kadoŋ ŋwaanɩ tɩn, á maŋɩ sɩ á kɩ kʋntʋ mʋ. 4 Abam wʋlʋ maama na jaanɩ varɩm kʋntʋ doŋ o ba sɩ o kɩ kaanɩm o pa Baŋa-Wɛ, kʋ tu wʋ́ ja wʋdiu pɛɛrɩ o ba o wǝli da. Pɛɛrɩ dɩm kʋntʋ wʋ́ taa yɩ mun-bwe bwɛn sɩle na viiri dɩdaanɩ nugə bwaŋa dɩdʋa tɩn. 5 O ta wʋ́ ja dɩvɛn bwaŋa dɩdʋa sɩ ka taa yɩ wo-nyɔɔrʋ pɛɛrɩ ka wǝli dɩ pi-bala kalʋ maama o na lagɩ o ma o kɩ zwɛɛm pɛɛrɩ kaanɩm naa kaanɩm dɩdoŋ tɩn wʋnɩ.
6 Kʋ nan na yɩ pi-bɩa mʋ kʋ tu kwe sɩ o ma o kɩ kaanɩm, sɩ o ja mun-bwe bwɛn sɩna na viiri dɩ nugə bwaŋa dɩdʋa dɩ cicoro tɩn o ba o wǝli da. 7 O ta wʋ́ ja dɩvɛn bwaŋa dɩdʋa dɩ cicoro o wǝli da sɩ ka taa yɩ wo-nyɔɔrʋ pɛɛrɩ. Kaanɩm dɩm kʋntʋ lwəm wʋ́ taa ywəmmə dɩ paɩ Baŋa-Wɛ.
8 Nmʋ nan na kwe na-bala sɩ n ma n kɩ zwɛɛm pɛɛrɩ kaanɩm naa kaanɩm dɩdoŋ mʋ, kʋ na yɩ ni-gonim pɛɛrɩ, naa yazurə pɛɛrɩ kaanɩm mʋ n lagɩ n kɩ na pa Baŋa-Wɛ, 9 sɩ n kwe mun-bwe bwɛn sɩrdʋ na viiri dɩ nugə bwɛn sɩle tɩn n wǝli da. 10 Nmʋ ta wʋ́ wǝli dɩvɛn bwɛn sɩle sɩ kʋ taa yɩ wo-nyɔɔrʋ pɛɛrɩ. Kaanɩm dɩm kʋntʋ wʋ́ taa yɩ zwɛɛm pɛɛrɩ mʋ. Dɩ nyʋa kam wʋ́ taa ywəmmə ka paɩ Baŋa-Wɛ.
11-12 Á wʋ́ tɔgɩ cwǝŋǝ kam kʋntʋ mʋ dɩ varɩm wʋlʋ maama á na wʋ́ ja á ba á pa Wɛ tɩn, kʋ na maŋɩ kʋ yɩ na-bɩa, naa pi-bɩa, naa pi-bala, naa bʋŋʋ. 13 Abam balʋ na yɩ tɩmbiə tɩn maŋɩ sɩ á kɩ kʋntʋ doŋ dɩ zwɛɛm pɛɛra yalʋ á na wʋ́ ja á ba sɩ ya lwəm dɩm taa ywəmmə dɩ paɩ Baŋa-Wɛ tɩn mʋ. 14 Kʋ ta na yɩ vərə balʋ na zʋʋrɩ abam wʋnɩ maŋa kalʋ maama tɩn, bantʋ dɩ maŋɩ sɩ ba tɔgɩ cwǝŋǝ kalʋ á na tɔgɩ tɩn dɩ zwɛɛm pɛɛrɩ kaanɩm dɩlʋ lwəm na wʋ́ taa ywəmmə dɩ paɩ Baŋa-Wɛ tɩn. 15 Á kɔgɔ kʋm maama wʋ́ taa tɔgɩ cwǝŋǝ dɩdʋa mʋ, kʋ na maŋɩ kʋ yɩ tɩmbiə naa vərə balʋ na zʋʋrɩ abam wʋnɩ tɩn dɩ. Wɛ ni dɩm kʋntʋ wʋ́ taa wʋra maŋa maama mʋ. Bɛŋwaanɩ, Baŋa-Wɛ yigə nɩ, Yisɩrayɛlɩ tiinə dɩdaanɩ vərə maama yɩ bɩdwɩ mʋ. 16 Abam balʋ na yɩ tɩmbiə tɩn dɩdaanɩ vərə balʋ na zʋʋrɩ abam wʋnɩ tɩn maŋɩ sɩ á taá tɔgɩ Wɛ niə yam bɩdwɩ mʋ yɩ pʋpwara tǝrǝ.»
17 Baŋa-Wɛ daa ta ma ta dɩ Moyisi DƖ wɩ:
18 «Ta n brɩ Yisɩrayɛlɩ tiinə bam nɩ: Abam na tu á zʋ tɩga kalʋ a na lagɩ a pa abam sɩ á taá zʋʋrɩ da tɩn, 19 yɩ á na lagɩ á di wʋdiu kʋlʋ tɩga kam na kɩ ka pa abam tɩn, sɩ á lɩ kʋ wʋnɩ á ma á kɩ pɛɛrɩ sɩ á zəŋi-dɩ wɛɛnɩ á pa Baŋa-Wɛ. 20 Abam na puli á zagɩ mɩna yɩ á kwe-ya á cʋ muni, sɩ á ma-dɩ á fɔgɩ dɩpɛ sɩ kʋ taa yɩ pɛɛrɩ kʋ paɩ Baŋa-Wɛ. Pɔɔrɩ-na kʋntʋ á pa Wɛ nɩ á na yǝni á kɩ te dɩ mɩna yalʋ á na frɩ tɩn. 21 Abam dɩ á dwi dɩlʋ maama na saŋɩ sɩ kʋ taa ve wuu tɩn wʋ́ lɩ mun-bwe dɩlʋ á na puli á cʋ tɩn wʋnɩ mʋ á ma á kɩ pɛɛrɩ á pa Baŋa-Wɛ.
22 Abam nan na wʋ wanɩ niə yantʋ Baŋa-Wɛ na pɛ Moyisi tɩn sɩ á tɔgɩ, yɩ á na wʋ paalɩ á cɔgɩ-ya, cwǝŋǝ wʋra sɩ á saarɩ á tusim dɩm kʋntʋ. 23 Á na maŋɩ á cɔgɩ ni dɩlʋ maama Baŋa-Wɛ na puli DƖ tɔgɩ Moyisi baŋa DƖ pa abam tɩn, naa ni dɩlʋ maama na zɩgɩ dɩ pa á kwaga kam tɩn, 24 yɩ á wʋ paalɩ á cɔgɩ-dɩ, yɩ abam maama ya na yǝri kʋ ni nɩ, sɩ á kɔgɔ kʋm ja na-bala á ma á kɩ zwɛɛm kaanɩm sɩ dɩ lwəm dɩm taa ywəmmə dɩ paɩ Baŋa-Wɛ. Á ta wʋ́ ja wʋdiu pɛɛrɩ dɩ wo-nyɔɔrʋ pɛɛrɩ na maŋɩ tɩn á wǝli da, yɩ á daarɩ á ja bʋ-bala á ba á ma á kɩ lwarɩm saarɩm kaanɩm. 25 Kaanɩm tu wʋm laan maa wʋ́ tɔgɩ kʋ cwǝŋǝ nɩ sɩ o lɩ Yisɩrayɛlɩ tiinə bam maama tusim dɩm Wɛ yigə nɩ. Baŋa-Wɛ wʋ́ yagɩ ba lwarɩm DƖ ma cɛ-ba, ba na wʋ paalɩ ba cɔgɩ yɩ ba daarɩ ba ja zwɛɛm pɛɛrɩ dɩm dɩdaanɩ lwarɩm saarɩm pɛɛrɩ dɩm ba ba ba kɩ kaanɩm ba pa‑DƖ tɩn ŋwaanɩ. 26 Kʋntʋ na kɩa, Wɛ wʋ́ sɩɩnɩ DƖ kwe á maama lwarɩm DƖ ma cɛ abam, kʋ na maŋɩ kʋ yɩ Yisɩrayɛlɩ tiinə dɩ vərə dɩ, á kɔgɔ kʋm maama na tɔgɩ daanɩ á tusi tɩn ŋwaanɩ.
27 Kʋ nan na yɩ abam wʋnɩ nɔɔnʋ dɩdʋa na cɔgɩ yɩ o wʋ paalɩ o kɩ, kʋ tu wʋ́ ja bʋ-cʋa kalʋ na yɩ bɩnɩ dɩdʋa tɩn o ba o ma o kɩ lwarɩm saarɩm kaanɩm. 28 Kaanɩm tu wʋm maa wʋ́ tɔgɩ kʋ cwǝŋǝ sɩ o lɩ kʋntʋ tu tusim dɩm Baŋa-Wɛ yigə nɩ. Kʋntʋ na kɩa, Wɛ wʋ́ yagɩ o lwarɩm DƖ ma cɛ-o. 29 Ni dɩntʋ zɩgɩ dɩ paɩ wʋlʋ maama na tusi yɩ o wʋ paalɩ o kɩ tɩn mʋ, kʋ tu na yɩ Yisɩrayɛlɩ tu naa vəru dɩ.
30 Wʋlʋ maama nan na zǝŋi o tɩtɩ yɩ o paalɩ o kɩ lwarɩm, kʋntʋ tu na yɩ Yisɩrayɛlɩ tu naa vəru mʋ dɩ, ba maŋɩ sɩ ba lɩ-o sɩ o daa yɩ tɔgɩ o wǝli Yisɩrayɛlɩ dwi dɩm wʋnɩ, o na yáalɩ Baŋa-Wɛ tɩn ŋwaanɩ. 31 O na kɩ te tɩn brɩ nɩ o gooni Baŋa-Wɛ kwǝrǝ kam yɩ o ta daarɩ o cɔgɩ DƖ niə yam. O lwarɩm dɩm wʋ́ taa wʋ o yuu nɩ. Á maŋɩ sɩ á yɔɔrɩ á lɩ-o sɩ o daa yɩ tɔgɩ o wǝli a nɔɔna bam wʋnɩ.»
Siun dɛ cullu tɩm cɔgɩm taanɩ
32 Yisɩrayɛlɩ tiinə bam dɛɛn ta na wʋ kagʋa kam wʋnɩ ba kaagɩ ba ve tɩn, mʋ dɛ dɩdʋa ba jaanɩ nɔɔnʋ na wʋra o pɛ dɛ Wɛ siun dɛ dɩm nɩ. 33 Ba ma ja-o ba vu ba yi Moyisi dɩ Arɔn dɩ nɔn-kɔgɔ kʋm maama te. 34 Ba ma pɩ-o sɩ ba cəgi ba nii, ba na yǝri kʋ na wʋ́ maŋɩ sɩ ba kɩ-o te tɩn ŋwaanɩ. 35 Baŋa-Wɛ ma ta dɩ Moyisi DƖ wɩ: «O maŋɩ sɩ o tɩ mʋ. Ja-na nɔɔnʋ wʋm á nuŋi á vu dáa sɩ Yisɩrayɛlɩ kɔ-fɔrɔ kʋm dʋl-o dɩ kandwa ba gʋ.» 36 Ba ma sɩɩnɩ ba ja-o ba vu ba dʋl-o dɩ kandwa ba gʋ, nɩnɛɛnɩ Baŋa-Wɛ na pɛ Moyisi ni sɩ ba kɩ te tɩn.
Ba gwaarʋ niə yam kunə taanɩ
37 Baŋa-Wɛ daa ma ta dɩ Moyisi DƖ wɩ:
38 «Ta n brɩ Yisɩrayɛlɩ tiinə bam nɩ: Á wʋ́ nyaanɩ á gwar-dannʋ tɩm sɩ zala taa wʋ tɩ niə yana yam maama nɩ, sɩ á daarɩ á nyaanɩ ŋʋnɩ sɩlʋ nyɩnyʋgʋ na yɩ nazon-pupwiə tɩn á kɩ zalɩ maama yɩra nɩ. Á maŋɩ sɩ á taá kɩ á gwaarʋ tɩm kʋntʋ doŋ mʋ taan wuu. 39 Á wʋ́ taá nii á kunə yam kʋntʋ, yɩ á guli Baŋa-Wɛ niə yam maama sɩ á taá tɔgɩ-ya. Kʋ ta wʋ́ pa abam bá ywəri Wɛ kwaga nɩ á daarɩ á tɔgɩ wo-yɔɔrʋ tɩlʋ á fra na zʋ tɩn. 40 Kʋntʋ tɩn, á wʋ́ tʋŋɩ á tɔgɩ amʋ niə yam maama. Á ta wʋ́ pɔɔrɩ á tɩtɩ á pa á Tu Wɛ dɩm. 41 Amʋ mʋ yɩ abam Tu Baŋa-Wɛ dɩm. A nan jaanɩ abam a nuŋi Ezipi wʋnɩ, sɩ a taa yɩ abam Tu Wɛ dɩm mʋ. Cɩga tɩn, amʋ mʋ yɩ abam Tu Baŋa-Wɛ dɩm.»