Nɔɔna bam ywəri Moyisi kwaga nɩ
14
Yisɩrayɛlɩ tiinə kɔgɔ kʋm maama dɛɛn yɔɔrɩ ba kaasɩ tɩtɩɩ dɩm kʋntʋ nɩ yɩ ba keeri bɔgɩ-bɔgɩ. 2 Ba maa jɩgɩ Moyisi dɩ Arɔn ba pʋʋna yɩ ba wɩ: «Dɩ́ ya na tɩgɩ Ezipi wʋnɩ, naa kagʋa kantʋ wʋnɩ, kʋ yaá taa gara.a 3 Baŋa-Wɛ jɩgɩ dɩbam DƖ zʋʋrɩ Kaanan tɩga kam wʋnɩ sɩ bɛɛ mʋ? Kʋ yɩ sɩ ba gʋ dɩbam mʋ, sɩ ba daarɩ ba vrɩ dɩ́ kaana dɩ dɩ́ biə ba taa te. Dɩ́ na joori Ezipi tɩʋ, kʋ gara!» 4 Ba ma ŋɔɔnɩ ba brɩ daanɩ ba wɩ: «Pa-na sɩ dɩ́ kuri yigə tu sɩ kʋntʋ tu ja dɩbam o joori Ezipi.»5 Moyisi dɩ Arɔn maa vin ba yibi sɩm tɩga nɩ yɩ nɔn-kɔgɔ kʋm maama dɛɛn jeeri ba yigə nɩ. 6 Nun bu Zozwe dɩ Yefune bu Kalɛbɩ ma kaarɩ ba gwaarʋ wʋ-cɔgɔ ŋwaanɩ. Bantʋ bale dɛɛn tɔgɩ ba wʋ balʋ na ve ba nii tɩga kam tɩn wʋnɩ mʋ. 7 Ba ma ta dɩ nɔn-kɔgɔ kʋm maama ba wɩ: «Tɩga kalʋ dɩ́ na ve dɩ́ kaagɩ dɩ́ nii tɩn lana lanyɩranɩ. 8 Baŋa-Wɛ yi nan na su dɩ́ kikiə, DƖ wʋ́ ja dɩbam DƖ zʋ tɩ-ywəŋə kam kʋntʋ wʋnɩ, yɩ DƖ daarɩ DƖ kwe-ka DƖ pa dɩbam. Ka ywəmmə mʋ dɩ varɩm dɩ kɔnɔb. 9 Nan yɩ pa-na sɩ dɩ́ lɔ Baŋa-Wɛ kwaga nɩ. Yɩ kwarɩ-na fʋʋnɩ dɩ nɔɔna balʋ na zʋʋrɩ tɩga kam wʋnɩ tɩn, dɩ́ na wʋ́ wanɩ-ba dɩ́ di tɩn ŋwaanɩ. Woro daa tǝrǝ sɩ ba duri ba səgi kʋ wʋnɩ. Baŋa-Wɛ nan wʋ dɩ́ tee nɩ. Yɩ pa-na sɩ dɩ́ taa kwarɩ fʋʋnɩ!»
10 Yisɩrayɛlɩ tiinə kɔ-fɔrɔ kʋm wʋbʋŋa ma ja sɩ ba dʋlɩ Moyisi dɩ Arɔn dɩ kandwa ba gʋ. Baŋa-Wɛ ma da DƖ cu DƖ zɩgɩ jero-vwe dɩm baŋa nɩ DƖ vɩɩrɩ DƖ tɩtɩ dɩ DƖ paarɩ-zulǝ yam DƖ brɩ Yisɩrayɛlɩ tiinə bam maama.
Moyisi loori Wɛ o pa nɔɔna bam
11 Baŋa-Wɛ ma ta dɩ Moyisi DƖ wɩ: «Tɩta mʋ amʋ wʋ́ pɩɩnɩ a tɩtɩ dɩ nɔɔna bantʋ? Baá taa jɩgɩ-nɩ ba goonə taan sɩ ba vu ba maŋɩ yən mʋ? A kɩ wo-kamunə zanzan ba tɩtarɩ nɩ, yɩ ba ta vɩ-nɩ. 12 Amʋ laan nan lagɩ a cɔgɩ-ba dɩ yawɩ-cɛɛrʋ mʋ. Aá pa ba dwi dɩm ti sɩ a daarɩ a pa nmʋ ji dwi-dʋʋrɩ ko. Dwi dɩlʋ na wʋ́ zɩgɩ nmʋ yɩra nɩ tɩn wʋ́ taa daga, yɩ dɩ ta dana dɩ dwe bantʋ na yɩ te tɩn.»
13 Moyisi ma ləri Baŋa-Wɛ o wɩ: «Nmʋ nan na kɩ kʋntʋ, Ezipi tiinə bam wʋ́ ni kʋ ŋwa. Nmʋ dɛɛn kwe n dam-fɔrɔ kʋm n vrɩ n nɔɔna bam Ezipi tiinə bam jɩŋa nɩ mʋ. 14 Bantʋ wʋ́ pa balʋ na zʋʋrɩ Kaanan tɩga kam nɩ tɩn lwarɩ kʋ ni nɩ. Ba nan maŋɩ ba ye nɩ nmʋ, dɩbam Tu Baŋa-Wɛ dɩm wʋ n nɔɔna bam tee nɩ. Ba lwarɩ nɩ n vɩɩrɩ n tɩtɩ jaja n brɩ dɩbam, yɩ n yǝni n pa n kunkoŋo kʋm wʋ dɩ́ baŋa nɩ. Ba ta lwarɩ nɩ n tɔgɩ dɩbam yigə mʋ nɩ kunkoŋo na zɩgɩ dəki tɩn wɩa maama nɩ, yɩ n daarɩ n ji nɩ mim te tɩtɩɩ nɩ. 15 Nmʋ nan na zaŋɩ n gʋ n nɔɔna bam bɩdwɩ baŋa nɩ, dwi-gɛ tiinə balʋ na ye nmʋ ni nɩ tɩn wʋ́ ta ba wɩ: 16 ‹Kʋ yɩ ba Baŋa-Wɛ dɩm na warɩ sɩ DƖ ja-ba DƖ zʋ tɩga kalʋ wʋnɩ DƖ na goni ni sɩ DƖ pa-ba tɩn ŋwaanɩ mʋ DƖ gʋ-ba kagʋa kam wʋnɩ.› 17 Kʋntʋ ŋwaanɩ, dɩ Yuutu Baŋa-Wɛ, pa n dam-kamunu kʋm brɩ jaja. Nmʋ maŋɩ n ta n tɩtɩ taanɩ nɩ:
18 Baŋa-Wɛ yǝni DƖ pɩɩnɩ DƖ banɩ.
DƖ sono kʋm nan ba tiə.
DƖ maa kwe nɔɔna lwarɩm dɩ ba tusim
DƖ yagɩ DƖ maa cɛ-ba.
Sɩ kʋ na yɩ balʋ na gɛ bʋra tɩn,
DƖ yǝni o waarɩ-ba dɩ ba biə maama mʋ
sɩ kʋ yi ba naarʋ,
dɩ ba na-jooru dwiə yatɔ naa yana laŋa nɩ.c
19 Nmʋ sono kʋm na sɩɩnɩ kʋ gaalɩ tɩn ŋwaanɩ, a loori‑m sɩ n kwe nɔɔna bantʋ lwarɩm n ma n cɛ-ba. Ta kɩ n pa-ba nɩnɛɛnɩ n na maŋɩ n yǝni n kɩ te dɩ ba kʋ zɩgɩ ba na nuŋi Ezipi tɩʋ nɩ tɩn.»d
20 Baŋa-Wɛ ma ləri Moyisi DƖ wɩ:
«A sɛ nmʋ wɛ-loro kʋm yɩ a kwe ba lwarɩm a yagɩ a cɛ-ba. 21 Nɩ amʋ na jɩgɩ ŋwɩa maŋa maama te yɩ a dam dɩm wʋ́ ba dɩ lwarɩ jaja lʋgʋ baŋa je maama wʋnɩ te tɩn, a nan dugi dɩ a tɩtɩ mʋ nɩ: 22 kʋ na yɩ nɔɔna balʋ na nɛ a paarɩ-zulǝ yam dɩ wo-kɩnkagɩla yalʋ a na kɩ Ezipi wʋnɩ dɩdaanɩ kagʋa kam wʋnɩ tɩn, bantʋ vɩn sɩ ba sɛ amʋ ni, yɩ ba ta kwaanɩ sɩ ba makɩ-nɩ ba nii kuni zanzan. 23 Kʋntʋ ŋwaanɩ ba wʋlʋwʋlʋ bá zʋ tɩga kalʋ a na goni ni dɩ ba nabaara bam sɩ a pa-ba tɩn wʋnɩ. Balʋ maama na gooni amʋ tɩn bá na tɩga kam kʋntʋ. 24 Amʋ tɩntʋŋnʋ Kalɛbɩ wʋbʋŋa nan yɩ ya yɩra mʋ dɩ o donnǝ bam wʋbʋŋ-balwaarʋ tɩm. O kwe o bɩcarɩ maama mʋ o ma o tɔgɩ-nɩ. Kʋntʋ ŋwaanɩ amʋ wʋ́ pa o zʋ tɩga kalʋ o na ve o nii tɩn sɩ o dɩ o kwaga kam taa te-ka.e 25 Tɔ. Amalɛkɩ tiinə dɩ Kaanan tiinə bam na zʋʋrɩ bwəəlu laŋa kam nɩ yɩ ba cɩ á cwǝŋǝ tɩn ŋwaanɩ, jwa tɩtɩɩtɩ sɩ á maama joori á pipiri á magɩ á yum kagʋa kam seeni sɩ á kwe Nanɩ-sʋŋʋ cwǝŋǝ kam á taá veǝ.»
26 Baŋa-Wɛ daa ma ta dɩ Moyisi dɩ Arɔn DƖ wɩ:
27 «Tɩta mʋ amʋ wʋ́ pɩɩnɩ a tɩtɩ dɩ vɩɩna bantʋ? Baá taa jɩgɩ-nɩ ba pʋʋna taan sɩ ba vu ba maŋɩ yən mʋ? Amʋ ni Yisɩrayɛlɩ tiinə bam pʋmpʋna kam ba na tiini ba kɩ tɩn. 28 Kʋntʋ tɩn, ta-na á brɩ-ba nɩ:
‹Nɩ amʋ Baŋa-Wɛ na jɩgɩ ŋwɩa te tɩn, kʋ yɩ cɩga mʋ nɩ a sɩɩnɩ a lagɩ a kɩ abam nɩ á na tagɩ te yɩ a ni tɩn mʋ. 29 Abam wʋ́ tɩ kagʋa kantʋ wʋnɩ mʋ sɩ á yɩra yam faarɩ tɩga kam je maama nɩ. Á baara balʋ maama na yi bɩna fiinle ba daŋɩ yɩ ba tɔgɩ ba wʋ garɩm dɩm wʋnɩ tɩn wʋ́ tɩ mʋ, ba na pʋʋnɩ amʋ tɩn ŋwaanɩ. 30 Abam wʋlʋwʋlʋ bá zʋ tɩga kalʋ amʋ dɛɛn na dugi durə sɩ a pa abam sɩ á jǝni da tɩn. Yefune bu Kalɛbɩ dɩ Nun bu Zozwe yɩranɩ mʋ wʋ́ zʋ da. 31 Kʋ nan na yɩ á biə balʋ á na jɩgɩ ba liǝ nɩ tɩga kam tiinə wʋ́ vrɩ-ba ba taa te tɩn, a lagɩ a pa ba zʋ tɩga kalʋ abam na vɩn sɩ á joŋi tɩn mʋ ba taa te. 32 Sɩ Kʋ daarɩ abam tɩtɩ, á wʋ́ tɩ kagʋa kantʋ wʋnɩ mʋ 33 á daarɩ á biə bam. Bantʋ maa wʋ́ da á zwabaniə kikiə yam ŋwaanɩ ba beeri kagʋa kantʋ wʋnɩ yɩ ba yaarɩ taan, bɩna fiinna, sɩ kʋ yi maŋa kalʋ abam nɔn-kwɩɩrʋ tɩm maama na wʋ́ tɩ ba ti tɩn. 34 Á na kwe da fiinna á kaagɩ tɩga kam maama á nii tɩn, mʋ amʋ dɩ kwe dɛ maama sɩ dɩ taa yɩ bɩnɩ á na wʋ́ yaarɩ dɩ wʋnɩ tɩn. Amʋ wʋ́ pa á yaarɩ bɩna fiinna á lwarɩm dɩm ŋwaanɩ, sɩ á ma á lwarɩ nɩ amʋ nuŋi á kwaga nɩ.›
35 Amʋ Baŋa-Wɛ mʋ tagɩ kʋntʋ! Aá yɔɔrɩ a pa kʋlʋ maama a na tagɩ tɩn ba nɔn-balwaarʋ bantʋ baŋa nɩ, ba na kɩ ni daanɩ sɩ ba yáalɩ amʋ tɩn ŋwaanɩ. Ba lagɩ ba tɩ kagʋa kantʋ wʋnɩ mʋ.»
36 Kʋ na yɩ Moyisi dɛɛn na tʋŋɩ nɔɔna balʋ sɩ ba vu ba ŋɔ ba nii tɩga kam yɩ ba joori ba ŋɔɔnɩ bɩtar-balɔrɔ ka ŋwaanɩ pa nɔn-kɔgɔ kʋm maama pʋʋn‑o tɩn, 37 Baŋa-Wɛ kwe yawɩ-cɛɛrʋ mʋ DƖ dɩ bantʋ wʋnɩ pa ba tɩ. 38 Balʋ na ve ba nii tɩga kam tɩn, kʋ yɩ Nun bu Zozwe, dɩ Yefune bu Kalɛbɩ yɩranɩ mʋ wəri ba wʋnɩ.
Nɔɔna bam gɛ cwǝŋǝ sɩ ba zʋ ba joŋi tɩga kam
39 Moyisi dɛɛn na jaanɩ Baŋa-Wɛ kwǝrǝ kam o ba o lwǝni o brɩ nɔɔna bam tɩn, mʋ ba wʋrʋ cɔgɩ yɩ ba keeri lanyɩranɩ. 40 Tɩga na pʋʋrɩ tɩtɩɩtɩ tɩn, mʋ ba zaŋɩ sɩ ba vu Kaanan pweeru laŋa kam. Ba maa wɩ: «Dɩ́ tiini dɩ́ tusi dɩdaanɩ dɩ́ na vɩn Baŋa-Wɛ ni dɩm tɩn. Dɩ́ laan ti yigə sɩ dɩ́ vu dɩ́ kwe tɩga kam Baŋa-Wɛ na goni ni sɩ o pa dɩbam tɩn.»
41-42 Moyisi ma lǝri-ba o wɩ: «Abam nan vɩn Baŋa-Wɛ ni sɩ bɛ? Yɩ ve-na, sɩ kʋ bá maŋɩ kʋ pa abam. Baŋa-Wɛ na tǝri á tee nɩ tɩn ŋwaanɩ, á dʋna wʋ́ wanɩ abam ba di mʋ. 43 Amalɛkɩ tiinə dɩ Kaanan tiinə bam na nuŋi ba zaŋɩ najara dɩ abam, baá gʋ abam, á na ywəri Baŋa-Wɛ kwaga nɩ yɩ DƖ daa tǝri á tee nɩ tɩn ŋwaanɩ.»
44 Dɩ kʋntʋ dɩ, nɔɔna bam ta ma fɩn ba tɩtɩ yɩ ba yɔɔrɩ ba vu ba di pweeru laŋa kam seeni. Moyisi wʋ dɛ dɩ ba o vu. Baŋa-Wɛ ni-gonim daka kam dɩ nan wʋ nuŋi ba zʋʋrɩm jǝgǝ kam nɩ. 45 Amalɛkɩ tiinə dɩ Kaanan tiinə bam dɛɛn ma nuŋi ba pweeru je sɩm nɩ ba ba ba jeeri-ba dɩ najara. Ba ma di Yisɩrayɛlɩ tiinə bam yɩ ba zəli-ba ba vu ba yi Horama tɩʋ.