Nɔɔna ve sɩ ba ŋɔ ba nii Kaanan tɩga kam
13
Baŋa-Wɛ ma ta dɩ Moyisi DƖ wɩ: 2 «Lɩ nɔɔna sɩ ba vu ba ŋɔ ba nii Kaanan tɩga kam, kʋ na yɩ tɩga kalʋ a na lagɩ a pa Yisɩrayɛlɩ tiinə bam tɩn ŋwaanɩ. Kuri yigə tu dɩdʋa dɩdʋa Yisɩrayɛlɩ dwi maama wʋnɩ.»3 Ba dɛɛn ta na wʋ Paran kagʋa kam nɩ tɩn mʋ Moyisi tʋŋɩ yigǝ tiinǝ fugǝ-bale sɩ ba nuŋi nɩnɛɛnɩ Baŋa-Wɛ na pɛ‑o ni sɩ o kɩ te tɩn. 4-15 Nɔɔna bam yɩra mʋ tɩntʋ:
| Dwi dɩm | Yigə tu wʋm |
| Ruban | Zakuri bu Samʋa |
| Simeyon | Hori bu Safatɩ |
| Zuda | Yefune bu Kalɛbɩ |
| Yisakaarɩ | Zozɛfʋ bu Igalɩ |
| Efrayim | Nun bu Oze |
| Bɛnzamɛn | Rafu bu Pelɛtɩ |
| Zabulɔn | Sodi bu Gadeli |
| Manasɩ | Susi bu Gadɩ |
| Dan | Gemali bu Amiyɛlɩ |
| Asɛɛrɩ | Misɛɛlɩ bu Seturi |
| Nɛfitali | Vofisi bu Nasibi |
| Gadɩ | Maki bu Geweli |
16 Nɔɔna balʋ Moyisi na tʋŋɩ sɩ ba vu ba ŋɔ ba nii Kaanan tɩga kam tɩn yɩra yam mʋ kʋntʋ. Moyisi dɛɛn ləri Nun bu Oze yɩrɩ sɩ dɩ taa yɩ Zozwe.
17 Moyisi dɛɛn na lagɩ o tʋŋɩ-ba sɩ ba vu ba zʋ Kaanan tɩga kam wʋnɩ tɩn, mʋ o tagɩ dɩ ba o wɩ: «Tɔgɩ-na jagwiə seeni kagʋa kam, sɩ á laan taá tʋlɩ á diini jazɩm baŋa seeni sɩ á vu á yi pweeru laŋa kam. 18 Kwaanɩ-na sɩ á lwarɩ tɩga kam kʋntʋ na yɩ te tɩn. Fɔgɩ-na á nii nɔɔna balʋ na zʋʋrɩ da tɩn kɔgɔ na maɩ te, dɩdaanɩ ba dam na maɩ te tɩn. 19 Ta maanɩ-na á nii ba tɩga kam lana na? Tɩɩnɩ dɩlʋ ba na zʋʋrɩ dɩ wʋnɩ tɩn zɩgɩ da kʋntʋ mʋ naa, dɩ cɩgɩ dɩ kaagɩ dɩ kabri mʋ? 20 Ba tɩga kam kɩ wʋdiiru lanyɩranɩ na? Tweeru wʋra na? Vɔ-na á wʋ yɩ á kwaanɩ-na sɩ á gwəri tweeru biə badonnǝ á ja á ba sɩ dɩ́ nii.» Kʋ dɛɛn nan yɩ maŋa kalʋ vinyə tiu biə na puli ba bra sɩ nɔɔna gwəri-ba tɩn mʋ.
21 Nɔɔna bam ma sɩɩnɩ ba din jazɩm baŋa seeni ba tʋlɩ yɩ ba nii tɩga kam na yɩ te tɩn. Ba zɩgɩ Zin kagʋa kam nɩ mʋ ba vu ba yi Rehɔbɩ. Je sɩm kʋntʋ bwələ dɩ Lebo-Hamatɩ mʋ. 22 Ba daa ma tɔgɩ jagwiə seeni kagʋa kam ba kɛ ba yi Ebrɔn. Ba dɛɛn cwi tɩʋ kʋm kʋntʋ bɩna yarpɛ mʋ yɩ ba daarɩ ba cwi Sʋan tɩʋ na wʋ Ezipi wʋnɩ tɩn. Ba dɛɛn na yi Ebrɔn tɩʋ kʋm tɩn, mʋ ba nɛ nɔn-sawaara balʋ na zʋʋrɩ da tɩn. Bantʋ maa yɩ Anakɩ biə batɔ sɔ-yuu tiinə, ba yɩra na yɩ Ahiman, dɩ Sesayi, dɩ Taliməyi tɩn. 23 Nɔɔna bam dɛɛn ma vu ba yi Ɛskɔlɩ bugə kam. Ba na yi da tɩn, ba ma goni Vinyə tiu naga dɩ ka tiu biə na yɩ wo-zɔgɔ dɩdʋa tɩn. Ba ma goni daa ba daŋɩ tiu biə bam ka baŋa nɩ yɩ nɔɔna bale kwe-ka ba daŋɩ ba bakalɩ baŋa nɩ ba veǝ, ka na dwe nɔn-dʋa zeerim tɩn ŋwaanɩ. Ba dɛɛn ta jɩgɩ grɩnadɩnɩ biə dɩdaanɩ mɔɔla mʋ ba wǝli da. 24 Ba bəŋi je sɩm kʋntʋ nɩ Ɛskɔlɩ bugə kam, bɛŋwaanɩ dáanɩ mʋ Yisɩrayɛlɩ tiinə bam dɛɛn goni vinyə tiu bu-zɔgɔ kʋm. 25 Ba dɛɛn kwe da fiinna mʋ ba beeri ba nii tɩga kam ni maama yɩ ba daarɩ ba joori Moyisi te.
Nɔɔna bam joori ba lwǝni ba bərə kam
26 Nɔɔna fugǝ-bale bam dɛɛn joori ba vu Kadɛsɩ na wʋ Paran kagʋa kam wʋnɩ tɩn. Yisɩrayɛlɩ tiinə kɔ-fɔrɔ kʋm maama dɛɛn wʋ dáanɩ mʋ. Nɔɔna bam ma vu ba ta ba brɩ Moyisi, dɩ Arɔn, dɩ nɔn-kɔgɔ kʋm maama kʋlʋ ba yi na nɛ tɩn. Ba ta ma brɩ-ba tiu biə balʋ ba na gwəri Kaanan nɩ ba ja ba nuŋi da ba ba tɩn. 27 Ba ma ta dɩ Moyisi ba wɩ: «Dɩbam sɩɩnɩ dɩ́ vu dɩ́ beeri tɩga kalʋ wʋnɩ nmʋ na tʋŋɩ dɩbam sɩ dɩ́ vu dɩ́ nii tɩn. Dɩ́ ma maanɩ nɩ ka yɩ tɩ-ywəŋə mʋ. Ka tiini ka lana dɩ varɩm dɩ kɔnɔ. Nii ka tweeru biə badonnǝ dɩ́ na jaanɩ dɩ́ ba tɩn! 28 Nɔɔna balʋ na zʋʋrɩ da tɩn nan mʋ tiini ba dana. Ba tɩɩnɩ dɩm dɩ maa yalma, yɩ dɩ lɔ dɩ pɩa. Dɩ́ ta nɛ nɩ Anakɩ dwi tiinə dɩ zʋʋrɩ dáanɩ mʋ. 29 Amalɛkɩ tiinə bam dɩ zʋʋrɩ jagwiə seeni kagʋa kam nɩ mʋ. Hɛtɩ tiinə bam, dɩ Yebusi tiinə, dɩ Amɔɔrɩ tiinə bam dɩ maa wʋ pweeru laŋa kam nɩ. Kʋ daarɩ Kaanan tiinə bam dɩ zʋʋrɩ Mediterane nɩnɩʋ kʋm ni nɩ, dɩ Zʋrdɛn bugə kam ni nɩ.»
30 Kalɛbɩ ma zaŋɩ Moyisi yigə nɩ yɩ o ta sɩ nɔn-kɔgɔ kʋm maama zuri ba bɩcara. O maa wɩ: «Pa-na sɩ dɩ́ yɔɔrɩ dɩ́ vu dɩ́ joŋi tɩga kam dɩ́ taa te! Dɩ́ wʋ́ wanɩ ka nɔɔna bam dɩ́ di!»
31 Nɔɔna balʋ dɛɛn na tɔg-o ba vu ba nii tɩn ma ləri ba wɩ: «Dɩ́ bá wanɩ nɔɔna bam kʋntʋ dɩ́ jeeri dɩ najara. Ba tiini ba dana ba dwe dɩbam.» 32 Ba laan ma ŋɔɔnɩ ta-balɔrɔ tɩga kam seeni ba brɩ Yisɩrayɛlɩ tiinə bam. Ba maa wɩ: «Tɩga kalʋ dɩ́ na ve dɩ́ nii tɩn wʋ́ cɔgɩ balʋ na zʋʋrɩ ka wʋnɩ tɩn. Ka nɔn-biə bam maama yɩ nɔn-wagɩla mʋ. 33 Cɩga ŋwaanɩ tɩn, dɩbam nɛ Nefili dwi tiinə dáanɩ.b Anakɩ tiinə mʋ nuŋi bantʋ dwi dɩm wʋnɩ. Ba na tiini ba yɩ nɔn-sawaarʋ te tɩn, dɩbam nii dɩ́ tɩtɩ sɩ dɩ́ taa yɩ manjwəəlu mʋ dɩ paɩ-ba. Ba dɩ maa nii dɩbam pa dɩ́ nyɩ dɩ manjwəəlu ba yigə nɩ.»