Miriyam dɩ Arɔn nuŋi Moyisi kwaga nɩ
12
Miriyam dɩ Arɔn dɛɛn maa jɩgɩ Moyisi ba lwɛa, o na di Kusi tiinə bukɔ o ma kɩ o kaanɩ tɩn ŋwaanɩ. 2 Ba maa wɩ: «Moyisi yɩranɩ mʋ Baŋa-Wɛ yǝni DƖ tɔgɩ DƖ baŋa DƖ ŋɔɔnɩ dɩ DƖ nɔɔna bam na? DƖ ba tɔgɩ dɩbam dɩ baŋa DƖ ŋɔɔnɩ dɩ ba na?» Baŋa-Wɛ ma ni ba pʋmpʋna kam. 3 Kʋ nan na yɩ Moyisi, o dɛɛn tiini o tu o tɩtɩ tɩga nɩ mʋ sɩ kʋ dwǝni lʋgʋ baŋa nɔɔna maama.4 Baŋa-Wɛ ma da DƖ ta dɩ Moyisi, dɩ Arɔn, dɩ Miriyam DƖ wɩ: «Zaŋɩ-na á ba jero-vwe dɩm nɩ sɩ á maama zɩgɩ amʋ yigə nɩ.» Ba ma sɩɩnɩ ba vu ba zɩgɩ da. 5 Baŋa-Wɛ laan ma cu DƖ ba DƖ zɩgɩ jero-vwe ni dɩm nɩ, yɩ kunkoŋo na zɩgɩ dəki tɩn kwǝli‑DƖ. DƖ ma bəŋi Arɔn dɩ Miriyam sɩ ba fʋfɔ ba yi DƖ te. Bantʋ bale bam ma kɩ kʋntʋ. 6 Baŋa-Wɛ ma ta dɩ ba DƖ wɩ:
«Nan fɔgɩ á cəgi-na amʋ taanɩ dɩntʋ!
Amʋ Baŋa-Wɛ na yǝni a pa a nijoŋnu wʋ abam tɩtarɩ nɩ,
aá vɩɩrɩ wǝǝnu a brɩ-o,
yɩ a daarɩ a ŋɔɔnɩ dɩd-o dɩndwɩa wʋnɩ mʋ.
7 Kʋ nan na yɩ a tɩntʋŋnʋ Moyisi,
amʋ ba kɩ kʋntʋ doŋ dɩd-o.
Amʋ yɔɔrɩ a kwe a nɔɔna bam
a kɩ wʋntʋ jɩŋa nɩ mʋ sɩ o taa nii-ba.a
8 A maa yǝni a pa dɩ́ jeeri daanɩ yibiyə dɩ yibiyə,
sɩ a ŋɔɔnɩ dɩd-o jaja,
yɩ kʋ daɩ dɩ dɩndɩ mʋ a maa brɩ-o wǝǝnu.
Wʋntʋ mʋ yɔɔrɩ o nii o naɩ amʋ nyɩnyʋgʋ.b
Kʋntʋ tɩn, bɛɛ mʋ yɩ á ba fʋna sɩ á taá jɩgɩ amʋ tɩntʋŋnʋ Moyisi á ŋɔɔnɩ á co?»
9 Baŋa-Wɛ banɩ ma tiini dɩ zaŋɩ dɩ Arɔn dɩ Miriyam yɩ DƖ zaŋɩ DƖ kɛ DƖ daarɩ-ba.
10 Kunkoŋo kʋm ma gɔ kʋ tɩtɩ jero-vwe dɩm baŋa nɩ. Sɩntʋ nɛ sɩm ni nɩ mʋ Miriyam yɩra tiini ya pɩɩrɩ dɩdaanɩ nanyaanʋ yawɩʋ kʋm.c Arɔn ma pipiri o nii o na kʋlʋ na kɩ Miriyam yɩra nɩ tɩn. 11 O ma tiini o loori Moyisi o wɩ: «Dɩ́ ko, popo! Dɩ́ loori‑m sɩ n yɩ waarɩ dɩbam dɩ́ tusim dɩntʋ ŋwaanɩ. Dɩbam tiini dɩ́ tʋŋɩ jwərim mʋ. 12 Nii kʋ baŋa nɩ sɩ Miriyam yɩ taa nyɩ dɩ bu-tʋʋ wʋlʋ yɩra na mʋʋrɩ tɩn!»
13 Moyisi dɩ ma kaasɩ o loori Baŋa-Wɛ yɩ o wɩ: «Amʋ tu Wɛ, a loori-m! Pa o na yazurə.»
14 Baŋa-Wɛ ma ləri Moyisi DƖ wɩ: «Miriyam ko ya na twɩ lileeru o kɩ o yibiyə nɩ, kʋ yaá pa o di cavɩɩra sɩ kʋ yi da yarpɛ mʋ. Kʋntʋ ŋwaanɩ, pa-na sɩ o nuŋi dáa Yisɩrayɛlɩ tiinə bam wʋnɩ, sɩ á daarɩ á pɩ-o da yarpɛ. Kʋ kwaga nɩ sɩ á pa‑o cwǝŋǝ sɩ o joori o taa zʋʋrɩ ba wʋnɩ.» 15 Ba ma sɩɩnɩ ba kɩ kʋntʋ. Yisɩrayɛlɩ tiinə bam dɛɛn ma maŋɩ je sɩm kʋntʋ nɩ sɩ kʋ yi da yarpɛ. Miriyam ma joori o zʋ ba wʋnɩ, yɩ ba zaŋɩ ba kɛ.
16 Kʋntʋ kwaga nɩ mʋ ba zaŋɩ Hazerɔtɩ nɩ yɩ ba laan vu ba yi Paran kagʋa kam. Ba ma cwi ba vwə dáanɩ.