Yisɩrayɛlɩ tiinə pʋmpʋna kam
11
Nɔɔna bam dɛɛn na nɛ cam dwi dwi tɩn, mʋ ba yɔɔrɩ ba pʋʋnɩ yɩ Baŋa-Wɛ ni ba pʋmpʋna kam. DƖ na ni tɩn, DƖ banɩ ma zaŋɩ dɩ ba yɩ DƖ pa mim di ba na cwi ba vwə yam mɛ daa dɩdʋa tɩn niə yam. 2 Nɔɔna bam ma loori Moyisi sɩ o wǝli-ba. O dɩ ma loori Wɛ, yɩ mim dɩm dwe. 3 Ba ma bəŋi je sɩm yɩrɩ ba wɩ ‹Tabera›. a Kʋ maa yɩ Baŋa-Wɛ na pɛ mim zwɛ ba vwə yam tɩn ŋwaanɩ mʋ.4 Nɔn-wo-kʋrrʋ dɛɛn tɔgɩ ba wʋ Yisɩrayɛlɩ tiinə bam wʋnɩ pa ba veǝ. Bantʋ fra ma tiini ya zʋ wʋdiiru tɩdonnǝ. Yisɩrayɛlɩ tiinə bam dɩ ma puli sɩ ba pʋʋnɩ ba wɩ: «Dɩ́ ya na nɛ nwana sɩ dɩ́ dʋnɩ, kʋ ba garɩ tɩntʋ na? 5 Dɩ́ dɛɛn na wʋ Ezipi wʋnɩ tɩn, dɩ́ naɩ kale dɩ́ di zaanɩ. Dɩ́ ta di nyambɔla, dɩ gaana, dɩ gaburu dwi dwi, dɩ ayɩ, nɩ dɩ́ wʋbʋŋa na lagɩ te tɩn mʋ. 6 Nan nii! Dɩ́ yɩra cɛ mʋ. Wʋdiu kʋlʋ yɩranɩ dɩ́ na yɔɔrɩ dɩ́ naɩ tɩn yɩ Maanɩ kantʋ mʋ!»
7 Maanɩ dɛɛn nyɩ dɩdaanɩ nyasaŋa biə mʋ. Kʋ maa yɩ napoŋo nɩ sabarɩ-kərə maarʋ te. 8-9 Maanɩ yam dɛɛn yǝni ya tɔgɩ dɩ nyɔnɔ mʋ ya tʋɩ tɩtɩɩ nɩ. Nɔɔna bam maa yǝni ba nuŋi ba pɛ-ya ba cʋ, naa ba zɔ-ya, yɩ ba laan saŋɩ muni dɩm ba kɩ nɩnɛɛnɩ pɛɛla doŋ te. Ba dɛɛn na di-ya, ya nyɩ dɩ dɩpɛ mʋ ba na wɔgɩ dɩ nugə.
10 Digə maama dɩ ka nɔɔna dɛɛn wʋ ba vwə yam ni nɩ mʋ ba pʋʋna, yɩ Moyisi ni ba pʋmpʋna kam. Baŋa-Wɛ banɩ ma tiini dɩ zaŋɩ pa Moyisi wʋ cɔgɩ kʋ ŋwaanɩ. 11 O ma loori Baŋa-Wɛ yɩ o wɩ: «Amʋ Tu Wɛ, bɛɛ mʋ kɩ yɩ n kwe cam dɩntʋ n pa-nɩ? Bɛɛ mʋ a kɩ a cɔgɩ n yigə, yɩ n pa nɔɔna bantʋ jɩgɩ-nɩ ba daana? 12 Kʋ daɩ amʋ mʋ naanɩ-ba, a nan wʋ lʋgɩ-ba. Nmʋ ta wʋ́ pa a kɩ-ba a ja-kukoro nɩ, a daarɩ a ja-ba sɩ dɩ́ vu dɩ́ yi tɩga kalʋ nmʋ na goni ni dɩ dɩ́ nabaara sɩ n kwe n pa-ba tɩn na? 13 Ba nan na tiini ba pʋʋnɩ nwana ŋwaanɩ kʋntʋ tɩn, amʋ lagɩ a na-ya yən nɩ mʋ a pa-ba? 14 Tɩtʋŋɩ dɩm n na kwe n pa-nɩ tɩn tiini dɩ dwe a jam. Amʋ yɩranɩ warɩ nɔɔna bam a ja. 15 Kʋ na yɩ tɩntʋ mʋ n kuri sɩ kʋ taa yɩ amʋ yɩra nɩ, sɩ n duri amʋ yibwənə n daarɩ n lɩ a ŋwɩa lɩla sɩ a sin dɩ yaara yantʋ!»
Nakwa fusɩrpɛ
16 Baŋa-Wɛ dɛɛn ma ta dɩ Moyisi DƖ wɩ:
«Nan kuri Yisɩrayɛlɩ nakwa fusɩrpɛ balʋ nmʋ na ye nɩ ba yɩ yigǝ tiinǝ yɩ nɔɔna nɩgɩ-ba lanyɩranɩ tɩn. Pa ba tɔgɩ dɩ nmʋ ba ba jero-vwe dɩm sɩ á maama zɩgɩ amʋ yigə nɩ. 17 Amʋ wʋ́ tu a ba a ŋɔɔnɩ dɩ nmʋ dáanɩ yɩ ba zɩgɩ ba niə. Amʋ laan maa wʋ́ pwəri joro kʋlʋ n na jɩgɩ n tʋŋɩ n tɩtʋŋa yam tɩn wʋnɩ a kɩ bantʋ dɩ yɩra nɩ. Kʋntʋ mʋ wʋ́ pa ba dɩ wanɩ ba da ba wəli‑m sɩ n ta n nii nɔɔna bam baŋa nɩ, yɩ kʋ daa bá taa yɩ nmʋ yɩranɩ mʋ wʋ́ taa jɩgɩ-ba n niə.
18 Sɩ kʋ na yɩ nɔɔna bam, sɩ n ta dɩ ba nɩ: ‹Kwɛ-na á tɩtɩ sɩ á jwa wʋ́ na nwana sɩ á dʋnɩ. Baŋa-Wɛ sɩɩnɩ DƖ ni á pʋmpʋna kam dɩ á na tagɩ á wɩ: á fra zʋ nwana dʋnɩm, yɩ á Ezipi ŋwɩa kam ya garɩ á lele ŋwɩa kam tɩn. Tɔ. Baŋa-Wɛ wʋ́ pa abam nwana yɩ á maŋɩ sɩ á dʋnɩ-ya mʋ. 19 Á nan na wʋ́ dʋnɩ nwana yam te tɩn, kʋ daɩ dɛ dɩdʋa: naa da yale, naa da yanu, naa da fugə, naa da fiinle wʋnɩ. 20 Sɩ cana wʋnɩ, á wʋ́ dʋnɩ nwana mʋ dɛ maama taan sɩ ya ba ya taa lwe á mʋmwa nɩ. Á lagɩ á lɩɩrɩ-ya mʋ. Bɛŋwaanɩ, á vɩn Baŋa-Wɛ dɩlʋ na wʋ á tɩtarɩ nɩ tɩn mʋ, yɩ á pʋʋnɩ DƖ yigə nɩ á wɩ kʋ yaa wʋ maŋɩ sɩ á nuŋi Ezipi tɩʋ wʋnɩ.› »
21 Moyisi ma ləri Baŋa-Wɛ o wɩ: «Baara bam na wʋ amʋ tee nɩ yɩ ba ve tɩga nɩ tɩn yɩ mʋrrʋ biə-yardʋ (600,000) mʋ. Nmʋ laan nan tagɩ nɩ nń pa ba maama nwana sɩ ba taa dʋnɩ dɛ dɛ sɩ kʋ yi cana mʋ na? 22 Dɩ́ na lagɩ dɩ́ gʋ dɩ́ naanɩ dɩm maama, dɩ dɩ́ varɩ-balwa bam maama, kʋ ta bá yi ba dim. Dɩ́ na gɔɔnɩ nɩnɩʋ wʋ kale sɩm maama dɩ́ pa-ba, kʋ brɩ kʋ bá yi-ba!» 23 Baŋa-Wɛ ma bwe‑o nɩ: «Amʋ dam dɩm muri mʋ na? Cəgi fɩɩn sɩ n ma n lwarɩ nɩ kʋlʋ a na tagɩ tɩn lagɩ kʋ kɩ mʋ.»
24 Moyisi ma nuŋi o vu o ta dɩ nɔɔna bam kʋlʋ Baŋa-Wɛ na tagɩ tɩn. O ma kuri Yisɩrayɛlɩ nakwa fusɩrpɛ, yɩ o daarɩ o pa ba zɩgɩ ba kaagɩ jero-vwe dɩm. 25 Baŋa-Wɛ ma tu jero-vwe dɩm nɩ yɩ kunkoŋo kʋm kwǝli‑DƖ. DƖ ma ŋɔɔnɩ dɩ Moyisi, yɩ DƖ daarɩ DƖ pwəri joro kʋlʋ Moyisi na jɩgɩ o ma o tʋŋɩ tɩn wʋnɩ o pa nakwa fusɩrpɛ bam dɩdʋa dɩdʋa. Joro kʋm na tu ba baŋa nɩ kʋntʋ tɩn, mʋ ba tʋ Wɛ yiyiu ŋwɛ nɩ, nɩ Wɛ ni-joŋnə tɩte. Kʋntʋ woŋo kʋm kɩ ba tɩtarɩ nɩ, kuni bɩdwɩ ma mʋ.
26 Eledadɩ dɩ Medadɩ dɩ dɛɛn wʋ nakwa fusɩrpɛ bam wʋnɩ mʋ. Ba ma maŋɩ ba vwə yam seeni, yɩ ba wʋ tɔgɩ ba zʋ jero-vwe dɩm nɩ. Ba na wʋra kʋntʋ tɩn, mʋ joro kʋm tu ba baŋa. Ba dɩ ma puli sɩ ba taa ŋɔɔnɩ Wɛ yiyiu-ŋwɛ. 27 Nɔn-dʋŋʋ kʋdoŋ ma duri o vu o yi Moyisi te, yɩ o ta o brɩ-o o nɩ: Eledadɩ dɩ Medadɩ wʋra ba ŋɔɔnɩ Wɛ yiyiu-ŋwɛ ba vwə yam seeni. 28 Nun bu Zozwe nan dɛɛn maŋɩ o zɩgɩ o nɔn-dʋnnɩ maŋa nɩ mʋ o tʋŋɩ o wǝli Moyisi. O ma ta dɩ Moyisi o wɩ: «Dɩ́ ko, cɩ-ba dɩ ba kǝm dɩm kʋntʋ!»
29 Moyisi ma lǝr-o o wɩ: «Kʋ yɩ amʋ ŋwaanɩ mʋ n jɩgɩ wʋbʋŋa kʋntʋ doŋ na? Nan yagɩ! Amʋ tee nɩ, Baŋa-Wɛ ya na pɛ DƖ nɔɔna bam maama su dɩ DƖ Joro pa ba ŋɔɔnɩ nɩnɛɛnɩ Wɛ nijoŋnǝ bam na yǝni ba kɩ te tɩn, kʋ ya gara.» 30 Moyisi dɩdaanɩ nakwa fusɩrpɛ bam maama laan ma joori nɔɔna bam na cwi ba vwə je sɩlʋ nɩ tɩn.
Baŋa-Wɛ tʋŋɩ lwib pa nɔɔna pɛ-sɩ
31 Baŋa-Wɛ dɛɛn ma pa vu-dɩʋ tiini kʋ dʋlɩ. Viu kʋm ma kalɩ lwi pa sɩ nuŋi nɩnɩʋ kʋm seeni, yɩ sɩ laan ba sɩ kaagɩ nɔɔna bam na cwi ba vwə mɛ tɩn seeni.c Sɩ dɛɛn na jaanɩ wɛɛnɩ te tɩn zaŋɩ kʋ yi jatogo maŋɩm kuni bɩle mʋ dɩ tɩga kam. Sɩ ma faarɩ tɩga kam maama sɩ kʋ vu kʋ yi dɛ dɩdʋa vəŋə mʋ je maama nɩ. 32 Da yale punə mʋ nɔɔna bam dɛɛn kwe, wɩa dɩ tɩtɩɩ maama, ba ma ba jaanɩ lwi sɩm. Ba na lagɩ-sɩ ba tiŋi tɩn nɔɔnʋ maama lwi sɩm duuni dɛɛn wʋ muri kʋrɩwaa biə bi. Ba dɛɛn ma jarɩ-sɩ ba tiŋi je sɩm maama nɩ. 33 Lwi sɩm nwana yam ta na wʋ nɔɔna bam niə nɩ yɩ ba ta wʋ di ba ti tɩn, mʋ Baŋa-Wɛ banɩ zaŋɩ dɩ ba. DƖ ma pa yawɩ-cɛɛrʋ tʋ ba tɩtarɩ nɩ. 34 Ba dɛɛn ma kwe nɔɔna bam zanzan ba kɩ, yawɩɩrʋ tɩm na gʋ-ba tɩn ŋwaanɩ. Ba ma bəŋi je sɩm kʋntʋ ba wɩ ‹Kibrɔtɩ-Atava›d, Bɛŋwaanɩ ba kɩ balʋ fra na zʋ nwana wʋnɩ tɩn je sɩm kʋntʋ nɩ mʋ.
35 Yisɩrayɛlɩ tiinə bam laan ma zaŋɩ Kibrɔtɩ-Atava nɩ ba vu ba yi Hazerɔtɩ. Ba dɛɛn ma cwi ba vwə dáanɩ.