Lu-nyɩnnʋ nabwaanʋ dɩ tɩ wum
10
Baŋa-Wɛ ma ta dɩ Moyisi DƖ wɩ:
2 «Nan pa ba kwe lu-nyɩnnʋ ba magɩ-tɩ sɩ ba ma ba kɩ nabwaanʋ tɩle. Nmʋ laan ma n wʋ́ yǝni n pa ba kwe-tɩ ba ma ba bəŋi nɔɔna bam ba kɩ daanɩ, naa sɩ ba gɔ ba vwə ba vu jəgə kadoŋ. 3 Ba na yǝni ba wu nabwaanʋ tɩle tɩm maŋa dɩdʋa wʋnɩ, sɩ nɔɔna bam maama da ba jeeri‑m jero-vwe dɩm ni nɩ. 4 Sɩ ba na wugi nabɔnɔ dɩdʋa yɩranɩ, kʋ yɩ sɔ-yuni yigǝ tiinǝ bam mʋ wʋ́ ba ba jeeri‑m.
5 Ba na yǝni ba wu nabwaanʋ tɩm ba kɔɩ, kʋ brɩ nɩ Yisɩrayɛlɩ dwiə yalʋ na je jero-vwe dɩm wa-puli seeni tɩn mʋ maŋɩ sɩ ba gɔ ba vwə ba nuŋi ba kɛ. 6 Ba daa na wugi-tɩ ba kɩ bɩle tu, sɩ dwiə yalʋ na je vwe dɩm jagwiə seeni tɩn dɩ gɔ ba vwə. Ba na wugi nabwaanʋ tɩm ba kɔ, kʋʋ́ brɩ nɔɔna bam nɩ maŋa kam yiǝ sɩ ba nuŋi ba kɛ. 7 Kʋ nan na yǝni kʋ yɩ sɩ nɔɔna bam maama jeeri daanɩ, sɩ ba wu nabwaanʋ tɩm ba ləri tɩ kwǝri.
8 Arɔn biə bam na yɩ kaanɩm tiinə tɩn mʋ maŋɩ sɩ ba taa wui nabwaanʋ tɩm. Amʋ ni dɩm kʋntʋ wʋ́ taa wʋra taan wuu mʋ kʋ pa abam dɩ á kwaga kam maama. 9 Á na nuŋi sɩ á zaŋɩ najara dɩ á dʋna balʋ na tu sɩ ba cɔgɩ á tɩga kam tɩn, sɩ á pa ba wu nabwaanʋ tɩm ba kɔ tigurə ŋwaanɩ. Kʋ na kɩ kʋntʋ, abam Tu Baŋa-Wɛ dɩm wʋ́ ni kʋ ŋwa, sɩ DƖ joŋi abam DƖ yagɩ á dʋna bam jɩŋa nɩ. 10 Abam nan ta na yǝni á di ywəəni da yalʋ wʋnɩ tɩn, sɩ á wu nabwaanʋ tɩm. Kʋ na yɩ á lagɩ á di can-dʋŋa candiə naa candiə kadoŋ, sɩ á wu-tɩ, sɩ kʋ brɩ nɩ á jɩgɩ á zwɛɛm pɛɛra dɩ á yazurə pɛɛra mʋ á bɩɩnɩ sɩ á kɩ kaanɩm á pa Wɛ. Nabwaanʋ tɩm wʋ́ pa abam Tu Wɛ dɩm nii á baŋa nɩ. Amʋ mʋ yɩ abam Tu Baŋa-Wɛ dɩm.»
Yisɩrayɛlɩ tiinə bam yagɩ Sinayi je sɩm
11 Dɩntʋ bɩnɩ dɩm canɩ sɩle cana kam da fiinle dɛ dɩm nɩ mʋ kunkoŋo kʋm ya na dɔgɩ jero-vwe dɩm baŋa nɩ tɩn zaŋɩ. 12 Kʋ ma pa Yisɩrayɛlɩ tiinə bam dɩ gɔ ba vwə ba yagɩ Sinayi kagʋa kam yɩ ba tʋlɩ ba veǝ. Kunkoŋo kʋm dɛɛn ma vu kʋ yi Paran kagʋa kam kʋ maŋɩ dáanɩ kʋ zɩgɩ. 13 Ba na puli ba zaŋɩ sɩ ba vu jǝgǝ kadoŋ kʋntʋ tɩn, kʋ yɩ Baŋa-Wɛ na tɔgɩ Moyisi baŋa DƖ pa-ba ni sɩ ba kɩ te tɩn mʋ.
14 Zuda dwi dɩm dɩ ba kwaga kam dɛɛn ma puli sɩ ba nuŋi ba kɛ, yɩ ba ze ba gwɛɛm yɩrɩa dɩm. Amɩnadabɩ bu Naasɔn dɛɛn nan mʋ wʋ ba kɔgɔ kʋm maama yigə nɩ. 15 Zuwara bu Netaneli maa wʋ Yisakaarɩ dwi dɩm yigə nɩ. 16 Helon bu Eliabɩ maa wʋ Zabulɔn dwi dɩm yigə nɩ.
17 Ba laan ma kʋrɩ jero-vwe dɩm, sɩ Gɛrsɔnɩ tiinə dɩ Merari tiinə bam zɩŋɩ dɩ zɩla yam ba taa ve ba tɔgɩ Zuda kɔgɔ kʋm kwaga.
18 Ruban dwi dɩm dɩ ba kwaga kam dɛɛn ma saŋɩ sɩ ba nuŋi ba kɛ, yɩ ba ze ba gwɛɛm yɩrɩ dɩm. Seduri bu Elizuri dɛɛn nan mʋ wʋ ba kɔgɔ kʋm maama yigə nɩ. 19 Zurisadayi bu Selumeli maa wʋ Simeyon dwi dɩm yigə nɩ. 20 Deweli bu Eliasatɩ maa wʋ Yisakaarɩ dwi dɩm yigə nɩ.
21 Keyatɩ tiinə dɩ ma zɩŋɩ jero-vwe wʋ-zɩla yalʋ na tiini ya yɩ lanyɩranɩ fasɩ tɩn ba ve ba tɔgɩ-ba. Ba na yǝni ba yi mɛ ba daa na wʋ́ jǝni tɩn, dɩdaanɩ nɔɔna badonnǝ maŋɩ ba cwi jero-vwe dɩm kʋ je nɩ.
22 Efrayim dwi dɩm dɩ ba kwaga kam dɛɛn ma saŋɩ sɩ ba nuŋi ba kɛ, yɩ ba ze ba gwɛɛm yɩrɩ dɩm. Amiwudi bu Elisama dɛɛn nan mʋ wʋ ba kɔgɔ kʋm maama yigə nɩ. 23 Pedazura bu Gamaleli maa wʋ Manasɩ dwi dɩm yigə nɩ. 24 Gidɩoni bu Abidan maa wʋ Bɛnzamɛn dwi dɩm yigə nɩ.
25 Dan dwi dɩm dɩ ba kwaga kam dɛɛn ma kweeli sɩ ba nuŋi ba kɛ, yɩ ba ze ba gwɛɛm yɩrɩ dɩm. Amisadayi bu Ahiyezera dɛɛn nan mʋ wʋ ba kɔgɔ kʋm maama yigə nɩ. 26 Ocaran bu Pagɩlɩ maa wʋ Asɛɛrɩ dwi dɩm yigə nɩ. 27 Enan bu Ahira maa wʋ Nɛfitali dwi dɩm yigə nɩ.
28 Yisɩrayɛlɩ tiinə kɔ-fɔrɔ kʋm maama na yǝni ba zaŋɩ sɩ ba nuŋi ba vu jǝgǝ kalʋ, kʋ yɩ cwǝŋǝ kam kʋntʋ seeni mʋ ba tɔga yɩ ba ve ba maa kɛa.
29 Madian tu Rewuɛlɩ bu Hobabɩ dɩ dɛɛn tɔgɩ o wʋ ba tee nɩ. Rewuɛlɩ maa yɩ Moyisi tɩmbaarʋ. Moyisi ma ta dɩ Hobabɩ o wɩ: «Kʋ laan yi sɩ dɩbam zaŋɩ dɩ́ vu je sɩlʋ Baŋa-Wɛ na goni ni sɩ DƖ kwe DƖ pa dɩbam tɩn. DƖ nan pɛ dɩ́ lwarɩ nɩ dɩ́ na yi da, kʋʋ́ taa lana kʋ paɩ dɩbam. Nmʋ dɩ nan ba sɩ dɩ́ maama kɛ, sɩ dɩ́ wʋ́ nii nmʋ baŋa nɩ yɩ n tɔgɩ n na wo-laarʋ.» 30 Hobabɩ ma lǝr-o o wɩ: «Awo! Amʋ dɩ lagɩ sɩ a joori a tɩtɩ tɩʋ mʋ, sɩ a taa zʋʋrɩ a nɔɔna tee nɩ.»
31 Moyisi daa ma ta o wɩ: «A loori-m! Pa dɩ́ maama kɛ, sɩ nmʋ wʋ́ tan brɩ dɩbam cwǝŋǝ kam, nmʋ na ye kagʋa kam je sɩm lanyɩranɩ tɩn ŋwaanɩ. 32 Kʋ kwaga nɩ, n na dɛ dɩ́ kwaga sɩ dɩ́ yi da, dɩ́ wʋ́ cɛ wo-laarʋ tɩlʋ maama Baŋa-Wɛ na wʋ́ pa dɩbam tɩn, sɩ nmʋ dɩ da n na tɩ wʋnɩ.»
33 Nɔɔna bam maama dɛɛn ma yagɩ Sinayi piu kʋmb je sɩm yɩ ba ve taan, da yatɔ. Ba na maa ve tɩn, Baŋa-Wɛ ni-gonim daka kam maa wʋ ba yigə nɩ, sɩ ka brɩ-ba je sɩ ba jǝni da. 34 Ba na zaŋɩ sɩ ba nuŋi dɛ dɩlʋ maama wʋnɩ, Baŋa-Wɛ kunkoŋo kʋm maa yǝni kʋ wʋ ba tee nɩ yɩ ba veǝ.
35 Ba dɛɛn na yǝni ba zɩŋɩ Baŋa-Wɛ ni-gonim daka kam sɩ ba nuŋi, Moyisi mʋ yǝni o loori Wɛ yɩ o wɩ:
«Dɩ́ Tu Baŋa-Wɛ, zaŋɩ sɩ n zəli n dʋna bam,
sɩ n pa ba duri ba jagɩ nmʋ yigə nɩ!»
36 Ba nan na yǝni ba zɩgɩ yɩ ba zʋʋrɩ daka kam, o daa wʋ́ loori Wɛ mʋ o wɩ:
«Dɩ́ Tu Baŋa-Wɛ, ba n jǝni n twɛ dɩ Yisɩrayɛlɩ kɔ-fɔrɔ kʋm,
sɩ n tan nii dɩbam maama baŋa nɩ,
sɩ dɩ́ yɩ kɔgɔ dɩ kɔgɔ, kuni mʋrʋ mʋ.»