Pakɩ candiə kam
9
Yisɩrayɛlɩ tiinə bam dɛɛn na nuŋi Ezipi tɩʋ kʋm nɩ yɩ bɩnɩ dɩdʋa kɛ sɩ kʋ vu kʋ yi bɩna yale bɩnɩ dɩm pulim cana kam tɩn, mʋ Baŋa-Wɛ ŋɔɔnɩ dɩ Moyisi Sinayi kagʋa kam nɩ yɩ DƖ wɩ: 2 «Pa Yisɩrayɛlɩ tiinə bam di Pakɩ candiə kam ka maŋa kam nɩ. 3 Cana kantʋ da fugə-yana dɛ dɩm na yiǝ, sɩ ba di candiə kam wa-zʋʋrɩ maŋa nɩ sɩ kʋ taa veǝ. Ba nan maŋɩ sɩ ba di-ka sɩ kʋ maŋɩ dɩ ka dim cwǝŋǝ kam mʋ.»a4-5 Moyisi ma ta dɩ nɔɔna bam yɩ ba dɩ sɩɩnɩ ba di Pakɩ candiə kam Sinayi kagʋa kam nɩ kʋntʋ. Kʋ dɛɛn yɩ pulim cana kam da fugə-yana dɛ dɩm wa-zʋʋrɩ maŋa nɩ mʋ ba di-ka. Yisɩrayɛlɩ tiinə bam dɛɛn kɩ nɩnɛɛnɩ Baŋa-Wɛ na pɛ Moyisi ni sɩ ba kɩ te tɩn mʋ.
6 Nɔɔna badonnǝ dɛɛn wʋ maŋɩ dɩ cullu tɩm, pa cwǝŋǝ wʋ pəni ka pa-ba sɩ ba tɔgɩ ba di candiə kam dɩ dɛ dɩm nɩ. Kʋ maa yɩ ba dɛɛn na dwe tʋʋ ŋwaanɩ tɩn mʋ. Dɛ dɩm kʋntʋ nɩ ba ma vu Moyisi dɩ Arɔn te, 7 yɩ ba ta ba wɩ: «Dɩbam sɩɩnɩ dɩ́ dwe tʋʋ pa dɩ́ wʋ maŋɩ dɩ cullu tɩm. Kʋntʋ nan wʋ́ cɩ sɩ dɩ́ yɩ tɔgɩ dɩ Yisɩrayɛlɩ tiinə kɔ-fɔrɔ kʋm dɩ́ kwe dɩ́ pɛɛra dɩ́ pa Baŋa-Wɛ ka maŋa kam nɩ na?» 8 Moyisi ma lǝri-ba o wɩ: «Zuri-na á yɩra sɩ a bwe Baŋa-Wɛ sɩ dɩ́ lwarɩ dɩ́ na wʋ́ kɩ te abam ŋwaanɩ tɩn.»
9 Baŋa-Wɛ dɩ ma ta dɩ Moyisi DƖ wɩ:
10 «Ta n brɩ Yisɩrayɛlɩ tiinə bam nɩ: Abam dɩ á kwaga kam balʋ maama na dwe tʋʋ pa ba wʋ maŋɩ dɩ cullu tɩm, naa ba na ve cwǝŋǝ mʋ yigə yigə, ba dɩ wʋ́ taa jɩgɩ cwǝŋǝ sɩ ba di Pakɩ candiə kam. 11 Ba nan maŋɩ sɩ ba cəgi sɩ canɩ sɩle cana kam da fugə-yana dɛ dɩm na yiǝ sɩ ba di-kʋ wa-zʋʋrɩ maŋa nɩ sɩ kʋ taa veǝ. Baá di pǝlbu kam nwana mʋ, yɩ ba di dɩpwa yalʋ dabɩlɩ na tǝri ya wʋnɩ tɩn, dɩdaanɩ dwə vɔɔ-cɛɛrʋ ba wǝli da. 12 Ba yɩ pa wʋdiu kʋm kʋntʋ zɩgɩ kʋ pʋʋrɩ tɩga, naa sɩ ba bwəri varɩm wʋm kwi dɩ dɩdʋa dɩ. Ba na lagɩ ba di Pakɩ candiə kam, ba maŋɩ sɩ ba kɩ ba tɔgɩ ka dim cwǝŋǝ kam maama mʋ. 13 Wʋlʋ nan na maŋɩ dɩ cullu tɩm, yɩ o na wʋ ve cwə-dɔrɔ, kʋ tu na vɩn sɩ o di Pakɩ candiə kam, o nan daa bá tɔgɩ o wǝli Yisɩrayɛlɩ dwi dɩm wʋnɩ, o na wʋ jaanɩ o pɛɛra o ba amʋ yigə nɩ ka maŋa kam nɩ tɩn ŋwaanɩ. O tusim dɩm kʋntʋ wʋ́ taa wʋ o yuu nɩ yɩ o maŋɩ sɩ o na waarɩm mʋ.
14 Kʋ ta na yɩ vəru wʋlʋ na zʋʋrɩ abam tee nɩ yɩ o lagɩ sɩ o di Pakɩ candiə kam, kʋ tu dɩ maŋɩ sɩ o di-ka sɩ kʋ maŋɩ dɩ ka dim cwǝŋǝ kam mʋ. Cwǝŋǝ dɩdʋa mʋ wʋra kʋ paɩ tɩmbiə dɩ vərə.»
Kunkoŋo na kwǝli jero-vwe dɩm te tɩn
15 Dɛ dɩlʋ wʋnɩ ba dɛɛn na cwi jero-vwe dɩm tɩn, mʋ kunkoŋo cugi kʋ kwǝli jero-vwe dɩm mɛ Wɛ ni-gonim kandwa yam na tigi tɩn maama. Kʋ na zɩgɩ wa-zʋʋrɩ maŋa nɩ sɩ kʋ yi tɩ-pʋra tɩn, kunkoŋo kʋm dɛɛn nyɩ dɩ mim mʋ.b 16 Kʋ nan yǝni kʋ kɩ kʋntʋ mʋ dɛ maama wʋnɩ. Kunkoŋo mʋ yǝni kʋ kwǝli Wɛ jero-vwe dɩm, yɩ tɩtɩɩ nɩ kʋ nyɩ dɩ mim. 17 Kunkoŋo kʋm na yǝni kʋ zaŋɩ Wɛ jero-vwe dɩm baŋa nɩ yɩ kʋ veǝ, Yisɩrayɛlɩ tiinə bam dɩ wʋ́ zaŋɩ ba ve ba tɔgɩ-kʋ mʋ. Kʋ na yi mɛ yɩ kʋ zɩgɩ, Yisɩrayɛlɩ tiinə bam dɩ wʋ́ cwi ba vwə ba jǝni dáanɩ mʋ. 18 Baŋa-Wɛ dɛɛn yǝni DƖ tɔgɩ kʋntʋ baŋa nɩ mʋ DƖ brɩ Yisɩrayɛlɩ tiinə bam maŋa kalʋ ba na wʋ́ gɔ ba vwə yam ba kɛ tɩn, dɩ ba na wʋ́ cwi ba vwə yam ba jǝni je sɩlʋ nɩ tɩn. Kunkoŋo kʋm na yǝni kʋ maŋɩ Wɛ jero-vwe dɩm baŋa nɩ, Yisɩrayɛlɩ tiinə bam dɩ wʋ́ maŋɩ je sɩm kʋntʋ nɩ mʋ. 19 Kʋ na maŋɩ da taan, yɩ kʋ ba zaŋa, Yisɩrayɛlɩ tiinə bam dɩ wʋ́ maŋɩ je sɩm kʋntʋ nɩ mʋ, nɩ Baŋa-Wɛ na brɩ-ba sɩ ba kɩ te tɩn. 20 Kunkoŋo kʋm dɛɛn waɩ kʋ maŋɩ vwe dɩm baŋa nɩ da fɩnfɩɩn. Yisɩrayɛlɩ tiinə bam nan sɛ ba tɔgɩ Baŋa-Wɛ ni dɩm mʋ. Ba ma yǝni ba cwi ba vwə ba maŋɩ jǝgǝ kam nɩ, naa ba gɔɩ ba vwə yam sɩ ba nuŋi ba kɛ, nɩnɛɛnɩ Baŋa-Wɛ na brɩ-ba sɩ ba kɩ te maama tɩn. 21 Kunkoŋo kʋm brɩ kʋ waɩ kʋ maŋɩ vwe dɩm baŋa nɩ sɩ kʋ zɩgɩ wa-zʋʋrɩ maŋa nɩ kʋ yi tɩ-pʋra, sɩ kʋ laan zaŋɩ kʋ kɛ. Tɩga na pʋʋrɩ yɩ kunkoŋo kʋm na gɔga, nɔɔna bam dɩ wʋ́ gɔ mʋ. Maŋa kalʋ maama kunkoŋo kʋm na zaŋɩ, kʋ na yɩ wɩa nɩ naa tɩtɩɩ nɩ mʋ dɩ, ba dɩ wʋ́ zaŋɩ mʋ ba kɛ. 22 Kunkoŋo kʋm dɛɛn na kɩ da yale, naa cana, naa bɩnɩ, yɩ kʋ na yɔɔrɩ kʋ maŋɩ jero-vwe dɩm baŋa nɩ, Yisɩrayɛlɩ tiinə bam dɩ wʋ́ maŋɩ je sɩm kʋntʋ nɩ mʋ. Kʋ na zaŋɩ kʋ ve maŋa kalʋ nɩ, ba dɩ wʋ́ zaŋɩ ba tɔgɩ kʋ kwaga mʋ ba veǝ. 23 Ba dɛɛn yǝni ba cwi ba vwə ba jǝni, naa ba gɔ ba vwə yam sɩ ba nuŋi ba kɛ, nɩnɛɛnɩ Baŋa-Wɛ na pɛ-ba ni sɩ ba kɩ te maama tɩn mʋ. Nɔɔna bam dɛɛn sɛ ba tɔgɩ Baŋa-Wɛ na tɔgɩ Moyisi baŋa DƖ pa-ba ni sɩ ba kɩ kʋlʋ maama tɩn mʋ.