Jero-vwe dɩm min-zwǝǝnu tɩm
8
Baŋa-Wɛ dɛɛn ma ta dɩ Moyisi DƖ wɩ: 2 «Ta dɩ Arɔn sɩ o zɩgɩ min-zwǝǝnu tɩrpɛ tɩm min-zwǝn-zɩgʋ kʋm baŋa nɩ, sɩ tɩ taa nyɩɩnɩ tɩ pooni tɩ jeeri kʋ yigə kam seeni.»3 Arɔn ma sɛ yɩ o zɩgɩ min-zwǝǝnu tɩm pa tɩ pooni nyɩɩnɩ tɩ jeeri kʋ yigə kam seeni, nɩ Baŋa-Wɛ na pɛ Moyisi ni sɩ o kɩ te tɩn. 4 Ba dɛɛn ya kwe səbu-sɩŋa mʋ ba magɩ ba gɔgɩrɩ min-zwǝn-zɩgʋ kʋm maama, sɩ kʋ zɩgɩ kʋ kuri dɩm nɩ kʋ yi pun-kʋgɩla yam na wʋ kʋ baŋa seeni tɩn. Kʋ maa yɩ Baŋa-Wɛ dɛɛn na pɛ Moyisi ni sɩ ba kɩ-kʋ te tɩn mʋ cɩga cɩga.
Ba na pɔɔrɩ Levi tiinə bam ba tɩtʋŋa ŋwaanɩ te tɩn
5 Baŋa-Wɛ ta ma ta dɩ Moyisi DƖ wɩ:
6 «Nmʋ maŋɩ sɩ n pɔɔrɩ Levi tiinə bam mʋ sɩ ba taa yɩ ba yɩra dɩ Yisɩrayɛlɩ tiinə bam maama, sɩ n daarɩ n kwɛ-ba dɩ cullu tɩm. 7 Nmʋ nan na wʋ́ kwɛ-ba te tɩn yɩ sɩ n miisi na mʋ ba yɩra nɩ lwarɩm saarɩm ŋwaanɩ. Ta pa ba fanɩ ba yɩra yam je maama kʋrʋ ba yagɩ, sɩ ba daarɩ ba zarɩ ba gwaarʋ. Kǝm dɩm kʋntʋ wʋ́ kwɛ-ba. 8 Ba laan maa wʋ́ ja na-bala, dɩdaanɩ wʋdiu pɛɛrɩ dɩlʋ na maŋɩ tɩn ba ba. Wʋdiu pɛɛrɩ dɩm maa yɩ mun-bwe na viiri dɩ nugə tɩn mʋ. Nmʋ dɩ maa wʋ́ ja na-bala kadoŋ n ba sɩ n ma n kɩ lwarɩm saarɩm kaanɩm. 9 Pa Levi tiinə bam ba ba zɩgɩ jero-vwe dɩm ni nɩ, sɩ Yisɩrayɛlɩ tiinə kɔgɔ kʋm maama dɩ ba ba jeeri da. 10 Nmʋ ta wʋ́ pa Levi tiinə bam ba amʋ Baŋa-Wɛ yigə nɩ, sɩ Yisɩrayɛlɩ tiinə bam dɩ kwe ba jɩan ba daŋɩ ba baŋa nɩ. 11 Arɔn maa wʋ́ kwe Levi tiinə bam o kɩ amʋ jɩŋa nɩ, nɩ o zəŋi-ba amʋ yigə nɩ mʋ te tɩn. Ba yɩ Yisɩrayɛlɩ tiinə bam maama pɛɛrɩ mʋ ba na kwe sɩ ba taa tʋŋɩ ba pa-nɩ. 12 Levi tiinə bam laan wʋ́ daŋɩ ba jɩan na-bɛ sɩle sɩm yum nɩ.a Na-bɩa dɩdʋa yɩ sɩ ba kwe-ka ba kɩ lwarɩm saarɩm kaanɩm, sɩ ba kwe kadoŋ kam ba kɩ zwɛɛm pɛɛrɩ kaanɩm dɩlʋ na wʋ́ lɩ Levi tiinə bam lwarɩm amʋ yigə nɩ tɩn. 13 Ta daarɩ n pa Levi tiinə bam zɩgɩ Arɔn dɩ o biə bam yigə nɩ, yɩ n kɩ sɩ kʋ taa nyɩ dɩ n zəŋi-ba mʋ amʋ Baŋa-Wɛ yigə nɩ.
14 Nan kɩ kʋntʋ sɩ n ma n pɔɔrɩ Levi tiinə bam, sɩ ba taa yɩ ba yɩra Yisɩrayɛlɩ tiinə bam maama wʋnɩ. Levi tiinə bam wʋ́ taa yɩ amʋ nyɩm. 15 Nmʋ na pɛ ba kwɛ ba tɩtɩ dɩ cullu tɩm kʋntʋ, yɩ n daarɩ n kwe-ba n kɩ amʋ jɩŋa nɩ, ba laan jɩgɩ cwǝŋǝ sɩ ba taa tʋŋɩ jero-vwe dɩm tɩtʋŋa. 16 Bantʋ mʋ wʋ́ ləri Yisɩrayɛlɩ tiinə bəkər-kwɩn sɩlʋ maama abam na wʋ́ lʋ tɩn yuu nɩ. Amʋ mʋ kuri-ba sɩ ba yɔɔrɩ ba taa yɩ amʋ nyɩm. 17 Bɛŋwaanɩ, Yisɩrayɛlɩ tiinə bam wʋnɩ, dɩ ba vara wʋnɩ wo-kwɩn sɩlʋ na yɩ baara tɩn maama yɩ amʋ nyɩm mʋ. Amʋ dɛɛn na gʋ Ezipi tiinə bəkər-kwɩn sɩm tɩn, mʋ a kuri sɩ Yisɩrayɛlɩ tiinə bəkər-kwɩn sɩm taa yɩ a nyɩm.b 18 A laan nan kwe Levi tiinə bam mʋ sɩ ba ləri Yisɩrayɛlɩ tiinə bəkər-kwɩn sɩm yuu nɩ. 19 A ma yɔɔrɩ a kuri-ba Yisɩrayɛlɩ tiinə bam maama wʋnɩ a pa Arɔn dɩ o biə bam, sɩ ba taa tʋŋɩ jero-vwe dɩm tɩtʋŋa. Ba maŋɩ sɩ ba fɔgɩ ba kwɛ Yisɩrayɛlɩ tiinə bam tusim mʋ amʋ yigə nɩ, sɩ ba yɩ na cɔgɩm dɩ ba na tiini ba fʋfɔ ba yi amʋ jero-vwe dɩm seeni tɩn ŋwaanɩ.»
20 Moyisi, dɩ Arɔn, dɩ Yisɩrayɛlɩ tiinə kɔ-fɔrɔ kʋm maama ma nii kʋ baŋa nɩ pa Levi tiinə bam kɩ kʋlʋ maama Baŋa-Wɛ na pɛ ni sɩ ba kɩ tɩn. 21 Levi tiinə bam ma kwɛ ba tɩtɩ dɩ cullu tɩm, yɩ ba daarɩ ba zarɩ ba gwaarʋ. Arɔn dɩ ma kɩ sɩ kʋ brɩ nɩ o zəŋi-ba o kɩ Baŋa-Wɛ jɩŋa nɩ. O ta ma kɩ cullu tɩlʋ na lɩ ba lwarɩm Wɛ yigə nɩ tɩn, pa ba fɔgɩ ba kwɛ ba tɩtɩ Wɛ ŋwaanɩ. 22 Kʋ kwaga nɩ, Levi tiinə bam dɛɛn ma puli ba tɩtʋŋa jero-vwe dɩm nɩ, yɩ Arɔn dɩ o biə bam nii ba baŋa nɩ. Kʋntʋ tɩn, Yisɩrayɛlɩ tiinə bam dɛɛn pɛ Levi tiinə bam kɩ kʋlʋ maama Baŋa-Wɛ na pɛ Moyisi ni sɩ ba kɩ tɩn.
23 Baŋa-Wɛ ta ma ta dɩ Moyisi DƖ wɩ: 24 «Kʋ na yɩ Levi tiinə bam, ba baara balʋ na yi bɩna fiinle-yanu ba daŋɩ tɩn mʋ maŋɩ sɩ ba ba ba tʋŋɩ jero-vwe dɩm tɩtʋŋa. 25 Ba nan na tu ba yi bɩna fiinnu, sɩ ba yagɩ jero-vwe tɩtʋŋa yam, ba daarɩ ba jǝni ba sin. 26 Ba nan jɩgɩ cwǝŋǝ sɩ ba wǝli ba donnǝ Levi tiinə sɩ ba tʋŋɩ ba tɩtʋŋa jero-vwe dɩm nɩ, sɩ bantʋ daa bá taa jɩgɩ ba tɩtɩ tɩtʋŋɩ. Nmʋ wʋ́ tɔgɩ cwǝŋǝ kam kʋntʋ mʋ n pa Levi tiinə bam taa tʋŋɩ ba tɩtʋŋa.»