Garɩm 7

Jero-vwe dɩm fɔgɩm pɛɛra

Moyisi dɛɛn na yɔɔrɩ o cwi jero-vwe dɩm o ti tɩn, mʋ o kwe nugə o ma taagɩ jero-vwe dɩm dɩ sɩ wʋ zɩla yam maama sɩ o pɔɔrɩ-ya o pa Wɛ. O ta ma daarɩ o taagɩ kaanɩm bimbim dɩm, dɩdaanɩ ka yɩra zɩla yam, yɩ o pɔɔrɩ-tɩ o pa Wɛ. 2 Sɔ-yuni tɩm yigǝ tiinǝ balʋ na nuŋi Yisɩrayɛlɩ dwiə yam maama wʋnɩ tɩn laan ma ja pɛɛra ba vu jero-vwe dɩm. Nɔɔna bam kʋntʋ yɩ balʋ dɛɛn ya na jeeli nɔɔna bam ni tɩn mʋ. 3 Ba dɛɛn maa jɩgɩ ba pɛɛra sɩ ba kɩ-ya Baŋa-Wɛ jɩŋa nɩ. Ba ma ja tərikooru bardʋ, dɩdaanɩ nabɛ fugə-sɩle ba vu. Yigə tu maama dɛɛn jɩgɩ o na-bɩa mʋ, yɩ ba bale kɩ daanɩ ba lagɩ təriko dɩdʋa. Ba ma ja-tɩ ba vu ba yi jero-vwe dɩm ni.

4 Baŋa-Wɛ ma ta dɩ Moyisi DƖ wɩ: 5 «Joŋi pɛɛra yam nɔɔna bam tee nɩ, sɩ Levi tiinə taa ma-tɩ ba tʋŋɩ jero-vwe dɩm tɩtʋŋa. Kwe-tɩ n pa Levi tiinə bam sɩ kʋ maŋɩ dɩ nɔɔnʋ maama tɩtʋŋɩ na yɩ te tɩn.»

6 Moyisi ma sɩɩnɩ o joŋi tərikooru tɩm dɩ nabɛ sɩm yɩ o kwe-tɩ o pa Levi tiinə bam. 7 O dɛɛn kwe tərikooru tɩm tɩle mʋ dɩ nabɛ sɩna o pa Gɛrsɔnɩ tiinə bam, sɩ kʋ maŋɩ dɩ ba tɩtʋŋa yam. 8 O ma daarɩ o kwe tərikooru tɩna dɩ nabɛ nana o pa Merari tiinə bam, sɩ tɩ maŋɩ dɩ bantʋ dɩ tɩtʋŋa yam. Wɛ kaanɩm tu Arɔn bu Itamarɩ mʋ nii ba maama tɩtʋŋa yam baŋa nɩ. 9 Sɩ kʋ na yɩ Keyatɩ tiinə bam, Moyisi dɛɛn wʋ pɛ-ba tərikooru naa nabɛ. Bɛŋwaanɩ, bantʋ tɩtʋŋɩ dɩm maŋɩ sɩ ba taa zɩŋɩ jero-vwe dɩm yɩra zɩla yalʋ na tiini tɩ yɩ lanyɩranɩ fasɩ tɩn mʋ ba bakalɩ baŋa nɩ.

10 Ba dɛɛn na kwe nugə ba ma taagɩ kaanɩm bimbim dɩm sɩ ba pɔɔrɩ-ka ba pa Baŋa-Wɛ ba ti tɩn, mʋ yigǝ tiinǝ bam ta jaanɩ pɛɛra yadonnə ba wǝli da ba vu bimbim dɩm seeni sɩ ba kɩ-ya Wɛ jɩŋa nɩ. 11 Baŋa-Wɛ dɛɛn tagɩ dɩ Moyisi DƖ wɩ: «Dɛ maama wʋnɩ yigǝ tiinǝ bam dɩdʋa mʋ wʋ́ ja o pɛɛra o ba sɩ o ma fɔgɩ o kwɛ bimbim dɩm o pa Wɛ.»

12-83 Ba dɛɛn na tu ba pa ba pɛɛra yam te tɩn tɔgɩ cwǝŋǝ kantʋ mʋ:

Dɛ dɩm	Dwi dɩm	Yigə tu wʋm
1	Zuda	Amɩnadabɩ bu Naasɔn
2	Yisakaarɩ	Zuwara bu Netaneli
3	Zabulɔn	Helon bu Eliabɩ
4	Ruban	Seduri bu Elizuri
5	Simeyon	Zurisadayi bu Selumeli
6	Gadɩ	Deweli bu Eliasatɩ
7	Efrayim	Amiwudi bu Elisama
8	Manasɩ	Pedazura bu Gamaleli
9	Bɛnzamɛn	Gidɩoni bu Abidan
10	Dan	Amisadayi bu Ahiyezera
11	Asɛɛrɩ	Ocaran bu Pagɩlɩ
12	Nɛfitali	Enan bu Ahira

Yigǝ tiinǝ bam kʋntʋ maama dɩdʋa dɩdʋa dɛɛn na jaanɩ pɛɛra yalʋ ba vu tɩn nan yɩ bɩdwɩ mʋ. Ba dɩdʋa dɩdʋa pɛɛra yam dɛɛn yɩ:

Səbu-poŋo zʋŋ-tanlaŋa dɩdʋa, ka duuni na yɩ sɛkɛlɩ bi dɩ fiintɔ (130) tɩn.

Səbu-poŋo war-zʋŋa dɩdʋa, ka dɩ duuni na yɩ sɛkɛlɩ fusɩrpɛ (70) tɩn.

(Səbu-poŋo wǝǝnu tɩm kʋntʋ duuni dɛɛn tɔgɩ digə kam maŋɩm cɩga cɩga na yɩ te tɩn mʋ.)

Zwɩ sɩm kʋntʋ maama su dɩdaanɩ mun-bwe dɩlʋ na viiri dɩ nugə sɩ ba ma ba kɩ wʋdiu pɛɛrɩ kaanɩm dɩm tɩn mʋ.

Səbu-sɩŋa zʋŋa kadoŋ, ka duuni na yɩ sɛkɛlɩ fugə yɩ ka su dɩ wǝǝnu tɩlʋ lwǝm na ywǝmmǝ tɩn.

Na-bala dɩdʋa, dɩ pi-bɩa dɩdʋa, dɩ pi-bala na yɩ bɩnɩ tɩn, sɩ ba kwe-tɩ ba ma ba kɩ zwɛɛm pɛɛrɩ kaanɩm.

Bʋ-bala dɩdʋa sɩ ba ma ba kɩ lwarɩm saarɩm kaanɩm.

Nabɛ sɩle, dɩ pi-bɛ sɩnu, dɩ bʋ-bwallʋ tɩnu, dɩ pi-balɩ sɩnu na yɩ bɩnɩ tɩn sɩ ba ma ba kɩ yazurə kaanɩm.

84-88 Yigǝ tiinǝ bam na jaanɩ pɛɛra yalʋ sɩ ba ma kwɛ kaanɩm bimbim dɩm ba pa Wɛ tɩn na kɩ daanɩ, ya maama yɩ tɩntʋ mʋ:

Səbu-poŋo zʋŋ-tanlɛ fugə-sɩle, dɩdaanɩ səbu-poŋo war-zwɩ fugə-sɩle, sɩ maama duuni na yɩ sɛkɛlɩ mʋrrʋ tɩle dɩ biə-yana (2,400) tɩn, sɩ kʋ tɔgɩ jero-vwe dɩm maŋɩm cɩga cɩga na yɩ te tɩn.

Səbu-sɩŋa zwɩ fugə-sɩle, sɩ maama duuni na yɩ sɛkɛlɩ bi dɩ fiinle (120) tɩn, sɩ kʋ tɔgɩ jero-vwe dɩm maŋɩm cɩga cɩga na yɩ te tɩn. Zwɩ sɩm maama dɛɛn su dɩdaanɩ wǝǝnu tɩlʋ lwǝm na ywǝmmǝ tɩn mʋ.

Na-balɩ fugə-sɩle, dɩ pi-bɛ fugə-sɩle, dɩ pi-balɩ fugə-sɩle sɩ dɩdʋa dɩdʋa na yɩ bɩnɩ bɩnɩ tɩn, dɩdaanɩ wʋdiu pɛɛra sɩ ya tɔgɩ ya wǝli da sɩ ba kwe tɩ maama ba ma ba kɩ zwɛɛm pɛɛra kaanɩm.

Bʋ-balɩ fugə-sɩle sɩ ba kwe-sɩ ba ma kɩ lwarɩm saarɩm kaanɩm.

Na-bɛ fiinle-sɩna, dɩ pi-bɛ fusɩrdʋ, dɩ bʋ-bwallʋ fusɩrdʋ, dɩ pi-balɩ fusɩrdʋ sɩ na yɩ bɩnɩ dɩdʋa dɩdʋa tɩn, sɩ ba ma ba kɩ yazurə kaanɩm.

89 Moyisi dɛɛn na yǝni o zʋ jero-vwe dɩm wʋnɩ sɩ o ŋɔɔnɩ dɩ Baŋa-Wɛ, o yǝni o ni Wɛ kwǝrǝ kam mʋ na ŋɔɔnɩ ka nuŋi Wɛ ni-gonim daka kam jazɩm baŋa seeni. Kʋ dɛɛn yɩ Serubɛn sɩle sɩm na zɩgɩ daka kam nipugu kʋm baŋa nɩ tɩn tɩtarɩ nɩ mʋ Baŋa-Wɛ yǝni DƖ ŋɔɔnɩ dɩ Moyisi.