Naziri tu na wʋ́ taa kɩ te tɩn
6
Baŋa-Wɛ daa ma ta dɩ Moyisi DƖ wɩ:2 «Ta dɩ Yisɩrayɛlɩ tiinə bam wɩ: Abam baarʋ wʋlʋ maama naa kaanɩ na goni ni sɩ o taa yɩ Naziri tu yɩ o pɔɔrɩ o tɩtɩ o kɩ Baŋa-Wɛ jɩŋa nɩ, 3 kʋ tu nan taa ye kʋ ni nɩ sɩ o daa yɩ nyɔ sana dwi dwi. Kʋ na yɩ sa-dɛɛra, naa sa-nywana, naa vinyə tiu nyʋa, sɩ o yɩ zaŋɩ o nyɔ! O ta yɩ di vinyə tiu biə, ba na maŋɩ ba kʋ dɩ. 4 Kʋ tu ta na pɔɔrɩ o tɩtɩ sɩ o taa yɩ Naziri tu, o yɩ di kʋlʋkʋlʋ na nuŋi vinyə tweeru yɩra nɩ. O nan yɩ di dɩ wo-dwə bam, naa o lɔɔrɩ dɩ wo-biə pʋrʋ o dʋnɩ.
5 Maŋa kalʋ maama o ta na pɔɔrɩ o tɩtɩ o ni-gonim dɩm ŋwaanɩ tɩn, o ba maŋɩ sɩ o fanɩ o yuuywe sɩm o yagɩ. O nan yagɩ-sɩ sɩ sɩ taa dwara, sɩ kʋ brɩ nɩ o pɔɔrɩ o tɩtɩ o pa Baŋa-Wɛ sɩ o taa yɩ lanyɩranɩ fasɩ mʋ.a 6 Da yam kʋntʋ nɩ o ta ba maŋɩ sɩ o yi tʋʋ yɩra, o na kwe o tɩtɩ o kɩ Baŋa-Wɛ jɩŋa nɩ tɩn ŋwaanɩ. 7 Kʋ na maŋɩ kʋ yɩ o ko, naa o nu, naa o nyaanɩ, naa o zɩmbaarʋ, naa o nakɔ mʋ na tɩga, sɩ o yɩ yi tʋʋ wʋm yɩra. Kʋ daɩ sɩ o cɔgɩ o ni-gonim dɩm, o yuuywe sɩm na brɩ nɩ o pɔɔrɩ o tɩtɩ o pa Wɛ tɩn ŋwaanɩ. 8 Maŋa kam maama wʋnɩ o na pɔɔrɩ o tɩtɩ kʋntʋ tɩn, o pɔɔrɩ o yɩ o yɩra mʋ Baŋa-Wɛ ŋwaanɩ.
9 Nɔɔnʋ nan na da o tɩ Naziri tu jɩŋa nɩ mʋ, kʋ brɩ nɩ o ni-gonim dɩm mʋ cɔgɩ, pa o yuuywe sɩm daa ba jɩgɩ kuri. Kʋ tu maŋɩ sɩ o cəgi da yarpɛ wɛɛnɩ mʋ, sɩ o kwɛ o tɩtɩ dɩ cullu tɩm, yɩ o fanɩ o yuuywe sɩm. 10 Tɩga na wʋ́ pʋʋrɩ sɩ kʋ taa yɩ da nana dɛ tɩn, sɩ o ja kunkwənə bale, naa kunkwən-puli sɩle o vu jero-vwe dɩm nɩ o pa kaanɩm tu wʋm. 11 Kaanɩm tu wʋm wʋ́ kwe kunkwənə bam dɩdʋa o ma o kɩ lwarɩm saarɩm kaanɩm nɔɔnʋ wʋm ŋwaanɩ, yɩ o daarɩ o kwe kadoŋ kam o ma o kɩ zwɛɛm pɛɛrɩ kaanɩm. Naziri tu wʋm na tusi dɩ o na yi tʋʋ yɩra tɩn ŋwaanɩ, kaanɩm dɩm wʋ́ lɩ o tusim dɩm Wɛ yigə nɩ. Dɛ dɩm kʋntʋ nɩ mʋ baá joori ba kwɛ o yuu kʋm Wɛ ŋwaanɩ. 12 Naziri tu wʋm nan maŋɩ sɩ o daa joori o pɔɔrɩ o tɩtɩ mʋ o kɩ Baŋa-Wɛ jɩŋa nɩ. O na maŋɩ o pɔɔrɩ o tɩtɩ da yalʋ wʋnɩ tɩn daa ba jɩgɩ kuri, tʋʋ wʋm na pɛ o cɔgɩ o tɩtɩ dɩ cullu tɩm tɩn ŋwaanɩ. O maa wʋ́ kwe pi-bala na yɩ bɩnɩ tɩn, sɩ ba ma ba kɩ lwarɩm jɩnɩ kaanɩm ba pa‑o.
13 Nɔɔnʋ na goni ni o ma o pɔɔrɩ o tɩtɩ sɩ o taa yɩ Naziri tu, yɩ o ni-gonim maŋa kam na ti, sɩ o kɩ tɩntʋ doŋ: Baá ja kʋntʋ tu ba vu ba zɩgɩ jero-vwe dɩm ni nɩ. 14 O laan wʋ́ ja vara batɔ na ba jɩgɩ gɛɛrɩ ba yɩra nɩ tɩn mʋ o ba o kɩ kaanɩm o pa Baŋa-Wɛ. Oó taa jɩgɩ pi-bala na yɩ bɩnɩ tɩn, sɩ o ma o kɩ zwɛɛm pɛɛrɩ kaanɩm. O ta wʋ́ taa jɩgɩ pi-cwɛn na yɩ bɩnɩ tɩn, sɩ o ma o kɩ lwarɩm saarɩm kaanɩm, yɩ o daarɩ o taa jɩgɩ pi-bɩa sɩ o ma-ka o kɩ yazurə pɛɛrɩ kaanɩm. 15 O nan ta wʋ́ taa jɩgɩ tɩtɔgɔ dɩ dɩpwa dwi dwi tɩlʋ dabɩlɩ na wʋ wǝli tɩ wʋnɩ tɩn. Baá kwe mun-bwe ba viiri dɩ nugə ba ma kɩ dɩpwa tɩdonnǝ, yɩ ba daarɩ ba kɩ dɩpwa-mɩmɩna yalʋ na taagɩ dɩ nugə tɩn. Kʋ tu ta wʋ́ kwe wʋdiu pɛɛra dɩ wo-nyɔɔrʋ pɛɛra o wǝli da.
16 Kaanɩm tu wʋm laan maa wʋ́ joŋi wǝǝnu tɩm kʋntʋ maama o ba o kɩ kaanɩm o pa Baŋa-Wɛ. Oó kɩ lwarɩm saarɩm kaanɩm sɩ o daarɩ o kɩ zwɛɛm kaanɩm dɩm. 17 O maa wʋ́ kwe pi-bɩa kam, o wǝli dɩ tɩtɔgɔ kʋm wʋ dɩpwa yam o kɩ Wɛ jɩŋa nɩ, sɩ o ma o kɩ yazurə pɛɛrɩ kaanɩm dɩm. O ta wʋ́ kwe wʋdiu pɛɛra yam dɩdaanɩ wo-nyɔɔrʋ pɛɛra yam o wǝli da o kɩ kaanɩm o pa Baŋa-Wɛ.
18 Kʋ kwaga nɩ Naziri tu wʋm wʋ́ zɩgɩ jero-vwe dɩm ni nɩ mʋ o fanɩ o yuu. O maa wʋ́ kwe o yuuywe sɩm na brɩ nɩ o pɔɔrɩ o tɩtɩ Wɛ ŋwaanɩ tɩn o dʋlɩ o dɩ mim dɩlʋ na wʋra dɩ zwɛ yazurə pɛɛrɩ dɩm ŋwaanɩ tɩn wʋnɩ.
19 O na fanɩ o yuu o ti tɩn, kaanɩm tu wʋm wʋ́ kwe pi-bɩa kam vɔŋɔ kʋlʋ na saŋɩ kʋ bɩ tɩn, dɩdaanɩ dɩpwa dwiə yale na wʋ tɩtɔgɔ kʋm wʋnɩ tɩn dɩdʋa dɩdʋa o kɩ kʋ tu jɩŋa nɩ. 20 Kaanɩm tu wʋm maa wʋ́ joori o joŋi-tɩ, yɩ o zəŋi-tɩ wɛɛnɩ o pa Baŋa-Wɛ. Wǝǝnu tɩm kʋntʋ yɩ Wɛ kaanɩm tu wʋm nyɩm mʋ sɩ tɩ wǝli dɩ varɩm wʋm nyɔɔnɩ dɩlʋ o na zǝŋi wɛɛnɩ tɩn dɩ cwe dɩlʋ o na kɩ Wɛ jɩŋa nɩ tɩn. Kʋntʋ na kɩ kʋ ti, nɔɔnʋ wʋm laan jɩgɩ cwǝŋǝ sɩ o nyɔ sana.
21 Naziri tu na goni ni sɩ o pɔɔrɩ o tɩtɩ Baŋa-Wɛ ŋwaanɩ, kʋ tu maŋɩ sɩ o tɔgɩ niə yam kʋntʋ mʋ. O jɩŋa nan na gara, oó wanɩ o kɩ o dwǝni kʋntʋ. Sɩ o nan maŋɩ sɩ o kɩ sɩ kʋ maŋɩ dɩ o na goni ni sɩ o kɩ kʋlʋ maama tɩn.»
Wɛ kaanɩm tu na wʋ́ kɩ nɔɔna bam yu-yoŋo te tɩn
22 Baŋa-Wɛ daa ma ta dɩ Moyisi DƖ wɩ: 23 «Ta n brɩ Arɔn dɩ o biə bam ba na wʋ́ ma bɩtarɩ sɩlʋ ba na loori Wɛ sɩ DƖ kɩ Yisɩrayɛlɩ tiinə bam yu-yoŋo tɩn. Baá taa tɛ nɩ:
24 ‹Baŋa-Wɛ wʋ́ kɩ abam yu-yoŋo,
sɩ DƖ daarɩ DƖ taa nii abam baŋa nɩ.
25 Baŋa-Wɛ yibiyə wʋ́ jeeri abam seeni,
sɩ DƖ daarɩ DƖ kɩ zaanɩ abam yuu nɩ.b
26 Baŋa-Wɛ wʋ́ pa DƖ yigə taa wʋ á wʋnɩ,
sɩ á taá jɩgɩ yazurə.›
27 Kʋntʋ tɩn, baá ma amʋ yɩrɩ ba ma sɔɔlɩ lanyɩranɩ ba kɩ Yisɩrayɛlɩ tiinə bam yuu nɩ. Amʋ maa wʋ́ sɩɩnɩ a kɩ ba yu-yoŋo.»