Wɛ cullu tɩm digiru taanɩ
5
Baŋa-Wɛ dɛɛn tagɩ dɩ Moyisi DƖ wɩ: 2 «Wʋlʋ maama na jɩgɩ yawɩ-cɛɔ na waɩ kʋ loŋi nɔɔna tɩn o yɩra nɩ, naa wʋlʋ yɩra na mʋ na nuŋi, naa wʋlʋ na dwe tʋʋ pa o wʋ maŋɩ dɩ cullu tɩm, sɩ n pa Yisɩrayɛlɩ tiinə bam ni sɩ ba lɩ kʋntʋ tu á na zʋʋrɩ je sɩlʋ nɩ tɩn. 3 Kʋ na yɩ kaanɩ naa baarʋ mʋ dɩ, sɩ á pa wʋlʋ maama na jɩgɩ digiru Wɛ cullu tɩm seeni tɩn nuŋi o vu dáa, sɩ kʋ tu yɩ cɔgɩ je sɩlʋ á na zʋʋrɩ yɩ amʋ wʋ á tɩtarɩ nɩ tɩn.» 4 Yisɩrayɛlɩ tiinə bam ma sɛ Baŋa-Wɛ ni dɩm kʋntʋ yɩ ba pa ba maama nuŋi ba vu dáa.Nɔɔnʋ na cɔgɩ o doŋ yigə, ba na wʋ́ kɩ te tɩn
5 Baŋa-Wɛ daa ma ta dɩ Moyisi DƖ wɩ:
6 «Ta n brɩ Yisɩrayɛlɩ tiinə bam nɩ: Baarʋ naa kaanɩ wʋlʋ maama na ywəri Baŋa-Wɛ kwaga nɩ yɩ o kɩ o cɔgɩ o doŋ yigə, kʋntʋ tu tusim dɩm wʋ o yuu nɩ mʋ. 7 Wʋlʋ na cɔgɩ tɩn mʋ maŋɩ sɩ o culi o tusim dɩm jaja, sɩ o daarɩ o ŋwɩ o na jaanɩ kʋlʋ o cɔgɩ tɩn maama ni o joori o pa nɔɔnʋ wʋm. O ta wʋ́ jeeli səbu kʋm pʋpwara dɩdʋa sɩnu maama wʋnɩ o wǝli da o pa‑o. 8 Nɔɔnʋ wʋm nan na tɩga yɩ o wʋ daarɩ o yɩra nɔɔnʋ sɩ kʋ tu joŋi tusim jɩnɩ dɩm səbu kʋm kʋntʋ, sɩ á pa kʋ taa yɩ Baŋa-Wɛ nyɩm. Wʋlʋ na tusi tɩn wʋ́ ŋwɩ-kʋ o pa kaanɩm tu wʋm mʋ. O ta wʋ́ ja pi-bɩa o wǝli da o vu, sɩ kaanɩm tu wʋm kwe-ka o kɩ kaanɩm sɩ o lɩ kʋntʋ tu tusim dɩm Wɛ yigə nɩ o yagɩ. 9 Pɛɛra yalʋ maama Yisɩrayɛlɩ tiinə bam na yǝni ba jaanɩ ba tui jero-vwe dɩm nɩ sɩ ba ma zuli Baŋa-Wɛ tɩn wʋ́ taa yɩ kaanɩm tu wʋlʋ na joŋi-ya tɩn nyɩm mʋ. 10 Nɔɔnʋ maama waɩ o kuri pɛɛra yalʋ o na wʋ́ pa Wɛ tɩn. Kaanɩm tu maama nan wʋ́ taa te pɛɛra yalʋ ba na kwe ba pa‑o tɩn mʋ.»
Baara dɩ kaana tɩtarɩ laŋa taanɩ
11 Baŋa-Wɛ ta ma ta dɩ Moyisi DƖ wɩ:
12-13 «Nan ta dɩ Yisɩrayɛlɩ tiinə bam nɩ: Nɔɔnʋ na jɩgɩ kaanɩ, o kaanɩ wʋm kʋntʋ waɩ o cɔgɩ o tɩtɩ dɩ baarʋ wʋdoŋ. Kǝm dɩm kʋntʋ na səgi kan-barʋ wʋm yigə nɩ, yɩ nɔɔn-nɔɔnʋ na tǝrǝ o na nɛ-dɩ, 14 yɩ o barʋ wʋm wʋʋ na gʋɩ dɩ nyɩm dɩm, yɩ o jɩgɩ bʋbwɛa dɩ o kaanɩ wʋm, nɩ o gaa zɩgɩ o digimi o tɩtɩ, na o wʋ digimia, 15 Kʋ na kɩ kʋntʋ doŋ, baarʋ wʋm wʋ́ ja o kaanɩ wʋm mʋ o vu o yi kaanɩm tu wʋm te. O ta wʋ́ kwe caarab muni bwɛn sɩlec o wʋ-gʋrʋ tɩm ŋwaanɩ, sɩ pɛɛrɩ dɩm kʋntʋ pa cɩga kam nuŋi pooni nɩ. O nan yɩ lo nugə muni dɩm wʋnɩ o viiri, naa o daŋɩ wǝǝnu tɩlʋ lwǝm na ywǝmmǝ tɩn dɩ baŋa nɩ. Bɛŋwaanɩ, muni dɩm yɩ pɛɛrɩ dɩlʋ baarʋ wʋm na jaanɩ o ba o wʋbʋŋa daanɩm ŋwaanɩ tɩn mʋ, sɩ kʋ pa o kaanɩ wʋm tusim ba dɩ lwarɩ jaja.
16 Kaanɩm tu wʋm maa wʋ́ pa kaanɩ wʋm ba o zɩgɩ Baŋa-Wɛ yigə nɩ. 17 O ta maa wʋ́ mɔ na balʋ na yɩ lanyɩranɩ fasɩ tɩn o lo o kɩ dɔgɔ kambiə wʋnɩ. O ta wʋ́ pɛ jero-vwe dɩm tɩga kasʋlʋ yɩ o daarɩ o yuŋi o viiri na bam wʋnɩ. 18 Kaanɩm tu wʋm wʋ́ pa kaanɩ wʋm zɩgɩ da, yɩ o daarɩ o bwǝli kaanɩ wʋm yukwala. O maa wʋ́ kɩ muni pɛɛrɩ dɩm kʋntʋ kaanɩ wʋm jɩŋa nɩ. Kaanɩm tu wʋm tɩtɩ maa wʋ́ taa ze na-cɛɛra bam na lagɩ ba ja waarɩm ba ba tʋ o jɩŋa nɩ. 19 O laan maa wʋ́ pa kaanɩ wʋm pooli o ni yɩ o ta wɩ: ‹Nmʋ na wʋ cɔgɩ n tɩtɩ dɩ baarʋ wʋdoŋ, Wɛ wʋ́ pa kampwəl-balwara kalʋ na tɔgɩ dɩ na bantʋ tɩn yɩ kɩ-m kʋlʋkʋlʋ. 20 Kʋ daarɩ, nmʋ na zʋʋrɩ dɩ n barʋ tɩn, n na sɩɩnɩ n nuŋi o kwaga nɩ mʋ n vu n cɔgɩ n tɩtɩ dɩ baarʋ wʋdoŋ, 21-22 Baŋa-Wɛ wʋ́ pa kampwəl-balwarɩ taa tɔgɩ-m n dwi tiinə bam wʋnɩ, sɩ n dwi tiinə dɩ sɔɔlɩ lwarɩm ba yagɩ n yɩra nɩ. Wɛ wʋ́ pa, na bantʋ na zʋ n wʋʋ, sɩ n yigə kam vɔ daanɩ, sɩ n pugə kam dɩ fʋlɩ.›
Kaanɩm tu wʋm na pɛ kaanɩ wʋm du durə kampwələ kam ŋwaanɩ, kaanɩ wʋm dɩ maa wʋ́ ləri nɩ: ‹Amina. Amʋ sɛ sɩ kʋ kɩ kʋntʋ.›
23 Kaanɩm tu wʋm laan wʋ́ pʋpʋnɩ kampwəl-balwarɩ sɩm sɩntʋ o kɩ tɔnɔ wʋnɩ. O maa wʋ́ seeri pʋpʋnɩm dɩm o yagɩ na-cɛɛra bam wʋnɩ, 24 sɩ o laan kwe tɩ maama o pa kaanɩ wʋm sɩ o nyɔ. Kʋ ma brɩ nɩ kampwəl-balwara kalʋ na tɔgɩ dɩ na bantʋ tɩn zʋ o wʋnɩ, sɩ kʋ wanɩ kʋ kɩ-o zʋnnɩ. 25 Kaanɩm tu wʋm ta wʋ́ joŋi muni pɛɛrɩ dɩlʋ na wʋra wʋ-gʋrʋ ŋwaanɩ tɩn kaanɩ wʋm jɩŋa nɩ, sɩ o zəŋi-dɩ wɛɛnɩ o pa Baŋa-Wɛ. O laan maa wʋ́ kwe-dɩ o ja vu o twɛ kaanɩm bimbim dɩm. 26 Oó zwɛ muni pɛɛrɩ dɩm wʋnɩ o kɩ o ja-bɔŋɔ nɩ. O laan maa wʋ́ zwɛ pɛɛrɩ dɩm pʋpwara kantʋ kaanɩm bimbim dɩm baŋa nɩ sɩ kʋ taa yɩ gulim pɛɛrɩ kʋ pa Wɛ. Kʋ kwaga nɩ, oó pa kaanɩ wʋm nyɔ na-cɛɛra bam. 27 Kaanɩ wʋm na sɩɩnɩ o cɔgɩ o dɩ o barʋ wʋm laŋa nɩ, yɩ na bam na zʋ o wʋ, baá tiini ba kɩ-o zʋnnɩ mʋ, pa kʋ taa jɩg-o kʋ ni. O yigə kam wʋ́ vɔ daanɩ, sɩ o pugə kam dɩ fʋlɩ. Kampwəl-balwara wʋ́ sɩɩnɩ ka jəni kaanɩ wʋm kʋntʋ yuu nɩ mʋ, o dwi tiinə tɩtarɩ nɩ. 28 O nan na wʋ kɩ o cɔgɩ yɩ o ba jɩgɩ digiru Wɛ cullu tɩm seeni, kʋlʋkʋlʋ bá kɩ-o. Cwǝŋǝ ta wʋ́ taa wʋra sɩ o lʋ biə.
29 Á maŋɩ sɩ á tɔgɩ cwǝŋǝ kam kʋntʋ, nɩnɛɛnɩ baarʋ na jɩgɩ o kaanɩ yɩ o wʋbʋŋa na daanɩ‑o o kaanɩ wʋm ŋwaanɩ. Kaanɩ wʋm na sɩɩnɩ o tusi mʋ, 30 naa o barʋ wʋm wʋbʋŋa na jɩg-o ya daana kʋntʋ doŋ, yɩ o yǝri cɩga kam o tiə, á wʋ́ kɩ kʋntʋ mʋ. Kaanɩm tu wʋm wʋ́ pa kaanɩ wʋm ba o zɩgɩ Baŋa-Wɛ yigə nɩ sɩ o daarɩ o kɩ cullu tɩm kʋntʋ maama o yɩra nɩ. 31 Kʋ na tu nɩ kan-barʋ wʋm mʋ ba jɩgɩ cɩga, sɩ o kaanɩ wʋm wʋ tʋlɩ, ba ba maŋɩ sɩ ba waarɩ baarʋ wʋm kʋ ŋwaanɩ. Kaanɩ wʋm nan na sɩɩnɩ o tʋlɩ mʋ, ba maŋɩ sɩ ba waar‑o mʋ o tusim dɩm ŋwaanɩ.»