Keyatɩ tiinə bam taanɩ
4
Baŋa-Wɛ dɛɛn tagɩ dɩ Moyisi DƖ wɩ:2 «Pɔɔrɩ Keyatɩ tiinə bam Levi dwi tiinə badaara bam wʋnɩ sɩ n jeeli ba ni, sɔ-yuu dɩ sɔ-yuu, digə dɩ digə. 3 Kʋ na yɩ baara balʋ na jɩgɩ bɩna fiintɔ sɩ kʋ taa ve bɩna fiinnu yɩ ba yi sɩ ba tʋŋɩ Baŋa-Wɛ jero-vwe dɩm tɩtʋŋa tɩn, sɩ n pʋpʋnɩ bantʋ yɩra n tiŋi. 4 Keyatɩ tiinə bam tɩtʋŋa yam kʋntʋ yɩ sɩ ba taa nii wǝǝnu tɩlʋ na tiini tɩ yɩ lanyɩranɩ fasɩ tɩn baŋa nɩ mʋ.
5 Kʋ na yǝni kʋ yi sɩ á gɔ á vwə yam sɩ á vu jǝgǝ kadoŋ, Arɔn dɩ o biə bam mʋ wʋ́ zʋ jero-vwe dɩm wʋnɩ ba parɩ gar-jalɩ dɩlʋ na cɩgɩ Wɛ-di-laa cɩga cɩga kam tɩn, sɩ ba ma-dɩ ba kwǝli Wɛ ni-gonim daka kam. 6 Ba laan wʋ́ kwe dofɛn twaanʋ ba kwǝli-ka, sɩ ba daarɩ ba kwe garyi dɩlʋ nyɩnyʋgʋ na yɩ nazon-pupwiə tɩn ba ma ba pu-ka. Kʋ kwaga nɩ, sɩ ba laan tʋrɩ bimbim dɩm zɩŋɩm dɛ sɩm ka yɩra nɩ.
7 Kʋ maa na yɩ taabʋlʋ kʋlʋ baŋa nɩ ba na yǝni ba kɩ dɩpwa yalʋ na tigi da Wɛ ŋwaanɩ tɩn, ba ta wʋ́ kwe garyi dɩlʋ nyɩnyʋgʋ na yɩ nazon-pupwiə tɩn mʋ ba kwǝli-kʋ. Ba laan maa wʋ́ kwe zʋŋ-tanlɛ sɩm, dɩ wǝǝnu tɩlʋ lwǝm na ywǝmmǝ tɩn zwɩ sɩm, dɩ kabǝli sɩm, dɩ sana pɛɛra kikərə sɩm, ba zɩgɩ kʋ baŋa nɩ. Dɩpwa yam maŋɩ sɩ ya yǝni ya taa wʋ taabʋlʋ kʋm baŋa nɩ mʋ maŋa maama. 8 Ba na tigisi wǝǝnu tɩntʋ maama taabʋlʋ kʋm baŋa nɩ ba ti, sɩ ba kwe garyi nasʋŋʋ cwɛ-cwɛ ba lwarɩ ba pu-tɩ, sɩ ba daarɩ ba ma dofɛn twaanʋ ba kwǝli tɩ maama. Kʋ kwaga nɩ sɩ ba laan tʋrɩ taabʋlʋ kʋm zɩŋɩm dɛ sɩm kʋ yɩra nɩ.
9 Ba ta wʋ́ kwe garyi dɩlʋ nyɩnyʋgʋ na yɩ nazon-pupwiə tɩn ba ma kwǝli min-zwǝn-zɩgʋ kʋm, dɩ kʋ min-zwǝǝnu tɩm, dɩ wǝǝnu tɩlʋ na fɔgɩ tɩ kwɛ mim dɩm tɩn, dɩ tɩntwarɩm zʋŋ-tanlɛ sɩm, dɩdaanɩ nugə kabɔɔrʋ tɩm maama. 10 Ba maŋɩ sɩ ba kukuli-kʋ mʋ, dɩ kʋ yɩra zɩla yam maama, dofɛn twaanʋ wʋnɩ, sɩ ba laan kwe-kʋ ba daŋɩ kʋ zɩŋɩm dɛ sɩm baŋa nɩ.
11 Ba daa ta wʋ́ kwe garyi dɩlʋ nyɩnyʋgʋ na yɩ nazon-pupwiə tɩn mʋ ba ma kwǝli səbu-sɩŋa kaanɩm bimbim dɩm,a sɩ ba daarɩ ba kwe dofɛn twaanʋ ba ma pu-ka. Kʋ kwaga nɩ sɩ ba laan tʋrɩ bimbim dɩm zɩŋɩm dɛ sɩm ka yɩra nɩ.
12 Arɔn dɩ o biə bam ta wʋ́ kwalɩmɩ zɩla yalʋ maama ba na jɩgɩ ba tʋŋɩ jero-vwe dɩm wʋnɩ tɩn yɩ ba daarɩ ba kukuli-tɩ garyi dɩlʋ nyɩnyʋgʋ na yɩ nazon-pupwiə tɩn wʋnɩ. Ba laan maa wʋ́ kwe dofɛn twaanʋ ba ma ba pu tɩ ni, yɩ ba daarɩ ba kwe-tɩ ba daŋɩ zɩŋɩm dɛ sɩm baŋa nɩ. 13 Ba ta wʋ́ koori tɩntwarɩm dɩlʋ maama na wʋ zwɛɛm kaanɩm bimbim dɩm wʋnɩ tɩn mʋ ba yagɩ, sɩ ba daarɩ ba kwe garyi na yɩ nasʋŋ-pupwiu tɩn ba ma kwǝli-dɩ. 14 Ba nan ta wʋ́ kwe zɩla yalʋ ba na jɩgɩ ba tʋŋɩ kaanɩm bimbim dɩm tɩtʋŋa tɩn mʋ ba tiŋi garyi dɩm kʋntʋ baŋa nɩ. Kʋ maa yɩ mim zʋŋ-tanlɛ sɩm, dɩ dɛ sɩlʋ ba na jɩgɩ ba cu ba lɩ nwana tɩn, dɩ sɛbʋllʋ tɩm, dɩdaanɩ na-zwɩ sɩm mʋ. Ba ta wʋ́ kwe dofɛn twaanʋ mʋ ba ma ba pu tɩ maama, yɩ ba laan tʋrɩ bimbim dɩm zɩŋɩm dɛ sɩm ka yɩra nɩ.
15 Abam na ti yigə sɩ á gɔ á vwə yam sɩ á vu jǝgǝ kadoŋ, sɩ Keyatɩ tiinə bam ba ba zɩŋɩ jero-vwe dɩm yɩra zɩla dɩ wǝǝnu tɩlʋ maama na wǝli ka tɩtʋŋa tɩn sɩ á kɛ. Kʋ nan maŋɩ sɩ Arɔn dɩ o biə mʋ da yigə ba kwǝli wǝǝnu tɩm kʋntʋ. Tɩ na tiini tɩ yɩ lanyɩranɩ fasɩ tɩ paɩ Wɛ tɩn ŋwaanɩ, Keyatɩ tiinə yɩ dwe-tɩ. Ba na dwe tɩ kʋlʋ, ba maŋɩ sɩ ba tɩ mʋ. Mʋ wǝǝnu tɩlʋ Keyatɩ sɔ-yuu tiinə bam na maŋɩ sɩ ba zɩŋɩ ba ja kɛ tɩn.
16 Kaanɩm tu Arɔn bu Eleyazaarɩ nan mʋ wʋ́ taa nii min-zwǝǝnu tɩm wʋʋ nugə kam, dɩ wǝǝnu tɩlʋ lwǝm na ywǝmmǝ tɩn tɩlʋ na wʋ́ zwɛ tɩnb, dɩ dɛ dɛ wʋdiu pɛɛra yam, dɩ Wɛ swəlim nugə kam baŋa nɩ. Wʋntʋ ta wʋ́ taa nii jero-vwe dɩm dɩdaanɩ dɩ yɩra zɩla yalʋ maama na pɔɔrɩ Baŋa-Wɛ zulə ŋwaanɩ tɩn baŋa nɩ.»
17 Baŋa-Wɛ ta ma ta dɩ Moyisi dɩ Arɔn DƖ wɩ:
18 «Yɩ pa-na sɩ Keyatɩ sɔ-yuni dwi dɩm ti Levi tiinə bam wʋnɩ. 19 Ba nan na lagɩ ba zɩŋɩ zɩla yalʋ na yɩ lanyɩranɩ fasɩ tɩn, ba na wʋ́ kɩ te sɩ ba yɩ tɩ tɩn mʋ tɩntʋ: Arɔn dɩ o biə bam mʋ wʋ́ zʋ jero-vwe dɩm wʋnɩ sɩ ba brɩ nɔɔnʋ maama o tɩtʋŋɩ dɩ woŋo kʋlʋ o na wʋ́ zɩŋɩ tɩn. 20 Keyatɩ tiinə bam tɩtɩ nan ba jɩgɩ cwǝŋǝ sɩ ba zʋ jero-vwe dɩm wʋnɩ ba taa kaagɩ ba nii dɩ yɩra zɩla yam, sɩ kʋ yɩ pa ba tɩ.»
Gɛrsɔnɩ tiinə bam taanɩ
21 Baŋa-Wɛ dɛɛn tagɩ dɩ Moyisi DƖ wɩ:
22 «Nan ta jeeli Gɛrsɔnɩ tiinə bam ni, sɔ-yuu dɩ sɔ-yuu, digə dɩ digə. 23 Kʋ na yɩ baara balʋ na jɩgɩ bɩna fiintɔ sɩ kʋ taa ve bɩna fiinnu yɩ ba yi sɩ ba tʋŋɩ Baŋa-Wɛ jero-vwe dɩm tɩtʋŋa tɩn, sɩ n pʋpʋnɩ bantʋ yɩra n tiŋi. 24 Gɛrsɔnɩ tiinə bam tɩtʋŋa yam dɩ zɩla yalʋ ba na wʋ́ zɩŋɩ tɩn mʋ tɩntʋ: 25 Baá taa zɩŋɩ jero-vwe dɩm tɩtɩ, dɩdaanɩ gar-jala yalʋ na kwǝli-dɩ tɩn, dɩ dofɛn twaanʋ tɩlʋ na daŋɩ da tɩn, dɩ gar-jalɩ dɩlʋ na lǝgi vwe dɩm ni nɩ tɩn, 26 dɩ gar-jala yalʋ na kwǝli digə kam kʋnkɔlɔ kʋm mɛ vwe dɩm tɩtɩ dɩ kaanɩm bimbim dɩm na wʋra tɩn maama, dɩ kʋnkɔlɔ kʋm ni gar-jalɩ dɩm, dɩdaanɩ gwaarʋ tɩm kʋntʋ ŋʋnɩ dɩ tɩ yɩra zɩla maama. Gɛrsɔnɩ tiinə bam mʋ wʋ́ taa tʋŋɩ wǝǝnu tɩm kʋntʋ maama tɩtʋŋa yam. 27 Arɔn dɩ o biə bam mʋ wʋ́ taa nii Gɛrsɔnɩ tiinə tɩtʋŋa yam baŋa nɩ. Á wʋ́ pa-ba ni sɩ ba lwarɩ woŋo dɩ woŋo kʋlʋ maama ba na wʋ́ zɩŋɩ tɩn. 28 Mʋ tɩtʋŋa yalʋ Gɛrsɔnɩ dwi tiinə bam na maŋɩ sɩ ba taa tʋŋa jero-vwe dɩm ŋwaanɩ tɩn. Kaanɩm tu Arɔn bu Itamarɩ nan mʋ wʋ́ taa nii-ba sɩ ba taa tʋŋɩ ba tɩtʋŋa yam.»
Merari tiinə bam taanɩ
29 «Ta jeeli Merari tiinə bam ni, sɔ-yuu dɩ sɔ-yuu, digə dɩ digə. 30 Kʋ na yɩ baara balʋ na jɩgɩ bɩna fiintɔ sɩ kʋ taa ve bɩna fiinnu yɩ ba yi sɩ ba tʋŋɩ Baŋa-Wɛ jero-vwe dɩm tɩtʋŋa tɩn, sɩ n pʋpʋnɩ bantʋ yɩra n tiŋi. 31 Merari tiinə bam na wʋ́ taa tʋŋɩ tɩtʋŋa yalʋ maama jero-vwe dɩm seeni tɩn mʋ yɩ sɩ ba zɩŋɩ wǝǝnu tɩntʋ tɩm: ywə yalʋ jero-vwe dɩm na lǝgi ya yɩra nɩ tɩn, dɩdaanɩ dɩ da-garɩ sɩm, dɩ dɩ da-dɛɛra yam, dɩ luuru tɩlʋ baŋa nɩ dɛ sɩm na zɩgɩ tɩn, 32 dɩ da-dɛɛra yalʋ na kaagɩ jero-vwe kʋnkɔlɔ kʋm tɩn, dɩ ya zɩgɩm wǝǝnu tɩm, dɩ paara yam maama, dɩ ŋʋnɩ sɩm, dɩ zɩla yalʋ maama na wʋra tɩtʋŋa yam kʋntʋ ŋwaanɩ tɩn. Á wʋ́ pa nɔɔnʋ maama ni sɩ o lwarɩ woŋo dɩ woŋo kʋlʋ o na wʋ́ zɩŋɩ tɩn. 33 Mʋ tɩtʋŋa yalʋ maama Merari dwi tiinə bam na maŋɩ sɩ ba taa tʋŋa jero-vwe dɩm ŋwaanɩ tɩn. Kaanɩm tu Arɔn bu Itamarɩ nan mʋ wʋ́ taa nii-ba sɩ ba taa tʋŋɩ ba tɩtʋŋa yam.»
Ba na jeeli Levi dwi tiinə bam ni te tɩn
34 Moyisi dɩ Arɔn, dɩdaanɩ Yisɩrayɛlɩ kɔgɔ kʋm nakwa bam ma sɩɩnɩ ba jeeli Keyatɩ tiinə bam ni, sɔ-yuu dɩ sɔ-yuu, digə dɩ digə. 35 Kʋ na yɩ baara balʋ na yi bɩna fiintɔ sɩ kʋ taa ve bɩna fiinnu, yɩ ba yi sɩ ba taa tʋŋɩ jero-vwe dɩm tɩtʋŋa tɩn, 36 ba na gagɩ-ba sɩ kʋ tɔgɩ dɩ ba sɔ-yuni tɩm tɩn, ba yɩ baara mʋrrʋ tɩle dɩ biə yarpɛ dɩ fiinnu (2,750) mʋ. 37 Keyatɩ sɔ-yuni tɩm baara balʋ maama na tʋŋɩ digə kam tɩtʋŋa, yɩ Moyisi dɩ Arɔn jeeli ba ni tɩn mʋ kʋntʋ. Ba dɛɛn jeeli-ba sɩ kʋ maŋɩ dɩ Baŋa-Wɛ na pɛ Moyisi ni sɩ o kɩ te tɩn mʋ.
38 Ba dɛɛn ma jeeli Gɛrsɔnɩ tiinə bam ni, sɔ-yuu dɩ sɔ-yuu, digə dɩ digə. 39 Kʋ na yɩ baara balʋ na yi bɩna fiintɔ sɩ kʋ taa ve bɩna fiinnu, yɩ ba yi sɩ ba taa tʋŋɩ jero-vwe dɩm tɩtʋŋa tɩn, 40 ba na gagɩ-ba sɩ kʋ tɔgɩ dɩ ba sɔ-yuni tɩm tɩn, ba yɩ baara mʋrrʋ tɩle dɩ biə-yardʋ dɩ fiintɔ (2,630) mʋ. 41 Gɛrsɔnɩ sɔ-yuni tɩm baara balʋ maama na tʋŋɩ jero-vwe dɩm tɩtʋŋa, yɩ Moyisi dɩ Arɔn jeeli ba ni tɩn mʋ kʋntʋ. Ba dɛɛn jeeli-ba sɩ kʋ maŋɩ dɩ Baŋa-Wɛ na pɛ Moyisi ni sɩ o kɩ te tɩn mʋ.
42 Ba dɛɛn ma jeeli Merari tiinə bam ni, sɔ-yuu dɩ sɔ-yuu, digə dɩ digə. 43 Kʋ na yɩ baara balʋ na yi bɩna fiintɔ sɩ kʋ taa ve bɩna fiinnu, yɩ ba yi sɩ ba taa tʋŋɩ jero-vwe dɩm tɩtʋŋa tɩn, 44 ba na gagɩ-ba sɩ kʋ tɔgɩ dɩ ba sɔ-yuni tɩm tɩn, ba yɩ baara mʋrrʋ tɩtɔ dɩ biə-yale (3,200) mʋ. 45 Merari sɔ-yuni tɩm baara balʋ maama na tʋŋɩ jero-vwe dɩm tɩtʋŋa, yɩ Moyisi dɩ Arɔn jeeli ba ni tɩn mʋ kʋntʋ. Ba dɛɛn jeeli-ba sɩ kʋ maŋɩ dɩ Baŋa-Wɛ na pɛ Moyisi ni sɩ o kɩ te tɩn mʋ.
46 Kʋ dɛɛn ma pa Moyisi dɩ Arɔn, dɩdaanɩ Yisɩrayɛlɩ nakwa bam jeeli Levi tiinə bam maama ni, sɔ-yuu dɩ sɔ-yuu, digə dɩ digə. 47 Kʋ na yɩ baara balʋ na yi bɩna fiintɔ sɩ kʋ taa ve bɩna fiinnu, yɩ ba yi sɩ ba taa tʋŋɩ jero-vwe dɩm tɩtʋŋa yɩ ba zɩŋɩ dɩ zɩla tɩn, 48 ba maama dɛɛn yɩ baara mʋrrʋ nana dɩ biə-yanu dɩ funɔnɔ (8,580) mʋ. 49 Ba dɛɛn jeeli-ba sɩ kʋ tɔgɩ dɩ Baŋa-Wɛ ni dɩm mʋ. Moyisi ma pa nɔɔnʋ maama lwarɩ o tɩtʋŋɩ dɩm dɩ woŋo kʋlʋ o na wʋ́ zɩŋɩ tɩn.
Kʋntʋ tɩn, ba dɛɛn jeeli Levi tiinə bam maama ni nɩnɛɛnɩ Baŋa-Wɛ na pɛ Moyisi ni sɩ o kɩ te tɩn mʋ.