Levi dwi dɩm taanɩ
3
Maŋa kam Baŋa-Wɛ dɛɛn na ŋɔɔnɩ dɩ Moyisi Sinayi piu kʋm yuu nɩ tɩn, Arɔn dɩ Moyisi digə kam tiinə mʋ tɩntʋ: 2 Arɔn dɛɛn jɩgɩ bu-baara bana mʋ. Nadabɩ mʋ yɩ o bəkər-kwɩa. Abiyu ma saŋɩ o kwaga, dɩ Eleyazaarɩ, dɩdaanɩ Itamarɩ. 3 Ba dɛɛn nan logi nugə Arɔn bu-baara bam kʋntʋ yuu nɩ mʋ ba lɩ-ba sɩ ba taa yɩ Wɛ kaanɩm tiinə yɩ ba tʋŋɩ ba pa‑DƖ. 4 Baŋa-Wɛ nan pɛ Nadabɩ dɩ Abiyu tɩ mʋ. Bɛŋwaanɩ, Sinayi kagʋa kam seeni mʋ bantʋ dɛɛn kwe min-yɔɔ ba zwɛ sɩ ba ma zuli Baŋa-Wɛ, yɩ DƖ wʋ pɛ cwǝŋǝ sɩ ba zwɛ mim dɩm kʋntʋ doŋ.a Ba maa ba jɩgɩ biə. Kʋntʋ ŋwaanɩ, Eleyazaarɩ dɩ Itamarɩ yɩranɩ dɛɛn mʋ tʋŋɩ Wɛ kaanɩm tiinə tɩtʋŋɩ yɩ ba ko Arɔn ta ŋwɩ.5 Baŋa-Wɛ ta ma ta dɩ Moyisi DƖ wɩ:
6 «Pa Levi dwi dɩm nuŋi ba zɩgɩ kaanɩm tu Arɔn yigə nɩ, sɩ ba taa tʋŋɩ ba zən‑o. 7 Bantʋ wʋ́ taa tʋŋɩ jero-vwe dɩm tɩtʋŋa mʋ ba paɩ Arɔn dɩ Yisɩrayɛlɩ tiinə kɔ-fɔrɔ kʋm maama. 8 Baá taa nii jero-vwe dɩm wʋ zɩla yam baŋa nɩ, yɩ ba daarɩ ba taa tʋŋɩ tɩtʋŋa yalʋ maama na maŋɩ dɩ jero-vwe dɩm tɩn ba paɩ Yisɩrayɛlɩ tiinə bam. 9 Pɔɔrɩ Levi tiinə bam sɩ ba taa tʋŋɩ ba wǝli Arɔn dɩ o biə bam. Lɩ-ba Yisɩrayɛlɩ dwi tiinə bam maama wʋnɩ sɩ ba yɔɔrɩ ba taa tʋŋɩ tɩtʋŋa yam kʋntʋ yɩranɩ. 10 Kʋ nan maŋɩ sɩ n tiŋi Arɔn dɩ o bu-baara bam mʋ sɩ ba taa yɩ amʋ kaanɩm tiinə. Nɔn-gaa na tiini o yi jero-vwe dɩm yɩra, sɩ ba gʋ kʋ tu.»
11 Baŋa-Wɛ daa ta ma ta dɩ Moyisi DƖ wɩ:
12 «Amʋ kuri Levi dwi tiinə bam mʋ sɩ ba taa yɩ amʋ nyɩm. A lɩ-ba Yisɩrayɛlɩ tiinə bam wʋnɩ sɩ ba ləri bəkər-kwɩn sɩlʋ maama abam na wʋ́ lʋ tɩn yuu nɩ mʋ. 13 Bɛŋwaanɩ, amʋ dɛɛn na gʋ Ezipi tiinə bəkər-kwɩn sɩm maama tɩn, a daarɩ Yisɩrayɛlɩ tiinə bəkər-kwɩn sɩm dɩ ba varɩ-kwɩn sɩm mʋ sɩ ba taa yɩ amʋ nyɩm. Levi tiinə bam mʋ maŋɩ sɩ ba ləri bəkər-kwɩn sɩm yuu nɩ ba ji amʋ nyɩm. Amʋ mʋ yɩ Baŋa-Wɛ dɩm.»
Ba jeeli Levi tiinə bam ni
14 Sinayi kagʋa kam nɩ mʋ Baŋa-Wɛ dɛɛn tagɩ dɩ Moyisi DƖ wɩ: 15 «Jeeli Levi dwi tiinə bam ni sɩ kʋ tɔgɩ dɩ ba sɔ-yuni tɩm, dɩ ba di sɩm. Nan jeeli ba baara balʋ na yi cana sɩ kʋ taa ve tɩn n pʋpʋnɩ ba yɩra n tiŋi.» 16 Moyisi ma sɩɩnɩ o kɩ te Baŋa-Wɛ na pɛ ni sɩ o kɩ tɩn.
17 Levi biə bam yɩra mʋ tɩntʋ:b
Gɛrsɔnɩ, dɩ Keyatɩ, dɩ Merari.
18 Gɛrsɔnɩ sɔ-yuni tɩm yɩ Libini dɩ Simeyi mʋ. 19 Keyatɩ sɔ-yuni tɩm maa yɩ Amiram, dɩ Yiseyarɩ, dɩ Ebrɔn, dɩ Uziyɛlɩ. 20 Merari sɔ-yuni tɩm dɩ maa yɩ Masili dɩ Musi.
Levi dwi tiinə sɔ-yuni tɩm mʋ kʋntʋ.
Gɛrsɔnɩ sɔ-yuu kʋm dɩ ba tɩtʋŋɩ dɩm
21 Libini dɩ Simeyi di sɩm dɛɛn nuŋi Gɛrsɔnɩ sɔ-yuu kʋm wʋnɩ mʋ. 22 Ba baara balʋ na yi cana sɩ kʋ taa ve yɩ ba jeeli ba ni tɩn dɛɛn yɩ mʋrrʋ tɩrpɛ dɩ biə-yanu (7,500). 23 Bantʋ sɔ-yuni tɩm dɛɛn mʋ maŋɩ sɩ ba yǝni ba cwi ba vwə jero-vwe dɩm kwaga nɩ, dɩ wa-zʋʋrɩ seeni. 24 Gɛrsɔnɩ sɔ-yuu kʋm yigə tu wʋm dɛɛn yɩ Layɛlɩ bu Eliasatɩ mʋ.
25 Kʋ dɛɛn yɩ Gɛrsɔnɩ sɔ-yuu tiinə tɩtʋŋɩ mʋ sɩ ba taa nii jero-vwe dɩm baŋa nɩ, dɩ gwaarʋ tɩlʋ na kwǝli-dɩ tɩn, dɩ gar-jalɩ dɩlʋ na lǝgi dɩ ni dɩm nɩ tɩn. 26 Ba ta wʋ́ taa nii gar-jala yalʋ na kwǝli jero-vwe dɩm kʋnkɔlɔ kʋm mɛ vwe dɩm tɩtɩ dɩ kaanɩm bimbim dɩm na wʋra tɩn, dɩ gar-jalɩ dɩlʋ na lǝgi kʋnkɔlɔ kʋm ni dɩm nɩ tɩn, dɩ ŋʋnɩ sɩlʋ ba na maɩ ba cwi jero-vwe dɩm tɩn. Ba ta maŋɩ sɩ ba taa nii wǝǝnu tɩm kʋntʋ tɩtʋŋa yam maama baŋa nɩ sɩ ya kɩ lanyɩranɩ.
Keyatɩ sɔ-yuu kʋm dɩ ba tɩtʋŋɩ dɩm
27 Amiram, dɩ Yiseyarɩ, dɩ Ebrɔn, dɩ Uziyɛlɩ di sɩm dɛɛn nuŋi Keyatɩ sɔ-yuu kʋm wʋnɩ mʋ. 28 Ba baara balʋ na yi cana sɩ kʋ taa ve tɩn dɛɛn yɩ mʋrrʋ nana dɩ biə-yardʋ (8,600) mʋ. Bantʋ tɩtʋŋɩ dɩm mʋ yɩ sɩ ba taa nii jero-vwe dɩm wʋʋ zɩla yam baŋa nɩ. 29 Ba sɔ-yuni tɩm dɛɛn mʋ maŋɩ sɩ ba yǝni ba cwi ba vwə yam jero-vwe dɩm jagwiə seeni. 30 Keyatɩ sɔ-yuu kʋm yigə tu wʋm dɛɛn yɩ Uziyɛlɩ bu Elizafan mʋ.
31 Kʋ dɛɛn yɩ Keyatɩ sɔ-yuu tiinə tɩtʋŋɩ mʋ sɩ ba taa nii Wɛ ni-gonim daka kam baŋa nɩ, dɩ taabʋlʋ kʋm, dɩ min-zwǝn-zɩgʋ kʋm, dɩ kaanɩm bimbinə yam, dɩdaanɩ zɩla yalʋ kaanɩm tiinə bam na yǝni ba kwe ba ma tʋŋɩ ba tɩtʋŋa tɩn, dɩ gar-jalɩ dɩlʋ na lǝgi dɩ cɩ Wɛ-di-laa cɩga cɩga kam tɩn, dɩdaanɩ wǝǝnu tɩm kʋntʋ maama tɩtʋŋa yam baŋa nɩ.c
32 Wɛ kaanɩm tu Arɔn bu Eleyazaarɩ dɛɛn mʋ yɩ Levi dwi dɩm yigǝ tiinǝ bam yuutu. Ba ma tiŋi wʋntʋ sɩ o taa nii balʋ maama na tʋŋɩ jero-vwe dɩm tɩtʋŋa yam tɩn baŋa nɩ.
Merari sɔ-yuu kʋm dɩ ba tɩtʋŋɩ dɩm
33 Masili dɩ Musi di sɩm dɛɛn nuŋi Merari sɔ-yuu kʋm wʋnɩ mʋ. 34 Ba baara balʋ na yi cana sɩ kʋ taa ve yɩ ba jeeli ba ni tɩn dɛɛn yɩ mʋrrʋ bardʋ dɩ biə-yale (6,200) mʋ. 35 Merari sɔ-yuu kʋm yigə tu wʋm dɛɛn yɩ Abihali bu Zureli mʋ. Bantʋ sɔ-yuni tɩm dɛɛn mʋ maŋɩ sɩ ba yǝni ba cwi ba vwə yam jero-vwe dɩm jazɩm baŋa seeni.
36 Kʋ dɛɛn nan yɩ Merari sɔ-yuu tiinə tɩtʋŋɩ mʋ sɩ ba taa nii ywə yalʋ na jaanɩ jero-vwe dɩm pa dɩ zɩgɩ tɩn, dɩdaanɩ da-garɩ sɩm, dɩ ywə yam, dɩ dɛ sɩm na zɩgɩ luuru tɩlʋ baŋa nɩ tɩn, dɩ sɩ zɩla yam maama baŋa nɩ. Ba ta maŋɩ sɩ ba taa nii wǝǝnu tɩm kʋntʋ tɩtʋŋa yam maama baŋa nɩ mʋ. 37 Kʋ ta yɩ Merari sɔ-yuu tiinə tɩtʋŋɩ mʋ sɩ ba taa nii jero-vwe dɩm kʋnkɔlɔ ywə yam, dɩ da-dɛɛra yam na zɩgɩ luuru tɩlʋ baŋa nɩ tɩn, dɩ paara yam, dɩdaanɩ ŋʋnɩ sɩm baŋa nɩ.d
38 Kʋ nan na yɩ Moyisi, dɩ Arɔn, dɩ Arɔn bu-baara bam, ba yǝni ba cwi ba vwə yam jero-vwe dɩm yigə nɩ mʋ, sɩ kʋ jeeri wa-puli seeni. Bantʋ mʋ lagɩ ba taa nii jero-vwe dɩm dɩ dɩ tɩtʋŋa yam baŋa nɩ ba paɩ Yisɩrayɛlɩ tiinə bam. Nɔn-gaa na tiini o yi jero-vwe dɩm yɩra, sɩ ba gʋ kʋ tu. 39 Levi dwi dɩm baara balʋ na yi cana yɩ Moyisi dɩ Arɔn jeeli ba ni sɔ-yuu dɩ sɔ-yuu, nɩ Baŋa-Wɛ na pɛ-ba ni sɩ ba kɩ te tɩn dɛɛn yɩ mʋrrʋ fiinle-tɩle (22,000) mʋ.
Levi tiinə dɩ bəkər-kwɩn sɩm jəlo kʋm
40 Baŋa-Wɛ daa ma ta dɩ Moyisi DƖ wɩ: «Jeeli Yisɩrayɛlɩ tiinə bəkər-kwɩn sɩlʋ maama na yi cana sɩ kʋ taa ve tɩn sɩ n pʋpʋnɩ ba yɩra n tiŋi. 41 Abam nan wʋ́ pa Levi dwi tiinə bam ləri á bəkər-kwɩn sɩm yuu nɩ ba ji amʋ nyɩm. Amʋ mʋ yɩ Baŋa-Wɛ dɩm! Levi tiinə vara bam dɩ wʋ́ ləri Yisɩrayɛlɩ tiinə maama varɩ-kwɩn sɩm yuu nɩ ba taa yɩ amʋ nyɩm.»
42 Moyisi ma sɩɩnɩ o jeeli Yisɩrayɛlɩ tiinə bəkər-kwɩn sɩm ni, nɩnɛɛnɩ Baŋa-Wɛ na pɛ‑o ni sɩ o kɩ te tɩn. 43 Bəkər-kwɩn sɩlʋ na yi cana sɩ kʋ taa ve yɩ ba pʋpʋnɩ ba yɩra tɩn dɛɛn maa yɩ mʋrrʋ fiinle-tɩle dɩ biə-yale dɩ fusɩrpɛ-batɔ (22,273).
44 Baŋa-Wɛ laan ma ta dɩ Moyisi DƖ wɩ:
45 «Laan pɔɔrɩ Levi tiinə bam sɩ bantʋ ləri Yisɩrayɛlɩ tiinə bəkər-kwɩn sɩm yuu nɩ ba ji amʋ nyɩm. Ta pɔɔrɩ Levi tiinə vara bam sɩ bantʋ dɩ ləri Yisɩrayɛlɩ tiinə bam maama varɩ-kwɩn sɩm yuu nɩ. Levi dwi tiinə bam wʋ́ taa yɩ amʋ nyɩm mʋ. Amʋ mʋ yɩ Baŋa-Wɛ dɩm. 46 Kʋ na yɩ te tɩn, Yisɩrayɛlɩ tiinə bəkər-kwɩn sɩm ni daga ba dwe Levi tiinə bam ni na maɩ te tɩn, dɩ nɔɔna 273. Abam maŋɩ sɩ á joori á yəgi nɔɔna bam kʋntʋ mʋ. 47 Á wʋ́ ŋwɩ sɛkɛlɩ səbu-dala yanu mʋ bu-kwɩan maama ŋwaanɩ. Səbu kʋm kʋntʋ duuni maŋɩ sɩ kʋ tɔgɩ jero-vwe dɩm maŋɩm na yɩ te tɩn mʋ. Sɛkɛlɩ dɩdʋa maa yɩ gɛra-dala kuni fiinle. 48 Á wʋ́ kwe səbu kʋm kʋntʋ á pa Arɔn dɩ o bu-baara bam, sɩ á ma á joori á yəgi bəkər-kwɩn sɩlʋ na dwe Levi tiinə bam ni na maɩ te tɩn.»
49 Moyisi ma sɛ yɩ o joŋi bəkər-kwɩn sɩm kʋntʋ yɩra səbu sɩ o joori o yəgi-ba. 50 Səbu kʋm maama dɛɛn yɩ sɛkɛlɩ səbu-dala mʋrʋ dɩdʋa dɩ biə-yatɔ dɩ fusɩrdʋ-yanu (1,365) mʋ. Kʋ duuni maa tɔgɩ jero-vwe dɩm maŋɩm na yɩ te tɩn. 51 Moyisi laan ma kwe-kʋ o pa Arɔn dɩ o bu-baara bam, nɩnɛɛnɩ Baŋa-Wɛ na pɛ ni sɩ o kɩ te tɩn.