Ba na cwi ba vwə yɩra yɩra te tɩn
2
Baŋa-Wɛ dɛɛn ta ma ta dɩ Moyisi dɩ Arɔn DƖ wɩ:2 «Yisɩrayɛlɩ tiinə bam maama maŋɩ sɩ ba cwi ba vwə yam mʋ dwi dɩ dwi na yɩ dáa dáa ba kaagɩ jero-vwe dɩm. Nɔɔnʋ maama maa wʋ́ taa jɩgɩ o kɔgɔ gwɛɛm yɩrɩ dɩ o sɔ-yuu kʋm yɩrɩ na gwɩɩrɩ ya brɩ jaja tɩn.
3-9 Kʋ na yɩ jero-vwe dɩm wa-puli seeni daa kam, dwiə yantʋ mʋ wʋ́ jǝni sɩ Zuda dwi dɩm taa wʋ ba yigə nɩ. Dwi maama wʋ́ jǝni dɩ ba yigə tu tɩntʋ doŋ mʋ:
| Dwi dɩm | Yigə tu wʋm | Baara bam ni |
| Zuda | Amɩnadabɩ bu Naasɔn | 74,600 |
| Yisakaarɩ | Zuwara bu Netaneli | 54,400 |
| Zabulɔn | Helon bu Eliabɩ | 57,400 |
| Ba maama: | 186,400 |
Zuda kɔgɔ kʋm mʋ wʋ́ tʋ Yisɩrayɛlɩ tiinə kɔ-fɔrɔ kʋm yigə nɩ sɩ ba taa veǝ.
10-16 Kʋ na yɩ jero-vwe dɩm jagwiə seeni daa kam, dwiə yantʋ mʋ wʋ́ jǝni sɩ Ruban dwi dɩm taa wʋ ba yigə nɩ. Dwi maama wʋ́ jǝni dɩ ba yigə tu tɩntʋ doŋ mʋ:
| Dwi dɩm | Yigə tu wʋm | Baara bam ni |
| Ruban | Seduri bu Elizuri | 46,500 |
| Simeyon | Zurisadayi bu Selumeli | 59,300 |
| Gadɩ | Deweli bu Eliasatɩ | 45,650 |
| Ba maama: | 151,450 |
Ruban kɔgɔ kʋm kʋntʋ mʋ wʋ́ saŋɩ Zuda kɔgɔ kʋm sɩ Yisɩrayɛlɩ tiinə kɔ-fɔrɔ kʋm taa veǝ.
17 Levi tiinə bam nan mʋ wʋ́ zɩŋɩ jero-vwe dɩm ba taa veǝ kɔ-fɔrɔ kʋm tɩtarɩ laŋa nɩ. Kɔgɔ maama wʋ́ taa veǝ nɩnɛɛnɩ ba na yǝni ba cwi ba vwə yam je sɩlʋ nɩ tɩn mʋ, sɩ nɔɔnʋ maama taa ve dɩ o kɔgɔ kʋm gwɛɛm yɩrɩ na gwɩɩrɩ dɩ brɩ jaja tɩn.
18-24 Kʋ na yɩ jero-vwe dɩm wa-zʋʋrɩ seeni daa kam, dwiə yantʋ mʋ wʋ́ jǝni sɩ Efrayim dwi dɩm taa wʋ ba yigə nɩ. Dwi maama wʋ́ jǝni dɩ ba yigə tu tɩntʋ doŋ mʋ:
| Dwi dɩm | Yigə tu wʋm | Baara bam ni |
| Efrayim | Amiwudi bu Elisama | 40,500 |
| Manasɩ | Pedazura bu ɡamaleli | 32,200 |
| Bɛnzamɛn | Gidɩoni bu Abidan | 35,400 |
| Ba maama: | 108,100 |
Efrayim kɔgɔ kʋm kʋntʋ mʋ wʋ́ saŋɩ ba kɩ batɔ tu sɩ Yisɩrayɛlɩ tiinə kɔ-fɔrɔ kʋm taa veǝ.
25-31 Kʋ na yɩ digə kam jazɩm baŋa seeni daa kam, dwiə yantʋ mʋ wʋ́ jǝni sɩ Dan dwi dɩm taa wʋ ba yigə nɩ. Dwi maama wʋ́ jǝni dɩ ba yigə tu tɩntʋ doŋ mʋ:
| Dwi dɩm | Yigə tu wʋm | Baara bam ni |
| Dan | Amisadayi bu Ahiyezera | 62,700 |
| Asɛɛrɩ | Ocaran bu Pagɩlɩ | 41,500 |
| Nɛfitali | Enan bu Ahira | 53,400 |
| Ba maama: | 157,600 |
Dan kɔgɔ kʋm kʋntʋ mʋ wʋ́ kweeli Yisɩrayɛlɩ tiinə kɔ-fɔrɔ kʋm maama wʋnɩ ba taa veǝ. Ba maama wʋ́ taa ve dɩ ba kɔgɔ kʋm gwɛɛm yɩrɩ na gwɩɩrɩ dɩ brɩ jaja tɩn mʋ.»
32 Ba dɛɛn na jeeli Yisɩrayɛlɩ tiinə kɔ-fɔrɔ kʋm sɔ-yuu dɩ sɔ-yuu tɩn, ba kɔgɔ kʋm maama na kɩ daanɩ tɩn yɩ baara mʋrrʋ biə-yardʋ dɩ tɩtɔ, dɩ biə-yanu dɩ fiinnu (603,550). 33 Kʋ daarɩ, ba dɛɛn wʋ jeeli Levi dwi dɩm ni ba wǝli Yisɩrayɛlɩ kɔ-fɔrɔ kʋm nɩ. Kʋ maa maŋɩ sɩ kʋ tɔgɩ dɩ Baŋa-Wɛ na pɛ Moyisi ni sɩ o kɩ te tɩn mʋ.
34 Yisɩrayɛlɩ tiinə bam dɛɛn ma yɔɔrɩ ba kɩ ba tɔgɩ ni dɩlʋ Baŋa-Wɛ na pɛ Moyisi sɩ ba kɩ tɩn. Ba dɛɛn yǝni ba cwi ba vwə kʋntʋ doŋ mʋ, sɔ-yuu dɩ sɔ-yuu, kɔgɔ dɩ kɔgɔ. Ba dɛɛn ta na gwɛ ba maa kɛ tɩn, nɔɔnʋ maama tɔgɩ dɩ o sɔ-yuu tiinə mʋ o veǝ.