Garɩm Tɔnɔ
Ba jeeli Yisɩrayɛlɩ tiinə bam ni
1
Bɩna yale bɩnɩ dɩm canɩ sɩle cana kam pulim dɛ dɩlʋ Yisɩrayɛlɩ tiinə bam na nuŋi Ezipi tɩʋ kʋm nɩ tɩn mʋ Baŋa-Wɛ ŋɔɔnɩ dɩ Moyisi Sinayi kagʋa kam nɩ. Jero-vwe dɩm wʋnɩ mʋ DƖ dɛɛn ŋɔɔnɩ dɩd-o yɩ DƖ wɩ:2 «Nmʋ dɩ Arɔn maŋɩ sɩ á jeeli Yisɩrayɛlɩ tiinə bam ni mʋ. Jeeli-ba-na sɔ-yuu dɩ sɔ-yuu, digə dɩ digə wʋnɩ sɩ á lwarɩ baarʋ maama dɩ o yɩrɩ.a 3 Á maa wʋ́ jeeli balʋ bam na yi bɩna fiinle ba daŋɩ yɩ ba yi jara kǝm tɩn ni, sɩ á pɔɔrɩ-ba kɔgɔ dɩ kɔgɔ. 4 Kʋ na yɩ te tɩn, dwi maama wʋ́ lɩ ba sɔ-yuu yigə tu dɩdʋa mʋ sɩ kʋ tu wǝli abam.
5-15 Baara balʋ na zɩgɩ dwi maama ŋwaanɩ sɩ ba wǝli abam dɩ á tɩtʋŋɩ dɩm tɩn yɩra mʋ tɩntʋ:
| Dwi dɩm | Yigə tu wʋm |
| Ruban | Seduri bu Elizuri |
| Simeyon | Zurisadayi bu Selumeli |
| Zuda | Amɩnadabɩ bu Naasɔn |
| Yisakaarɩ | Zuwara bu Netaneli |
| Zabulɔn | Helon bu Eliabɩ |
| Zʋzɛfʋ bu Efrayim | Amiwudi bu Elisama |
| Zʋzɛfʋ bu Manasɩ | Pedazura bu Gamaleli |
| Bɛnzamɛn | Gidɩoni bu Abidan |
| Dan | Amisadayi bu Ahiyezera |
| Asɛɛrɩ | Ocaran bu Pagɩlɩ |
| Gadɩ | Deweli bu Eliasatɩ |
| Nɛfitali | Enan bu Ahira» |
16 Nɔɔna bam kʋntʋ mʋ ba dɛɛn lɩ Yisɩrayɛlɩ dwiə yam maama wʋnɩ, sɩ ba ləri ba kɔgɔ kʋm maama yuu nɩ ba tʋŋɩ tɩtʋŋɩ dɩm kʋntʋ. Bantʋ mʋ yɩ yigǝ tiinǝ ba sɔ-yuni tɩm nɩ.
17 Moyisi dɩ Arɔn na lwarɩ nɔɔna bam kʋntʋ yɩra yam tɩn, ba dɛɛn ma sɩɩnɩ ba ja-ba sɩ ba wǝli tɩtʋŋɩ dɩm. 18 Canɩ sɩle cana kam pulim dɛ nɩ mʋ ba bəŋi Yisɩrayɛlɩ tiinə kɔ-fɔrɔ kʋm maama ba kɩ daanɩ. Ba ma pʋpʋnɩ ba sɔ-yuni tɩm dɩ ba di sɩm yɩra ba tiŋi. Kʋ na yɩ baara balʋ maama na yi bɩna fiinle ba daŋɩ tɩn, ba dɛɛn pʋpʋnɩ nɔɔnʋ maama dɩ o yɩrɩ. 19 Ba kɩ sɩ kʋ maŋɩ dɩ Baŋa-Wɛ na pɛ Moyisi ni sɩ o kɩ te tɩn mʋ. Sinayi kagʋa kam nɩ mʋ ba jeeli baara bam tɩntʋ doŋ:
20-43 Yisɩrayɛlɩ dwiə yam maama wʋnɩ ba dɛɛn jeeli baara balʋ na yi bɩna fiinle ba daŋɩ yɩ ba yi najara kǝm tɩn ni. Ba ma pʋpʋnɩ ba yɩra ba tiŋi, nɔɔnʋ maama dɩ o sɔ-yuu kʋm dɩ o digə kam mʋ.
| Dwi dɩm | Baara bam ni |
| Yisɩrayɛlɩ bu-kwɩan Ruban | 46,500 |
| Simeyon | 59,300 |
| Gadɩ | 45,650 |
| Zuda | 74,600 |
| Yisakaarɩ | 54,400 |
| Zabulɔn | 57,400 |
| Zʋzɛfʋ bu Efrayim | 40,500 |
| Zʋzɛfʋ bu Manasɩ | 32,200 |
| Bɛnzamɛn | 35,400 |
| Dan | 62,700 |
| Asɛɛrɩ | 41,500 |
| Nɛfitali | 53,400 |
44 Moyisi dɩ Arɔn dɩdaanɩ Yisɩrayɛlɩ yigǝ tiinǝ fugǝ-bale bam dɛɛn na jeeli nɔɔna bam ni te tɩn mʋ kʋntʋ. Nɔɔnʋ maama nan zɩgɩ o paɩ o digə kam mʋ. 45 Kʋ nan yɩ Yisɩrayɛlɩ tiinə baara balʋ na yi bɩna fiinle ba daŋɩ yɩ ba yi najara kǝm tɩn mʋ ba jeeli ba ni. 46 Baara bam maama maa yɩ nɔɔna mʋrrʋ biə-yardʋ dɩ tɩtɔ, dɩdaanɩ biə-yanu dɩ fiinnu (603,550).
47 Ba dɛɛn nan wʋ jeeli Levi dwi tiinə bam ba wǝli dɩ dwiə yadonnə yam.b 48 Bɛŋwaanɩ, Baŋa-Wɛ dɛɛn ya maŋɩ DƖ ta dɩ Moyisi mʋ DƖ wɩ:
49 «Abam na lagɩ á jeeli Yisɩrayɛlɩ tiinə bam ni, sɩ á yɩ jeeli Levi dwi tiinə bam á wǝli da. 50 Kʋ nan na yɩ te tɩn, abam wʋ́ pa Levi tiinə bam mʋ taa nii amʋ jero-vwe dɩm, dɩdaanɩ je sɩm kʋntʋ wʋ zɩla yam baŋa nɩ. Bantʋ mʋ wʋ́ yǝni ba zɩŋɩ jero-vwe dɩm dɩ dɩ zɩla yam ba ja kɛ. Ba ta wʋ́ taa tʋŋɩ dɩ wʋ tɩtʋŋa ba pa-nɩ, sɩ ba daarɩ ba cwi ba vwə ba cɩ jero-vwe dɩm. 51 Abam na lagɩ á gɔ á vwə yam sɩ á vu jǝgǝ kadoŋ, kʋ yɩ bantʋ mʋ wʋ́ gɔ jero-vwe dɩm, sɩ ba ja-dɩ ba kɛ. Á na yi jǝgǝ kam, bantʋ mʋ wʋ́ cwi vwe dɩm jə-dʋŋa kam nɩ. Wʋlʋ maama na daɩ Levi dwi tu yɩ o na tiini o yi jero-vwe dɩm yɩra, sɩ ba gʋ kʋntʋ tu.
52 Kʋ nan na yɩ Yisɩrayɛlɩ tiinə bam maama, ba maŋɩ sɩ ba cwi ba vwə mʋ sɔ-yuu dɩ sɔ-yuu, sɩ kɔgɔ maama taa jɩgɩ drapoo na pʋpʋnɩ kʋ yɩrɩ jaja tɩn. 53 Kʋ daarɩ, Levi tiinə bam wʋ́ cwi ba vwə ba kaagɩ Wɛ jero-vwe dɩm mʋ. Kʋntʋ wʋ́ pa ba cɩ sɩ nɔɔn-nɔɔnʋ yɩ yi dáanɩ sɩ kʋ pa a banɩ zaŋɩ Yisɩrayɛlɩ tiinə kɔgɔ kʋm baŋa nɩ kʋ ŋwaanɩ. Kʋ yɩ Levi dwi tiinə bam mʋ wʋ́ taa nii jero-vwe dɩm wǝǝnu maama baŋa nɩ.»
54 Yisɩrayɛlɩ tiinə bam dɛɛn ma yɔɔrɩ ba kɩ ba tɔgɩ ni dɩlʋ Baŋa-Wɛ na pɛ Moyisi sɩ ba kɩ tɩn.