Zozwe Tɔnɔ
Zozwe Tɔnɔ kʋm tɛ Zozwe na ləri Moyisi yuu nɩ o tɔgɩ Yisɩrayɛlɩ tiinə bam yigə pa ba bɛ Zʋrdɛn bugə kam yɩ ba zʋ Kaanan tɩga kam wʋnɩ te tɩn mʋ. Tɩga kam kʋntʋ dɛɛn yɩ tɩ-ywəŋə mʋ Wɛ na kwe DƖ pa DƖ nɔɔna bam. Dɩ kʋ dɩ, kʋ yɩ bantʋ tɩtʋŋɩ mʋ sɩ ba fɩn balʋ ya na maŋɩ ba wʋ ka wʋnɩ tɩn ba zəli, sɩ ba laan wanɩ-ka ba joŋi ba taa te. Ba na sɩŋɩ najara kǝm tɩn, ba di Zeriko tiinə lanyɩranɩ. Ba nan wʋ wanɩ tɩga kam kʋntʋ nɔɔna bam maama ba zəli, pa dwiə yalʋ ta na daarɩ da tɩn jɩgɩ Yisɩrayɛlɩ tiinə bam ba daana. Kʋ maama wʋnɩ dɩ nan, Zozwe ta pɔɔrɩ tɩga kam mʋ o pa Yisɩrayɛlɩ dwiə fugə-yale nɔɔna bam maama. Ya maama nan ya nuŋi ba nabaarʋ Zakɔbɩ yɩra nɩ mʋ, yɩ wʋntʋ yɩrɩ dɩdoŋ dɛɛn mʋ yɩ Yisɩrayɛlɩ. Kʋ na yɩ Levi dwi dɩm tiinə, ba dɛɛn pɛ bantʋ tɩga tɔgɩ ka wʋ dwiə fugə-dɩdʋa yadonnə yam tɩtarɩ nɩ mʋ. Ba kɩ kʋntʋ bɛŋwaanɩ, bantʋ mʋ Wɛ kuri sɩ ba taa tʋŋɩ ba pa‑DƖ DƖ nɔɔna badaara bam ŋwaanɩ. Sɩ kʋ loori Zozwe na wʋ́ tɩ tɩn, o dɛɛn bəŋi nɔɔna bam maama mʋ sɩ ba kɩ daanɩ yɩ o pa-ba ni sɩ ba taa zuli Wɛ dɩ ba bɩcara maama.