Moyisi tʋʋnɩ dɩm
34
Moyisi dɛɛn ma zɩgɩ Moabɩ pwarʋ tɩm nɩ o vu o yi Nebo piu kʋm. O ma di Pisiga piu kʋm yuu na jeeri Zeriko tɩʋ kʋm tɩn. Dáanɩ mʋ Baŋa-Wɛ brɩ-o tɩga kam maama, kʋ zɩgɩ Galadɩ laŋa kam nɩ sɩ kʋ vu kʋ yi Dan laŋa kam. 2 Wɛ daa ta brɩ-o Nɛfitali laŋa kam maama, dɩ Efrayim dɩ Manasɩ je sɩm, dɩ Zuda laŋa kam sɩ kʋ taa ve wa-zʋʋrɩ seeni kʋ vu kʋ yi Mediterane nɩnɩʋ kʋm, 3 kʋ ta wǝli dɩ jagwiə kagʋa kam, dɩ bolo tɩga kalʋ na tʋlɩ ka zɩgɩ Zeriko nɩ sɩ kʋ vu kʋ yi Soarɩ tɩn. Ba dɛɛn jɩgɩ Zeriko ba bǝi wɩ ‹Kʋrrʋ tɩʋ kʋm›.4 Baŋa-Wɛ ma ta dɩ Moyisi DƖ wɩ: «Tɩga kantʋ mʋ amʋ dugi durə ka ŋwaanɩ a pooli dɩ Abraham, dɩ Yizakɩ, dɩ Zakɔbɩ sɩ a kwe-ka a pa ba kwaga kam. A laan nan pɛ n na-ka dɩ n yiǝ mʋ, Kʋ daarɩ n bá na cwǝŋǝ sɩ n bɛ n vu n zʋ ka wʋnɩ.»a
5 Baŋa-Wɛ tɩntʋŋnʋ Moyisi ma tɩ dáanɩ, Moabɩ laŋa kam nɩ. Kʋ dɛɛn kɩ nɩnɛɛnɩ Baŋa-Wɛ na wuuri DƖ ta te tɩn. 6 Ba ma kɩ-o Moabɩ bolo kʋdoŋ nɩ, kʋ na jeeri Bɛt-Pewɔrɩ tɩn. Nɔɔn-nɔɔnʋ nan yǝri mɛ cɩga cɩga ba na kɩ-o tɩn dɩ zɩm maama. 7 Moyisi na tɩgɩ tɩn, o dɛɛn jaanɩ bɩna bi dɩ fiinle mʋ. O dɛɛn ya ta jɩgɩ dam, yɩ o yiǝ dɩ dana lanyɩranɩ.
8 Yisɩrayɛlɩ tiinə bam dɛɛn ma maŋɩ Moabɩ laŋa kam nɩ ba kwe da fiintɔ ba ma keeri Moyisi luə kam sɩ ba laan kɩ ba ti.
9 Kʋ nan na yɩ Nun bu Zozwe, Wɛ dɛɛn pɛ‑o swan lanyɩranɩ, Moyisi na kuri wʋntʋ sɩ o ləri o yuu nɩ tɩn ŋwaanɩ. Kʋntʋ ŋwaanɩ Yisɩrayɛlɩ tiinə bam dɛɛn sɛ Zozwe ni yɩ ba tʋŋɩ ba tɔgɩ niə yalʋ Baŋa-Wɛ ya na pɛ Moyisi tɩn.b
10 Baŋa-Wɛ dɛɛn ŋɔɔnɩ dɩ Moyisi jaja mʋ.c Wɛ nijoŋnu wʋdoŋ daa ta wʋ zaŋɩ Yisɩrayɛlɩ tiinə bam wʋnɩ o na nyɩ dɩ Moyisi 11 yɩ o tʋŋɩ wo-kamunnu dɩ wo-kɩnkagɩla sɩ ya ta nyɩ dɩ yalʋ Baŋa-Wɛ na tʋŋɩ Moyisi sɩ o tʋŋɩ Ezipi Pa-farʋ wʋm, dɩ o nakwa, dɩ o tɩʋ kʋm maama yigə nɩ tɩn doŋ. 12 Nɔɔn-nɔɔnʋ daa tǝrǝ o na jɩgɩ dam kʋntʋ doŋ sɩ o wanɩ o kɩ wo-kamunnu na jɩgɩ fʋʋnɩ sɩ tɩ maŋɩ dɩ Moyisi na tʋŋɩ te Yisɩrayɛlɩ tiinə bam maama yibiyə nɩ tɩn.