Moyisi loori Wɛ sɩ DƖ kɩ Yisɩrayɛlɩ dwiə yam maama yu-yoŋo
33
Wɛ yu-yoŋo dɩlʋ DƖ tɩntʋŋnʋ Moyisi dɛɛn na sɔɔlɩ o kɩ Yisɩrayɛlɩ tiinə bam yuu nɩ yɩ o laan tɩ tɩn mʋ tɩntʋ:2 «Baŋa-Wɛ dɛɛn zɩgɩ Sinayi piu kʋm nɩ
DƖ ba DƖ vɩɩrɩ DƖ tɩtɩ DƖ pa DƖ nɔɔna bam.
DƖ ma zaŋɩ Edɔm pweeru tɩm yuu nɩ
nɩnɛɛnɩ wɩa na puli te tɩn,
yɩ DƖ zɩgɩ Paran piu yuu nɩ
DƖ nyɩɩnɩ pooni ba baŋa nɩ.
Malɛsɩ kɔgɔ kɔgɔ mʋ wʋ DƖ tee nɩ,
yɩ mim dɩ wʋ DƖ jazɩm seeni dɩ pɩpɩla.
3 Cɩga tɩn, Baŋa-Wɛ jɩgɩ DƖ nɔɔna bam sono.
DƖ maa cʋ balʋ DƖ na pɔɔrɩ DƖ pa DƖ tɩtɩ tɩn.
Kʋntʋ ŋwaanɩ mʋ ba cɔɔlɩ ba tɩtɩ DƖ yigə nɩ
sɩ ba sɛ DƖ zaasɩm dɩm.
4 Dɩ́ sɛ Wɛ niə yalʋ Moyisi na pɛ dɩbam tɩn,
ya na yɩ dɩbam dwi dɩm lʋnnɩ na dwe maama tɩn.
5 Yisɩrayɛlɩ dwi tiinə dɩ ba yigǝ tiinǝ bam maama na lagɩ daanɩ tɩn,
Baŋa-Wɛ dɛɛn mʋ jigi pɛ DƖ nɔn-sonnu tɩm a baŋa nɩ.»
Ruban dwi dɩm yɩra taanɩ:
6 «Wɛ bá pa Ruban dwi dɩm saarɩ,
dɩ ba na maŋɩ ba ba daga tɩn dɩ.»
7 Zuda dwi dɩm yɩra taanɩ:
«Baŋa-Wɛ, cəgi Zuda dwi tiinə bam,
dɩ ba na loori zǝnǝ nmʋ tee nɩ tɩn.
Pa ba joori ba fɔgɩ dɩ ba dwiə yadonnə yam.
Kwe dam n kɩ ba jɩŋa nɩ,
sɩ ba dʋna yɩ wanɩ-ba.»
8 Levi dwi dɩm yɩra taanɩ:
«Baŋa-Wɛ, kwe n Yurim dɩ Tumim kandwa yam
n kɩ n tɩntʋŋna Levi dwi tiinə bam jɩŋa nɩ
sɩ ba ma lwarɩ n wʋbʋŋa. b
Ba na wʋ Masa nɩ tɩn,
nmʋ dɛɛn maŋɩ-ba mʋ n nii.
Ba ta na wʋ Meriba buli-yi dɩm seeni tɩn,
n ta jaanɩ dɩ ba mʋ.
9 Ba nan brɩ ba cɩga dɩ nmʋ,
yɩ ba tʋŋɩ ba tɔgɩ n kwiə yam dɩ n ni-gonim dɩm,
sɩ kʋ dwǝni ba kwə, dɩ ba niinə, dɩ ba cʋrrʋ, dɩ ba biə.c
10 Ba yǝni ba brɩ n nɔɔna Yisɩrayɛlɩ tiinə bam
sɩ ba taa sɛ n kwiə yam.
Ba ta zwɛ wǝǝnu tɩlʋ lwǝm na ywǝmmǝ tɩn nmʋ yigə nɩ,
yɩ ba daarɩ ba zwɛ vara n bimbim dɩm baŋa nɩ
ba ma kɩ kaanɩm ba pa‑m.
11 Baŋa-Wɛ, kɩ Levi dwi dɩm yu-yoŋo,
sɩ ba taa jɩgɩ duuni,
sɩ ba kikiə dɩ taa poli nmʋ wʋʋ.
Cɔgɩ ba dʋna maama,
sɩ ba daa yɩ joori ba zaŋɩ.»
12 Bɛnzamɛn dwi dɩm yɩra taanɩ:
«Dwi dɩntʋ mʋ Baŋa-Wɛ tiini DƖ soe.
DƖ maa cʋ-ba sɩ kʋlʋkʋlʋ yɩ yi-ba.
DƖ maa wʋ ba tee nɩ maŋa maama,
pa ba sin DƖ woro wʋnɩ.»
13 Zʋzɛfʋ dwi dɩm yɩra taanɩ:
«Baŋa-Wɛ wʋ́ kɩ ba tɩga kam yu-yoŋo,
pa nyɔnɔ nuŋi wɛyuu,
sɩ na dɩ taa burǝ ba nuŋi tɩga kuri nɩ ba pa-ba.
14 Wɩa wʋ́ taa paɩ ba wʋdiiru taa bra lanyɩranɩ,
yɩ ba na zanzan canɩ sɩm maama wʋnɩ.
15 Faŋa faŋa zwəənu tɩm wʋ́ faarɩ dɩ tweeru biə,
yɩ wʋdiiru dɩ wʋ́ kɩ lanyɩranɩ pweeru tɩm yuu nɩ.
16 Zʋzɛfʋ dwi tiinə wʋ́ na wo-laarʋ tɩlʋ maama na puli tɩga baŋa nɩ tɩn.
Baŋa-Wɛ dɩlʋ dɛɛn na zɩgɩ sabara kam wʋnɩ DƖ ŋɔɔnɩ tɩn
wʋ́ kɩ ba yu-yoŋo.d
Wɛ wʋ́ zǝni-ba kʋntʋ,
Zʋzɛfʋ dɛɛn na jigi o cʋrrʋ tɩm yigə tu tɩn ŋwaanɩ.
17 Zʋzɛfʋ jɩgɩ dam nɩ na-bɩa mʋ te.
O biə bale, Efrayim dɩ Manasɩ nyɩ dɩ ga-vara nyɩa yam
na waɩ ba dʋna ya cuə tɩn mʋ.
Efrayim jɩgɩ jar-kərə mʋrrʋ kuni fugə,
yɩ Manasɩ dɩ jɩgɩ jar-kərə mʋrrʋ mʋrrʋ.
Ba waɩ dwi-gɛ tiinə bam ba zələ
ba ja vu ba yi lʋgʋ baŋa kweelim je.»
18 Zabulɔn dɩ Yisakaarɩ dwiə yam yɩra taanɩ:
«Zabulɔn dwi tiinə bam, taá jɩgɩ-na wʋpolo,
dɩ á na nuŋi á beeri yigə yigə te tɩn.
Yisakaarɩ dwi tiinə bam, taá jɩgɩ-na wʋpolo,
dɩ á na maŋɩ sɔŋɔ nɩ te tɩn.
19 Baá bəŋi dwiə yadonnə tiinə
sɩ ba ba ba din piu kʋm yuu
yɩ ba kɩ kaanɩm dɩlʋ na yɩ cɩga cɩga tɩn ba pa Wɛ.
Ba naɩ ba duuni dɩm pipiu baŋa nɩ mʋ,
yɩ ba na tɔgɩ nɩnɩʋ kʋm wʋʋ ba beeri tɩn
ba ta guri wǝǝnu tɩlʋ na səgi kasʋlʋ kʋm wʋnɩ tɩn dɩ.»
20 Gadɩ dwi dɩm yɩra taanɩ:
«Baŋa-Wɛ yɩ dɩlʋ na wʋ́ pa Gadɩ laŋa kam taa daga tɩn.
Tee-na DƖ yɩrɩ!
Gadɩ tigi o sin nɩnɛɛnɩ nyoŋo te.
O lagɩ o zi varɩm
sɩ o ja kʋ jɩŋa naa kʋ yuu o kaarɩ.
21 O ma kuri tɩga kalʋ na tiini ka lamma tɩn o pa o tɩtɩ.
Yisɩrayɛlɩ dwiə yam yigǝ tiinǝ bam na gilimi daanɩ
sɩ ba pɔɔrɩ tɩga kam tɩn,
mʋ ba lɩ nakwɩ pʋpwara ba pa‑o.
O ma tʋŋɩ o tɔgɩ Baŋa-Wɛ cwǝŋǝ kam lanyɩranɩ,
yɩ o sɛ Wɛ niə yalʋ DƖ na pɛ Yisɩrayɛlɩ tiinə bam tɩn.»
22 Dan dwi dɩm yɩra taanɩ:
«Dan nyɩ dɩ nyoŋ-pwala mʋ.
O zɩgɩ Basan nɩ mʋ o faŋɩ o nuŋi.»
23 Nɛfitali dwi dɩm yɩra taanɩ:
«Nɛfitali dwi tiinə tɩtʋŋa yam mʋ su Baŋa-Wɛ yi,
yɩ Wɛ tiini DƖ kɩ-o yu-yoŋo.
Ba laŋa kam wʋ́ tɔgɩ nɩnɩʋ kʋme
dɩ jagwiə seeni maama.»
24 Asɛɛrɩ dwi dɩm yɩra taanɩ:
«Wɛ wʋ́ kɩ Asɛɛrɩ dwi tiinə bam yu-yoŋo,
sɩ kʋ dwǝni dwiə yadonnə yam maama.
Ba cʋrrʋ tɩm wʋ́ taa soe-ba.
Ba ta wʋ́ na Olivi nugə zanzan ba tɩga kam nɩ.
25 Baá ma luuru dɩ canna mʋ
ba fɔgɩ ba pɩ ba tɩɩnɩ dɩm manco-niə yam.
Ba ta wʋ́ na dam sɩ kʋ yi ba ŋwɩa da yam maama.»
26 «Baŋa-Wɛ nɔn-sonnu tɩm,
Wɛ dɩdoŋ daa tǝrǝ dɩ na nyɩ dɩ Baŋa-Wɛ dɩm.
DƖ jɩgɩ nɩnwaŋa mʋ yɩ DƖ dɔgɩ kunkwǝǝnu baŋa nɩ
DƖ kaagɩ wɛyuu maama DƖ duri DƖ ba sɩ DƖ zǝni abam.
27 Baŋa-Wɛ dɩlʋ na ba kɛ tɩn mʋ yɩ abam dalɩm je.f
DƖ maa təli abam DƖ jɩan nɩ yɩ DƖ ba yaga.
DƖ daa ta zəli á dʋna á yigə nɩ
yɩ DƖ wɩ: ‹Pa-na ba dwi je!›
28 Kʋntʋ tɩn, Yisɩrayɛlɩ dwi tiinə bam nɛ pwələ
sɩ ba taa zʋʋrɩ dɩ wʋ-zuru.
Zakɔbɩ kwaga kam nɛ ba kugu je.
Wɛyuu nyɔnɔ maa bugi tɩga kam
yɩ ka su dɩ mɩna dɩ sa-nyoŋo.
29 Yisɩrayɛlɩ dwi tiinə bam, á jɩgɩ yu-yoŋo!
Dwi tǝrǝ dɩ na nyɩ dɩ abam.
Kʋ yɩ abam mʋ Baŋa-Wɛ joŋi DƖ yagɩ.
DƖ maa kwǝli abam
nɩ jara cɩ-kwaŋa na kwǝli nɔɔnʋ jara wʋnɩ te tɩn.
O daa ta nyɩ dɩ sʋ-lɔŋɔ á jɩŋa nɩ
sɩ DƖ zǝni abam najara wʋnɩ.
DƖ wʋ́ pa á wanɩ á dʋna á di,
pa ba loori yibwənə á tee nɩ.
Á nan wʋ́ nɔnɩ-ba á sɩn tɩga nɩ.»