32
«Tɩga baŋa, ba n cəgi a taanɩ dɩm!
Sɩ wɛyuu dɩ, ba n ni kʋlʋ a na jɩgɩ sɩ a ta tɩn!
2 Wɛ wʋ́ pa a zaasɩm dɩm tʋ á zwa nɩ
nɩ kunkoŋo na siiri te tɩn mʋ,
nɩ nyɔnɔ dɩ na tʋ tɩga nɩ te tɩn.
A bɩtarɩ sɩm wʋ́ taa nyɩ dɩ dʋa na siiri
mɩn-cɩna dɩ ga-lɛɛrʋ baŋa nɩ te tɩn mʋ.
3 A lagɩ a zǝŋi Baŋa-Wɛ yɩrɩ!
Ba-na dɩ́ zuli dɩ́ Tu Wɛ dɩm dɩ DƖ kamunni dɩm.
4 Baŋa-Wɛ maa yɩ piu mʋ DƖ paɩ dɩbam.
DƖ tɩtʋŋa maama lana zanzan,
yɩ DƖ cwe sɩm dɩ yɔɔrɩ sɩ jɩgɩ cɩga.
Nɔɔna waɩ ba salɩ DƖ yɩra nɩ,
yɩ DƖ ba kwanɩ DƖ ni.
Kʋlʋ maama DƖ na tʋŋɩ tɩn yɩ cɩga mʋ.
5 Abam Wɛ nɔɔna bam nan lɔgɩ DƖ kwaga nɩ.
Á yɩ cavɩɩra yɩranɩ mʋ,
yɩ cwǝŋǝ daa tǝrǝ sɩ á taá yɩ DƖ nɔɔna,
á na tiini á tusi tɩn ŋwaanɩ.
6 Agɛbʋŋa tiinə, mʋ á na wʋ́ kɩ Baŋa-Wɛ te na?
Á ba jɩgɩ swan!
Dɩntʋ mʋ yɩ á Ko dɩ á Kəru.
DƖ maa yɩ dɩlʋ na pɛ abam kugu je lʋgʋ baŋa nɩ tɩn.
7 Guli-na faŋa faŋa da yam dɩ á nabaara bam gulə.
Bwe-na á kwə dɩ nankwɩn sɩm,
sɩ ba ta ba brɩ abam kʋlʋ dɛɛn na kɩ tɩn.
8 Yuutu Wɛ dɩm mʋ pɔɔrɩ lʋgʋ baŋa dwiə maama,
DƖ daarɩ DƖ pa nabiinǝ dwi maama ba tɩga kam.
DƖ ma pa tɩʋ maama taa jɩgɩ kʋ sisəm,
sɩ kʋ tɔgɩ wɛyuu kɔgɔ kʋm na maɩ te tɩn.
9 Kʋ daarɩ Zakɔbɩ dɩ o kwaga kam mʋ DƖ kuri DƖ pa DƖ tɩtɩ,
sɩ ba taa yɩ DƖ tɩtɩ nyɩma.
10 DƖ dɛɛn nɛ DƖ nɔɔna bam
ba na kaagɩ ba beeri kagʋa yuu nɩ,
mɛ sam na tǝrǝ yɩ viu yɩranɩ mʋ zwarɩ kʋ yaga tɩn.
DƖ ma cʋ-ba yɩ DƖ nii ba baŋa nɩ,
DƖ yi na pagɩ ba baŋa nɩ tɩn ŋwaanɩ.
11 Baŋa-Wɛ ma kʋrɩsɩ-ba lanyɩranɩ,
nɩ kaloŋ-zɔŋɔ na kɔnɩ kʋ biə
yɩ kʋ yarɩgɩ kʋ vwana kʋ kɔgɩsɩ-ba lanyɩranɩ te tɩn.b
12 Baŋa-Wɛ yɩranɩ mʋ yǝni DƖ kalɩ DƖ nɔɔna bam,
yɩ wa-yɔɔrʋ wʋ dɛ tɩ zǝni-DƖ.
13 DƖ ma pa-ba cwǝŋǝ sɩ ba taa te lʋgʋ kʋm zwəənu tɩm yuu.
DƖ dɛɛn pa-ba karɩ wʋʋ wodiiru mʋ yɩ ba di.
Ba dɛɛn lɔɔnɩ tʋʋrʋ mʋ pweeru je nɩ,
ba daarɩ ba na nugə kandwa je nɩ,
mɛ Olivi tweeru na ləri biə lanyɩranɩ tɩn.c
14 Ba naanɩ dɩ ba bʋnɩ pɛ-ba nayɩla zanzan dɩ nayɩl-pɩpala.
Ba vara dɩ dɛɛn nugi lanyɩranɩ,
peeni, dɩ bʋnɩ, dɩ naanɩ maama.
Ba ta ma na mɩna sɩ ba di,
dɩ vinyə sa-nyoŋo sɩ ba nyɔ.
15 Wɛ nɔn-sonnu tɩmd dɛɛn jaanɩ duum,
yɩ ba laan ji zwabani-nyɩna.
Ba ma di wʋdiu ba su pa ba nu lanyɩranɩ.
Ba lɔgɩ ba Kəru Wɛ kwaga nɩ.
Cɩga tɩn, DƖ yɩ ba vɩrnʋ,
DƖ ta kwǝri DƖ yɩ piu DƖ pa-ba,
yɩ ba ta vanɩ‑DƖ.
16 Baŋa-Wɛ banɩ ma zaŋɩ ba baŋa nɩ,
ba na yagɩ-DƖ yɩ ba daarɩ ba zuli wa-yɔɔrʋ dɩ wo-zɔɔna tɩn ŋwaanɩ.
Ba pa wʋ-gʋrʋ jɩgɩ-DƖ.
17 Ba dɛɛn kaanɩ ba pa tangwana,
ba ma ləri Wɛ yuu nɩ.
Ba ya yǝri wa-yɔɔrʋ tɩm kʋntʋ.
Tɩ maa yɩ jwə-dʋʋra yalʋ ba nabaara ya na wʋ zuli tɩn.
18 Ba swe Dam-fɔrɔ Tu Baŋa-Wɛ dɩm swiə,
dɩ DƖ na maŋɩ DƖ yɩ wʋlʋ na pɛ-ba ŋwɩa tɩn dɩ.
Ba mɛ ba kwaga ba ya wʋlʋ na lʋgɩ-ba tɩn.
19 Baŋa-Wɛ ma na ba na kɩ te tɩn,
yɩ DƖ daarɩ DƖ vɩ-ba,
ba na yɩ DƖ biə yɩ ba kɩ pu-sɩŋa dɩ DƖ tɩn ŋwaanɩ.
20 DƖ dɛɛn tagɩ DƖ wɩ:
A yigə daa bá taa wʋ ba wʋnɩ.
Nan yagɩ sɩ dɩ́ nii kʋ na lagɩ kʋ kɩ-ba te tɩn.
Ba yɩ a biə yɩ ba ta ba kwarɩ amʋ,
pa ba tiini ba tusi.
21 Ba tɔgɩ jwə-yɔɔrʋ mʋ
pa a banɩ zaŋɩ,
yɩ ba ma ba paɩ wʋ-gʋrʋ jɩgɩ amʋ.
Kʋntʋ ŋwaanɩ a lagɩ a tɔgɩ dwi-gɛ tiinə balʋ na yɩ nɔn-yɔɔrʋ tɩn baŋa nɩ
a ma pa a tɩtɩ nɔɔna bam banɩ zaŋɩ
a ma a pa ba dɩ wʋrʋ ta gʋɩ.
22 Amʋ banɩ dɩm wʋ́ zaŋɩ dɩ tarɩgɩ mʋ nɩ mim te,
sɩ dɩ di lʋgʋ baŋa dɩ kʋ wʋdiiru maama,
dɩ vu dɩ yi tɩga kam kuri kuri,
dɩ lagɩ dɩ di dɩ vu dɩ kwaarɩ pweeru bʋnnʋ mʋ.
23 A ta wʋ́ ja cam zanzan
a ba a yagɩ ba baŋa nɩ,
pa ba tiini ba na zʋnnɩ,
nɩ a na tagɩ a cɩna maama ba baŋa nɩ a ti te tɩn.
24 Kana, dɩ paa, dɩ yawɩ-cɛɛrʋ dwi maama wʋ́ ja-ba,
sɩ ba yaarɩ ba tɩ.
A ta wʋ́ tʋŋɩ ga-vara dɩ tɩga wo-vəəlu
a yagɩ ba yɩra nɩ sɩ tɩ dʋnɩ-ba tɩ gʋ.
25 Ba na nuŋi pooni yigə, ba dʋna wʋ́ gʋ-ba.
Ba nan na maŋɩ digə nɩ, fʋʋnɩ wʋ́ ja-ba.
Nɔn-dʋnnʋ, dɩ bɩsankam, dɩ bu-sɩsɩn, dɩ nankwɩn dɩ bá daarɩ.
Ba maama wʋ́ tɩ.
26 A yaá ta wɩ: ‹A lagɩ a cɔgɩ-ba fasɩ mʋ,
sɩ ba yɩra saarɩ lʋgʋ baŋa nɩ
sɩ nɔɔn-nɔɔnʋ yɩ guli ba gulə.›
27 A nan ba lagɩ sɩ ba dʋna taa jɩgɩ fiə
yɩ ba magɩ ba nyɔɔna ba wɩ:
‹Dɩbam mʋ wanɩ Yisɩrayɛlɩ tiinə bam
sɩ kʋ daɩ Baŋa-Wɛ mʋ kɩa.›
28 Yisɩrayɛlɩ tiinə nan ba jɩgɩ swan
yɩ ba wʋbʋŋa tǝrǝ.
29 Ba ya na jɩgɩ swan,
ba yaá wuuri ba lwarɩ kʋlʋ na lagɩ kʋ kɩ-ba tɩn.
Ba nan warɩ sɩ ba ni kʋ kuri.
30 Bɛɛ mʋ wʋ́ pa nɔɔnʋ dɩdʋa wanɩ nɔɔna mʋrʋ o zəli,
yɩ nɔɔna bale wanɩ nɔɔna mʋrrʋ kuni fugə?
Kʋ yɩ Baŋa-Wɛ na yagɩ-ba tɩn ŋwaanɩ mʋ.
Wʋlʋ na yɩ piu o pa-ba tɩn
mʋ kwe-ba o kɩ ba dʋna jɩŋa nɩ.
31 Baŋa-Wɛ na yɩ dɩbam piu tɩn,
dɩ́ dʋna bam ye nɩ
ba ba jɩgɩ Wɛ dɩlʋ dam na yi dɩbam Baŋa-Wɛ dɩm dam tɩn.
32 Ba nyɩ dɩ vinyə tweeru na ləri tiu bi-balwaarʋ tɩn mʋ.
Ba kugu je maa wʋ Sodɔm dɩ Gomɔrɩ nɩ.
33 Ba vinyə tiu biə pa nyʋa na tiini ka cana
nɩ sana balʋ ba na mɛ bɩsankwɩ vɩan ba ma kɩ tɩn.
34 Baŋa-Wɛ maa wɩ:
‹Amʋ maŋɩ a ye a na wʋ́ kɩ Yisɩrayɛlɩ tiinə dʋna bam te tɩn.
Kʋ wʋ a wʋbʋŋa nɩ sɩ ka maŋa na yiǝ, sɩ a lɩ-dɩ.
35 Amʋ mʋ wʋ́ joori a ŋwɩ ba kǝm-balwaarʋ jɩnɩ,
sɩ ba na kʋlʋ na maŋɩ dɩ ba tɩn.
Dɛ wʋ́ ba yɩ ba tʋ tɩga nɩ,
sɩ lɛɛrʋ laan ba tɩ cɔgɩ-ba
pa ba daa bá zaŋɩ wɛɛnɩ.›
36 Baŋa-Wɛ wʋ́ zaŋɩ DƖ bʋrɩ DƖ nɔɔna bam bʋra.
DƖ na nɛ nɩ ba dam ti
yɩ ba wʋlʋwʋlʋ daa wʋ daarɩ
tɩmbiə dɩdaanɩ gambɛ dɩ,
DƖ laan wʋ́ duri ba yibwənə.
37 DƖ maa wʋ́ bwe DƖ nɔɔna nɩ:
‹Á wa-yɔɔrʋ tɩm nan bɛ,
yɩ á ya bʋŋɩ sɩ á salɩ ya yɩra nɩ?
38 Á kwe á vara bam lara á ma á kaanɩ-ya,
sɩ á kwe á sana bam á ma á kɩ pɛɛra á pa-ya.
Yaá zaŋɩ ya ba ya zǝni abam na?
Ya wʋ́ wanɩ ya kwǝli abam ya cɩ na?
39 Lwarɩ-na nɩ: amʋ yɩranɩ mʋ yɩ Wɛ cɩga cɩga.
Wɛ dɩdoŋ daa tǝrǝ.
Amʋ mʋ paɩ nabiinǝ mʋmwɛ tiə,
yɩ a daarɩ a paɩ badonnǝ jɩgɩ ŋwɩa.
A maa kɩ zʋnnɩ nɔɔna yɩra nɩ,
yɩ a daarɩ a pa ba na yazurə.
Nɔɔn-nɔɔnʋ tǝrǝ o na wʋ́ wanɩ o dwəni dɩ amʋ.e
40 A lagɩ a zǝŋi a jɩŋa wɛɛnɩ sɩ a du durə nɩ:
Nɩ amʋ na jɩgɩ ŋwɩa maŋa maama tɩn,
41 a laan wʋ́ dwəri a sʋ-lɔŋɔ,
sɩ kʋ taa jɩgɩ ni yɩ kʋ nyɩɩna.
A ta wʋ́ kwe-kʋ a taa ziǝ sɩ a zagɩ a dʋna,
yɩ a waarɩ balʋ na culi-nɩ tɩn.
42 A cɩna yam niə wʋ́ taagɩ dɩ jana.
A sʋ-lɔŋɔ kʋm dɩ wʋ́ zɔ ba ya-nwana yam.
Ba jar-kərə bam wʋlʋwʋlʋ bá lu.
Kʋ na yɩ balʋ na nɛ zʋnnɩ dɩ balʋ ba na jaanɩ ba vɔ tɩn,
aá gʋ ba maama,
yɩ a go ba yigǝ tiinǝ bam yum.›
43 Lʋgʋ baŋa dwi tiinə maama,
tɔgɩ-na dɩ Wɛ nɔɔna bam
sɩ á taá zuli Baŋa-Wɛ dɩ wʋpolo.
DƖ lagɩ DƖ ŋwɩ balʋ na gʋɩ DƖ nɔɔna bam tɩn jɩnɩ,
sɩ DƖ waarɩ DƖ dʋna bam maama.
Kʋ nan na yɩ DƖ nɔɔna bam,
DƖ wʋ́ yagɩ ba lwarɩm DƖ ma cɛ-ba,
sɩ DƖ pa ba tɩga kam fɔgɩ ka kwɛ lanyɩranɩ.»
44 Moyisi ma tɔgɩ dɩ Nun bu Zozwe o vu o leeni ləŋə kantʋ sɩ Yisɩrayɛlɩ tiinə bam wanɩ ba ni. 45 O na tʋlɩ ka bɩtarɩ sɩm maama o ti tɩn, 46 o laan ma ta dɩ ba o wɩ: «Taá ye-na sɩ á guli taanɩ dɩlʋ a na pɛ abam zɩm tɩntʋ tɩn. Lwəni-na á brɩ á biə, sɩ ba dɩ wanɩ ba sɛ ba tɔgɩ Wɛ zaasɩm dɩm maama na pʋpʋnɩ ya tiŋi tɩntʋ tɩn. 47 Kwiə yantʋ daɩ taana. Ya jɩgɩ ŋwɩa ya paɩ abam mʋ kʋntʋ. Á na tɔgɩ-ya lanyɩranɩ, á wʋ́ wanɩ á daanɩ tɩga kalʋ wʋnɩ á na lagɩ á bɛ Zʋrdɛn bugə kam á zʋ á taá te tɩn.»
Moyisi nii o na Kaanan tɩga kam
48 Dɛ dɩm kʋntʋ nɩ mʋ Baŋa-Wɛ tagɩ dɩ Moyisi DƖ wɩ:
49 «Zaŋɩ n vu Abarim pweeru laŋa kam na wʋ Moabɩ nɩ tɩn. N na yi da, diini Nebo piu kʋm yuu na jeeri Zeriko tɩʋ kʋm tɩn sɩ n nii n na Kaanan tɩga kam. A lagɩ a kwe tɩga kam kʋntʋ a pa Yisɩrayɛlɩ tiinə bam sɩ ba taa te. 50 Kʋ kwaga nɩ nń tɩ piu kʋm yuu nɩ mʋ, nɩ n zɩmbaarʋ Arɔn na maŋɩ o tɩ Hɔrɩ piu yuu nɩ te tɩn.f 51 Abam bale dɛɛn vɩn amʋ ni mʋ Yisɩrayɛlɩ tiinə bam yigə nɩ, maŋa kalʋ á na beeri Zin kagʋa wʋnɩ á vu á yi Meriba-Kadesɩ buli-yi seeni tɩn. Á dɛɛn wʋ pɛ amʋ zulə nɔɔna bam yigə nɩ. 52 Kʋntʋ ŋwaanɩ, nmʋ wʋ́ zɩgɩ yigə yigə mʋ n nii n na tɩga kam. N za‑n bá na pwələ sɩ n zʋ tɩga kalʋ a na lagɩ a pa Yisɩrayɛlɩ tiinə bam tɩn wʋnɩ.»g