Zozwe ləri Moyisi yuu nɩ sɩ o vaŋɩ nɔɔna bam
31
Moyisi daa ta ma vu o ta dɩ Yisɩrayɛlɩ tiinə bam o wɩ:2 «Amʋ laan jɩgɩ bɩna bi dɩ fiinle mʋ. A daa bá wanɩ a da á yigə. Kʋ ta wǝli da, Baŋa-Wɛ tagɩ jaja dɩ amʋ DƖ wɩ: a bá tɔgɩ a bɛ Zʋrdɛn bugə kam.a 3 Abam Tu Baŋa-Wɛ dɩm tɩtɩ mʋ lagɩ DƖ da á yigə sɩ á bɛ á vu á cɔgɩ tɩɩnɩ dɩlʋ na wʋra tɩn, yɩ á daarɩ á zəli-ba pa ba daarɩ ba tɩga kam sɩ á joŋi-ka á taá te. Zozwe mʋ wʋ́ taa wʋ á yigə nɩ yɩ á bɛ. Kʋ maama wʋ́ kɩ nɩ Baŋa-Wɛ na brɩ te tɩn mʋ.b 4 Baŋa-Wɛ wʋ́ cɔgɩ nɔɔna bam kʋntʋ nɩ DƖ dɛɛn na kɩ Amɔɔrɩ tiinə pwa Sɩhɔn dɩ Ɔgɩ te yɩ ba dɩ ba tɩɩnɩ dɩm maama cɔgɩ tɩn. 5 Cɩga tɩn, Baŋa-Wɛ wʋ́ kɩ-ba á jɩŋa nɩ sɩ á wanɩ-ba. Kʋ nan maŋɩ sɩ á tɔgɩ niə yalʋ amʋ na pɛ abam tɩn sɩ á cɔgɩ-ba á ti. 6 Kɩ-na dam á kɩ á tɩtɩ kuri nɩ sɩ á taá jɩgɩ baarɩ. Yɩ taá kwarɩ-na fʋʋnɩ dɩ ba. Á Tu Baŋa-Wɛ dɩm wʋ á tee nɩ. DƖ bá fɔgɩ DƖ yagɩ abam. DƖ nan bá pa á tʋ.»
7 Moyisi laan ma bəŋi Zozwe o ta tɩntʋ dɩd-o Yisɩrayɛlɩ tiinə bam maama yigə nɩ o wɩ:
«Yɔɔrɩ n kɩ dam n kɩ n tɩtɩ kuri nɩ, sɩ n daarɩ n ta n jɩgɩ baarɩ. Nmʋ mʋ maŋɩ sɩ n da amʋ nɔɔna bam yigə sɩ ba vu ba zʋ tɩga kalʋ nɩ Baŋa-Wɛ na pooli dɩ ba nabaara sɩ DƖ pa-ba tɩn. Nmʋ ta wʋ́ pɔɔrɩ tɩga kam n pa-ba sɩ ba taa te. 8 Baŋa-Wɛ tɩtɩ mʋ wʋ́ taa wʋ n tee nɩ sɩ á taá veǝ. DƖ bá fɔgɩ DƖ yagɩ‑m. DƖ nan bá pa n tʋ. Kʋntʋ tɩn, yɩ tan liǝ. Nan yɩ pa n vwana parɩ.»
Wɛ niə yam kara
9 Moyisi laan ma pʋpʋnɩ Wɛ niə yam o tiŋi, yɩ o daarɩ o kwe-ya o pa Wɛ kaanɩm tiinə bam dɩ Yisɩrayɛlɩ nakwa bam. Kaanɩm tiinə bam dɛɛn nuŋi Levi dwi dɩm wʋnɩ mʋ yɩ ba yǝni ba zeeri Wɛ ni-gonim daka kam. 10-11 O ma ta dɩ ba o wɩ:
«Bɩna yarpɛ bɩnɩ dɩm maama na yiǝ, bɩnɩ dɩlʋ á na wʋ́ ma á cɛ balʋ na jɩgɩ á jɩna tɩn, sɩ á karɩmɩ Wɛ niə yam kʋntʋ sɩ Yisɩrayɛlɩ tiinə bam maama cəgi. Kʋ yɩ maŋa kalʋ ba na wʋ́ vu jǝgǝ kalʋ Baŋa-Wɛ na wʋ́ kuri yɩ ba jeeri DƖ yigə nɩ sɩ ba di Vwə cwiim candiə kam tɩn mʋ á maŋɩ sɩ á karɩmɩ á dɩ ba zwa nɩ.c 12 Á wʋ́ bəŋi nɔɔna bam maama, baara, dɩ kaana, dɩ biə, dɩ vərə balʋ na zʋʋrɩ á tee nɩ tɩn, sɩ ba maama la daanɩ ba cəgi Wɛ niə yam. Kʋntʋ wʋ́ pa ba lwarɩ ba na wʋ́ kɩ te ba taa kwarɩ Baŋa-Wɛ yɩ ba tʋŋɩ ba tɔgɩ DƖ zaasɩm dɩm maama lanyɩranɩ. 13 Ba kwaga kam dɩ jwa wʋ́ ba ba cəgi Wɛ niə yam yɩ ba ya yəri-ya. Bantʋ dɩ maŋɩ sɩ ba lwarɩ ba na wʋ́ kɩ te ba taa kwarɩ á Tu Baŋa-Wɛ dɩm, maŋa kalʋ maama á na wʋ́ taá zʋʋrɩ tɩga kalʋ nɩ á na lagɩ á bɛ Zʋrdɛn bugə kam á joŋi sɩ á taá te tɩn.»
Wɛ na brɩ Moyisi te DƖ kweeli tɩn
14 Baŋa-Wɛ laan ma ta dɩ Moyisi DƖ wɩ:
«Kʋ gɛ fɩɩn sɩ n tɩ. Bəŋi Zozwe sɩ á laan ba á zʋ jero-vwe dɩm nɩ sɩ á tiŋ‑o sɩ o ji á yigə tu.»
Moyisi dɩ Zozwe ma vu ba zʋ vwe dɩm nɩ. 15 Kunkoŋo na zɩgɩ dəki tɩn ma ba kʋ dɔgɩ vwe dɩm ni dɩm nɩ, yɩ Baŋa-Wɛ zɩgɩ kunkoŋo kʋm wʋnɩ. 16 DƖ ma ta dɩ Moyisi DƖ wɩ:
«Kʋ bá daanɩ sɩ n tɩ. Nmʋ tʋʋnɩ dɩm kwaga nɩ nan, nɔɔna bantʋ bam wʋ́ zaŋɩ ba yagɩ amʋ ba vu sɩ ba taa zuli tɩga kalʋ ba na lagɩ ba zʋ tɩn wa-yɔɔrʋ. Baá lɔ amʋ kwaga nɩ yɩ ba daarɩ ba cɔgɩ ni-gonim dɩlʋ a na kɩ dɩ ba tɩn. 17 Kʋ na kɩ kʋntʋ, a banɩ wʋ́ zaŋɩ ba baŋa nɩ lɩla, pa a ma a kwaga a ya-ba. Amʋ yigə bá taa wʋ ba wʋnɩ pa ba na cɔgɩm.d Yaara dɩ cana zanzan na wʋ́ ba ba baŋa nɩ tɩn, baá ta nɩnɛɛnɩ, ‹Bɛŋwaanɩ mʋ yaara yantʋ wʋ dɩbam baŋa nɩ? Kʋ daɩ dɩbam Tu Wɛ dɩm na yagɩ dɩbam tɩn ŋwaanɩ mʋ na?› 18 Dɛ dɩm kʋntʋ nɩ, amʋ yigə brɩ ka bá ta wʋ ba wʋnɩ, ba na tʋŋɩ lwarɩm dɩlʋ yɩ ba pipiri ba vu ba zuli wa-yɔɔrʋ tɩn ŋwaanɩ.
19 Kʋntʋ ŋwaanɩ, pʋpʋnɩ-na ləŋə kantʋ, sɩ nmʋ, Moyisi, laan kwe-ka n ma n zaasɩ Yisɩrayɛlɩ tiinə bam sɩ ba wanɩ ba taa leeni-ka. Ləŋə kam wʋ́ taa yɩ maana mʋ amʋ dɩ bantʋ laŋa nɩ nɩ ba tusi. 20 Amʋ lagɩ a kalɩ-ba a ja zʋ tɩ-ŋʋŋa kantʋ na ywəmmə dɩ varɩm dɩ kɔnɔ, nɩ amʋ na pooli dɩ ba nabaara sɩ a kɩ te tɩn mʋ. Ba nan na zʋ ba jǝni da, baá taa naɩ wʋdiu ba di ba sui pa ba nu lanyɩranɩ, yɩ ba daarɩ ba pipiri ba taa zuli wa-yɔɔrʋ. Baá vɩn amʋ ba daarɩ ba cɔgɩ ni-gonim dɩlʋ a na kɩ dɩ ba tɩn. 21 Yaara dɩ cana zanzan na tʋ ba baŋa nɩ, ba laan wʋ́ guli ləŋə kantʋ gulə sɩ ka taa yɩ maana mʋ nɩ ba tusi. A maŋɩ a lwarɩ kʋlʋ ba na bʋŋɩ ba kana nɩ tɩn yɩ a ta wʋ jaanɩ-ba a zʋ tɩga kalʋ a na pooli sɩ a pa-ba tɩn wʋnɩ.»
22 Dɛ dɩm kʋntʋ nɩ, Moyisi ma pʋpʋnɩ ləŋə kam yɩ o kwe-ka o zaasɩ Yisɩrayɛlɩ tiinə bam. 23 Baŋa-Wɛ ma pa Nun bu Zozwe ni yɩ DƖ wɩ: «Pa n bɩcarɩ kɩ dam sɩ n tan jɩgɩ baarɩ. Nmʋ mʋ lagɩ n tɔgɩ Yisɩrayɛlɩ tiinə bam yigə sɩ á vu á zʋ tɩga kalʋ nɩ a na pooli sɩ a pa-ba tɩn. Amʋ nan wʋ́ taa wʋ nmʋ tee nɩ.»
24 Moyisi ma pʋpʋnɩ Wɛ niə yam maama nyɔ o kɩ tɔnɔ nɩ. 25 O na ti tɩn, o ma ta dɩ Levi tiinə balʋ na zeeri Baŋa-Wɛ ni-gonim daka kam tɩn o wɩ: 26 «Joŋi-na Wɛ niə tɔnɔ kʋntʋ á ja vu á tiŋi á Tu Baŋa-Wɛ dɩm ni-gonim daka kam təŋə nɩ. Kʋʋ́ taa tigi da mʋ sɩ kʋ taa yɩ maana nɩ abam Yisɩrayɛlɩ tiinə bam tusi. 27 A ye abam maama na jɩgɩ wʋ-dɛɔ yɩ á zwa dɩ ba ni te tɩn. Nii a ta na ŋwɩ a wʋ abam tee nɩ, yɩ á maŋɩ á vɩn Baŋa-Wɛ ni dɩm, sɩ a na tɩga, kʋ bá dwǝni kʋntʋ na? 28 Nan bəŋi-na á dwiə yam maama nakwa dɩ á dɩdɛɛra sɩ ba la daanɩ sɩ a ŋɔɔnɩ wǝǝnu tɩntʋ dɩ ba sɩ ba ni. A lagɩ a kwe wɛyuu kʋm dɩ tɩga kam baŋa maama mʋ, sɩ tɩ taa yɩ maana bantʋ dɩ Baŋa-Wɛ tɩtarɩ nɩ. 29 A ye nɩ amʋ tʋʋnɩ dɩm kwaga nɩ, á wʋ́ digimi á tɩtɩ dɩ wo-zɔɔna, yɩ á daarɩ á vɩn Wɛ niə yalʋ a na brɩ abam tɩn. Jwa seeni á wʋ́ tʋŋɩ lwarɩm kikiə á cɔgɩ Baŋa-Wɛ yigə yɩ á zuli wǝǝnu tɩlʋ á na mɛ á jɩan á kɩ tɩn. Baŋa-Wɛ banɩ wʋ́ zaŋɩ pa cam tʋ abam baŋa nɩ.»
Moyisi ləŋə kam
30 Moyisi laan ma leeni ləŋə kantʋ maama o vu o kweeli yɩ Yisɩrayɛlɩ tiinə kɔgɔ kʋm maama cəgi: