Ba na wʋ́ kɩ te sɩ Baŋa-Wɛ joori DƖ kɩ-ba lanyɩranɩ
30
«Amʋ laan nan brɩ abam Wɛ yu-yoŋo kʋm dɩ DƖ kampwəl-balwara kam na wʋ́ taa yɩ te tɩn. Wǝǝnu tɩntʋ maama na sɩɩnɩ tɩ kɩ abam baŋa nɩ, yɩ á Tu Baŋa-Wɛ dɩm na zəli abam DƖ jagɩ sɩ á taá zʋʋrɩ dwi-gɛ tiinə tɩtarɩ nɩ, á wʋ́ guli tɩ gulə. 2 Abam dɩ á kwaga kam laan na pipiri á joori á Tu Baŋa-Wɛ dɩm te yɩ á sɛ DƖ ni dɩ á wʋbʋŋa maama dɩ á wʋʋ maama, nɩ amʋ zɩm na brɩ abam te maama tɩn, 3 Baŋa-Wɛ wʋ́ duri á ŋwaŋa yɩ DƖ joori DƖ kɩ abam lanyɩranɩ. DƖ wʋ́ pa á zɩgɩ tɩɩnɩ dɩlʋ wʋnɩ DƖ na jagɩ abam tɩn sɩ á joori yo. 4 Á na maŋɩ á jagɩ mʋ a zʋ lʋgʋ kʋm gugwəəru yigə yigə dɩ, Baŋa-Wɛ wʋ́ la abam dáanɩ DƖ ja joori yo. 5 DƖ wʋ́ pa á joori á zʋ tɩga kalʋ á nabaara dɛɛn na te tɩn, sɩ abam tɩtɩ dɩ taa te-ka. DƖ ta wʋ́ pa á fɔgɩ á puli á dwǝni á nabaara bam dɛɛn na yɩ te tɩn. 6 Baŋa-Wɛ wʋ́ kwɛ abam dɩ á biə bɩcara, sɩ á taá waɩ á soe‑DƖ dɩ á wʋbʋŋa maama, dɩ á wʋʋ maama, sɩ á daanɩ tɩga kam nɩ. 7 DƖ ta wʋ́ pa lwarɩm dɩlʋ DƖ ya na sɔɔlɩ DƖ kɩ abam baŋa nɩ tɩn yagɩ abam sɩ dɩ pipiri dɩ ba á dʋna baŋa nɩ, dɩ balʋ maama na culi abam tɩn. 8 Á wʋ́ joori á sɛ Baŋa-Wɛ kwǝrǝ yɩ á tʋŋɩ á tɔgɩ DƖ niə yam maama amʋ na pɛ abam zɩm tɩn. 9 Á Tu Baŋa-Wɛ dɩm wʋ́ pa á ŋwɩa kɩ lanyɩranɩ yɩ á tɩtʋŋa maama taa jɩgɩ nyɔɔrɩ. DƖ ta wʋ́ pa á taá jɩgɩ biə zanzan, dɩ vara zanzan, dɩ wʋdiiru zanzan. Kʋʋ́ poli DƖ wʋʋ sɩ DƖ kɩ abam lanyɩranɩ, nɩ DƖ yi dɛɛn na pagɩ á nabaara bam baŋa nɩ te tɩn mʋ. 10 Abam nan maŋɩ sɩ á sɛ á Tu Baŋa-Wɛ dɩm kwǝrǝ yɩ á tʋŋɩ á tɔgɩ DƖ niə dɩ DƖ kwiə yalʋ na pʋpʋnɩ ya tiŋi Wɛ niə tɔnɔ kʋntʋ nɩ tɩn mʋ. Á maŋɩ sɩ á pipiri á joori DƖ te mʋ dɩ á wʋbʋŋa maama dɩ á wʋʋ maama.Ŋwɩa dɩ tʋʋnɩ taanɩ
11 Wɛ niə yalʋ amʋ na pɛ abam zɩm tɩn ba tiini ya dwe á jam. 12 Kʋ daɩ nɩ ya tigi wɛyuu nɩ mʋ, sɩ á taá bwe da-tee nɩ á wɩ: ‹Wɔɔ mʋ wʋ́ wanɩ o din o ja-ya o joori o ba o pa dɩbam, sɩ dɩ́ wanɩ dɩ́ ni sɩ dɩ daarɩ dɩ́ sɛ?› 13 Kʋ daɩ nɩ ya wʋ nɩnɩʋ kʋm kakam daa nɩ, sɩ á taá bwe nɩnɛɛnɩ, ‹Wɔɔ mʋ wʋ́ yɛ na o bɛ nɩnɩʋ kʋm o ja-ya o joori o ba o pa dɩbam, sɩ dɩ́ wanɩ dɩ́ ni yɩ dɩ́ daarɩ dɩ sɛ?› 14 Awo, ya zɩgɩ yo mʋ ya bwələ dɩ abam. Ya maŋɩ ya wʋ á ni nɩ dɩ á bɩcara nɩ. Kʋntʋ tɩn, sɛ-na-ya lanyɩranɩ.a
Twǝri-na ŋwɩa
15 Amʋ zɩm pɛ abam cwǝŋǝ mʋ sɩ á kuri lanyɩranɩ dɩ balɔrɔ tɩtarɩ nɩ kʋlʋ á na lagɩ tɩn, sɩ á ta kuri ŋwɩa dɩ tʋʋnɩ dɩ tɩtarɩ nɩ. 16 Amʋ zɩm pɛ abam ni sɩ á taá soe á Tu Baŋa-Wɛ dɩm sɩ á daarɩ á taá tɔgɩ DƖ cwe sɩm, yɩ á sɛ DƖ niə yam dɩ DƖ zaasɩm dɩm dɩ o cullu tɩm maama. Á na sɩɩnɩ á kɩ kʋntʋ, Baŋa-Wɛ wʋ́ kɩ abam yu-yoŋo pa á fɔgɩ á puli tɩga kalʋ á na lagɩ á zʋ á jǝni ka wʋnɩ tɩn. 17 Kʋ daarɩ, á na lɔgɩ DƖ kwaga nɩ yɩ a vɩn DƖ niə yam, yɩ á fra na zʋ wa-yɔɔrʋ sɩ á zuli-tɩ, 18 taá ye-na nɩ á wʋ́ na cɔgɩm sɩ á ti lɩla. Á na ve á bɛ Zʋrdɛn bugə kam sɩ á zʋ tɩga kam á taá te, á bá daanɩ ka wʋnɩ yɩ á tɩ.
19 Zɩm dɛ dɩntʋ nɩ a kwe wɛyuu kʋm dɩ tɩga kam baŋa maama mʋ, sɩ tɩ taa yɩ maana abam dɩ Baŋa-Wɛ tɩtarɩ nɩ. A pɛ abam cwǝŋǝ sɩ á kuri ŋwɩa dɩ tʋʋnɩ tɩtarɩ nɩ, sɩ á ta kuri Wɛ yu-yoŋo dɩ DƖ kampwəl-balwara kam tɩtarɩ nɩ. Kʋntʋ tɩn, twəri-na ŋwɩa, sɩ abam dɩ á kwaga kam wanɩ á taá ŋwɩ: 20 sɩ á daarɩ á taá soe á Tu Baŋa-Wɛ dɩm á kwǝri á sɛ DƖ kwǝrǝ yɩ á salɩ‑DƖ. Baŋa-Wɛ yɩ dɩlʋ na wʋ́ pa abam mʋmwɛ-dɛɛrɩ, nɩ á na zʋ tɩga kalʋ DƖ na goni ni dɩ á nabaara Abraham dɩ Yizakɩ dɩ Zakɔbɩ sɩ DƖ pa-ba tɩn wʋnɩ.»