Ba joori ba kɩ ni-gonim dɩ Wɛ
29
Baŋa-Wɛ dɛɛn na lagɩ DƖ goni ni dɩ Yisɩrayɛlɩ tiinə bam Moabɩ laŋa nɩ tɩn, taanɩ dɩlʋ DƖ na tagɩ dɩ Moyisi sɩ o lwǝni o brɩ-ba tɩn mʋ tɩntʋ. Tɩntʋ dɩ nan ta lagɩ tɩ tɔgɩ tɩ wǝli dɩ ni-gonim dɩlʋ Baŋa-Wɛ na maŋɩ DƖ kɩ o pa-ba Sinayi piu yuu nɩ tɩn mʋ. 2 Moyisi ma bəŋi Yisɩrayɛlɩ tiinə bam maama yɩ o ta dɩ ba o wɩ:«Abam tɩtɩ maŋɩ á na Baŋa-Wɛ dɛɛn na tʋŋɩ kʋlʋ dɩ Ezipi Pa-farʋ wʋm dɩ o nakwa dɩ o tɩʋ kʋm maama tɩn. 3 Á yiǝ mʋ nɛ cana yalʋ, dɩ wo-kɩnkagɩla yalʋ, dɩ wo-kamunnu tɩlʋ Baŋa-Wɛ na kɩ DƖ ma maŋɩ Ezipi tiinə bam DƖ nii tɩn. 4 Dɩ zɩm maama dɩ, DƖ ta wʋ pɛ abam yiǝ pʋʋrɩ sɩ á wanɩ á ni kʋlʋ maama á na nɛ tɩn kuri.
5 Baŋa-Wɛ tagɩ DƖ wɩ: ‹Bɩna fiinna mʋ a tɔgɩ abam yigə kagʋa kam wʋnɩ yɩ dɩ́ veǝ. Á gwaarʋ nan wʋ zarɩmɩ, yɩ á natra dɩ wʋ cɔgɩ. 6 Á na beeri kʋntʋ tɩn, á wʋ di dɩpɛ yɩ á wʋ nyɔgɩ sana. Dɩ kʋ dɩ, a wǝli abam sɩ á wanɩ á lwarɩ nɩ amʋ mʋ yɩ abam Tu Baŋa-Wɛ dɩm.›
7 Dɩ́ na yi yo seeni tɩn, Hesebon tɩʋ Pɛ Sɩhɔn dɩ Basan tɩʋ Pɛ Ɔgɩ ma nuŋi sɩ ba zaŋɩ najara dɩ dɩbam. Dɩ́ dɛɛn ma wanɩ-ba. 8 Dɩ́ ma kwe ba tɩga kam dɩ́ pɔɔrɩ dɩ́ pa Ruban dwi dɩm, dɩ Gadɩ dwi dɩm, dɩ Manasɩ dwi cicoro kʋm sɩ ba taa te.
9 Taá ye-na sɩ á tɔgɩ kʋlʋ maama na pʋpʋnɩ kʋ tiŋi ni-gonim dɩm kʋntʋ ŋwaanɩ tɩn, sɩ kʋ pa kʋlʋ maama á na lagɩ á tʋŋɩ tɩn taa kɩ lanyɩranɩ kʋ pa abam. 10 Zɩm dɛ dɩm nɩ, abam maama zɩgɩ á Tu Baŋa-Wɛ dɩm yigə nɩ mʋ, dɩ á yuutiinə, dɩ á nakwa, dɩ á dɩdɛɛra, dɩ Yisɩrayɛlɩ baara bam maama, 11 kʋ ta wǝli dɩ á kaana, dɩ á biə, dɩ vərə balʋ na zʋʋrɩ dɩ abam yɩ ba goni dɛ ba daarɩ ba mɔɔnɩ na ba zɩŋɩ ba paɩ abam tɩn maama. 12 Á tu sɩ á sɛ ni-gonim dɩlʋ á Tu Baŋa-Wɛ dɩm na dugi durə DƖ ma kɩ dɩ abam zɩm tɩn mʋ. 13 Ni-gonim dɩm kʋntʋ brɩ nɩ á sɩɩnɩ á yɩ DƖ nɔɔna bam sɩ DƖ dɩ taa yɩ abam Tu Wɛ dɩm, nɩ DƖ na maŋɩ DƖ pooli te dɩ abam, dɩ á nabaara Abraham, dɩ Yizakɩ, dɩ Zakɔbɩ tɩn. 14-15 Kʋ daɩ abam balʋ zɩm na zɩgɩ dɩbam Tu Baŋa-Wɛ dɩm yigə nɩ tɩn yɩranɩ mʋ DƖ lagɩ DƖ du durə DƖ ma kɩ ni-gonim dɩm kʋntʋ dɩ ba, sɩ kʋ ta yɩ á kwaga kam dɩ mʋ DƖ lagɩ DƖ kɩ DƖ pa-ba.
16 Á wʋ́ wanɩ á guli dɩ́ dɛɛn na zʋʋrɩ Ezipi nɩ yɩ dɩ́ daarɩ dɩ́ tɔgɩ tɩɩnɩ dɩdonnǝ wʋnɩ dɩ́ kɛ dɩ́ ba yo yɩ kʋ kɩ dɩbam te tɩn. 17 Á nɛ dwiə yantʋ tiinə na zuli wo-zɔɔna dɩ jwǝnǝ yalʋ ba na mɛ dɛ, dɩ kandwa, dɩ səbu-poŋo, dɩ səbu-sɩŋa ba ma kɩ tɩn. 18 Taá ye-na sɩ abam wʋlʋwʋlʋ yɩ lɔ dɩ́ Tu Baŋa-Wɛ dɩm kwaga nɩ sɩ o daarɩ o vu o zuli dwi-gɛ tiinə jwǝnǝ. Kʋ na yɩ abam balʋ zɩm na wʋra tɩn wʋnɩ baarʋ, naa kaanɩ, naa sɔŋɔ kʋlʋ, naa dwi dɩlʋ maama, sɩ á yɩ zaŋɩ á kɩ kʋntʋ.a
Wʋlʋ maama na tɔgɩ jwə-yɔɔrʋ, kʋ tu wʋ́ taa nyɩ dɩ tiu kugu kʋlʋ na bɩgɩ sɩ kʋ laan ba kʋ lə tiu bi-balwaarʋ tɩn mʋ. 19 O waɩ o ni ni-gonim dɩntʋ na brɩ wǝǝnu tɩlʋ tɩn yɩ o bʋŋɩ o yuu nɩ o wɩ: o ta wʋ́ na lanyɩranɩ dɩ o na maŋɩ o jɩgɩ yi-dɛɛrɩ yɩ o ba tɔgɩ Wɛ cwǝŋǝ tɩn dɩ. Kʋ tu nan wʋ́ ja cɔgɩm o ba abam maama baŋa nɩ, nɔn-ŋʋna dɩ nɔn-balwaarʋ maama. 20 Baŋa-Wɛ bá yagɩ nɔɔnʋ wʋm kʋntʋ lwarɩm DƖ ma cɛ-o. DƖ ban-zɔŋɔ za mʋ wʋ́ tarɩgɩ kʋ tu baŋa nɩ, pa cana yalʋ maama na pʋpʋnɩ ya tiŋi tɔnɔ kʋntʋ wʋnɩ tɩn ba kʋ tu baŋa nɩ sɩ kʋ taa nii o yɩrɩ na saarɩ lʋgʋ baŋa maama nɩ. 21 Baŋa-Wɛ wʋ́ lɩ-o Yisɩrayɛlɩ dwiə yam maama wʋnɩ sɩ o tiini o na cɔgɩm. Kampwəl-balwaarʋ tɩlʋ maama na pʋpʋnɩ Wɛ niə tɔnɔ kʋm wʋnɩ DƖ ni-gonim dɩm ŋwaanɩ tɩn maa wʋ́ tʋ kʋ tu baŋa nɩ. 22 Abam kwaga kam dɩ vərə balʋ na nuŋi yigə yigə tɩn jwa wʋ́ na cɔgɩm dɩlʋ Baŋa-Wɛ na wʋ́ pa dɩ tʋ tɩga kam baŋa nɩ sɩ yaara zanzan ta wʋra tɩn. 23 Á tɩga kam maama wʋ́ cɔgɩ, yɛ dɩ ciribi na wʋ́ li-ka tɩn ŋwaanɩ. Ba bá wanɩ kʋlʋkʋlʋ ba du ka wʋnɩ. Wʋdiiru dɩ bá kɩ da, yɩ gaarʋ tɩtɩ bá wanɩ tɩ nuŋi. Laŋa kam maama wʋ́ taa nyɩ dɩ Sodɔm, dɩ Gomɔrɩ, dɩ Adema, dɩ Seboyim tɩɩnɩ dɩm dɛɛn na cɔgɩ te, Baŋa-Wɛ ban-zɔŋɔ kʋm ŋwaanɩ tɩn. 24 Dwi-gɛ tiinə maama na nɛa, baá taa bwe nɩnɛɛnɩ, ‹Bɛ laan mʋ kɩ yɩ Baŋa-Wɛ cɔgɩ ba tɩga kam kʋntʋ doŋ? Bɛŋwaanɩ mʋ DƖ banɩ tiini dɩ zaŋɩ dɩ ba kʋntʋ?›
25 Nɔɔna wʋ́ lǝri-ba ba wɩ:
‹Kʋʋ́ taa yɩ nɩ: Baŋa-Wɛ nɔɔna bam cɔgɩ ni-gonim dɩlʋ DƖ na kɩ dɩ ba maŋa kalʋ DƖ na jaanɩ-ba DƖ nuŋi Ezipi nɩ tɩn, dɩ DƖ na yɩ ba nabaara Wɛ dɩm tɩn. 26 Dɩ kʋntʋ dɩ, ba dɛɛn yagɩ-DƖ ba daarɩ ba zuli wa-yɔɔrʋ mʋ, tɩ na yɩ wa yalʋ ba ya na yǝri, yɩ Wɛ wʋ sɛ sɩ ba zuli-ya tɩn. 27 Kʋntʋ laan mʋ pɛ Baŋa-Wɛ banɩ zaŋɩ ba baŋa nɩ, yɩ DƖ pa kampwəl-balwaarʋ tɩlʋ maama na pʋpʋnɩ tɔnɔ kʋntʋ nɩ tɩn ba ba tɩga kam baŋa nɩ. 28 Baŋa-Wɛ ma vuuri-ba DƖ lɩ ba tɩga kam nɩ, yɩ DƖ laan dʋlɩ-ba DƖ yagɩ sa-tɩʋ nɩ, DƖ ban-lʋm dɩm ŋwaanɩ. Dáanɩ mʋ ba ta wʋra dɩ zɩm maama.›
29 Wəənu tɩlʋ na səgi tɩn wʋra, tɩ na maŋɩ tɩ wʋ dɩ́ Tu Baŋa-Wɛ dɩm wʋbʋŋa nɩ, sɩ kʋ daarɩ zaasɩm dɩlʋ DƖ na vɩɩrɩ DƖ pa dɩbam tɩn, dɩntʋ mʋ yɩ dɩbam dɩ dɩ́ kwaga kam nyɩm sɩ kʋ taa ve maŋa maama, sɩ dɩ́ wanɩ dɩ́ taa tɔgɩ DƖ niə yam maama.»