Zozwe Tɔnɔ
Zozwe jigi Yisɩrayɛlɩ tiinə bam yigə tu
1
Wɛ tɩntʋŋnʋ Moyisi tʋʋnɩ dɩm kwaga nɩ, Baŋa-Wɛ ma ŋɔɔnɩ dɩdaanɩ Nun bu Zozwe. Wʋntʋ dɛɛn mʋ yǝni o wǝli Moyisi. Baŋa-Wɛ maa wɩ:2 «Amʋ tɩntʋŋnʋ Moyisi tɩga. Nmʋ laan nan zaŋɩ n tʋ amʋ nɔɔna Yisɩrayɛlɩ tiinə bam yigə nɩ sɩ á bɛ Zʋrdɛn bugə kam á zʋ tɩga kalʋ amʋ na wʋ́ pa abam tɩn. 3 Amʋ lagɩ a kɩ kʋlʋ a dɛɛn na tagɩ dɩdaanɩ Moyisi tɩn mʋ. Abam na nuŋi á yi je sɩlʋ maama, amʋ wʋ́ kwe tɩga kam a pa abam. 4 Abam laŋa kam sisəm wʋ́ zɩgɩ kagʋa kalʋ na wʋ jagwiə seeni tɩn, ka tʋlɩ kʋntʋ ka yi Liban pweeru tɩm na wʋ jazɩm baŋa seeni tɩn. Ka wa-puli seeni sisəm dɩm maa wʋ́ zɩgɩ Efratɩ bu-fara kam nɩ ka tɔgɩ Hɛtɩ tiinə tɩga kam maama seeni, sɩ ka laan taa ve Mediterane nɩnɩʋ kʋm na wʋ wa-zʋʋrɩ seeni tɩn.a 5 Amʋ wʋ́ taa wʋ nmʋ tee nɩ maŋa maama, nɩnɛɛnɩ a dɛɛn na wʋ Moyisi tee nɩ te tɩn. Amʋ bá fɔgɩ a yagɩ‑m.b Nɔɔn-nɔɔnʋ dɩ nan bá wanɩ o dwəni dɩ nmʋ.
6 Kɩ dam n kɩ n tɩtɩ kuri nɩ, sɩ n daarɩ n ta n jɩgɩ baarɩ. Bɛŋwaanɩ, nmʋ mʋ lagɩ n tɔgɩ nɔɔna bam yigə sɩ á zʋ á joŋi tɩga kalʋ a na goni ni sɩ a pa á nabaara bam tɩn. 7 Yɔɔrɩ n kɩ dam n tɩtɩ kuri nɩ, sɩ n daarɩ n tiini n ta n jɩgɩ baarɩ. Nan ta sɛ Wɛ niə yalʋ amʋ tɩntʋŋnʋ Moyisi na brɩ-m tɩn. Yɩ vri n kwaga n ya-ya, sɩ yantʋ mʋ wʋ́ pa‑m yigə-vəŋə. 8 Maŋa maama, sɩ n ta n zaasɩ Wɛ niə tɔnɔ kʋm, sɩ n daarɩ n zʋ ya wʋ n bʋŋɩ ya wʋbʋŋa. Nmʋ ma n na sɛ o niə yam na brɩ te maama tɩn, nmʋ wʋ́ sɩɩnɩ n na yigə-vəŋə cɩga cɩga. 9 Amʋ nan maŋɩ a ta dɩ nmʋ nɩ n kɩ dam n kɩ n tɩtɩ kuri nɩ sɩ n ta ta n jɩgɩ baarɩ. Yɩ ta n fʋna, nan yɩ pa n wʋʋ ga baarɩ. Bɛŋwaanɩ, amʋ mʋ yɩ nmʋ Tu Baŋa-Wɛ dɩm. Je sɩlʋ maama nmʋ na wʋ́ vu tɩn, amʋ wʋ́ taa wʋra dɩ nmʋ.»c
10 Zozwe laan ma pa Yisɩrayɛlɩ tiinə dɩdɛɛra bam ni o wɩ: 11 «Ve-na nɔɔna bam tigə je sɩm nɩ, sɩ á ta dɩ ba nɩ: ‹Ti-na á wʋdiiru yigə sɩ da yatɔ maŋa nɩ mʋ á lagɩ á bɛ Zʋrdɛn bugə kam sɩ á zʋ tɩga kalʋ abam Tu Baŋa-Wɛ dɩm na goni ni sɩ DƖ pa abam tɩn.› »
12 Zozwe ta ma ta dɩ Ruban dwi dɩm, dɩ Gadɩ dwi dɩm dɩdaanɩ Manasɩ dwi cicoro kʋm o wɩ: 13 «Guli-na Wɛ tɩntʋŋnʋ Moyisi dɛɛn na tagɩ te dɩdaanɩ abam tɩn. O dɛɛn wɩ: ‹Abam Tu Baŋa-Wɛ lagɩ DƖ pa abam tɩga kantʋ mʋ sɩ á jǝni da.› 14-15 Nan pa-na sɩ á kaana, dɩ á biə, dɩdaanɩ á vara bam maŋɩ yo seeni. Abam nɔɔna balʋ maama na ye najara kǝm tɩn maa wʋ́ vɔ ba najara zɩla diŋ-diŋ, yɩ ba tɔgɩ dɩ á donnǝ Yisɩrayɛlɩ tiinə bam sɩ á bɛ Zʋrdɛn bugə kam á vu á wǝli bantʋ sɩ ba wanɩ ba joŋi tɩga kalʋ na wʋ bugə kam bubɛ dɩlʋ na jeeri wa-zʋʋrɩ seeni yɩ abam Tu Baŋa-Wɛ dɩm kwe DƖ pa-ba tɩn. Wɛ maa na pɛ Yisɩrayɛlɩ tiinə bam maama ba jǝŋǝ je, sɩ abam dɩ laan joori á tɩga kam na wʋ Zʋrdɛn bubɛ dɩlʋ na jeeri wa-puli seeni yɩ Wɛ tɩntʋŋnʋ Moyisi kwe o pa abam tɩn wʋnɩ.»d
16 Ba dɩ ma lǝr-o ba wɩ: «Dɩ́ wʋ́ sɛ nmʋ ni dɩm maama n na pɛ dɩbam tɩn, yɩ n na tʋŋɩ dɩbam je sɩlʋ maama, dɩ́ wʋ́ vu. 17 Dɩbam wʋ́ taa sɛ nmʋ ni maŋa maama mʋ nɩnɛɛnɩ dɩ́ dɛɛn na sɛ Moyisi ni te tɩn.e Dɩ́ nan tɩɩnɩ nɩ nmʋ Tu Baŋa-Wɛ dɩm wʋ́ taa wʋ n tee nɩ nɩnɛɛnɩ DƖ dɛɛn na wʋra dɩ Moyisi te tɩn. 18 Wʋlʋ maama nan na gooni‑m yɩ o vɩn sɩ o sɛ nmʋ taanɩ, sɩ ba gʋ-o. Kʋntʋ ŋwaanɩ, yɔɔrɩ n kɩ dam n tɩtɩ kuri nɩ, sɩ n daarɩ n ta n jɩgɩ baarɩ dɩ n tɩtʋŋa yam.»