Rahabɩ wǝli Yisɩrayɛlɩ tiinə badonnǝ
2
Yisɩrayɛlɩ tiinə bam dɛɛn maŋɩ Sitim nɩ mʋ ba te ba vwə. Ba na wʋra tɩn mʋ Zozwe lɩ nɔɔna bale o tʋŋɩ-ba yɩ o wɩ: «Ve-na á ŋɔ á nii Kaanan tɩga kam maama, kʋ fɔgɩ kʋ daɩ Zeriko tɩʋ kʋm.» Nɔɔna bam ma sɩɩnɩ ba vu ba yi tɩʋ kʋm. Ba ma zʋ ka-boro dɩdʋa sɔŋɔ ba pəni. Kaanɩ wʋm yɩrɩ mʋ Rahabɩ.2 Zeriko tɩʋ Pɛ wʋm ma ni sɩswɩa nɩ: «Yisɩrayɛlɩ tiinə badonnǝ mʋ tu dɩbam tɩʋ tɩtɩɩ dɩntʋ, sɩ ba ŋɔ-kʋ ba nii.» 3 Pɛ wʋm ma pa kwǝrǝ sɩ ba ta dɩ Rahabɩ ba wɩ: «Pa dɩ́ jɩŋa zʋ nɔɔna balʋ na tuǝ ba zʋ nmʋ sɔŋɔ kʋm nɩ tɩn, bɛŋwaanɩ ba bʋŋɩ sɩ ba ŋɔ dɩ́ tɩʋ kʋm mʋ ba nii sɩ ba di dam dɩbam baŋa nɩ.»
4 Rahabɩ dɛɛn nan ya səgi nɔɔna bam mʋ. O ma joori o ləri Pɛ wʋm kwǝrǝ kam o wɩ: «Nɔɔna sɩɩnɩ ba ba yo seeni, amʋ nan yǝri ba na nuŋi mɛ tɩn. 5 Wɛ ya na jɩgɩ dɩ zʋʋrɩ yɩ kʋ maŋɩ sɩ ba pɩ tɩʋ kʋm bwəəru tɩm maŋa kalʋ tɩn, mʋ ba nuŋi amʋ sɔŋɔ nɩ ba maa viirǝ. Amʋ nan daa wʋ lwarɩ ba na kwe cwǝŋǝ kalʋ tɩn. Dɛ dɩlʋ á na kɩ lɩla yɩ á pɛ ba kwaga á pu, á wʋ́ ja-ba cwǝŋǝ nɩ.» 6 O dɛɛn nan ya jaanɩ-ba mʋ o di o sɔŋɔ kʋm nayuu, yɩ o kwe-ba o səgi kasʋrʋ kuri nɩ. 7 Pɛ wʋm nɔɔna bam ma tɔgɩ cwǝŋǝ kalʋ na ve je sɩlʋ ba na yǝni ba tɔgɩ da ba bɛ Zʋrdɛn bugə kam tɩn. Ba na yɔɔrɩ ba nuŋi tɩʋ kʋm wʋnɩ sɩ ba zəli-ba tɩn, mʋ ba pɩ kʋ ni dɩm.
8 Tɩtɩɩ dɩm kʋntʋ nɩ Rahabɩ dɛɛn daa ma joori o din nɔɔna bam te, yɩ ba ta ba dɔa. 9 O ma ta dɩ ba o wɩ: «Amʋ ye nɩ Baŋa-Wɛ kwe tɩga kantʋ mʋ DƖ pa abam. Dɩbam maama yɩra saɩ mʋ abam ŋwaanɩ, yɩ nɔɔna maama yo seeni tiini ba fʋna dɩ abam.a 10 Dɩbam maŋɩ dɩ́ ni nɩ á dɛɛn na maa nuŋi Ezipi nɩ tɩn, Baŋa-Wɛ pɛ Nanɩ-sʋŋʋ kʋm pwɛ mʋ yɩ abam nɔnɩ tɩ-kʋra baŋa nɩ á kɛ. Dɩ́ ta ye abam na kɩ te yɩ á yɔɔrɩ á gʋ Sɩhɔn dɩ Ɔgɩ tɩn. Bantʋ mʋ yɩ Amɔɔrɩ tiinə pwa bale bam na zʋʋrɩ Zʋrdɛn bugə kam wa-puli seeni tɩn. 11 Nii-na mʋ! Dɩbam na ni wǝǝnu tɩntʋ maama tɩn, mʋ dɩ́ baarɩ maama je, yɩ nɔɔn-nɔɔnʋ daa ba jɩgɩ dam sɩ o jeeri abam dɩ najara. Cɩga tɩn, abam Tu Baŋa-Wɛ dɩm yɩ Wɛ-kamunu mʋ, yɩ DƖ te wɛyuu dɩdaanɩ tɩga baŋa maama. 12 Kʋntʋ ŋwaanɩ, kwe-na Baŋa-Wɛ yɩrɩ dɩm á ma á pooli dɩ amʋ nɩ: abam wʋ́ kɩ amʋ digə tiinə bam lanyɩranɩ, nɩnɛɛnɩ amʋ dɩ na kɩ abam lanyɩranɩ te tɩn. Ta brɩ-nɩ-na mɩmaŋɩ sɩ a ma a lwarɩ nɩ: 13 abam bá sɛ sɩ á nɔɔna bam cɔgɩ amʋ, dɩ a ko, dɩ a nu, dɩ a nabwa, dɩ a cʋrrʋ maama, dɩ ba dɩ kwaga kam, sɩ ba yɩ ga ba ŋwɩa.»
14 Nɔɔna bam dɩ ma lǝr-o ba wɩ: «Nmʋ na loori n wʋ pɛ dɩbam kǝm dɩntʋ nuŋi pooni, dɩbam dɩ pooli wɩ: Baŋa-Wɛ na kwe je sɩntʋ DƖ pa dɩbam, dɩ́ wʋ́ kɩ-m lanyɩranɩ. Wɛ wʋ́ lɩ dɩ́ ŋwɩa nɩnɛɛnɩ dɩ́ na vɩn sɩ dɩ́ kɩ dɩ́ na tagɩ te dɩ nmʋ tɩn.»b
15 Rahabɩ sɔŋɔ kʋm dɛɛn ya lɔgɩ tɩʋ kʋm kəbrə yɩra nɩ mʋ. O ma le ŋʋna pa ka tɔgɩ takoro ni nɩ sɩ nɔɔna bam tɔgɩ-ka ba tu tɩga. 16 O ya maŋɩ o ta dɩ ba o wɩ: «Magɩ-na á yum pweeru laŋa kam seeni, sɩ balʋ na zəli abam tɩn yɩ na abam. Maŋɩ-na da á səgi da yatɔ, sɩ ba na joori yo seeni, sɩ á laan viiri.»
17 Nɔɔna bam ma ta ba wɩ: «Dɩ́ wʋ́ nii sɩ kampwələ kalʋ n na pɛ dɩbam pooli tɩn sɩɩnɩ ka tʋŋɩ. 18 Dɩ́ nan na tu sɩ dɩ́ jeeri tɩʋ kʋm dɩ najara, sɩ nmʋ yagɩ ŋʋn-sɩŋa kantʋ sɩ ka taa lǝgi n takoro kʋm ni nɩ. Nmʋ ma n wʋ́ ja n ko, dɩ n nu, dɩ n nabwa, dɩ n cʋrrʋ tɩm maama n ba yo seeni sɩ ba taa wʋ nmʋ sɔŋɔ kʋm wʋnɩ. 19 Nmʋ yɩra nɔɔna bam wʋlʋ na nuŋi nmʋ sɔŋɔ kʋm wʋnɩ o kaagɩ tɩʋ kʋm nɩ o beerǝ yɩ o tɩ, kʋ bá taa yɩ dɩbam yigə. Kʋ daarɩ dɩ́ goni ni nɩ wʋlʋ maama na wʋ nmʋ sɔŋɔ wʋnɩ, yɩ o na tɩga, sɩ lɛɛrʋ taa tɔgɩ dɩbam. 20 Nan ta lwarɩ nɩ: n na pɛ dɩ́ bʋbʋŋɩ dɩntʋ nuŋi pooni, kampwələ kantʋ dɩ́ na pooli dɩ nmʋ tɩn daa bá ja dɩbam.»
21 Kaanɩ wʋm ma sɛ yɩ o lǝri-ba o wɩ: «Dɩ́ nan jǝni abam ni dɩm kwaga nɩ.» O ma banɩ-ba o yagɩ cwǝŋǝ nɩ, yɩ o daarɩ o lə ŋʋn-sɩŋa kam takoro kʋm ni nɩ o yagɩ da.
22 Baara bam ma duri ba vu ba səgi pweeru laŋa kam seeni. Pɛ wʋm nɔɔna bam ma zəli-ba ba ga. Ba maa na nii cwe sɩm maama yɩ ba ga ba ŋwa tɩn, mʋ ba joori Zeriko tɩʋ kʋm wʋnɩ. 23 Nɔɔna bale bam ma zɩgɩ pweeru tɩm seeni ba tu tɩga. Ba laan ma bɛ Zʋrdɛn bugə kam, yɩ ba joori ba vu Zozwe te. Ba ma ta kʋlʋ maama na kɩ tɩn ba brɩ-o. 24 Ba ma ta ba wɩ: «Cɩga tɩn, Baŋa-Wɛ maŋɩ DƖ kwe tɩga kam mʋ DƖ pa dɩbam. Je sɩm kʋntʋ nɔɔna bam maama tiini ba fʋm mʋ dɩbam ŋwaanɩ, yɩ ba yɩra saɩ vagɩ vagɩ.»c