Ba na bɛ Zʋrdɛn bugə kam te tɩn
3
Ba dɛɛn ma maŋɩ daanɩ ba pəni yɩ tɩga pʋʋrɩ. Zozwe dɩdaanɩ Yisɩrayɛlɩ tiinə bam maama ma goni tɩga ba zaŋɩ Sitim nɩ ba vu ba yi Zʋrdɛn bugə kam. Ba ma te ba vwə yɩ ba laan cəgi maŋa kalʋ ba na wʋ́ bɛ bugə kam tɩn. 2 Ba dɛɛn na kɩ da yatɔ je sɩm kʋntʋ nɩ tɩn, mʋ Yisɩrayɛlɩ dɩdɛɛra bam tʋlɩ nɔɔna bam pwəgə je nɩ, 3 yɩ ba tɛ ba wɩ: «Abam na yɔɔrɩ á na nɩ: Levi dwi dɩm na yɩ kaanɩm tiinə tɩn zɩŋɩ Wɛ ni-gonim daka kam, sɩ á nuŋi á pwəgə je sɩm á pɛ ba kwaga á pu. 4 Abam ta na wʋ tɔgɩ cwǝŋǝ kantʋ tɩn, Wɛ ni-gonim daka kam mʋ wʋ́ brɩ abam cwǝŋǝ. Nan taá ye á tɩtɩ sɩ á yɩ tiini á yi ka yɩra. Taá yɩ dáa dáa sɩ kʋ maŋɩ dɩ mɛtra mʋrʋ laŋa.»5 Zozwe laan ma ta dɩ nɔɔna bam o wɩ: «Kwɛ-na á tɩtɩ, sɩ kʋ maŋɩ dɩ Wɛ na lagɩ te tɩn, bɛŋwaanɩ Baŋa-Wɛ jwa lagɩ DƖ kɩ wo-kɩnkagɩla mʋ á tɩtarɩ nɩ.»
6 Zozwe ta ma ta dɩ kaanɩm tiinə bam o wɩ: «Kwe-na ni-gonim daka kam á zɩŋɩ, sɩ á tɔgɩ dɩ́ maama yigə sɩ dɩ́ bɛ Zʋrdɛn bugə kam.» Ba dɩ ma kwe-ka ba tʋ nɔɔna bam yigə nɩ.
7 Dɩntʋ dɛ dɩm nɩ mʋ Baŋa-Wɛ tagɩ dɩ Zozwe DƖ wɩ: «Kʋ zɩgɩ zɩm sɩ kʋ taa veǝ, a lagɩ a pa nmʋ ji nɔn-yuu mʋ Yisɩrayɛlɩ tiinə maama wʋnɩ. Lele kʋntʋ mʋ ba lagɩ ba lwarɩ nɩ: amʋ wʋ nmʋ dɩ tee nɩ, nɩnɛɛnɩ a dɛɛn na wʋra dɩ Moyisi te tɩn. 8 Nan ta dɩ kaanɩm tiinə balʋ na zɩŋɩ amʋ ni-gonim daka kam tɩn sɩ ba na yi bugə kam ni dɩm sɩ ba zʋ na bam wʋnɩ. Ba laan maa wʋ́ vu fɩɩn ba maŋɩ da ba zɩgɩ.»
9 Zozwe dɩ ma ta dɩdaanɩ nɔɔna bam maama o wɩ: «Ba-na yo seeni sɩ á cəgi abam Tu Baŋa-Wɛ dɩm na jɩgɩ kʋlʋ sɩ DƖ ta dɩ abam tɩn. 10 Abam zɩm wʋ́ lwarɩ nɩ: Wɛ dɩlʋ na jɩgɩ ŋwɩa tɩn wʋra dɩ abam. Dɩntʋ mʋ lagɩ o zəli Kaanan tiinə bam, dɩ Hɛtɩ tiinə bam, dɩ Hevi tiinə bam, dɩ Perezi tiinə bam, dɩ Girgasɩ tiinə bam, dɩ Amɔɔrɩ tiinə bam, dɩdaanɩ Yebusi tiinə bam maama sɩ ba nuŋi ba daarɩ tɩga kam ba pa abam. 11 Nii-na mʋ! Baŋa-Wɛ mʋ te lʋgʋ baŋa maama, yɩ Dɩntʋ ni-gonim daka kam lagɩ ka da abam yigə ka bɛ Zʋrdɛn bugə kam. 12 Abam nan maŋɩ sɩ á nii Yisɩrayɛlɩ dwiə fugə-yale yam wʋnɩ mʋ á lɩ nɔɔnʋ dɩdʋa dɩdʋa dwi maama wʋnɩ. 13 Daka kantʋ yɩ Baŋa-Wɛ dɩlʋ na te lʋgʋ baŋa maama tɩn nyɩm mʋ. Kaanɩm tiinə balʋ na zɩŋɩ-ka tɩn maa na nɔnɩ ba nɛ Zʋrdɛn bugə kam wʋnɩ, na balʋ na duri ba tui tɩn wʋ́ kɔ, yɩ ba tigisi daanɩ nɩnɛɛnɩ kəbrə doŋ.»
14 Yisɩrayɛlɩ tiinə bam ma zaŋɩ ba gɔ ba vwə yam, yɩ ba laan ve ba maa kɛa sɩ ba bɛ bugə kam. Kaanɩm tiinə bam dɩ ma zɩŋɩ ni-gonim daka kam ba tɔgɩ ba yigə. 15 Bɩnɩ maama wʋnɩ, kʋ na yǝni kʋ yi wʋdiiru zagɩm maŋa, Zʋrdɛn bugə kam yǝni ka su mʋ ka pɛɛlɩ ka niə yam maama nɩ. Dɩ kʋntʋ maama dɩ, kaanɩm tiinə balʋ na zɩŋɩ ni-gonim daka kam tɩn na yɔɔrɩ ba nɔnɩ ba nɛ bugə kam wʋnɩ tɩn, 16 mʋ bu-tʋla kam na tʋlɩ ba maa tu tɩn kʋga. Kʋ na yɔɔrɩ kʋ maŋɩ dɩ tɩʋ kʋlʋ yɩrɩ na yɩ Adam tɩn, mʋ na bam puli sɩ ba tigisi daanɩ nɩnɛɛnɩ kəbrə doŋ tɩn. Tɩʋ kʋm kʋntʋ dɛɛn yɩ yigə yigə mʋ yɩ kʋ bwələ dɩdaanɩ Zaretan. Na dɛɛn daa ba duri sɩ ba zʋ Araba nɩnɩʋ kʋm wʋnɩ. (Yɛ nɩnɩʋ kʋm mʋ kʋntʋ.)a Bugə na bam ma wɩ pa nɔɔna bam na pwələ ba bɛ Zʋrdɛn bugə kam. Je sɩm dɛɛn nan bwələ dɩdaanɩ Zeriko mʋ.b 17 Kaanɩm tiinə bam na zɩŋɩ daka kam tɩn dɩ yɔɔrɩ ba zɩgɩ bugə kam tɩtarɩ nɩ mʋ. Ba maa zɩgɩ tɩ-kʋra baŋa nɩ taa, sɩ kʋ taa nii maŋa kalʋ Yisɩrayɛlɩ kɔgɔ kʋm maama na bɛ ba ti tɩn.c