Nɔɔna bam tigisi gulə kandwa
4
Yisɩrayɛlɩ nɔn-kɔgɔ kʋm maama na bɛ Zʋrdɛn bugə kam ba ti tɩn mʋ Baŋa-Wɛ tagɩ dɩ Zozwe DƖ wɩ: 2 «Ta dɩ Yisɩrayɛlɩ dwiə fugə-yale yam sɩ dwi maama lɩ nɔɔnʋ dɩdʋa. 3 Bantʋ wʋ́ vu mɛ kaanɩm tiinə bam na zɩgɩ bugə kam tɩtarɩ nɩ tɩn, ba kwe kandwa-kamunə fugə-yale. Ba laan maa wʋ́ ja-ya ba nuŋi ba vu ba tigisi je sɩlʋ abam na wʋ́ cwi á vwə zɩm tɩtɩɩ nɩ tɩn.»4 Zozwe ma sɩɩnɩ o kuri nɔɔna fugǝ-bale pa ba dɩdʋa maama nuŋi Yisɩrayɛlɩ dwi maama wʋnɩ, yɩ o bǝŋi-ba o kɩ daanɩ. 5 O ma daarɩ o ta dɩ ba o wɩ: «Zʋ-na bugə kam tɩtarɩ sɩ á gaalɩ je sɩlʋ ba na zɩŋɩ Baŋa-Wɛ ni-gonim daka kam ba zɩgɩ tɩn. Abam dɩdʋa dɩdʋa maa wʋ́ kwe kandwɛ-kamunu o dwi dɩm ŋwaanɩ, o daŋɩ o bakalɩ baŋa nɩ o ja o ba mɛ dɩ́ na wʋ́ pəni zɩm tɩn. 6 Kandwa yam kʋntʋ lagɩ ya taa yɩ gulə mʋ ya paɩ abam. Abam biə jwa na bwe abam ba wɩ: ‹Kandwa yantʋ na kikili yo seeni tɩn kuri mʋ bɛ?›, 7 sɩ á ta dɩ ba wɩ: ‹Ya guli dɩbam maŋa kalʋ Wɛ ni-gonim daka kam na wʋra ka bɛ Zʋrdɛn bugə kam, yɩ bugə kam na kɔ tɩn mʋ. Ya yɩ gulə mʋ ya paɩ Yisɩrayɛlɩ kɔgɔ kʋm sɩ kʋ taa ve maŋa maama.› »
8 Nɔɔna bam ma sɛ ba kɩ Baŋa-Wɛ na brɩ Zozwe sɩ ba kɩ te maama tɩn. Ba fugǝ-bale bam dɩdʋa maama ma kwe kandwɛ dɩdwɩ sɩ kʋ maŋɩ dɩ ba dwiə yam ni na maɩ te tɩn. Ba ma ja kandwa yam ba vu je sɩlʋ nɔɔna bam na lagɩ ba pəni tɩtɩɩ dɩm kʋntʋ nɩ tɩn, yɩ ba tigisi-ya da. 9 Zozwe ma pa nɔɔna badonnǝ maŋɩ Zʋrdɛn bugə kam tɩtarɩ nɩ ba kikili kandwa fugə-yale. Ba tigisi-ya mɛ seeni kaanɩm tiinə bam na zɩŋɩ ni-gonim daka kam ba zɩgɩ tɩn mʋ. Kandwa yam kʋntʋ ta wʋra dɩ zɩm maama.
10 Kaanɩm tiinə bam dɛɛn maŋɩ bugə kam tɩtarɩ nɩ mʋ ba zɩŋɩ Wɛ ni-gonim daka kam taan, yɩ Yisɩrayɛlɩ kɔgɔ kʋm dɩ kɩ kʋlʋ maama Baŋa-Wɛ na brɩ Zozwe sɩ ba kɩ tɩn. Moyisi dɩ ya maŋɩ o pa Zozwe ni dɩm kʋntʋ mʋ.
Nɔɔna bam ma kɩ lɩla ba bɛ kakam daa kam nɩ. 11 Ba maama na bɛ ba ti tɩn, kaanɩm tiinə bam ma zɩŋɩ Wɛ ni-gonim daka kam ba bɛ bubɛ dɩdoŋ dɩm nɩ, yɩ nɔɔna bam maama zɩgɩ ba niə. 12-13 Jar-kərə balʋ dɛɛn na bɛ tɩn yi mʋrrʋ fiinna (40,000). Ba yɩ nɔɔna balʋ na ti yigə sɩ ba kɩ najara tɩn mʋ. Kʋ nan yɩ Ruban dwi dɩm, dɩ Gadɩ dwi dɩm dɩdaanɩ Manasɩ dwi cicoro kʋm jar-kərə bam dɛɛn mʋ tʋ Yisɩrayɛlɩ kɔgɔ kʋm maama yigə nɩ, nɩnɛɛnɩ Moyisi ya na brɩ-ba sɩ ba kɩ te tɩn. Ba maama dɛɛn ma bɛ ba vu ba yi tɩ-kamparɩ je sɩlʋ na bwələ dɩ Zeriko tɩn, yɩ Baŋa-Wɛ wʋ ba tee nɩ.a
14 Kikiə yam kʋntʋ Baŋa-Wɛ na kɩ dɩntʋ dɛ dɩm nɩ tɩn pɛ Zozwe na yɩrɩ kamunu Yisɩrayɛlɩ kɔgɔ kʋm wʋnɩ. Ba ma yɔɔrɩ ba nɩg-o taan sɩ kʋ yi o ŋwɩa tiim maŋa, nɩnɛɛnɩ ba dɛɛn na nɩgɩ Moyisi te tɩn.
15 Baŋa-Wɛ daa ma ta dɩdaanɩ Zozwe DƖ wɩ: 16 «Pa kaanɩm tiinə bam na zɩŋɩ Wɛ ni-gonim daka kam tɩn ni sɩ ba bɛ bugə kam.» 17 Zozwe ma sɩɩnɩ o kɩ kʋntʋ. 18 Kaanɩm tiinə bam na yɔɔrɩ ba zɩŋɩ Wɛ ni-gonim daka kam ba bɛ Zʋrdɛn bugə kam tɩn, mʋ ka na bam daa duri ba su ba pɛɛlɩ bugə kam ni maama.
19 Bɩn-dʋʋrɩ cana kam da fugə dɛ dɩm nɩ mʋ Yisɩrayɛlɩ tiinə bam dɛɛn bɛ Zʋrdɛn bugə kam. Ba ma yi Giligalɩ yɩ ba cwi ba vwə da. Tɩʋ kʋm kʋntʋ wʋ Zeriko tɩʋ wa-puli seeni mʋ. 20 Kʋ nan ya yɩ Giligalɩ nɩ mʋ Zozwe pɛ ba tigisi gulə kandwa fugə-yale yam ba na jaanɩ ba nuŋi Zʋrdɛn bugə kam nɩ tɩn. 21 Zozwe ma ta dɩ nɔɔna bam o wɩ: «Maŋa bɩɩna sɩ á biə bwe abam wɩ: ‹Kandwa yantʋ tigisi yo seeni bɛŋwaanɩ mʋ?› 22 Abam maa wʋ́ ta á brɩ-ba nɩ: ‹Dɩ́ na yi yo seeni tɩn mʋ Baŋa-Wɛ pɛ Yisɩrayɛlɩ tiinə bam nɔnɩ tɩ-kʋra baŋa nɩ ba bɛ Zʋrdɛn bugə kam.› 23 Abam ta maa wʋ́ pa ba lwarɩ nɩ: dɩ́ Tu Baŋa-Wɛ pɛ bugə kam wɩ á yibiyə nɩ nɩnɛɛnɩ o dɛɛn na kɩ te Nanɩ-sʋŋʋ kʋm ni nɩ yɩ dɩ́ nɔɔna bam maama bɛ tɩn. 24 DƖ nan kɩ kʋntʋ mʋ sɩ lʋgʋ baŋa tɩɩnɩ dɩm maama lwarɩ nɩ: Baŋa-Wɛ yɩ Wɛ-kamunu yɩ DƖ jɩgɩ dam. Kʋntʋ maa wʋ́ pa abam taá zuli‑DƖ sɩ kʋ taa ve maŋa maama.»