Yisɩrayɛlɩ tiinə pən-gwəŋə kam
5
Amɔɔrɩ tiinə pwa bam dɛɛn wʋ Zʋrdɛn bugə kam wa-zʋʋrɩ seeni mʋ, yɩ Kaanan tiinə pwa bam dɩ zʋʋrɩ Mediterane nɩnɩʋ kʋm niə yam nɩ. Bantʋ maama ma ni nɩ Baŋa-Wɛ pɛ Zʋrdɛn bugə kam wɩ mʋ pa Yisɩrayɛlɩ tiinə bam bɛ. Ba na ni kʋntʋ tɩn, ba vwana maama ma parɩ, yɩ ba wʋʋ cɔgɩ. Ba daa ba lagɩ sɩ ba jeeri Yisɩrayɛlɩ tiinə bam dɩ najara.2 Kantʋ maŋa nɩ mʋ Baŋa-Wɛ tagɩ dɩ Zozwe o wɩ: «Kɩ fanɩ sɩ n ma n goni Yisɩrayɛlɩ tiinə balʋ na daarɩ tɩn pənə.»a 3 Zozwe ma sɩɩnɩ o kɩ fanɩ yɩ o goni nɔɔna bam pənə pu-kunə kadoŋ yuu nɩ, kʋ yɩrɩ mʋ Aralɔtɩ.
4 Kʋ dɛɛn yɩ fɩfɩʋn mʋ sɩ Zozwe goni nɔɔna bam pənə, bɛŋwaanɩ baara balʋ na bɩgɩ ba yi najara kǝm yɩ ba dɩ da ba nuŋi Ezipi tɩʋ kʋm nɩ tɩn maama tɩgɩ kagʋa kam yuu nɩ mʋ. 5 Balʋ maama nan na tɔgɩ ba nuŋi Ezipi nɩ tɩn mʋ goni ba pənə, sɩ kʋ na yɩ balʋ maama ba na lʋgɩ kagʋa yuu nɩ, maŋa kalʋ ba na beeri ka wʋnɩ tɩn, bantʋ pənə wʋ goni. 6 Yisɩrayɛlɩ tiinə bam nan ya kaagɩ kagʋa kam yuu nɩ mʋ ba beerǝ bɩna fiinna. Ba dɛɛn kɩ kʋntʋ mʋ sɩ kʋ taa nii maŋa kalʋ nɔn-kwɩɩrʋ tɩlʋ na dɛ ba zɩgɩ Ezipi nɩ ba nuŋi yɩ ba yi najara kǝm tɩn maama na tɩgɩ ba ti tɩn. Bantʋ dɛɛn vɩn Baŋa-Wɛ ni mʋ pa o du durə wɩ: ba bá da ba zʋ tɩga kalʋ o na goni ni sɩ o pa dɩbam, yɩ ka tiini ka ywəmmə dɩ varɩm dɩ kɔnɔ tɩn.
7 Zozwe goni nɔɔna bam kʋntʋ biə pənə mʋ. Bantʋ mʋ ləri ba kwə yuu nɩ. Ba pənə nan ya ta wʋ goni, ba na lʋgɩ-ba kagʋa kam yuu cwə-vəli dɩm baŋa nɩ tɩn ŋwaanɩ. 8 Nɔɔna bam na goni ba pənə yam kʋntʋ tɩn, Yisɩrayɛlɩ kɔgɔ kʋm ma maŋɩ dáanɩ pa ba ŋwana yam je.
9 Baŋa-Wɛ laan ma ta dɩ Zozwe o wɩ: «Amʋ zɩm lɩ Ezipi tɩʋ cavɩɩra yalʋ maama ya na wʋ abam baŋa nɩ tɩn a yagɩ dáa nɩ.» Yisɩrayɛlɩ tiinə bam ma bəŋi je sɩm kʋntʋ yɩrɩ wɩ Giligalɩb. Dɩdaanɩ zɩm maama, ba ta bǝi yɩrɩ dɩm kʋntʋ mʋ.
10 Yisɩrayɛlɩ tiinə bam dɛɛn ma cwi ba vwə yam Giligalɩ na wʋ Zeriko tɩ-kamparɩ laŋa kam nɩ tɩn. Ba na wʋra tɩn, ba maama ma di Pakɩ candiə kam. Ba di-ka pulim cana kam da fugə-yana dɛ dɩm nɩ mʋ sɩ kʋ maŋɩ dɩ cana kalʋ ba na nuŋi Ezipi nɩ tɩn. 11 Ba na di Pakɩ candiə kam ba ti yɩ tɩga pʋʋrɩ tɩn, mʋ ba sɩŋɩ sɩ ba di tɩga kam wʋdiiru. Ba dɛɛn di dɩpɛ dɩlʋ na ba jɩgɩ dabɩlɩ kʋ wʋnɩ tɩn, dɩ mɩna yalʋ ba na wɔgɩ tɩn mʋ. 12 Dɩntʋ dɛ dɩm nɩ, ba na di tɩga kam baŋa wʋdiu tɩn, mʋ Baŋa-Wɛ cɩgɩ sɩ Maanɩ yam daa yɩ zɩgɩ wɛɛnɩ ya tʋ sɩ Yisɩrayɛlɩ tiinə bam pɛ.c Kʋ na zɩgɩ kantʋ maŋa nɩ tɩn, Yisɩrayɛlɩ tiinə bam laan lɛɛrɩ ba di Kaanan tɩga kam wʋdiiru mʋ.
Yisɩrayɛlɩ tiinə bam di Zeriko
13 Dɛ dɩdwɩ Zozwe na twɛ Zeriko tɩn, mʋ o tʋlɩ o na nɔɔnʋ na zɩgɩ o yigə nɩ. Kʋ tu ze sʋ-lɔŋɔ mʋ o jɩŋa nɩ. Zozwe ma fʋfɔ o yi nɔɔnʋ wʋm te yɩ o bwe‑o o wɩ: «Nmʋ tɔgɩ n wǝli dɩbam kɔgɔ kʋm wʋnɩ mʋ naa n wǝli dɩ́ dʋna bam wʋnɩ mʋ?»
14 Nɔɔnʋ wʋm ma lǝr-o o wɩ: «Amʋ ba tɔgɩ á wʋlʋwʋlʋ! Cɩga ŋwaanɩ tɩn, amʋ mʋ yɩ Baŋa-Wɛ jar-kərə bam yigə tu. Kʋntʋ ŋwaanɩ mʋ a nan tu yo seeni.»d
Zozwe na ni kʋntʋ tɩn, mʋ o tʋ o vin o yibiyə tɩga nɩ yɩ o jɔɔn‑o. Zozwe ta ma ta dɩd-o o wɩ: «Amʋ tu, a yɩ nmʋ tɩntʋŋnʋ mʋ. Ta n brɩ-nɩ kʋlʋ a na maŋɩ sɩ a kɩ tɩn.»
15 Baŋa-Wɛ jar-kərə yigə tu wʋm laan ma ta dɩd-o o wɩ: «Lɩ n natra yam, sɩ nmʋ na zɩgɩ mɛ tɩn yɩ lanyɩranɩ fasɩ mʋ.» O ma sɩɩnɩ o kɩ kʋntʋ.